| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
২৩৭. চতুৰগ্গকরণাদিকথা
237. Catuvaggakaraṇādikathā
৩৮৮. যদিদং কম্মন্তি যোজনা। তেসন্তি সঙ্ঘানং। কম্মপ্পত্তোতি এত্থ কম্মেন, কম্মস্স ৰা পত্তোতি অত্থং পটিক্খিপন্তো আহ ‘‘কম্মং পত্তো’’তি। ‘‘সব্বকম্মেসু কম্মপত্তো’’তি পাল়িনযেন ‘‘কম্মেসু পত্তো’’তি অত্থোপি যুজ্জতি। লোকৰোহারৰসেন ‘‘কম্মেন কম্মস্স ৰা পত্তো’’তি অত্থোপি যুজ্জতেৰ।
388. Yadidaṃ kammanti yojanā. Tesanti saṅghānaṃ. Kammappattoti ettha kammena, kammassa vā pattoti atthaṃ paṭikkhipanto āha ‘‘kammaṃ patto’’ti. ‘‘Sabbakammesu kammapatto’’ti pāḷinayena ‘‘kammesu patto’’ti atthopi yujjati. Lokavohāravasena ‘‘kammena kammassa vā patto’’ti atthopi yujjateva.
৩৮৯. পরিসতোতি পরিসকারণা। তত্থাতি ‘‘চতুৰগ্গকরণঞ্চে ভিক্খৰে’’তিআদিপাঠে, চতুৰীসতিপুগ্গলেসু ৰা। কম্মনানাসংৰাসকোতি উক্খেপনীযকম্মকতো। লদ্ধিনানাসংৰাসকোতি উক্খিত্তানুৰত্তকো। ‘‘হুত্ৰা’’তি ইমিনা ‘‘ভিক্খুনীচতুত্থো’’তিআদীসু চতুৰীসতিযা ঠানেসু কিরিযাৰিসেসনভাৰং দস্সেতি। ভিক্খুনী চতুত্থী এতস্সাতি ভিক্খুনীচতুত্থো, চতুৰগ্গো সঙ্ঘোতিআদিনা ৰচনত্থো কাতব্বো।
389.Parisatoti parisakāraṇā. Tatthāti ‘‘catuvaggakaraṇañce bhikkhave’’tiādipāṭhe, catuvīsatipuggalesu vā. Kammanānāsaṃvāsakoti ukkhepanīyakammakato. Laddhinānāsaṃvāsakoti ukkhittānuvattako. ‘‘Hutvā’’ti iminā ‘‘bhikkhunīcatuttho’’tiādīsu catuvīsatiyā ṭhānesu kiriyāvisesanabhāvaṃ dasseti. Bhikkhunī catutthī etassāti bhikkhunīcatuttho, catuvaggo saṅghotiādinā vacanattho kātabbo.
৩৯৩. পরিৰাসাদীতিআদিসদ্দেন মূলাযকস্সনমানত্তঅব্ভানানি সঙ্গণ্হাতি। তেসন্তি পরিৰাসাদিকম্মানং। পরতোতি পরস্মিং চূল়ৰগ্গে (চূল়ৰ॰ অট্ঠ॰ ৭৫ আদযো)।
393.Parivāsādītiādisaddena mūlāyakassanamānattaabbhānāni saṅgaṇhāti. Tesanti parivāsādikammānaṃ. Paratoti parasmiṃ cūḷavagge (cūḷava. aṭṭha. 75 ādayo).
৩৯৪. পটিকুট্ঠকতকম্মস্সাতি পটিকুট্ঠস্স হুত্ৰা কতস্স কম্মস্স। পকতত্তস্সাতি এত্থ পকতিসীলসঙ্খাতো অত্তা সভাৰো এতস্সাতি পকতত্তোতি অত্থং দস্সেন্তো আহ ‘‘অৰিপন্নসীলস্সা’’তি। সঙ্ঘাদিসেসং অনাপজ্জন্তস্সাপি অৰিপন্নসীলত্তা ৰুত্তং ‘‘পারাজিকং অনজ্ঝাপন্নস্সা’’তি। ইমিনা সঙ্ঘাদিসেসং আপজ্জন্তোপি পকতত্তোযেৰাতি দস্সেতি। সোপি হি ইধ অৰিপন্নসীলো নাম, অঞ্ঞত্থ পন সঙ্ঘাদিসেসস্স সীলৰিপত্তিভাৰতো তং আপজ্জন্তোপি ৰিপন্নসীলোযেৰ নাম। আনন্তরিকস্সাতি এত্থ অনন্তরসদ্দস্স সম্বন্ধঞ্চ ণিকপচ্চযস্স অত্থঞ্চ দস্সেন্তো আহ ‘‘অত্তনো অনন্তরং নিসিন্নস্সা’’তি। তত্থ ‘‘অত্তনো’’তি ইমিনা অনন্তরসদ্দস্স সম্বন্ধং দস্সেতি। ‘‘নিসিন্নস্সা’’তি ইমিনা ণিকপচ্চযস্স অত্থং দস্সেতি।
394.Paṭikuṭṭhakatakammassāti paṭikuṭṭhassa hutvā katassa kammassa. Pakatattassāti ettha pakatisīlasaṅkhāto attā sabhāvo etassāti pakatattoti atthaṃ dassento āha ‘‘avipannasīlassā’’ti. Saṅghādisesaṃ anāpajjantassāpi avipannasīlattā vuttaṃ ‘‘pārājikaṃ anajjhāpannassā’’ti. Iminā saṅghādisesaṃ āpajjantopi pakatattoyevāti dasseti. Sopi hi idha avipannasīlo nāma, aññattha pana saṅghādisesassa sīlavipattibhāvato taṃ āpajjantopi vipannasīloyeva nāma. Ānantarikassāti ettha anantarasaddassa sambandhañca ṇikapaccayassa atthañca dassento āha ‘‘attano anantaraṃ nisinnassā’’ti. Tattha ‘‘attano’’ti iminā anantarasaddassa sambandhaṃ dasseti. ‘‘Nisinnassā’’ti iminā ṇikapaccayassa atthaṃ dasseti.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi
২৩৭. চতুৰগ্গকরণাদিকথা • 237. Catuvaggakaraṇādikathā
২৩৮. পারিৰাসিকাদিকথা • 238. Pārivāsikādikathā
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / চতুৰগ্গকরণাদিকথা • Catuvaggakaraṇādikathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / চতুৰগ্গকরণাদিকথাৰণ্ণনা • Catuvaggakaraṇādikathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / কস্সপগোত্তভিক্খুৰত্থুকথাদিৰণ্ণনা • Kassapagottabhikkhuvatthukathādivaṇṇanā
