| Library / Tipiṭaka / ติปิฎก • Tipiṭaka / ปาจิตฺยาทิโยชนาปาฬิ • Pācityādiyojanāpāḷi |
๒๓๗. จตุวคฺคกรณาทิกถา
237. Catuvaggakaraṇādikathā
๓๘๘. ยทิทํ กมฺมนฺติ โยชนาฯ เตสนฺติ สงฺฆานํฯ กมฺมปฺปโตฺตติ เอตฺถ กเมฺมน, กมฺมสฺส วา ปโตฺตติ อตฺถํ ปฎิกฺขิปโนฺต อาห ‘‘กมฺมํ ปโตฺต’’ติฯ ‘‘สพฺพกเมฺมสุ กมฺมปโตฺต’’ติ ปาฬินเยน ‘‘กเมฺมสุ ปโตฺต’’ติ อโตฺถปิ ยุชฺชติฯ โลกโวหารวเสน ‘‘กเมฺมน กมฺมสฺส วา ปโตฺต’’ติ อโตฺถปิ ยุชฺชเตวฯ
388. Yadidaṃ kammanti yojanā. Tesanti saṅghānaṃ. Kammappattoti ettha kammena, kammassa vā pattoti atthaṃ paṭikkhipanto āha ‘‘kammaṃ patto’’ti. ‘‘Sabbakammesu kammapatto’’ti pāḷinayena ‘‘kammesu patto’’ti atthopi yujjati. Lokavohāravasena ‘‘kammena kammassa vā patto’’ti atthopi yujjateva.
๓๘๙. ปริสโตติ ปริสการณาฯ ตตฺถาติ ‘‘จตุวคฺคกรณเญฺจ ภิกฺขเว’’ติอาทิปาเฐ, จตุวีสติปุคฺคเลสุ วาฯ กมฺมนานาสํวาสโกติ อุเกฺขปนียกมฺมกโตฯ ลทฺธินานาสํวาสโกติ อุกฺขิตฺตานุวตฺตโกฯ ‘‘หุตฺวา’’ติ อิมินา ‘‘ภิกฺขุนีจตุโตฺถ’’ติอาทีสุ จตุวีสติยา ฐาเนสุ กิริยาวิเสสนภาวํ ทเสฺสติฯ ภิกฺขุนี จตุตฺถี เอตสฺสาติ ภิกฺขุนีจตุโตฺถ, จตุวโคฺค สโงฺฆติอาทินา วจนโตฺถ กาตโพฺพฯ
389.Parisatoti parisakāraṇā. Tatthāti ‘‘catuvaggakaraṇañce bhikkhave’’tiādipāṭhe, catuvīsatipuggalesu vā. Kammanānāsaṃvāsakoti ukkhepanīyakammakato. Laddhinānāsaṃvāsakoti ukkhittānuvattako. ‘‘Hutvā’’ti iminā ‘‘bhikkhunīcatuttho’’tiādīsu catuvīsatiyā ṭhānesu kiriyāvisesanabhāvaṃ dasseti. Bhikkhunī catutthī etassāti bhikkhunīcatuttho, catuvaggo saṅghotiādinā vacanattho kātabbo.
๓๙๓. ปริวาสาทีติอาทิสเทฺทน มูลายกสฺสนมานตฺตอพฺภานานิ สงฺคณฺหาติฯ เตสนฺติ ปริวาสาทิกมฺมานํฯ ปรโตติ ปรสฺมิํ จูฬวเคฺค (จูฬว. อฎฺฐ. ๗๕ อาทโย)ฯ
393.Parivāsādītiādisaddena mūlāyakassanamānattaabbhānāni saṅgaṇhāti. Tesanti parivāsādikammānaṃ. Paratoti parasmiṃ cūḷavagge (cūḷava. aṭṭha. 75 ādayo).
๓๙๔. ปฎิกุฎฺฐกตกมฺมสฺสาติ ปฎิกุฎฺฐสฺส หุตฺวา กตสฺส กมฺมสฺสฯ ปกตตฺตสฺสาติ เอตฺถ ปกติสีลสงฺขาโต อตฺตา สภาโว เอตสฺสาติ ปกตโตฺตติ อตฺถํ ทเสฺสโนฺต อาห ‘‘อวิปนฺนสีลสฺสา’’ติฯ สงฺฆาทิเสสํ อนาปชฺชนฺตสฺสาปิ อวิปนฺนสีลตฺตา วุตฺตํ ‘‘ปาราชิกํ อนชฺฌาปนฺนสฺสา’’ติฯ อิมินา สงฺฆาทิเสสํ อาปชฺชโนฺตปิ ปกตโตฺตเยวาติ ทเสฺสติฯ โสปิ หิ อิธ อวิปนฺนสีโล นาม, อญฺญตฺถ ปน สงฺฆาทิเสสสฺส สีลวิปตฺติภาวโต ตํ อาปชฺชโนฺตปิ วิปนฺนสีโลเยว นามฯ อานนฺตริกสฺสาติ เอตฺถ อนนฺตรสทฺทสฺส สมฺพนฺธญฺจ ณิกปจฺจยสฺส อตฺถญฺจ ทเสฺสโนฺต อาห ‘‘อตฺตโน อนนฺตรํ นิสินฺนสฺสา’’ติฯ ตตฺถ ‘‘อตฺตโน’’ติ อิมินา อนนฺตรสทฺทสฺส สมฺพนฺธํ ทเสฺสติฯ ‘‘นิสินฺนสฺสา’’ติ อิมินา ณิกปจฺจยสฺส อตฺถํ ทเสฺสติฯ
394.Paṭikuṭṭhakatakammassāti paṭikuṭṭhassa hutvā katassa kammassa. Pakatattassāti ettha pakatisīlasaṅkhāto attā sabhāvo etassāti pakatattoti atthaṃ dassento āha ‘‘avipannasīlassā’’ti. Saṅghādisesaṃ anāpajjantassāpi avipannasīlattā vuttaṃ ‘‘pārājikaṃ anajjhāpannassā’’ti. Iminā saṅghādisesaṃ āpajjantopi pakatattoyevāti dasseti. Sopi hi idha avipannasīlo nāma, aññattha pana saṅghādisesassa sīlavipattibhāvato taṃ āpajjantopi vipannasīloyeva nāma. Ānantarikassāti ettha anantarasaddassa sambandhañca ṇikapaccayassa atthañca dassento āha ‘‘attano anantaraṃ nisinnassā’’ti. Tattha ‘‘attano’’ti iminā anantarasaddassa sambandhaṃ dasseti. ‘‘Nisinnassā’’ti iminā ṇikapaccayassa atthaṃ dasseti.
Related texts:
ติปิฎก (มูล) • Tipiṭaka (Mūla) / วินยปิฎก • Vinayapiṭaka / มหาวคฺคปาฬิ • Mahāvaggapāḷi
๒๓๗. จตุวคฺคกรณาทิกถา • 237. Catuvaggakaraṇādikathā
๒๓๘. ปาริวาสิกาทิกถา • 238. Pārivāsikādikathā
อฎฺฐกถา • Aṭṭhakathā / วินยปิฎก (อฎฺฐกถา) • Vinayapiṭaka (aṭṭhakathā) / มหาวคฺค-อฎฺฐกถา • Mahāvagga-aṭṭhakathā / จตุวคฺคกรณาทิกถา • Catuvaggakaraṇādikathā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / สารตฺถทีปนี-ฎีกา • Sāratthadīpanī-ṭīkā / จตุวคฺคกรณาทิกถาวณฺณนา • Catuvaggakaraṇādikathāvaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วิมติวิโนทนี-ฎีกา • Vimativinodanī-ṭīkā / กสฺสปโคตฺตภิกฺขุวตฺถุกถาทิวณฺณนา • Kassapagottabhikkhuvatthukathādivaṇṇanā
