| Library / Tipiṭaka / တိပိဋက • Tipiṭaka / မဟာဝဂ္ဂပာဠိ • Mahāvaggapāḷi |
၂၃၇. စတုဝဂ္ဂကရဏာဒိကထာ
237. Catuvaggakaraṇādikathā
၃၈၈. ပဉ္စ သင္ဃာ – စတုဝဂ္ဂော ဘိက္ခုသင္ဃော ပဉ္စဝဂ္ဂော ဘိက္ခုသင္ဃော, ဒသဝဂ္ဂော ဘိက္ခုသင္ဃော, ဝီသတိဝဂ္ဂော ဘိက္ခုသင္ဃော, အတိရေကဝီသတိဝဂ္ဂော ဘိက္ခုသင္ဃော။ တတ္ရ, ဘိက္ခဝေ, ယ္ဝာယံ စတုဝဂ္ဂော ဘိက္ခုသင္ဃော, ဌပေတ္ဝာ တီဏိ ကမ္မာနိ – ဥပသမ္ပဒံ ပဝာရဏံ အဗ္ဘာနံ, ဓမ္မေန သမဂ္ဂော သဗ္ဗကမ္မေသု ကမ္မပ္ပတ္တော။ တတ္ရ, ဘိက္ခဝေ, ယ္ဝာယံ ပဉ္စဝဂ္ဂော ဘိက္ခုသင္ဃော, ဌပေတ္ဝာ ဒ္ဝေ ကမ္မာနိ – မဇ္ဈိမေသု ဇနပဒေသု ဥပသမ္ပဒံ အဗ္ဘာနံ, ဓမ္မေန သမဂ္ဂော သဗ္ဗကမ္မေသု ကမ္မပ္ပတ္တော။ တတ္ရ, ဘိက္ခဝေ, ယ္ဝာယံ ဒသဝဂ္ဂော ဘိက္ခုသင္ဃော, ဌပေတ္ဝာ ဧကံ ကမ္မံ – အဗ္ဘာနံ, ဓမ္မေန သမဂ္ဂော သဗ္ဗကမ္မေသု ကမ္မပ္ပတ္တော။ တတ္ရ, ဘိက္ခဝေ, ယ္ဝာယံ ဝီသတိဝဂ္ဂော ဘိက္ခုသင္ဃော ဓမ္မေန သမဂ္ဂော သဗ္ဗကမ္မေသု ကမ္မပ္ပတ္တော။ တတ္ရ, ဘိက္ခဝေ, ယ္ဝာယံ အတိရေကဝီသတိဝဂ္ဂော ဘိက္ခုသင္ဃော ဓမ္မေန သမဂ္ဂော သဗ္ဗကမ္မေသု ကမ္မပ္ပတ္တော။
388. Pañca saṅghā – catuvaggo bhikkhusaṅgho pañcavaggo bhikkhusaṅgho, dasavaggo bhikkhusaṅgho, vīsativaggo bhikkhusaṅgho, atirekavīsativaggo bhikkhusaṅgho. Tatra, bhikkhave, yvāyaṃ catuvaggo bhikkhusaṅgho, ṭhapetvā tīṇi kammāni – upasampadaṃ pavāraṇaṃ abbhānaṃ, dhammena samaggo sabbakammesu kammappatto. Tatra, bhikkhave, yvāyaṃ pañcavaggo bhikkhusaṅgho, ṭhapetvā dve kammāni – majjhimesu janapadesu upasampadaṃ abbhānaṃ, dhammena samaggo sabbakammesu kammappatto. Tatra, bhikkhave, yvāyaṃ dasavaggo bhikkhusaṅgho, ṭhapetvā ekaṃ kammaṃ – abbhānaṃ, dhammena samaggo sabbakammesu kammappatto. Tatra, bhikkhave, yvāyaṃ vīsativaggo bhikkhusaṅgho dhammena samaggo sabbakammesu kammappatto. Tatra, bhikkhave, yvāyaṃ atirekavīsativaggo bhikkhusaṅgho dhammena samaggo sabbakammesu kammappatto.
၃၈၉. စတုဝဂ္ဂကရဏဉ္စေ, ဘိက္ခဝေ, ကမ္မံ ဘိက္ခုနိစတုတ္ထော ကမ္မံ ကရေယ္ယ – အကမ္မံ န စ ကရဏီယံ။ စတုဝဂ္ဂကရဏဉ္စေ, ဘိက္ခဝေ, ကမ္မံ သိက္ခမာနစတုတ္ထော ကမ္မံ ကရေယ္ယ။ အကမ္မံ န စ ကရဏီယံ။ပေ.။။ သာမဏေရစတုတ္ထော ကမ္မံ ကရေယ္ယ။ အကမ္မံ န စ ကရဏီယံ။ သာမဏေရိစတုတ္ထော ကမ္မံ ကရေယ္ယ။ အကမ္မံ န စ ကရဏီယံ။ သိက္ခံ ပစ္စက္ခာတကစတုတ္ထော ကမ္မံ ကရေယ္ယ။ အကမ္မံ န စ ကရဏီယံ။ အန္တိမဝတ္ထုံ အဇ္ဈာပန္နကစတုတ္ထော ကမ္မံ ကရေယ္ယ။ အကမ္မံ န စ ကရဏီယံ။ အာပတ္တိယာ အဒသ္သနေ ဥက္ခိတ္တကစတုတ္ထော ကမ္မံ ကရေယ္ယ။ အကမ္မံ န စ ကရဏီယံ။ အာပတ္တိယာ အပ္ပဋိကမ္မေ ဥက္ခိတ္တကစတုတ္ထော ကမ္မံ ကရေယ္ယ။ အကမ္မံ န စ ကရဏီယံ။ ပာပိကာယ ဒိဋ္ဌိယာ အပ္ပဋိနိသ္သဂ္ဂေ ဥက္ခိတ္တကစတုတ္ထော ကမ္မံ ကရေယ္ယ။ အကမ္မံ န စ ကရဏီယံ။ ပဏ္ဍကစတုတ္ထော ကမ္မံ ကရေယ္ယ။ အကမ္မံ န စ ကရဏီယံ။ ထေယ္ယသံဝာသကစတုတ္ထော ကမ္မံ ကရေယ္ယ။ အကမ္မံ န စ ကရဏီယံ။ တိတ္ထိယပက္ကန္တကစတုတ္ထော ကမ္မံ ကရေယ္ယ။ အကမ္မံ န စ ကရဏီယံ။ တိရစ္ဆာနဂတစတုတ္ထော ကမ္မံ ကရေယ္ယ။ အကမ္မံ န စ ကရဏီယံ။ မာတုဃာတကစတုတ္ထော ကမ္မံ ကရေယ္ယ။ အကမ္မံ န စ ကရဏီယံ။ ပိတုဃာတကစတုတ္ထော ကမ္မံ ကရေယ္ယ။ အကမ္မံ န စ ကရဏီယံ။ အရဟန္တဃာတကစတုတ္ထော ကမ္မံ ကရေယ္ယ။ အကမ္မံ န စ ကရဏီယံ။ ဘိက္ခုနိဒူသကစတုတ္ထော ကမ္မံ ကရေယ္ယ။ အကမ္မံ န စ ကရဏီယံ။ သင္ဃဘေဒကစတုတ္ထော ကမ္မံ ကရေယ္ယ။ အကမ္မံ န စ ကရဏီယံ။ လောဟိတုပ္ပာဒကစတုတ္ထော ကမ္မံ ကရေယ္ယ။ အကမ္မံ န စ ကရဏီယံ။ ဥဘတောဗ္ယဉ္ဇနကစတုတ္ထော ကမ္မံ ကရေယ္ယ။ အကမ္မံ န စ ကရဏီယံ။ နာနာသံဝာသကစတုတ္ထော ကမ္မံ ကရေယ္ယ။ အကမ္မံ န စ ကရဏီယံ။ နာနာသီမာယ ဌိတစတုတ္ထော ကမ္မံ ကရေယ္ယ။ အကမ္မံ န စ ကရဏီယံ။ ဣဒ္ဓိယာ ဝေဟာသေ ဌိတစတုတ္ထော ကမ္မံ ကရေယ္ယ။ အကမ္မံ န စ ကရဏီယံ။ ယသ္သ သင္ဃော ကမ္မံ ကရောတိ, တံစတုတ္ထော ကမ္မံ ကရေယ္ယ ။ အကမ္မံ န စ ကရဏီယံ။
389. Catuvaggakaraṇañce, bhikkhave, kammaṃ bhikkhunicatuttho kammaṃ kareyya – akammaṃ na ca karaṇīyaṃ. Catuvaggakaraṇañce, bhikkhave, kammaṃ sikkhamānacatuttho kammaṃ kareyya… akammaṃ na ca karaṇīyaṃ…pe…. Sāmaṇeracatuttho kammaṃ kareyya… akammaṃ na ca karaṇīyaṃ. Sāmaṇericatuttho kammaṃ kareyya… akammaṃ na ca karaṇīyaṃ. Sikkhaṃ paccakkhātakacatuttho kammaṃ kareyya… akammaṃ na ca karaṇīyaṃ. Antimavatthuṃ ajjhāpannakacatuttho kammaṃ kareyya… akammaṃ na ca karaṇīyaṃ. Āpattiyā adassane ukkhittakacatuttho kammaṃ kareyya… akammaṃ na ca karaṇīyaṃ. Āpattiyā appaṭikamme ukkhittakacatuttho kammaṃ kareyya… akammaṃ na ca karaṇīyaṃ. Pāpikāya diṭṭhiyā appaṭinissagge ukkhittakacatuttho kammaṃ kareyya… akammaṃ na ca karaṇīyaṃ. Paṇḍakacatuttho kammaṃ kareyya… akammaṃ na ca karaṇīyaṃ. Theyyasaṃvāsakacatuttho kammaṃ kareyya… akammaṃ na ca karaṇīyaṃ. Titthiyapakkantakacatuttho kammaṃ kareyya… akammaṃ na ca karaṇīyaṃ. Tiracchānagatacatuttho kammaṃ kareyya… akammaṃ na ca karaṇīyaṃ. Mātughātakacatuttho kammaṃ kareyya… akammaṃ na ca karaṇīyaṃ. Pitughātakacatuttho kammaṃ kareyya… akammaṃ na ca karaṇīyaṃ. Arahantaghātakacatuttho kammaṃ kareyya… akammaṃ na ca karaṇīyaṃ. Bhikkhunidūsakacatuttho kammaṃ kareyya… akammaṃ na ca karaṇīyaṃ. Saṅghabhedakacatuttho kammaṃ kareyya… akammaṃ na ca karaṇīyaṃ. Lohituppādakacatuttho kammaṃ kareyya… akammaṃ na ca karaṇīyaṃ. Ubhatobyañjanakacatuttho kammaṃ kareyya… akammaṃ na ca karaṇīyaṃ. Nānāsaṃvāsakacatuttho kammaṃ kareyya… akammaṃ na ca karaṇīyaṃ. Nānāsīmāya ṭhitacatuttho kammaṃ kareyya… akammaṃ na ca karaṇīyaṃ. Iddhiyā vehāse ṭhitacatuttho kammaṃ kareyya… akammaṃ na ca karaṇīyaṃ. Yassa saṅgho kammaṃ karoti, taṃcatuttho kammaṃ kareyya … akammaṃ na ca karaṇīyaṃ.
စတုဝရဏံ။
Catuvaraṇaṃ.
၃၉၀. ပဉ္စဝဂ္ဂကရဏဉ္စေ, ဘိက္ခဝေ, ကမ္မံ ဘိက္ခုနိပဉ္စမော ကမ္မံ ကရေယ္ယ။ အကမ္မံ န စ ကရဏီယံ။ ပဉ္စဝဂ္ဂကရဏဉ္စေ, ဘိက္ခဝေ, ကမ္မံ သိက္ခမာနပဉ္စမော ကမ္မံ ကရေယ္ယ။ပေ.။။ သာမဏေရပဉ္စမော ကမ္မံ ကရေယ္ယ။ သာမဏေရိပဉ္စမော ကမ္မံ ကရေယ္ယ ။ သိက္ခံ ပစ္စက္ခာတကပဉ္စမော ကမ္မံ ကရေယ္ယ။ အန္တိမဝတ္ထုံ အဇ္ဈာပန္နကပဉ္စမော ကမ္မံ ကရေယ္ယ။ အာပတ္တိယာ အဒသ္သနေ ဥက္ခိတ္တကပဉ္စမော ကမ္မံ ကရေယ္ယ။ အာပတ္တိယာ အပ္ပဋိကမ္မေ ဥက္ခိတ္တကပဉ္စမော ကမ္မံ ကရေယ္ယ။ ပာပိကာယ ဒိဋ္ဌိယာ အပ္ပဋိနိသ္သဂ္ဂေ ဥက္ခိတ္တကပဉ္စမော ကမ္မံ ကရေယ္ယ။ ပဏ္ဍကပဉ္စမော ကမ္မံ ကရေယ္ယ။ ထေယ္ယသံဝာသကပဉ္စမော ကမ္မံ ကရေယ္ယ။ တိတ္ထိယပက္ကန္တကပဉ္စမော ကမ္မံ ကရေယ္ယ။ တိရစ္ဆာနဂတပဉ္စမော ကမ္မံ ကရေယ္ယ။ မာတုဃာတကပဉ္စမော ကမ္မံ ကရေယ္ယ။ ပိတုဃာတကပဉ္စမော ကမ္မံ ကရေယ္ယ။ အရဟန္တဃာတကပဉ္စမော ကမ္မံ ကရေယ္ယ။ ဘိက္ခုနိဒူသကပဉ္စမော ကမ္မံ ကရေယ္ယ။ သင္ဃဘေဒကပဉ္စမော ကမ္မံ ကရေယ္ယ။ လောဟိတုပ္ပာဒကပဉ္စမော ကမ္မံ ကရေယ္ယ။ ဥဘတောဗ္ယဉ္ဇနကပဉ္စမော ကမ္မံ ကရေယ္ယ။ နာနာသံဝာသကပဉ္စမော ကမ္မံ ကရေယ္ယ။ နာနာသီမာယ ဌိတပဉ္စမော ကမ္မံ ကရေယ္ယ။ ဣဒ္ဓိယာ ဝေဟာသေ ဌိတပဉ္စမော ကမ္မံ ကရေယ္ယ။ ယသ္သ သင္ဃော ကမ္မံ ကရောတိ, တံပဉ္စမော ကမ္မံ ကရေယ္ယ – အကမ္မံ န စ ကရဏီယံ။
390. Pañcavaggakaraṇañce, bhikkhave, kammaṃ bhikkhunipañcamo kammaṃ kareyya… akammaṃ na ca karaṇīyaṃ. Pañcavaggakaraṇañce, bhikkhave, kammaṃ sikkhamānapañcamo kammaṃ kareyya…pe…. Sāmaṇerapañcamo kammaṃ kareyya… sāmaṇeripañcamo kammaṃ kareyya … sikkhaṃ paccakkhātakapañcamo kammaṃ kareyya… antimavatthuṃ ajjhāpannakapañcamo kammaṃ kareyya… āpattiyā adassane ukkhittakapañcamo kammaṃ kareyya… āpattiyā appaṭikamme ukkhittakapañcamo kammaṃ kareyya… pāpikāya diṭṭhiyā appaṭinissagge ukkhittakapañcamo kammaṃ kareyya… paṇḍakapañcamo kammaṃ kareyya… theyyasaṃvāsakapañcamo kammaṃ kareyya… titthiyapakkantakapañcamo kammaṃ kareyya… tiracchānagatapañcamo kammaṃ kareyya… mātughātakapañcamo kammaṃ kareyya… pitughātakapañcamo kammaṃ kareyya… arahantaghātakapañcamo kammaṃ kareyya… bhikkhunidūsakapañcamo kammaṃ kareyya… saṅghabhedakapañcamo kammaṃ kareyya… lohituppādakapañcamo kammaṃ kareyya… ubhatobyañjanakapañcamo kammaṃ kareyya… nānāsaṃvāsakapañcamo kammaṃ kareyya… nānāsīmāya ṭhitapañcamo kammaṃ kareyya… iddhiyā vehāse ṭhitapañcamo kammaṃ kareyya… yassa saṅgho kammaṃ karoti, taṃpañcamo kammaṃ kareyya – akammaṃ na ca karaṇīyaṃ.
ပဉ္စဝဂ္ဂကရဏံ။
Pañcavaggakaraṇaṃ.
၃၉၁. ဒသဝဂ္ဂကရဏဉ္စေ, ဘိက္ခဝေ, ကမ္မံ ဘိက္ခုနိဒသမော ကမ္မံ ကရေယ္ယ, အကမ္မံ န စ ကရဏီယံ။ ဒသဝဂ္ဂကရဏဉ္စေ, ဘိက္ခဝေ, ကမ္မံ သိက္ခမာနဒသမော ကမ္မံ ကရေယ္ယ, အကမ္မံ န စ ကရဏီယံ။ပေ.။ ။ ဒသဝဂ္ဂကရဏဉ္စေ, ဘိက္ခဝေ, ကမ္မံ ယသ္သ သင္ဃော ကမ္မံ ကရောတိ, တံဒသမော ကမ္မံ ကရေယ္ယ – အကမ္မံ န စ ကရဏီယံ။
391. Dasavaggakaraṇañce, bhikkhave, kammaṃ bhikkhunidasamo kammaṃ kareyya, akammaṃ na ca karaṇīyaṃ. Dasavaggakaraṇañce, bhikkhave, kammaṃ sikkhamānadasamo kammaṃ kareyya, akammaṃ na ca karaṇīyaṃ…pe… . Dasavaggakaraṇañce, bhikkhave, kammaṃ yassa saṅgho kammaṃ karoti, taṃdasamo kammaṃ kareyya – akammaṃ na ca karaṇīyaṃ.
ဒသဝဂ္ဂကရဏံ။
Dasavaggakaraṇaṃ.
၃၉၂. ဝီသတိဝဂ္ဂကရဏဉ္စေ, ဘိက္ခဝေ, ကမ္မံ ဘိက္ခုနိဝီသော ကမ္မံ ကရေယ္ယ – အကမ္မံ န စ ကရဏီယံ။ ဝီသတိဝဂ္ဂကရဏဉ္စေ, ဘိက္ခဝေ, ကမ္မံ သိက္ခမာနဝီသော ကမ္မံ ကရေယ္ယ ။ပေ.။ သာမဏေရဝီသော ကမ္မံ ကရေယ္ယ။ သာမဏေရိဝီသော ကမ္မံ ကရေယ္ယ။ သိက္ခံ ပစ္စက္ခာတကဝီသော ကမ္မံ ကရေယ္ယ။ အန္တိမဝတ္ထုံ အဇ္ဈာပန္နကဝီသော ကမ္မံ ကရေယ္ယ။ အာပတ္တိယာ အဒသ္သနေ ဥက္ခိတ္တကဝီသော ကမ္မံ ကရေယ္ယ။ အာပတ္တိယာ အပ္ပဋိကမ္မေ ဥက္ခိတ္တကဝီသော ကမ္မံ ကရေယ္ယ။ ပာပိကာယ ဒိဋ္ဌိယာ အပ္ပဋိနိသ္သဂ္ဂေ ဥက္ခိတ္တကဝီသော ကမ္မံ ကရေယ္ယ။ ပဏ္ဍကဝီသော ကမ္မံ ကရေယ္ယ။ ထေယ္ယသံဝာသကဝီသော ကမ္မံ ကရေယ္ယ။ တိတ္ထိယပက္ကန္တကဝီသော ကမ္မံ ကရေယ္ယ။ တိရစ္ဆာနဂတဝီသော ကမ္မံ ကရေယ္ယ။ မာတုဃာတကဝီသော ကမ္မံ ကရေယ္ယ။ ပိတုဃာတကဝီသော ကမ္မံ ကရေယ္ယ။ အရဟန္တဃာတကဝီသော ကမ္မံ ကရေယ္ယ။ ဘိက္ခုနိဒူသကဝီသော ကမ္မံ ကရေယ္ယ။ သင္ဃဘေဒကဝီသော ကမ္မံ ကရေယ္ယ။ လောဟိတုပ္ပာဒကဝီသော ကမ္မံ ကရေယ္ယ။ ဥဘတောဗ္ယဉ္ဇနကဝီသော ကမ္မံ ကရေယ္ယ။ နာနာသံဝာသကဝီသော ကမ္မံ ကရေယ္ယ။ နာနာသီမာယ ဌိတဝီသော ကမ္မံ ကရေယ္ယ။ ဣဒ္ဓိယာ ဝေဟာသေ ဌိတဝီသော ကမ္မံ ကရေယ္ယ။ ယသ္သ သင္ဃော ကမ္မံ ကရောတိ, တံဝီသော ကမ္မံ ကရေယ္ယ – အကမ္မံ န စ ကရဏီယံ။
392. Vīsativaggakaraṇañce, bhikkhave, kammaṃ bhikkhunivīso kammaṃ kareyya – akammaṃ na ca karaṇīyaṃ. Vīsativaggakaraṇañce, bhikkhave, kammaṃ sikkhamānavīso kammaṃ kareyya …pe… sāmaṇeravīso kammaṃ kareyya… sāmaṇerivīso kammaṃ kareyya… sikkhaṃ paccakkhātakavīso kammaṃ kareyya… antimavatthuṃ ajjhāpannakavīso kammaṃ kareyya… āpattiyā adassane ukkhittakavīso kammaṃ kareyya… āpattiyā appaṭikamme ukkhittakavīso kammaṃ kareyya… pāpikāya diṭṭhiyā appaṭinissagge ukkhittakavīso kammaṃ kareyya… paṇḍakavīso kammaṃ kareyya… theyyasaṃvāsakavīso kammaṃ kareyya… titthiyapakkantakavīso kammaṃ kareyya… tiracchānagatavīso kammaṃ kareyya… mātughātakavīso kammaṃ kareyya… pitughātakavīso kammaṃ kareyya… arahantaghātakavīso kammaṃ kareyya… bhikkhunidūsakavīso kammaṃ kareyya… saṅghabhedakavīso kammaṃ kareyya… lohituppādakavīso kammaṃ kareyya… ubhatobyañjanakavīso kammaṃ kareyya… nānāsaṃvāsakavīso kammaṃ kareyya… nānāsīmāya ṭhitavīso kammaṃ kareyya… iddhiyā vehāse ṭhitavīso kammaṃ kareyya… yassa saṅgho kammaṃ karoti, taṃvīso kammaṃ kareyya – akammaṃ na ca karaṇīyaṃ.
ဝီသတိဝဂ္ဂကရဏံ။
Vīsativaggakaraṇaṃ.
စတုဝဂ္ဂကရဏာဒိကထာ နိဋ္ဌိတာ။
Catuvaggakaraṇādikathā niṭṭhitā.
Related texts:
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝဂ္ဂ-အဋ္ဌကထာ • Mahāvagga-aṭṭhakathā / စတုဝဂ္ဂကရဏာဒိကထာ • Catuvaggakaraṇādikathā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / စတုဝဂ္ဂကရဏာဒိကထာဝဏ္ဏနာ • Catuvaggakaraṇādikathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ကသ္သပဂောတ္တဘိက္ခုဝတ္ထုကထာဒိဝဏ္ဏနာ • Kassapagottabhikkhuvatthukathādivaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၂၃၇. စတုဝဂ္ဂကရဏာဒိကထာ • 237. Catuvaggakaraṇādikathā
