| Library / Tipiṭaka / ತಿಪಿಟಕ • Tipiṭaka / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi |
೨೩೭. ಚತುವಗ್ಗಕರಣಾದಿಕಥಾ
237. Catuvaggakaraṇādikathā
೩೮೮. ಯದಿದಂ ಕಮ್ಮನ್ತಿ ಯೋಜನಾ। ತೇಸನ್ತಿ ಸಙ್ಘಾನಂ। ಕಮ್ಮಪ್ಪತ್ತೋತಿ ಏತ್ಥ ಕಮ್ಮೇನ, ಕಮ್ಮಸ್ಸ ವಾ ಪತ್ತೋತಿ ಅತ್ಥಂ ಪಟಿಕ್ಖಿಪನ್ತೋ ಆಹ ‘‘ಕಮ್ಮಂ ಪತ್ತೋ’’ತಿ। ‘‘ಸಬ್ಬಕಮ್ಮೇಸು ಕಮ್ಮಪತ್ತೋ’’ತಿ ಪಾಳಿನಯೇನ ‘‘ಕಮ್ಮೇಸು ಪತ್ತೋ’’ತಿ ಅತ್ಥೋಪಿ ಯುಜ್ಜತಿ। ಲೋಕವೋಹಾರವಸೇನ ‘‘ಕಮ್ಮೇನ ಕಮ್ಮಸ್ಸ ವಾ ಪತ್ತೋ’’ತಿ ಅತ್ಥೋಪಿ ಯುಜ್ಜತೇವ।
388. Yadidaṃ kammanti yojanā. Tesanti saṅghānaṃ. Kammappattoti ettha kammena, kammassa vā pattoti atthaṃ paṭikkhipanto āha ‘‘kammaṃ patto’’ti. ‘‘Sabbakammesu kammapatto’’ti pāḷinayena ‘‘kammesu patto’’ti atthopi yujjati. Lokavohāravasena ‘‘kammena kammassa vā patto’’ti atthopi yujjateva.
೩೮೯. ಪರಿಸತೋತಿ ಪರಿಸಕಾರಣಾ। ತತ್ಥಾತಿ ‘‘ಚತುವಗ್ಗಕರಣಞ್ಚೇ ಭಿಕ್ಖವೇ’’ತಿಆದಿಪಾಠೇ, ಚತುವೀಸತಿಪುಗ್ಗಲೇಸು ವಾ। ಕಮ್ಮನಾನಾಸಂವಾಸಕೋತಿ ಉಕ್ಖೇಪನೀಯಕಮ್ಮಕತೋ। ಲದ್ಧಿನಾನಾಸಂವಾಸಕೋತಿ ಉಕ್ಖಿತ್ತಾನುವತ್ತಕೋ। ‘‘ಹುತ್ವಾ’’ತಿ ಇಮಿನಾ ‘‘ಭಿಕ್ಖುನೀಚತುತ್ಥೋ’’ತಿಆದೀಸು ಚತುವೀಸತಿಯಾ ಠಾನೇಸು ಕಿರಿಯಾವಿಸೇಸನಭಾವಂ ದಸ್ಸೇತಿ। ಭಿಕ್ಖುನೀ ಚತುತ್ಥೀ ಏತಸ್ಸಾತಿ ಭಿಕ್ಖುನೀಚತುತ್ಥೋ, ಚತುವಗ್ಗೋ ಸಙ್ಘೋತಿಆದಿನಾ ವಚನತ್ಥೋ ಕಾತಬ್ಬೋ।
389.Parisatoti parisakāraṇā. Tatthāti ‘‘catuvaggakaraṇañce bhikkhave’’tiādipāṭhe, catuvīsatipuggalesu vā. Kammanānāsaṃvāsakoti ukkhepanīyakammakato. Laddhinānāsaṃvāsakoti ukkhittānuvattako. ‘‘Hutvā’’ti iminā ‘‘bhikkhunīcatuttho’’tiādīsu catuvīsatiyā ṭhānesu kiriyāvisesanabhāvaṃ dasseti. Bhikkhunī catutthī etassāti bhikkhunīcatuttho, catuvaggo saṅghotiādinā vacanattho kātabbo.
೩೯೩. ಪರಿವಾಸಾದೀತಿಆದಿಸದ್ದೇನ ಮೂಲಾಯಕಸ್ಸನಮಾನತ್ತಅಬ್ಭಾನಾನಿ ಸಙ್ಗಣ್ಹಾತಿ। ತೇಸನ್ತಿ ಪರಿವಾಸಾದಿಕಮ್ಮಾನಂ। ಪರತೋತಿ ಪರಸ್ಮಿಂ ಚೂಳವಗ್ಗೇ (ಚೂಳವ॰ ಅಟ್ಠ॰ ೭೫ ಆದಯೋ)।
393.Parivāsādītiādisaddena mūlāyakassanamānattaabbhānāni saṅgaṇhāti. Tesanti parivāsādikammānaṃ. Paratoti parasmiṃ cūḷavagge (cūḷava. aṭṭha. 75 ādayo).
೩೯೪. ಪಟಿಕುಟ್ಠಕತಕಮ್ಮಸ್ಸಾತಿ ಪಟಿಕುಟ್ಠಸ್ಸ ಹುತ್ವಾ ಕತಸ್ಸ ಕಮ್ಮಸ್ಸ। ಪಕತತ್ತಸ್ಸಾತಿ ಏತ್ಥ ಪಕತಿಸೀಲಸಙ್ಖಾತೋ ಅತ್ತಾ ಸಭಾವೋ ಏತಸ್ಸಾತಿ ಪಕತತ್ತೋತಿ ಅತ್ಥಂ ದಸ್ಸೇನ್ತೋ ಆಹ ‘‘ಅವಿಪನ್ನಸೀಲಸ್ಸಾ’’ತಿ। ಸಙ್ಘಾದಿಸೇಸಂ ಅನಾಪಜ್ಜನ್ತಸ್ಸಾಪಿ ಅವಿಪನ್ನಸೀಲತ್ತಾ ವುತ್ತಂ ‘‘ಪಾರಾಜಿಕಂ ಅನಜ್ಝಾಪನ್ನಸ್ಸಾ’’ತಿ। ಇಮಿನಾ ಸಙ್ಘಾದಿಸೇಸಂ ಆಪಜ್ಜನ್ತೋಪಿ ಪಕತತ್ತೋಯೇವಾತಿ ದಸ್ಸೇತಿ। ಸೋಪಿ ಹಿ ಇಧ ಅವಿಪನ್ನಸೀಲೋ ನಾಮ, ಅಞ್ಞತ್ಥ ಪನ ಸಙ್ಘಾದಿಸೇಸಸ್ಸ ಸೀಲವಿಪತ್ತಿಭಾವತೋ ತಂ ಆಪಜ್ಜನ್ತೋಪಿ ವಿಪನ್ನಸೀಲೋಯೇವ ನಾಮ। ಆನನ್ತರಿಕಸ್ಸಾತಿ ಏತ್ಥ ಅನನ್ತರಸದ್ದಸ್ಸ ಸಮ್ಬನ್ಧಞ್ಚ ಣಿಕಪಚ್ಚಯಸ್ಸ ಅತ್ಥಞ್ಚ ದಸ್ಸೇನ್ತೋ ಆಹ ‘‘ಅತ್ತನೋ ಅನನ್ತರಂ ನಿಸಿನ್ನಸ್ಸಾ’’ತಿ। ತತ್ಥ ‘‘ಅತ್ತನೋ’’ತಿ ಇಮಿನಾ ಅನನ್ತರಸದ್ದಸ್ಸ ಸಮ್ಬನ್ಧಂ ದಸ್ಸೇತಿ। ‘‘ನಿಸಿನ್ನಸ್ಸಾ’’ತಿ ಇಮಿನಾ ಣಿಕಪಚ್ಚಯಸ್ಸ ಅತ್ಥಂ ದಸ್ಸೇತಿ।
394.Paṭikuṭṭhakatakammassāti paṭikuṭṭhassa hutvā katassa kammassa. Pakatattassāti ettha pakatisīlasaṅkhāto attā sabhāvo etassāti pakatattoti atthaṃ dassento āha ‘‘avipannasīlassā’’ti. Saṅghādisesaṃ anāpajjantassāpi avipannasīlattā vuttaṃ ‘‘pārājikaṃ anajjhāpannassā’’ti. Iminā saṅghādisesaṃ āpajjantopi pakatattoyevāti dasseti. Sopi hi idha avipannasīlo nāma, aññattha pana saṅghādisesassa sīlavipattibhāvato taṃ āpajjantopi vipannasīloyeva nāma. Ānantarikassāti ettha anantarasaddassa sambandhañca ṇikapaccayassa atthañca dassento āha ‘‘attano anantaraṃ nisinnassā’’ti. Tattha ‘‘attano’’ti iminā anantarasaddassa sambandhaṃ dasseti. ‘‘Nisinnassā’’ti iminā ṇikapaccayassa atthaṃ dasseti.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಮಹಾವಗ್ಗಪಾಳಿ • Mahāvaggapāḷi
೨೩೭. ಚತುವಗ್ಗಕರಣಾದಿಕಥಾ • 237. Catuvaggakaraṇādikathā
೨೩೮. ಪಾರಿವಾಸಿಕಾದಿಕಥಾ • 238. Pārivāsikādikathā
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಮಹಾವಗ್ಗ-ಅಟ್ಠಕಥಾ • Mahāvagga-aṭṭhakathā / ಚತುವಗ್ಗಕರಣಾದಿಕಥಾ • Catuvaggakaraṇādikathā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ಚತುವಗ್ಗಕರಣಾದಿಕಥಾವಣ್ಣನಾ • Catuvaggakaraṇādikathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ಕಸ್ಸಪಗೋತ್ತಭಿಕ್ಖುವತ್ಥುಕಥಾದಿವಣ್ಣನಾ • Kassapagottabhikkhuvatthukathādivaṇṇanā
