| Library / Tipiṭaka / තිපිටක • Tipiṭaka / පාචිත්‍යාදියොජනාපාළි • Pācityādiyojanāpāḷi |
237. චතුවග්‌ගකරණාදිකථා
237. Catuvaggakaraṇādikathā
388. යදිදං කම්‌මන්‌ති යොජනා. තෙසන්‌ති සඞ්‌ඝානං. කම්‌මප්‌පත්‌තොති එත්‌ථ කම්‌මෙන, කම්‌මස්‌ස වා පත්‌තොති අත්‌ථං පටික්‌ඛිපන්‌තො ආහ ‘‘කම්‌මං පත්‌තො’’ති. ‘‘සබ්‌බකම්‌මෙසු කම්‌මපත්‌තො’’ති පාළිනයෙන ‘‘කම්‌මෙසු පත්‌තො’’ති අත්‌ථොපි යුජ්‌ජති. ලොකවොහාරවසෙන ‘‘කම්‌මෙන කම්‌මස්‌ස වා පත්‌තො’’ති අත්‌ථොපි යුජ්‌ජතෙව.
388. Yadidaṃ kammanti yojanā. Tesanti saṅghānaṃ. Kammappattoti ettha kammena, kammassa vā pattoti atthaṃ paṭikkhipanto āha ‘‘kammaṃ patto’’ti. ‘‘Sabbakammesu kammapatto’’ti pāḷinayena ‘‘kammesu patto’’ti atthopi yujjati. Lokavohāravasena ‘‘kammena kammassa vā patto’’ti atthopi yujjateva.
389. පරිසතොති පරිසකාරණා. තත්‌ථාති ‘‘චතුවග්‌ගකරණඤ්‌චෙ භික්‌ඛවෙ’’තිආදිපාඨෙ, චතුවීසතිපුග්‌ගලෙසු වා. කම්‌මනානාසංවාසකොති උක්‌ඛෙපනීයකම්‌මකතො. ලද්‌ධිනානාසංවාසකොති උක්‌ඛිත්‌තානුවත්‌තකො. ‘‘හුත්‌වා’’ති ඉමිනා ‘‘භික්‌ඛුනීචතුත්‌ථො’’තිආදීසු චතුවීසතියා ඨානෙසු කිරියාවිසෙසනභාවං දස්‌සෙති. භික්‌ඛුනී චතුත්‌ථී එතස්‌සාති භික්‌ඛුනීචතුත්‌ථො, චතුවග්‌ගො සඞ්‌ඝොතිආදිනා වචනත්‌ථො කාතබ්‌බො.
389.Parisatoti parisakāraṇā. Tatthāti ‘‘catuvaggakaraṇañce bhikkhave’’tiādipāṭhe, catuvīsatipuggalesu vā. Kammanānāsaṃvāsakoti ukkhepanīyakammakato. Laddhinānāsaṃvāsakoti ukkhittānuvattako. ‘‘Hutvā’’ti iminā ‘‘bhikkhunīcatuttho’’tiādīsu catuvīsatiyā ṭhānesu kiriyāvisesanabhāvaṃ dasseti. Bhikkhunī catutthī etassāti bhikkhunīcatuttho, catuvaggo saṅghotiādinā vacanattho kātabbo.
393. පරිවාසාදීතිආදිසද්‌දෙන මූලායකස්‌සනමානත්‌තඅබ්‌භානානි සඞ්‌ගණ්‌හාති. තෙසන්‌ති පරිවාසාදිකම්‌මානං. පරතොති පරස්‌මිං චූළවග්‌ගෙ (චූළව. අට්‌ඨ. 75 ආදයො).
393.Parivāsādītiādisaddena mūlāyakassanamānattaabbhānāni saṅgaṇhāti. Tesanti parivāsādikammānaṃ. Paratoti parasmiṃ cūḷavagge (cūḷava. aṭṭha. 75 ādayo).
394. පටිකුට්‌ඨකතකම්‌මස්‌සාති පටිකුට්‌ඨස්‌ස හුත්‌වා කතස්‌ස කම්‌මස්‌ස. පකතත්‌තස්‌සාති එත්‌ථ පකතිසීලසඞ්‌ඛාතො අත්‌තා සභාවො එතස්‌සාති පකතත්‌තොති අත්‌ථං දස්‌සෙන්‌තො ආහ ‘‘අවිපන්‌නසීලස්‌සා’’ති. සඞ්‌ඝාදිසෙසං අනාපජ්‌ජන්‌තස්‌සාපි අවිපන්‌නසීලත්‌තා වුත්‌තං ‘‘පාරාජිකං අනජ්‌ඣාපන්‌නස්‌සා’’ති. ඉමිනා සඞ්‌ඝාදිසෙසං ආපජ්‌ජන්‌තොපි පකතත්‌තොයෙවාති දස්‌සෙති. සොපි හි ඉධ අවිපන්‌නසීලො නාම, අඤ්‌ඤත්‌ථ පන සඞ්‌ඝාදිසෙසස්‌ස සීලවිපත්‌තිභාවතො තං ආපජ්‌ජන්‌තොපි විපන්‌නසීලොයෙව නාම. ආනන්‌තරිකස්‌සාති එත්‌ථ අනන්‌තරසද්‌දස්‌ස සම්‌බන්‌ධඤ්‌ච ණිකපච්‌චයස්‌ස අත්‌ථඤ්‌ච දස්‌සෙන්‌තො ආහ ‘‘අත්‌තනො අනන්‌තරං නිසින්‌නස්‌සා’’ති. තත්‌ථ ‘‘අත්‌තනො’’ති ඉමිනා අනන්‌තරසද්‌දස්‌ස සම්‌බන්‌ධං දස්‌සෙති. ‘‘නිසින්‌නස්‌සා’’ති ඉමිනා ණිකපච්‌චයස්‌ස අත්‌ථං දස්‌සෙති.
394.Paṭikuṭṭhakatakammassāti paṭikuṭṭhassa hutvā katassa kammassa. Pakatattassāti ettha pakatisīlasaṅkhāto attā sabhāvo etassāti pakatattoti atthaṃ dassento āha ‘‘avipannasīlassā’’ti. Saṅghādisesaṃ anāpajjantassāpi avipannasīlattā vuttaṃ ‘‘pārājikaṃ anajjhāpannassā’’ti. Iminā saṅghādisesaṃ āpajjantopi pakatattoyevāti dasseti. Sopi hi idha avipannasīlo nāma, aññattha pana saṅghādisesassa sīlavipattibhāvato taṃ āpajjantopi vipannasīloyeva nāma. Ānantarikassāti ettha anantarasaddassa sambandhañca ṇikapaccayassa atthañca dassento āha ‘‘attano anantaraṃ nisinnassā’’ti. Tattha ‘‘attano’’ti iminā anantarasaddassa sambandhaṃ dasseti. ‘‘Nisinnassā’’ti iminā ṇikapaccayassa atthaṃ dasseti.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / මහාවග්‌ගපාළි • Mahāvaggapāḷi
237. චතුවග්‌ගකරණාදිකථා • 237. Catuvaggakaraṇādikathā
238. පාරිවාසිකාදිකථා • 238. Pārivāsikādikathā
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවග්‌ග-අට්‌ඨකථා • Mahāvagga-aṭṭhakathā / චතුවග්‌ගකරණාදිකථා • Catuvaggakaraṇādikathā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / චතුවග්‌ගකරණාදිකථාවණ්‌ණනා • Catuvaggakaraṇādikathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / කස්‌සපගොත්‌තභික්‌ඛුවත්‌ථුකථාදිවණ්‌ණනා • Kassapagottabhikkhuvatthukathādivaṇṇanā
