| Library / Tipiṭaka / তিপিটক • Tipiṭaka / ৰিনযৰিনিচ্ছয-টীকা • Vinayavinicchaya-ṭīkā |
চতুৰিপত্তিকথাৰণ্ণনা
Catuvipattikathāvaṇṇanā
২৭৩. ইদানি উভযসাধারণং কত্ৰা ৰিপত্তিৰারাদীনং ৰিসিট্ঠৰারানং সঙ্গহং কাতুমাহ ‘‘কতি আপত্তিযো’’তিআদি।
273. Idāni ubhayasādhāraṇaṃ katvā vipattivārādīnaṃ visiṭṭhavārānaṃ saṅgahaṃ kātumāha ‘‘kati āpattiyo’’tiādi.
২৭৪. ভিক্খুনী সচে ছাদেতি, চুতা হোতি। সচে ৰেমতিকা ছাদেতি, থুল্লচ্চযং সিযাতি যোজনা।
274. Bhikkhunī sace chādeti, cutā hoti. Sace vematikā chādeti, thullaccayaṃ siyāti yojanā.
২৭৫. সঙ্ঘাদিসেসন্তি পরস্স সঙ্ঘাদিসেসং।
275.Saṅghādisesanti parassa saṅghādisesaṃ.
২৭৬. ‘‘কতি আচারৰিপত্তিপচ্চযা’’তি পদচ্ছেদো।
276. ‘‘Kati ācāravipattipaccayā’’ti padacchedo.
২৭৭. আচারৰিপত্তিন্তি অত্তনো ৰা পরস্স ৰা আচারৰিপত্তিং।
277.Ācāravipattinti attano vā parassa vā ācāravipattiṃ.
২৭৯. পাপিকং দিট্ঠিন্তি অহেতুকঅকিরিযনত্থিকদিট্ঠিআদিং লামিকং দিট্ঠিং।
279.Pāpikaṃ diṭṭhinti ahetukaakiriyanatthikadiṭṭhiādiṃ lāmikaṃ diṭṭhiṃ.
২৮১. মনুস্সুত্তরিধম্মন্তি উত্তরিমনুস্সধম্মং।
281.Manussuttaridhammanti uttarimanussadhammaṃ.
২৮২. আজীৰহেতু সঞ্চরিত্তং সমাপন্নোতি যোজনা। পরিযাযৰচনেতি ‘‘যো তে ৰিহারে ৰসতি, সো ভিক্খু অরহা’’তিআদিকে লেসৰচনে। ঞাতেতি যং উদ্দিস্স ৰদতি, তস্মিং মনুস্সজাতিকে ৰচনসমনন্তরমেৰ ঞাতে।
282. Ājīvahetu sañcarittaṃ samāpannoti yojanā. Pariyāyavacaneti ‘‘yo te vihāre vasati, so bhikkhu arahā’’tiādike lesavacane. Ñāteti yaṃ uddissa vadati, tasmiṃ manussajātike vacanasamanantarameva ñāte.
২৮৩. ৰত্ৰাতি অগিলানো অত্তনো অত্থায ৰিঞ্ঞাপেত্ৰা। ভিক্খুনী পন সচে এৰং হোতি, ভিক্খুনী অগিলানা অত্তনো অত্থায পণীতভোজনং ৰিঞ্ঞাপেত্ৰা ভুত্তাৰিনী সচে হোতীতি অধিপ্পাযো। তস্সা পাটিদেসনীযং সিযাতি যোজনা।
283.Vatvāti agilāno attano atthāya viññāpetvā. Bhikkhunī pana sace evaṃ hoti, bhikkhunī agilānā attano atthāya paṇītabhojanaṃ viññāpetvā bhuttāvinī sace hotīti adhippāyo. Tassā pāṭidesanīyaṃ siyāti yojanā.
২৮৪. ‘‘অত্তনো অত্থায ৰিঞ্ঞাপেত্ৰানা’’তি ইমিনা পরস্স ঞাতকপৰারিতে তস্সেৰত্থায ৰিঞ্ঞাপেত্ৰা তেন দিন্নং ৰা তস্স ৰিস্সাসেন ৰা পরিভুঞ্জন্তস্স তেসং অত্তনো অঞ্ঞাতকঅপ্পৰারিতে সুদ্ধচিত্ততায অনাপত্তীতি দীপেতি।
284.‘‘Attano atthāya viññāpetvānā’’ti iminā parassa ñātakapavārite tassevatthāya viññāpetvā tena dinnaṃ vā tassa vissāsena vā paribhuñjantassa tesaṃ attano aññātakaappavārite suddhacittatāya anāpattīti dīpeti.
ইতি উত্তরে লীনত্থপকাসনিযা
Iti uttare līnatthapakāsaniyā
চতুৰিপত্তিকথাৰণ্ণনা নিট্ঠিতা।
Catuvipattikathāvaṇṇanā niṭṭhitā.
