| Library / Tipiṭaka / තිපිටක • Tipiṭaka / විනයවිනිච්‌ඡය-ටීකා • Vinayavinicchaya-ṭīkā |
චතුවිපත්‌තිකථාවණ්‌ණනා
Catuvipattikathāvaṇṇanā
273. ඉදානි උභයසාධාරණං කත්‌වා විපත්‌තිවාරාදීනං විසිට්‌ඨවාරානං සඞ්‌ගහං කාතුමාහ ‘‘කති ආපත්‌තියො’’තිආදි.
273. Idāni ubhayasādhāraṇaṃ katvā vipattivārādīnaṃ visiṭṭhavārānaṃ saṅgahaṃ kātumāha ‘‘kati āpattiyo’’tiādi.
274. භික්‌ඛුනී සචෙ ඡාදෙති, චුතා හොති. සචෙ වෙමතිකා ඡාදෙති, ථුල්‌ලච්‌චයං සියාති යොජනා.
274. Bhikkhunī sace chādeti, cutā hoti. Sace vematikā chādeti, thullaccayaṃ siyāti yojanā.
275. සඞ්‌ඝාදිසෙසන්‌ති පරස්‌ස සඞ්‌ඝාදිසෙසං.
275.Saṅghādisesanti parassa saṅghādisesaṃ.
276. ‘‘කති ආචාරවිපත්‌තිපච්‌චයා’’ති පදච්‌ඡෙදො.
276. ‘‘Kati ācāravipattipaccayā’’ti padacchedo.
277. ආචාරවිපත්‌තින්‌ති අත්‌තනො වා පරස්‌ස වා ආචාරවිපත්‌තිං.
277.Ācāravipattinti attano vā parassa vā ācāravipattiṃ.
279. පාපිකං දිට්‌ඨින්‌ති අහෙතුකඅකිරියනත්‌ථිකදිට්‌ඨිආදිං ලාමිකං දිට්‌ඨිං.
279.Pāpikaṃ diṭṭhinti ahetukaakiriyanatthikadiṭṭhiādiṃ lāmikaṃ diṭṭhiṃ.
281. මනුස්‌සුත්‌තරිධම්‌මන්‌ති උත්‌තරිමනුස්‌සධම්‌මං.
281.Manussuttaridhammanti uttarimanussadhammaṃ.
282. ආජීවහෙතු සඤ්‌චරිත්‌තං සමාපන්‌නොති යොජනා. පරියායවචනෙති ‘‘යො තෙ විහාරෙ වසති, සො භික්‌ඛු අරහා’’තිආදිකෙ ලෙසවචනෙ. ඤාතෙති යං උද්‌දිස්‌ස වදති, තස්‌මිං මනුස්‌සජාතිකෙ වචනසමනන්‌තරමෙව ඤාතෙ.
282. Ājīvahetu sañcarittaṃ samāpannoti yojanā. Pariyāyavacaneti ‘‘yo te vihāre vasati, so bhikkhu arahā’’tiādike lesavacane. Ñāteti yaṃ uddissa vadati, tasmiṃ manussajātike vacanasamanantarameva ñāte.
283. වත්‌වාති අගිලානො අත්‌තනො අත්‌ථාය විඤ්‌ඤාපෙත්‌වා. භික්‌ඛුනී පන සචෙ එවං හොති, භික්‌ඛුනී අගිලානා අත්‌තනො අත්‌ථාය පණීතභොජනං විඤ්‌ඤාපෙත්‌වා භුත්‌තාවිනී සචෙ හොතීති අධිප්‌පායො. තස්‌සා පාටිදෙසනීයං සියාති යොජනා.
283.Vatvāti agilāno attano atthāya viññāpetvā. Bhikkhunī pana sace evaṃ hoti, bhikkhunī agilānā attano atthāya paṇītabhojanaṃ viññāpetvā bhuttāvinī sace hotīti adhippāyo. Tassā pāṭidesanīyaṃ siyāti yojanā.
284. ‘‘අත්‌තනො අත්‌ථාය විඤ්‌ඤාපෙත්‌වානා’’ති ඉමිනා පරස්‌ස ඤාතකපවාරිතෙ තස්‌සෙවත්‌ථාය විඤ්‌ඤාපෙත්‌වා තෙන දින්‌නං වා තස්‌ස විස්‌සාසෙන වා පරිභුඤ්‌ජන්‌තස්‌ස තෙසං අත්‌තනො අඤ්‌ඤාතකඅප්‌පවාරිතෙ සුද්‌ධචිත්‌තතාය අනාපත්‌තීති දීපෙති.
284.‘‘Attano atthāya viññāpetvānā’’ti iminā parassa ñātakapavārite tassevatthāya viññāpetvā tena dinnaṃ vā tassa vissāsena vā paribhuñjantassa tesaṃ attano aññātakaappavārite suddhacittatāya anāpattīti dīpeti.
ඉති උත්‌තරෙ ලීනත්‌ථපකාසනියා
Iti uttare līnatthapakāsaniyā
චතුවිපත්‌තිකථාවණ්‌ණනා නිට්‌ඨිතා.
Catuvipattikathāvaṇṇanā niṭṭhitā.
