| Library / Tipiṭaka / তিপিটক • Tipiṭaka / পরিৰারপাল়ি • Parivārapāḷi |
২. চতুৰিপত্তিং
2. Catuvipattiṃ
৩৩৬.
336.
তং তং ব্যাকতং অনঞ্ঞথা।
Taṃ taṃ byākataṃ anaññathā;
অঞ্ঞং তং পুচ্ছামি তদিঙ্ঘ ব্রূহি।
Aññaṃ taṃ pucchāmi tadiṅgha brūhi;
গরুক লহুকঞ্চাপি সাৰসেসং।
Garuka lahukañcāpi sāvasesaṃ;
অনৰসেসং দুট্ঠুল্লঞ্চ অদুট্ঠুল্লং।
Anavasesaṃ duṭṭhullañca aduṭṭhullaṃ;
যে চ যাৰততিযকা॥
Ye ca yāvatatiyakā.
সাধারণং অসাধারণং।
Sādhāraṇaṃ asādhāraṇaṃ;
সব্বানিপেতানি ৰিযাকরোহি।
Sabbānipetāni viyākarohi;
হন্দ ৰাক্যং সুণোম তে॥
Handa vākyaṃ suṇoma te.
একতিংসা যে গরুকা, অট্ঠেত্থ অনৰসেসা।
Ekatiṃsā ye garukā, aṭṭhettha anavasesā;
যে গরুকা তে দুট্ঠুল্লা, যে দুট্ঠুল্লা সা সীলৰিপত্তি।
Ye garukā te duṭṭhullā, ye duṭṭhullā sā sīlavipatti;
পারাজিকং সঙ্ঘাদিসেসো, ‘‘সীলৰিপত্তী’’তি ৰুচ্চতি॥
Pārājikaṃ saṅghādiseso, ‘‘sīlavipattī’’ti vuccati.
থুল্লচ্চযং পাচিত্তিযা, পাটিদেসনীযং দুক্কটং।
Thullaccayaṃ pācittiyā, pāṭidesanīyaṃ dukkaṭaṃ;
দুব্ভাসিতং যো চাযং, অক্কোসতি হসাধিপ্পাযো।
Dubbhāsitaṃ yo cāyaṃ, akkosati hasādhippāyo;
অযং সা আচারৰিপত্তিসম্মতা॥
Ayaṃ sā ācāravipattisammatā.
ৰিপরীতদিট্ঠিং গণ্হন্তি, অসদ্ধম্মেহি পুরক্খতা।
Viparītadiṭṭhiṃ gaṇhanti, asaddhammehi purakkhatā;
অব্ভাচিক্খন্তি সম্বুদ্ধং, দুপ্পঞ্ঞা মোহপারুতা।
Abbhācikkhanti sambuddhaṃ, duppaññā mohapārutā;
অযং সা দিট্ঠিৰিপত্তিসম্মতা॥
Ayaṃ sā diṭṭhivipattisammatā.
আজীৰহেতু আজীৰকারণা পাপিচ্ছো ইচ্ছাপকতো অসন্তং অভূতং উত্তরিমনুস্সধম্মং উল্লপতি, আজীৰহেতু আজীৰকারণা সঞ্চরিত্তং সমাপজ্জতি, আজীৰহেতু আজীৰকারণা – ‘‘যো তে ৰিহারে ৰসতি, সো ভিক্খু অরহা’’তি ভণতি, আজীৰহেতু আজীৰকারণা ভিক্খু পণীতভোজনানি অত্তনো অত্থায ৰিঞ্ঞাপেত্ৰা ভুঞ্জতি, আজীৰহেতু আজীৰকারণা ভিক্খুনী পণীতভোজনানি অত্তনো অত্থায ৰিঞ্ঞাপেত্ৰা ভুঞ্জতি, আজীৰহেতু আজীৰকারণা সূপং ৰা ওদনং ৰা অগিলানো অত্তনো অত্থায ৰিঞ্ঞাপেত্ৰা ভুঞ্জতি। অযং সা আজীৰৰিপত্তি সম্মতা।
Ājīvahetu ājīvakāraṇā pāpiccho icchāpakato asantaṃ abhūtaṃ uttarimanussadhammaṃ ullapati, ājīvahetu ājīvakāraṇā sañcarittaṃ samāpajjati, ājīvahetu ājīvakāraṇā – ‘‘yo te vihāre vasati, so bhikkhu arahā’’ti bhaṇati, ājīvahetu ājīvakāraṇā bhikkhu paṇītabhojanāni attano atthāya viññāpetvā bhuñjati, ājīvahetu ājīvakāraṇā bhikkhunī paṇītabhojanāni attano atthāya viññāpetvā bhuñjati, ājīvahetu ājīvakāraṇā sūpaṃ vā odanaṃ vā agilāno attano atthāya viññāpetvā bhuñjati. Ayaṃ sā ājīvavipatti sammatā.
একাদস যাৰততিযকা, তে সুণোহি যথাতথং।
Ekādasa yāvatatiyakā, te suṇohi yathātathaṃ;
উক্খিত্তানুৰত্তিকা, অট্ঠ যাৰততিযকা।
Ukkhittānuvattikā, aṭṭha yāvatatiyakā;
অরিট্ঠো চণ্ডকাল়ী চ, ইমে তে যাৰততিযকা॥
Ariṭṭho caṇḍakāḷī ca, ime te yāvatatiyakā.
Footnotes:
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / পরিৰার-অট্ঠকথা • Parivāra-aṭṭhakathā / চতুৰিপত্তিৰণ্ণনা • Catuvipattivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / চতুৰিপত্তিৰণ্ণনা • Catuvipattivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / চতুৰিপত্তিৰণ্ণনা • Catuvipattivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / চতুৰিপত্তিৰণ্ণনা • Catuvipattivaṇṇanā
