| Library / Tipiṭaka / तिपिटक • Tipiṭaka / परिवारपाळि • Parivārapāḷi |
२. चतुविपत्तिं
2. Catuvipattiṃ
३३६.
336.
तं तं ब्याकतं अनञ्ञथा।
Taṃ taṃ byākataṃ anaññathā;
अञ्ञं तं पुच्छामि तदिङ्घ ब्रूहि।
Aññaṃ taṃ pucchāmi tadiṅgha brūhi;
गरुक लहुकञ्चापि सावसेसं।
Garuka lahukañcāpi sāvasesaṃ;
अनवसेसं दुट्ठुल्लञ्च अदुट्ठुल्लं।
Anavasesaṃ duṭṭhullañca aduṭṭhullaṃ;
ये च यावततियका॥
Ye ca yāvatatiyakā.
साधारणं असाधारणं।
Sādhāraṇaṃ asādhāraṇaṃ;
सब्बानिपेतानि वियाकरोहि।
Sabbānipetāni viyākarohi;
हन्द वाक्यं सुणोम ते॥
Handa vākyaṃ suṇoma te.
एकतिंसा ये गरुका, अट्ठेत्थ अनवसेसा।
Ekatiṃsā ye garukā, aṭṭhettha anavasesā;
ये गरुका ते दुट्ठुल्ला, ये दुट्ठुल्ला सा सीलविपत्ति।
Ye garukā te duṭṭhullā, ye duṭṭhullā sā sīlavipatti;
पाराजिकं सङ्घादिसेसो, ‘‘सीलविपत्ती’’ति वुच्चति॥
Pārājikaṃ saṅghādiseso, ‘‘sīlavipattī’’ti vuccati.
थुल्लच्चयं पाचित्तिया, पाटिदेसनीयं दुक्कटं।
Thullaccayaṃ pācittiyā, pāṭidesanīyaṃ dukkaṭaṃ;
दुब्भासितं यो चायं, अक्कोसति हसाधिप्पायो।
Dubbhāsitaṃ yo cāyaṃ, akkosati hasādhippāyo;
अयं सा आचारविपत्तिसम्मता॥
Ayaṃ sā ācāravipattisammatā.
विपरीतदिट्ठिं गण्हन्ति, असद्धम्मेहि पुरक्खता।
Viparītadiṭṭhiṃ gaṇhanti, asaddhammehi purakkhatā;
अब्भाचिक्खन्ति सम्बुद्धं, दुप्पञ्ञा मोहपारुता।
Abbhācikkhanti sambuddhaṃ, duppaññā mohapārutā;
अयं सा दिट्ठिविपत्तिसम्मता॥
Ayaṃ sā diṭṭhivipattisammatā.
आजीवहेतु आजीवकारणा पापिच्छो इच्छापकतो असन्तं अभूतं उत्तरिमनुस्सधम्मं उल्लपति, आजीवहेतु आजीवकारणा सञ्चरित्तं समापज्जति, आजीवहेतु आजीवकारणा – ‘‘यो ते विहारे वसति, सो भिक्खु अरहा’’ति भणति, आजीवहेतु आजीवकारणा भिक्खु पणीतभोजनानि अत्तनो अत्थाय विञ्ञापेत्वा भुञ्जति, आजीवहेतु आजीवकारणा भिक्खुनी पणीतभोजनानि अत्तनो अत्थाय विञ्ञापेत्वा भुञ्जति, आजीवहेतु आजीवकारणा सूपं वा ओदनं वा अगिलानो अत्तनो अत्थाय विञ्ञापेत्वा भुञ्जति। अयं सा आजीवविपत्ति सम्मता।
Ājīvahetu ājīvakāraṇā pāpiccho icchāpakato asantaṃ abhūtaṃ uttarimanussadhammaṃ ullapati, ājīvahetu ājīvakāraṇā sañcarittaṃ samāpajjati, ājīvahetu ājīvakāraṇā – ‘‘yo te vihāre vasati, so bhikkhu arahā’’ti bhaṇati, ājīvahetu ājīvakāraṇā bhikkhu paṇītabhojanāni attano atthāya viññāpetvā bhuñjati, ājīvahetu ājīvakāraṇā bhikkhunī paṇītabhojanāni attano atthāya viññāpetvā bhuñjati, ājīvahetu ājīvakāraṇā sūpaṃ vā odanaṃ vā agilāno attano atthāya viññāpetvā bhuñjati. Ayaṃ sā ājīvavipatti sammatā.
एकादस यावततियका, ते सुणोहि यथातथं।
Ekādasa yāvatatiyakā, te suṇohi yathātathaṃ;
उक्खित्तानुवत्तिका, अट्ठ यावततियका।
Ukkhittānuvattikā, aṭṭha yāvatatiyakā;
अरिट्ठो चण्डकाळी च, इमे ते यावततियका॥
Ariṭṭho caṇḍakāḷī ca, ime te yāvatatiyakā.
Footnotes:
Related texts:
अट्ठकथा • Aṭṭhakathā / विनयपिटक (अट्ठकथा) • Vinayapiṭaka (aṭṭhakathā) / परिवार-अट्ठकथा • Parivāra-aṭṭhakathā / चतुविपत्तिवण्णना • Catuvipattivaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / सारत्थदीपनी-टीका • Sāratthadīpanī-ṭīkā / चतुविपत्तिवण्णना • Catuvipattivaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / वजिरबुद्धि-टीका • Vajirabuddhi-ṭīkā / चतुविपत्तिवण्णना • Catuvipattivaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / पाचित्यादियोजनापाळि • Pācityādiyojanāpāḷi / चतुविपत्तिवण्णना • Catuvipattivaṇṇanā
