| Library / Tipiṭaka / ติปิฎก • Tipiṭaka / ปริวารปาฬิ • Parivārapāḷi |
๒. จตุวิปตฺติํ
2. Catuvipattiṃ
๓๓๖.
336.
ตํ ตํ พฺยากตํ อนญฺญถา;
Taṃ taṃ byākataṃ anaññathā;
อญฺญํ ตํ ปุจฺฉามิ ตทิงฺฆ พฺรูหิ;
Aññaṃ taṃ pucchāmi tadiṅgha brūhi;
ครุก ลหุกญฺจาปิ สาวเสสํ;
Garuka lahukañcāpi sāvasesaṃ;
อนวเสสํ ทุฎฺฐุลฺลญฺจ อทุฎฺฐุลฺลํ;
Anavasesaṃ duṭṭhullañca aduṭṭhullaṃ;
เย จ ยาวตติยกาฯ
Ye ca yāvatatiyakā.
สาธารณํ อสาธารณํ;
Sādhāraṇaṃ asādhāraṇaṃ;
สพฺพานิเปตานิ วิยากโรหิ;
Sabbānipetāni viyākarohi;
หนฺท วากฺยํ สุโณม เตฯ
Handa vākyaṃ suṇoma te.
เอกติํสา เย ครุกา, อเฎฺฐตฺถ อนวเสสา;
Ekatiṃsā ye garukā, aṭṭhettha anavasesā;
เย ครุกา เต ทุฎฺฐุลฺลา, เย ทุฎฺฐุลฺลา สา สีลวิปตฺติ;
Ye garukā te duṭṭhullā, ye duṭṭhullā sā sīlavipatti;
ปาราชิกํ สงฺฆาทิเสโส, ‘‘สีลวิปตฺตี’’ติ วุจฺจติฯ
Pārājikaṃ saṅghādiseso, ‘‘sīlavipattī’’ti vuccati.
ถุลฺลจฺจยํ ปาจิตฺติยา, ปาฎิเทสนียํ ทุกฺกฎํ;
Thullaccayaṃ pācittiyā, pāṭidesanīyaṃ dukkaṭaṃ;
ทุพฺภาสิตํ โย จายํ, อโกฺกสติ หสาธิปฺปาโย;
Dubbhāsitaṃ yo cāyaṃ, akkosati hasādhippāyo;
อยํ สา อาจารวิปตฺติสมฺมตาฯ
Ayaṃ sā ācāravipattisammatā.
วิปรีตทิฎฺฐิํ คณฺหนฺติ, อสทฺธเมฺมหิ ปุรกฺขตา;
Viparītadiṭṭhiṃ gaṇhanti, asaddhammehi purakkhatā;
อพฺภาจิกฺขนฺติ สมฺพุทฺธํ, ทุปฺปญฺญา โมหปารุตา;
Abbhācikkhanti sambuddhaṃ, duppaññā mohapārutā;
อยํ สา ทิฎฺฐิวิปตฺติสมฺมตาฯ
Ayaṃ sā diṭṭhivipattisammatā.
อาชีวเหตุ อาชีวการณา ปาปิโจฺฉ อิจฺฉาปกโต อสนฺตํ อภูตํ อุตฺตริมนุสฺสธมฺมํ อุลฺลปติ, อาชีวเหตุ อาชีวการณา สญฺจริตฺตํ สมาปชฺชติ, อาชีวเหตุ อาชีวการณา – ‘‘โย เต วิหาเร วสติ, โส ภิกฺขุ อรหา’’ติ ภณติ, อาชีวเหตุ อาชีวการณา ภิกฺขุ ปณีตโภชนานิ อตฺตโน อตฺถาย วิญฺญาเปตฺวา ภุญฺชติ, อาชีวเหตุ อาชีวการณา ภิกฺขุนี ปณีตโภชนานิ อตฺตโน อตฺถาย วิญฺญาเปตฺวา ภุญฺชติ, อาชีวเหตุ อาชีวการณา สูปํ วา โอทนํ วา อคิลาโน อตฺตโน อตฺถาย วิญฺญาเปตฺวา ภุญฺชติฯ อยํ สา อาชีววิปตฺติ สมฺมตาฯ
Ājīvahetu ājīvakāraṇā pāpiccho icchāpakato asantaṃ abhūtaṃ uttarimanussadhammaṃ ullapati, ājīvahetu ājīvakāraṇā sañcarittaṃ samāpajjati, ājīvahetu ājīvakāraṇā – ‘‘yo te vihāre vasati, so bhikkhu arahā’’ti bhaṇati, ājīvahetu ājīvakāraṇā bhikkhu paṇītabhojanāni attano atthāya viññāpetvā bhuñjati, ājīvahetu ājīvakāraṇā bhikkhunī paṇītabhojanāni attano atthāya viññāpetvā bhuñjati, ājīvahetu ājīvakāraṇā sūpaṃ vā odanaṃ vā agilāno attano atthāya viññāpetvā bhuñjati. Ayaṃ sā ājīvavipatti sammatā.
เอกาทส ยาวตติยกา, เต สุโณหิ ยถาตถํ;
Ekādasa yāvatatiyakā, te suṇohi yathātathaṃ;
อุกฺขิตฺตานุวตฺติกา, อฎฺฐ ยาวตติยกา;
Ukkhittānuvattikā, aṭṭha yāvatatiyakā;
อริโฎฺฐ จณฺฑกาฬี จ, อิเม เต ยาวตติยกาฯ
Ariṭṭho caṇḍakāḷī ca, ime te yāvatatiyakā.
Footnotes:
Related texts:
อฎฺฐกถา • Aṭṭhakathā / วินยปิฎก (อฎฺฐกถา) • Vinayapiṭaka (aṭṭhakathā) / ปริวาร-อฎฺฐกถา • Parivāra-aṭṭhakathā / จตุวิปตฺติวณฺณนา • Catuvipattivaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / สารตฺถทีปนี-ฎีกา • Sāratthadīpanī-ṭīkā / จตุวิปตฺติวณฺณนา • Catuvipattivaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วชิรพุทฺธิ-ฎีกา • Vajirabuddhi-ṭīkā / จตุวิปตฺติวณฺณนา • Catuvipattivaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / ปาจิตฺยาทิโยชนาปาฬิ • Pācityādiyojanāpāḷi / จตุวิปตฺติวณฺณนา • Catuvipattivaṇṇanā
