| Library / Tipiṭaka / តិបិដក • Tipiṭaka / បរិវារបាឡិ • Parivārapāḷi |
២. ចតុវិបត្តិំ
2. Catuvipattiṃ
៣៣៦.
336.
តំ តំ ព្យាកតំ អនញ្ញថា;
Taṃ taṃ byākataṃ anaññathā;
អញ្ញំ តំ បុច្ឆាមិ តទិង្ឃ ព្រូហិ;
Aññaṃ taṃ pucchāmi tadiṅgha brūhi;
គរុក លហុកញ្ចាបិ សាវសេសំ;
Garuka lahukañcāpi sāvasesaṃ;
អនវសេសំ ទុដ្ឋុល្លញ្ច អទុដ្ឋុល្លំ;
Anavasesaṃ duṭṭhullañca aduṭṭhullaṃ;
យេ ច យាវតតិយកា។
Ye ca yāvatatiyakā.
សាធារណំ អសាធារណំ;
Sādhāraṇaṃ asādhāraṇaṃ;
សព្ពានិបេតានិ វិយាករោហិ;
Sabbānipetāni viyākarohi;
ហន្ទ វាក្យំ សុណោម តេ។
Handa vākyaṃ suṇoma te.
ឯកតិំសា យេ គរុកា, អដ្ឋេត្ថ អនវសេសា;
Ekatiṃsā ye garukā, aṭṭhettha anavasesā;
យេ គរុកា តេ ទុដ្ឋុល្លា, យេ ទុដ្ឋុល្លា សា សីលវិបត្តិ;
Ye garukā te duṭṭhullā, ye duṭṭhullā sā sīlavipatti;
បារាជិកំ សង្ឃាទិសេសោ, ‘‘សីលវិបត្តី’’តិ វុច្ចតិ។
Pārājikaṃ saṅghādiseso, ‘‘sīlavipattī’’ti vuccati.
ថុល្លច្ចយំ បាចិត្តិយា, បាដិទេសនីយំ ទុក្កដំ;
Thullaccayaṃ pācittiyā, pāṭidesanīyaṃ dukkaṭaṃ;
ទុព្ភាសិតំ យោ ចាយំ, អក្កោសតិ ហសាធិប្បាយោ;
Dubbhāsitaṃ yo cāyaṃ, akkosati hasādhippāyo;
អយំ សា អាចារវិបត្តិសម្មតា។
Ayaṃ sā ācāravipattisammatā.
វិបរីតទិដ្ឋិំ គណ្ហន្តិ, អសទ្ធម្មេហិ បុរក្ខតា;
Viparītadiṭṭhiṃ gaṇhanti, asaddhammehi purakkhatā;
អព្ភាចិក្ខន្តិ សម្ពុទ្ធំ, ទុប្បញ្ញា មោហបារុតា;
Abbhācikkhanti sambuddhaṃ, duppaññā mohapārutā;
អយំ សា ទិដ្ឋិវិបត្តិសម្មតា។
Ayaṃ sā diṭṭhivipattisammatā.
អាជីវហេតុ អាជីវការណា បាបិច្ឆោ ឥច្ឆាបកតោ អសន្តំ អភូតំ ឧត្តរិមនុស្សធម្មំ ឧល្លបតិ, អាជីវហេតុ អាជីវការណា សញ្ចរិត្តំ សមាបជ្ជតិ, អាជីវហេតុ អាជីវការណា – ‘‘យោ តេ វិហារេ វសតិ, សោ ភិក្ខុ អរហា’’តិ ភណតិ, អាជីវហេតុ អាជីវការណា ភិក្ខុ បណីតភោជនានិ អត្តនោ អត្ថាយ វិញ្ញាបេត្វា ភុញ្ជតិ, អាជីវហេតុ អាជីវការណា ភិក្ខុនី បណីតភោជនានិ អត្តនោ អត្ថាយ វិញ្ញាបេត្វា ភុញ្ជតិ, អាជីវហេតុ អាជីវការណា សូបំ វា ឱទនំ វា អគិលានោ អត្តនោ អត្ថាយ វិញ្ញាបេត្វា ភុញ្ជតិ។ អយំ សា អាជីវវិបត្តិ សម្មតា។
Ājīvahetu ājīvakāraṇā pāpiccho icchāpakato asantaṃ abhūtaṃ uttarimanussadhammaṃ ullapati, ājīvahetu ājīvakāraṇā sañcarittaṃ samāpajjati, ājīvahetu ājīvakāraṇā – ‘‘yo te vihāre vasati, so bhikkhu arahā’’ti bhaṇati, ājīvahetu ājīvakāraṇā bhikkhu paṇītabhojanāni attano atthāya viññāpetvā bhuñjati, ājīvahetu ājīvakāraṇā bhikkhunī paṇītabhojanāni attano atthāya viññāpetvā bhuñjati, ājīvahetu ājīvakāraṇā sūpaṃ vā odanaṃ vā agilāno attano atthāya viññāpetvā bhuñjati. Ayaṃ sā ājīvavipatti sammatā.
ឯកាទស យាវតតិយកា, តេ សុណោហិ យថាតថំ;
Ekādasa yāvatatiyakā, te suṇohi yathātathaṃ;
ឧក្ខិត្តានុវត្តិកា, អដ្ឋ យាវតតិយកា;
Ukkhittānuvattikā, aṭṭha yāvatatiyakā;
អរិដ្ឋោ ចណ្ឌកាឡី ច, ឥមេ តេ យាវតតិយកា។
Ariṭṭho caṇḍakāḷī ca, ime te yāvatatiyakā.
Footnotes:
Related texts:
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / បរិវារ-អដ្ឋកថា • Parivāra-aṭṭhakathā / ចតុវិបត្តិវណ្ណនា • Catuvipattivaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / ចតុវិបត្តិវណ្ណនា • Catuvipattivaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / ចតុវិបត្តិវណ្ណនា • Catuvipattivaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / ចតុវិបត្តិវណ្ណនា • Catuvipattivaṇṇanā
