| Library / Tipiṭaka / ತಿಪಿಟಕ • Tipiṭaka / ಪರಿವಾರಪಾಳಿ • Parivārapāḷi |
೨. ಚತುವಿಪತ್ತಿಂ
2. Catuvipattiṃ
೩೩೬.
336.
ತಂ ತಂ ಬ್ಯಾಕತಂ ಅನಞ್ಞಥಾ।
Taṃ taṃ byākataṃ anaññathā;
ಅಞ್ಞಂ ತಂ ಪುಚ್ಛಾಮಿ ತದಿಙ್ಘ ಬ್ರೂಹಿ।
Aññaṃ taṃ pucchāmi tadiṅgha brūhi;
ಗರುಕ ಲಹುಕಞ್ಚಾಪಿ ಸಾವಸೇಸಂ।
Garuka lahukañcāpi sāvasesaṃ;
ಅನವಸೇಸಂ ದುಟ್ಠುಲ್ಲಞ್ಚ ಅದುಟ್ಠುಲ್ಲಂ।
Anavasesaṃ duṭṭhullañca aduṭṭhullaṃ;
ಯೇ ಚ ಯಾವತತಿಯಕಾ॥
Ye ca yāvatatiyakā.
ಸಾಧಾರಣಂ ಅಸಾಧಾರಣಂ।
Sādhāraṇaṃ asādhāraṇaṃ;
ಸಬ್ಬಾನಿಪೇತಾನಿ ವಿಯಾಕರೋಹಿ।
Sabbānipetāni viyākarohi;
ಹನ್ದ ವಾಕ್ಯಂ ಸುಣೋಮ ತೇ॥
Handa vākyaṃ suṇoma te.
ಏಕತಿಂಸಾ ಯೇ ಗರುಕಾ, ಅಟ್ಠೇತ್ಥ ಅನವಸೇಸಾ।
Ekatiṃsā ye garukā, aṭṭhettha anavasesā;
ಯೇ ಗರುಕಾ ತೇ ದುಟ್ಠುಲ್ಲಾ, ಯೇ ದುಟ್ಠುಲ್ಲಾ ಸಾ ಸೀಲವಿಪತ್ತಿ।
Ye garukā te duṭṭhullā, ye duṭṭhullā sā sīlavipatti;
ಪಾರಾಜಿಕಂ ಸಙ್ಘಾದಿಸೇಸೋ, ‘‘ಸೀಲವಿಪತ್ತೀ’’ತಿ ವುಚ್ಚತಿ॥
Pārājikaṃ saṅghādiseso, ‘‘sīlavipattī’’ti vuccati.
ಥುಲ್ಲಚ್ಚಯಂ ಪಾಚಿತ್ತಿಯಾ, ಪಾಟಿದೇಸನೀಯಂ ದುಕ್ಕಟಂ।
Thullaccayaṃ pācittiyā, pāṭidesanīyaṃ dukkaṭaṃ;
ದುಬ್ಭಾಸಿತಂ ಯೋ ಚಾಯಂ, ಅಕ್ಕೋಸತಿ ಹಸಾಧಿಪ್ಪಾಯೋ।
Dubbhāsitaṃ yo cāyaṃ, akkosati hasādhippāyo;
ಅಯಂ ಸಾ ಆಚಾರವಿಪತ್ತಿಸಮ್ಮತಾ॥
Ayaṃ sā ācāravipattisammatā.
ವಿಪರೀತದಿಟ್ಠಿಂ ಗಣ್ಹನ್ತಿ, ಅಸದ್ಧಮ್ಮೇಹಿ ಪುರಕ್ಖತಾ।
Viparītadiṭṭhiṃ gaṇhanti, asaddhammehi purakkhatā;
ಅಬ್ಭಾಚಿಕ್ಖನ್ತಿ ಸಮ್ಬುದ್ಧಂ, ದುಪ್ಪಞ್ಞಾ ಮೋಹಪಾರುತಾ।
Abbhācikkhanti sambuddhaṃ, duppaññā mohapārutā;
ಅಯಂ ಸಾ ದಿಟ್ಠಿವಿಪತ್ತಿಸಮ್ಮತಾ॥
Ayaṃ sā diṭṭhivipattisammatā.
ಆಜೀವಹೇತು ಆಜೀವಕಾರಣಾ ಪಾಪಿಚ್ಛೋ ಇಚ್ಛಾಪಕತೋ ಅಸನ್ತಂ ಅಭೂತಂ ಉತ್ತರಿಮನುಸ್ಸಧಮ್ಮಂ ಉಲ್ಲಪತಿ, ಆಜೀವಹೇತು ಆಜೀವಕಾರಣಾ ಸಞ್ಚರಿತ್ತಂ ಸಮಾಪಜ್ಜತಿ, ಆಜೀವಹೇತು ಆಜೀವಕಾರಣಾ – ‘‘ಯೋ ತೇ ವಿಹಾರೇ ವಸತಿ, ಸೋ ಭಿಕ್ಖು ಅರಹಾ’’ತಿ ಭಣತಿ, ಆಜೀವಹೇತು ಆಜೀವಕಾರಣಾ ಭಿಕ್ಖು ಪಣೀತಭೋಜನಾನಿ ಅತ್ತನೋ ಅತ್ಥಾಯ ವಿಞ್ಞಾಪೇತ್ವಾ ಭುಞ್ಜತಿ, ಆಜೀವಹೇತು ಆಜೀವಕಾರಣಾ ಭಿಕ್ಖುನೀ ಪಣೀತಭೋಜನಾನಿ ಅತ್ತನೋ ಅತ್ಥಾಯ ವಿಞ್ಞಾಪೇತ್ವಾ ಭುಞ್ಜತಿ, ಆಜೀವಹೇತು ಆಜೀವಕಾರಣಾ ಸೂಪಂ ವಾ ಓದನಂ ವಾ ಅಗಿಲಾನೋ ಅತ್ತನೋ ಅತ್ಥಾಯ ವಿಞ್ಞಾಪೇತ್ವಾ ಭುಞ್ಜತಿ। ಅಯಂ ಸಾ ಆಜೀವವಿಪತ್ತಿ ಸಮ್ಮತಾ।
Ājīvahetu ājīvakāraṇā pāpiccho icchāpakato asantaṃ abhūtaṃ uttarimanussadhammaṃ ullapati, ājīvahetu ājīvakāraṇā sañcarittaṃ samāpajjati, ājīvahetu ājīvakāraṇā – ‘‘yo te vihāre vasati, so bhikkhu arahā’’ti bhaṇati, ājīvahetu ājīvakāraṇā bhikkhu paṇītabhojanāni attano atthāya viññāpetvā bhuñjati, ājīvahetu ājīvakāraṇā bhikkhunī paṇītabhojanāni attano atthāya viññāpetvā bhuñjati, ājīvahetu ājīvakāraṇā sūpaṃ vā odanaṃ vā agilāno attano atthāya viññāpetvā bhuñjati. Ayaṃ sā ājīvavipatti sammatā.
ಏಕಾದಸ ಯಾವತತಿಯಕಾ, ತೇ ಸುಣೋಹಿ ಯಥಾತಥಂ।
Ekādasa yāvatatiyakā, te suṇohi yathātathaṃ;
ಉಕ್ಖಿತ್ತಾನುವತ್ತಿಕಾ, ಅಟ್ಠ ಯಾವತತಿಯಕಾ।
Ukkhittānuvattikā, aṭṭha yāvatatiyakā;
ಅರಿಟ್ಠೋ ಚಣ್ಡಕಾಳೀ ಚ, ಇಮೇ ತೇ ಯಾವತತಿಯಕಾ॥
Ariṭṭho caṇḍakāḷī ca, ime te yāvatatiyakā.
Footnotes:
Related texts:
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಪರಿವಾರ-ಅಟ್ಠಕಥಾ • Parivāra-aṭṭhakathā / ಚತುವಿಪತ್ತಿವಣ್ಣನಾ • Catuvipattivaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ಚತುವಿಪತ್ತಿವಣ್ಣನಾ • Catuvipattivaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ಚತುವಿಪತ್ತಿವಣ್ಣನಾ • Catuvipattivaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi / ಚತುವಿಪತ್ತಿವಣ್ಣನಾ • Catuvipattivaṇṇanā
