| Library / Tipiṭaka / তিপিটক • Tipiṭaka / পরিৰার-অট্ঠকথা • Parivāra-aṭṭhakathā |
চতুৰিপত্তিৰণ্ণনা
Catuvipattivaṇṇanā
৩৩৬. যং তং পুচ্ছিম্হাতি যং ত্ৰং অপুচ্ছিম্হা। অকিত্তযীতি অভাসি। নোতি অম্হাকং । তং তং ব্যাকতন্তি যং যং পুট্ঠং, তং তদেৰ ব্যাকতং। অনঞ্ঞথাতি অঞ্ঞথা অকত্ৰা ব্যাকতং।
336.Yaṃ taṃ pucchimhāti yaṃ tvaṃ apucchimhā. Akittayīti abhāsi. Noti amhākaṃ . Taṃ taṃ byākatanti yaṃ yaṃ puṭṭhaṃ, taṃ tadeva byākataṃ. Anaññathāti aññathā akatvā byākataṃ.
যে দুট্ঠুল্লা সা সীলৰিপত্তীতি এত্থ কিঞ্চাপি সীলৰিপত্তি নাম পঞ্হে নত্থি, অথ খো দুট্ঠুল্লং ৰিস্সজ্জেতুকামতাযেতং ৰুত্তং। চতূসু হি ৰিপত্তীসু দুট্ঠুল্লং একায ৰিপত্তিযা সঙ্গহিতং, অদুট্ঠুল্লং তীহি ৰিপত্তীহি সঙ্গহিতং। তস্মা ‘‘যে দুট্ঠুল্লা সা সীলৰিপত্তী’’তি ৰত্ৰা তমেৰ ৰিত্থারতো দস্সেতুং ‘‘পারাজিকং সঙ্ঘাদিসেসো সীলৰিপত্তীতি ৰুচ্চতী’’তি আহ।
Ye duṭṭhullā sā sīlavipattīti ettha kiñcāpi sīlavipatti nāma pañhe natthi, atha kho duṭṭhullaṃ vissajjetukāmatāyetaṃ vuttaṃ. Catūsu hi vipattīsu duṭṭhullaṃ ekāya vipattiyā saṅgahitaṃ, aduṭṭhullaṃ tīhi vipattīhi saṅgahitaṃ. Tasmā ‘‘ye duṭṭhullā sā sīlavipattī’’ti vatvā tameva vitthārato dassetuṃ ‘‘pārājikaṃ saṅghādiseso sīlavipattīti vuccatī’’ti āha.
ইদানি তিস্সন্নং ৰিপত্তীনং ৰসেন অদুট্ঠুল্লং দস্সেতুং ‘‘থুল্লচ্চয’’ন্তিআদিমাহ। তত্থ যো চাযং, অক্কোসতি হসাধিপ্পাযোতি ইদং দুব্ভাসিতস্স ৰত্থুদস্সনত্থং ৰুত্তং।
Idāni tissannaṃ vipattīnaṃ vasena aduṭṭhullaṃ dassetuṃ ‘‘thullaccaya’’ntiādimāha. Tattha yo cāyaṃ, akkosati hasādhippāyoti idaṃ dubbhāsitassa vatthudassanatthaṃ vuttaṃ.
অব্ভাচিক্খন্তীতি ‘‘তথাহং ভগৰতা ধম্মং দেসিতং আজানামী’’তি ৰদন্তা অব্ভাচিক্খন্তি।
Abbhācikkhantīti ‘‘tathāhaṃ bhagavatā dhammaṃ desitaṃ ājānāmī’’ti vadantā abbhācikkhanti.
অযং সা আজীৰৰিপত্তিসম্মতাতি অযং ছহি সিক্খাপদেহি সঙ্গহিতা আজীৰৰিপত্তি নাম চতুত্থা ৰিপত্তি সম্মতাতি এত্তাৰতা ‘‘অদুট্ঠুল্ল’’ন্তি ইদং ৰিস্সজ্জিতং হোতি।
Ayaṃ sā ājīvavipattisammatāti ayaṃ chahi sikkhāpadehi saṅgahitā ājīvavipatti nāma catutthā vipatti sammatāti ettāvatā ‘‘aduṭṭhulla’’nti idaṃ vissajjitaṃ hoti.
ইদানি ‘‘যে চ যাৰততিযকা’’তি পঞ্হং ৰিস্সজ্জেতুং ‘‘একাদসা’’তিআদিমাহ।
Idāni ‘‘ye ca yāvatatiyakā’’ti pañhaṃ vissajjetuṃ ‘‘ekādasā’’tiādimāha.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / পরিৰারপাল়ি • Parivārapāḷi / ২. চতুৰিপত্তিং • 2. Catuvipattiṃ
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / চতুৰিপত্তিৰণ্ণনা • Catuvipattivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / চতুৰিপত্তিৰণ্ণনা • Catuvipattivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / চতুৰিপত্তিৰণ্ণনা • Catuvipattivaṇṇanā
