| Library / Tipiṭaka / តិបិដក • Tipiṭaka / បរិវារ-អដ្ឋកថា • Parivāra-aṭṭhakathā |
ចតុវិបត្តិវណ្ណនា
Catuvipattivaṇṇanā
៣៣៦. យំ តំ បុច្ឆិម្ហាតិ យំ ត្វំ អបុច្ឆិម្ហា។ អកិត្តយីតិ អភាសិ។ នោតិ អម្ហាកំ ។ តំ តំ ព្យាកតន្តិ យំ យំ បុដ្ឋំ, តំ តទេវ ព្យាកតំ។ អនញ្ញថាតិ អញ្ញថា អកត្វា ព្យាកតំ។
336.Yaṃ taṃ pucchimhāti yaṃ tvaṃ apucchimhā. Akittayīti abhāsi. Noti amhākaṃ . Taṃ taṃ byākatanti yaṃ yaṃ puṭṭhaṃ, taṃ tadeva byākataṃ. Anaññathāti aññathā akatvā byākataṃ.
យេ ទុដ្ឋុល្លា សា សីលវិបត្តីតិ ឯត្ថ កិញ្ចាបិ សីលវិបត្តិ នាម បញ្ហេ នត្ថិ, អថ ខោ ទុដ្ឋុល្លំ វិស្សជ្ជេតុកាមតាយេតំ វុត្តំ។ ចតូសុ ហិ វិបត្តីសុ ទុដ្ឋុល្លំ ឯកាយ វិបត្តិយា សង្គហិតំ, អទុដ្ឋុល្លំ តីហិ វិបត្តីហិ សង្គហិតំ។ តស្មា ‘‘យេ ទុដ្ឋុល្លា សា សីលវិបត្តី’’តិ វត្វា តមេវ វិត្ថារតោ ទស្សេតុំ ‘‘បារាជិកំ សង្ឃាទិសេសោ សីលវិបត្តីតិ វុច្ចតី’’តិ អាហ។
Ye duṭṭhullā sā sīlavipattīti ettha kiñcāpi sīlavipatti nāma pañhe natthi, atha kho duṭṭhullaṃ vissajjetukāmatāyetaṃ vuttaṃ. Catūsu hi vipattīsu duṭṭhullaṃ ekāya vipattiyā saṅgahitaṃ, aduṭṭhullaṃ tīhi vipattīhi saṅgahitaṃ. Tasmā ‘‘ye duṭṭhullā sā sīlavipattī’’ti vatvā tameva vitthārato dassetuṃ ‘‘pārājikaṃ saṅghādiseso sīlavipattīti vuccatī’’ti āha.
ឥទានិ តិស្សន្នំ វិបត្តីនំ វសេន អទុដ្ឋុល្លំ ទស្សេតុំ ‘‘ថុល្លច្ចយ’’ន្តិអាទិមាហ។ តត្ថ យោ ចាយំ, អក្កោសតិ ហសាធិប្បាយោតិ ឥទំ ទុព្ភាសិតស្ស វត្ថុទស្សនត្ថំ វុត្តំ។
Idāni tissannaṃ vipattīnaṃ vasena aduṭṭhullaṃ dassetuṃ ‘‘thullaccaya’’ntiādimāha. Tattha yo cāyaṃ, akkosati hasādhippāyoti idaṃ dubbhāsitassa vatthudassanatthaṃ vuttaṃ.
អព្ភាចិក្ខន្តីតិ ‘‘តថាហំ ភគវតា ធម្មំ ទេសិតំ អាជានាមី’’តិ វទន្តា អព្ភាចិក្ខន្តិ។
Abbhācikkhantīti ‘‘tathāhaṃ bhagavatā dhammaṃ desitaṃ ājānāmī’’ti vadantā abbhācikkhanti.
អយំ សា អាជីវវិបត្តិសម្មតាតិ អយំ ឆហិ សិក្ខាបទេហិ សង្គហិតា អាជីវវិបត្តិ នាម ចតុត្ថា វិបត្តិ សម្មតាតិ ឯត្តាវតា ‘‘អទុដ្ឋុល្ល’’ន្តិ ឥទំ វិស្សជ្ជិតំ ហោតិ។
Ayaṃ sā ājīvavipattisammatāti ayaṃ chahi sikkhāpadehi saṅgahitā ājīvavipatti nāma catutthā vipatti sammatāti ettāvatā ‘‘aduṭṭhulla’’nti idaṃ vissajjitaṃ hoti.
ឥទានិ ‘‘យេ ច យាវតតិយកា’’តិ បញ្ហំ វិស្សជ្ជេតុំ ‘‘ឯកាទសា’’តិអាទិមាហ។
Idāni ‘‘ye ca yāvatatiyakā’’ti pañhaṃ vissajjetuṃ ‘‘ekādasā’’tiādimāha.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / បរិវារបាឡិ • Parivārapāḷi / ២. ចតុវិបត្តិំ • 2. Catuvipattiṃ
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / ចតុវិបត្តិវណ្ណនា • Catuvipattivaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / ចតុវិបត្តិវណ្ណនា • Catuvipattivaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / ចតុវិបត្តិវណ្ណនា • Catuvipattivaṇṇanā
