| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
8. சேதனாஸுத்தங்
8. Cetanāsuttaṃ
38. ஸாவத்தி²னிதா³னங் . ‘‘யஞ்ச, பி⁴க்க²வே, சேதேதி யஞ்ச பகப்பேதி யஞ்ச அனுஸேதி, ஆரம்மணமேதங் 1 ஹோதி விஞ்ஞாணஸ்ஸ டி²தியா. ஆரம்மணே ஸதி பதிட்டா² விஞ்ஞாணஸ்ஸ ஹோதி. தஸ்மிங் பதிட்டி²தே விஞ்ஞாணே விரூள்ஹே ஆயதிங் புனப்³ப⁴வாபி⁴னிப்³ப³த்தி ஹோதி. ஆயதிங் புனப்³ப⁴வாபி⁴னிப்³ப³த்தியா ஸதி ஆயதிங் ஜாதி ஜராமரணங் ஸோகபரிதே³வது³க்க²தோ³மனஸ்ஸுபாயாஸா ஸம்ப⁴வந்தி. ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ ஸமுத³யோ ஹோதி’’.
38. Sāvatthinidānaṃ . ‘‘Yañca, bhikkhave, ceteti yañca pakappeti yañca anuseti, ārammaṇametaṃ 2 hoti viññāṇassa ṭhitiyā. Ārammaṇe sati patiṭṭhā viññāṇassa hoti. Tasmiṃ patiṭṭhite viññāṇe virūḷhe āyatiṃ punabbhavābhinibbatti hoti. Āyatiṃ punabbhavābhinibbattiyā sati āyatiṃ jāti jarāmaraṇaṃ sokaparidevadukkhadomanassupāyāsā sambhavanti. Evametassa kevalassa dukkhakkhandhassa samudayo hoti’’.
‘‘நோ சே, பி⁴க்க²வே, சேதேதி நோ சே பகப்பேதி, அத² சே அனுஸேதி, ஆரம்மணமேதங் ஹோதி விஞ்ஞாணஸ்ஸ டி²தியா. ஆரம்மணே ஸதி பதிட்டா² விஞ்ஞாணஸ்ஸ ஹோதி. தஸ்மிங் பதிட்டி²தே விஞ்ஞாணே விரூள்ஹே ஆயதிங் புனப்³ப⁴வாபி⁴னிப்³ப³த்தி ஹோதி. ஆயதிங் புனப்³ப⁴வாபி⁴னிப்³ப³த்தியா ஸதி ஆயதிங் ஜாதிஜராமரணங் ஸோகபரிதே³வது³க்க²தோ³மனஸ்ஸுபாயாஸா ஸம்ப⁴வந்தி. ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ ஸமுத³யோ ஹோதி.
‘‘No ce, bhikkhave, ceteti no ce pakappeti, atha ce anuseti, ārammaṇametaṃ hoti viññāṇassa ṭhitiyā. Ārammaṇe sati patiṭṭhā viññāṇassa hoti. Tasmiṃ patiṭṭhite viññāṇe virūḷhe āyatiṃ punabbhavābhinibbatti hoti. Āyatiṃ punabbhavābhinibbattiyā sati āyatiṃ jātijarāmaraṇaṃ sokaparidevadukkhadomanassupāyāsā sambhavanti. Evametassa kevalassa dukkhakkhandhassa samudayo hoti.
‘‘யதோ ச கோ², பி⁴க்க²வே, நோ சேவ சேதேதி நோ ச பகப்பேதி நோ ச அனுஸேதி, ஆரம்மணமேதங் ந ஹோதி விஞ்ஞாணஸ்ஸ டி²தியா . ஆரம்மணே அஸதி பதிட்டா² விஞ்ஞாணஸ்ஸ ந ஹோதி. தத³ப்பதிட்டி²தே விஞ்ஞாணே அவிரூள்ஹே ஆயதிங் புனப்³ப⁴வாபி⁴னிப்³ப³த்தி ந ஹோதி. ஆயதிங் புனப்³ப⁴வாபி⁴னிப்³ப³த்தியா அஸதி ஆயதிங் ஜாதிஜராமரணங் ஸோகபரிதே³வது³க்க²தோ³மனஸ்ஸுபாயாஸா நிருஜ்ஜ²ந்தி. ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ நிரோதோ⁴ ஹோதீ’’தி. அட்ட²மங்.
‘‘Yato ca kho, bhikkhave, no ceva ceteti no ca pakappeti no ca anuseti, ārammaṇametaṃ na hoti viññāṇassa ṭhitiyā . Ārammaṇe asati patiṭṭhā viññāṇassa na hoti. Tadappatiṭṭhite viññāṇe avirūḷhe āyatiṃ punabbhavābhinibbatti na hoti. Āyatiṃ punabbhavābhinibbattiyā asati āyatiṃ jātijarāmaraṇaṃ sokaparidevadukkhadomanassupāyāsā nirujjhanti. Evametassa kevalassa dukkhakkhandhassa nirodho hotī’’ti. Aṭṭhamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 8. சேதனாஸுத்தவண்ணனா • 8. Cetanāsuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 8. சேதனாஸுத்தவண்ணனா • 8. Cetanāsuttavaṇṇanā
