| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
(18) 3. ஸஞ்சேதனியவக்³கோ³
(18) 3. Sañcetaniyavaggo
1. சேதனாஸுத்தவண்ணனா
1. Cetanāsuttavaṇṇanā
171. ததியஸ்ஸ பட²மே காயேதி காயத்³வாரே, காயவிஞ்ஞத்தியா ஸதீதி அத்தோ². காயஸஞ்சேதனாஹேதூதிஆதீ³ஸு காயஸஞ்சேதனா நாம காயத்³வாரே சேதனா பகப்பனா. ஸா அட்ட² காமாவசரகுஸலவஸேன அட்ட²விதா⁴, அகுஸலவஸேன த்³வாத³ஸவிதா⁴தி வீஸதிவிதா⁴. ததா² வசீஸஞ்சேதனா, ததா² மனோஸஞ்சேதனா. அபிசெத்த² நவ மஹக்³க³தசேதனாபி லப்³ப⁴ந்தி. காயஸஞ்சேதனாஹேதூதி காயஸஞ்சேதனாபச்சயா. உப்பஜ்ஜதி அஜ்ஜ²த்தங் ஸுக²து³க்க²ந்தி அட்ட²குஸலகம்மபச்சயா நியகஜ்ஜ²த்தே ஸுக²ங் உப்பஜ்ஜதி, த்³வாத³ஸஅகுஸலகம்மபச்சயா து³க்க²ங். ஸேஸத்³வாரேஸுபி ஏஸேவ நயோ. அவிஜ்ஜாபச்சயாவாதி அவிஜ்ஜாகாரணேனேவ. ஸசே ஹி அவிஜ்ஜா சா²த³யமானா பச்சயோ ஹோதி, ஏவங் ஸந்தே தீஸு த்³வாரேஸு ஸுக²து³க்கா²னங் பச்சயபூ⁴தா சேதனா உப்பஜ்ஜதி. இதி மூலபூ⁴தாய அவிஜ்ஜாய வஸேனேதங் வுத்தங்.
171. Tatiyassa paṭhame kāyeti kāyadvāre, kāyaviññattiyā satīti attho. Kāyasañcetanāhetūtiādīsu kāyasañcetanā nāma kāyadvāre cetanā pakappanā. Sā aṭṭha kāmāvacarakusalavasena aṭṭhavidhā, akusalavasena dvādasavidhāti vīsatividhā. Tathā vacīsañcetanā, tathā manosañcetanā. Apicettha nava mahaggatacetanāpi labbhanti. Kāyasañcetanāhetūti kāyasañcetanāpaccayā. Uppajjati ajjhattaṃ sukhadukkhanti aṭṭhakusalakammapaccayā niyakajjhatte sukhaṃ uppajjati, dvādasaakusalakammapaccayā dukkhaṃ. Sesadvāresupi eseva nayo. Avijjāpaccayāvāti avijjākāraṇeneva. Sace hi avijjā chādayamānā paccayo hoti, evaṃ sante tīsu dvāresu sukhadukkhānaṃ paccayabhūtā cetanā uppajjati. Iti mūlabhūtāya avijjāya vasenetaṃ vuttaṃ.
ஸாமங் வாதிஆதீ³ஸு பரேஹி அனாணத்தோ ஸயமேவ அபி⁴ஸங்க²ரொந்தோ ஸாமங் காயஸங்கா²ரங் அபி⁴ஸங்க²ரோதி நாம. யங் பன பரே ஸமாத³பெத்வா ஆணாபெத்வா காரெந்தி, தஸ்ஸ தங் காயஸங்கா²ரங் பரே அபி⁴ஸங்க²ரொந்தி நாம. யோ பன குஸலங் குஸலந்தி அகுஸலங் அகுஸலந்தி குஸலவிபாகங் குஸலவிபாகோதி அகுஸலவிபாகங் அகுஸலவிபாகோதி ஜானந்தோ காயத்³வாரே வீஸதிவித⁴ங் காயஸங்கா²ரங் அபி⁴ஸங்க²ரோதி, அயங் ஸம்பஜானோ அபி⁴ஸங்க²ரோதி நாம. யோ ஏவங் அஜானந்தோ அபி⁴ஸங்க²ரோதி, அயங் அஸம்பஜானோ அபி⁴ஸங்க²ரோதி நாம. ஸேஸத்³வாரேஸுபி ஏஸேவ நயோ.
Sāmaṃ vātiādīsu parehi anāṇatto sayameva abhisaṅkharonto sāmaṃ kāyasaṅkhāraṃ abhisaṅkharoti nāma. Yaṃ pana pare samādapetvā āṇāpetvā kārenti, tassa taṃ kāyasaṅkhāraṃ pare abhisaṅkharonti nāma. Yo pana kusalaṃ kusalanti akusalaṃ akusalanti kusalavipākaṃ kusalavipākoti akusalavipākaṃ akusalavipākoti jānanto kāyadvāre vīsatividhaṃ kāyasaṅkhāraṃ abhisaṅkharoti, ayaṃ sampajāno abhisaṅkharoti nāma. Yo evaṃ ajānanto abhisaṅkharoti, ayaṃ asampajāno abhisaṅkharoti nāma. Sesadvāresupi eseva nayo.
தத்த² அஸம்பஜானகம்மங் ஏவங் வேதி³தப்³ப³ங் – த³ஹரதா³ரகா ‘‘மாதாபிதூஹி கதங் கரோமா’’தி சேதியங் வந்த³ந்தி, புப்ப²பூஜங் கரொந்தி, பி⁴க்கு²ஸங்க⁴ங் வந்த³ந்தி, தேஸங் குஸலந்தி அஜானந்தானம்பி தங் குஸலமேவ ஹோதி. ததா² மிக³பக்கி²ஆத³யோ திரச்சா²னா த⁴ம்மங் ஸுணந்தி, ஸங்க⁴ங் வந்த³ந்தி, சேதியங் வந்த³ந்தி, தேஸங் ஜானந்தானம்பி அஜானந்தானம்பி தங் குஸலமேவ ஹோதி. த³ஹரதா³ரகா பன மாதாபிதரோ ஹத்த²பாதே³ஹி பஹரந்தி, பி⁴க்கூ²னங் தலஸத்திகங் உக்³கி³ரந்தி, த³ண்ட³ங் கி²பந்தி, அக்கோஸந்தி . கா³வியோ பி⁴க்கு²ஸங்க⁴ங் அனுப³ந்த⁴ந்தி, ஸுனகா² அனுப³ந்த⁴ந்தி, ட³ங்ஸந்தி, ஸீஹப்³யக்³கா⁴த³யோ அனுப³ந்த⁴ந்தி, ஜீவிதா வோரோபெந்தி. தேஸங் ஜானந்தானம்பி அஜானந்தானம்பி அகுஸலகம்மங் ஹோதீதி வேதி³தப்³ப³ங்.
Tattha asampajānakammaṃ evaṃ veditabbaṃ – daharadārakā ‘‘mātāpitūhi kataṃ karomā’’ti cetiyaṃ vandanti, pupphapūjaṃ karonti, bhikkhusaṅghaṃ vandanti, tesaṃ kusalanti ajānantānampi taṃ kusalameva hoti. Tathā migapakkhiādayo tiracchānā dhammaṃ suṇanti, saṅghaṃ vandanti, cetiyaṃ vandanti, tesaṃ jānantānampi ajānantānampi taṃ kusalameva hoti. Daharadārakā pana mātāpitaro hatthapādehi paharanti, bhikkhūnaṃ talasattikaṃ uggiranti, daṇḍaṃ khipanti, akkosanti . Gāviyo bhikkhusaṅghaṃ anubandhanti, sunakhā anubandhanti, ḍaṃsanti, sīhabyagghādayo anubandhanti, jīvitā voropenti. Tesaṃ jānantānampi ajānantānampi akusalakammaṃ hotīti veditabbaṃ.
இதா³னி தீஸுபி த்³வாரேஸு ஆயூஹனசேதனா ஸமோதா⁴னேதப்³பா³. ஸெய்யதி²த³ங் – காயத்³வாரே ஸயங்கதமூலிகா வீஸதி சேதனா, ஆணத்திமூலிகா வீஸதி, ஸம்பஜானமூலிகா வீஸதி, அஸம்பஜானமூலிகா வீஸதீதி அஸீதி சேதனா ஹொந்தி, ததா² வசீத்³வாரே. மனொத்³வாரே பன ஏகேகஸ்மிம்பி விகப்பே ஏகூனதிங்ஸ கத்வா ஸதஞ்ச ஸோளஸ ச ஹொந்தி. இதி ஸப்³பா³பி தீஸு த்³வாரேஸு த்³வே ஸதானி ச²ஸத்ததி ச சேதனா. தா ஸப்³பா³பி ஸங்கா²ரக்க²ந்தோ⁴தேவ ஸங்க²ங் க³ச்ச²ந்தி, தங்ஸம்பயுத்தோ வேத³யிதாகாரோ வேத³னாக்க²ந்தோ⁴, ஸஞ்ஜானநாகாரோ ஸஞ்ஞாக்க²ந்தோ⁴, சித்தங் விஞ்ஞாணக்க²ந்தோ⁴, காயோ உபாதா³ரூபங், தஸ்ஸ பச்சயா சதஸ்ஸோ தா⁴துயோ சத்தாரி பூ⁴தானீதி இமே பஞ்சக்க²ந்தா⁴ து³க்க²ஸச்சங் நாம.
Idāni tīsupi dvāresu āyūhanacetanā samodhānetabbā. Seyyathidaṃ – kāyadvāre sayaṃkatamūlikā vīsati cetanā, āṇattimūlikā vīsati, sampajānamūlikā vīsati, asampajānamūlikā vīsatīti asīti cetanā honti, tathā vacīdvāre. Manodvāre pana ekekasmimpi vikappe ekūnatiṃsa katvā satañca soḷasa ca honti. Iti sabbāpi tīsu dvāresu dve satāni chasattati ca cetanā. Tā sabbāpi saṅkhārakkhandhoteva saṅkhaṃ gacchanti, taṃsampayutto vedayitākāro vedanākkhandho, sañjānanākāro saññākkhandho, cittaṃ viññāṇakkhandho, kāyo upādārūpaṃ, tassa paccayā catasso dhātuyo cattāri bhūtānīti ime pañcakkhandhā dukkhasaccaṃ nāma.
இமேஸு, பி⁴க்க²வே, த⁴ம்மேஸு அவிஜ்ஜா அனுபதிதாதி இமேஸு வுத்தப்பபே⁴தே³ஸு சேதனாத⁴ம்மேஸு அவிஜ்ஜா ஸஹஜாதவஸேன ச உபனிஸ்ஸயவஸேன ச அனுபதிதா. ஏவங் வட்டஞ்சேவ வட்டமூலிகா ச அவிஜ்ஜா த³ஸ்ஸிதா ஹோதி.
Imesu, bhikkhave, dhammesu avijjā anupatitāti imesu vuttappabhedesu cetanādhammesu avijjā sahajātavasena ca upanissayavasena ca anupatitā. Evaṃ vaṭṭañceva vaṭṭamūlikā ca avijjā dassitā hoti.
எத்தாவதா விபஸ்ஸனங் வட்³டெ⁴த்வா அரஹத்தங் பத்தஸ்ஸ கீ²ணாஸவஸ்ஸ இதா³னி து²திங் கரொந்தோ அவிஜ்ஜாயத்வேவ அஸேஸவிராக³னிரோதா⁴திஆதி³மாஹ. தத்த² அஸேஸவிராக³னிரோதா⁴தி அஸேஸவிராகே³ன சேவ அஸேஸனிரோதே⁴ன ச. ஸோ காயோ ந ஹோதீதி கீ²ணாஸவஸ்ஸ காயேன கரணகம்மங் பஞ்ஞாயதி, சேதியங்க³ணஸம்மஜ்ஜனங் போ³தி⁴யங்க³ணஸம்மஜ்ஜனங் அபி⁴க்கமனங் படிக்கமனங் வத்தானுவத்தகரணந்தி ஏவமாதி³. காயத்³வாரே பனஸ்ஸ வீஸதி சேதனா அவிபாகத⁴ம்மதங் ஆபஜ்ஜந்தி. தேன வுத்தங் – ‘‘ஸோ காயோ ந ஹோதி, யங் பச்சயாஸ்ஸ தங் உப்பஜ்ஜதி அஜ்ஜ²த்தங் ஸுக²து³க்க²’’ந்தி. காயத்³வாரப்பவத்தா ஹி சேதனா இத⁴ காயோதி அதி⁴ப்பேதா. ஸேஸத்³வயேபி ஏஸேவ நயோ. கெ²த்தந்திஆதீ³னிபி குஸலாகுஸலகம்மஸ்ஸேவ நாமானி. தஞ்ஹி விபாகஸ்ஸ விருஹனட்டா²னட்டே²ன கெ²த்தங், பதிட்டா²னட்டே²ன வத்து², காரணட்டே²ன ஆயதனங், அதி⁴கரணட்டே²ன அதி⁴கரணந்தி வுச்சதி.
Ettāvatā vipassanaṃ vaḍḍhetvā arahattaṃ pattassa khīṇāsavassa idāni thutiṃ karonto avijjāyatveva asesavirāganirodhātiādimāha. Tattha asesavirāganirodhāti asesavirāgena ceva asesanirodhena ca. So kāyo na hotīti khīṇāsavassa kāyena karaṇakammaṃ paññāyati, cetiyaṅgaṇasammajjanaṃ bodhiyaṅgaṇasammajjanaṃ abhikkamanaṃ paṭikkamanaṃ vattānuvattakaraṇanti evamādi. Kāyadvāre panassa vīsati cetanā avipākadhammataṃ āpajjanti. Tena vuttaṃ – ‘‘so kāyo na hoti, yaṃ paccayāssa taṃ uppajjati ajjhattaṃ sukhadukkha’’nti. Kāyadvārappavattā hi cetanā idha kāyoti adhippetā. Sesadvayepi eseva nayo. Khettantiādīnipi kusalākusalakammasseva nāmāni. Tañhi vipākassa viruhanaṭṭhānaṭṭhena khettaṃ, patiṭṭhānaṭṭhena vatthu, kāraṇaṭṭhena āyatanaṃ, adhikaraṇaṭṭhena adhikaraṇanti vuccati.
இதி ஸத்தா² எத்தகேன டா²னேன தீஹி த்³வாரேஹி ஆயூஹிதகம்மங் த³ஸ்ஸெத்வா இதா³னி தஸ்ஸ கம்மஸ்ஸ விபச்சனட்டா²னங் த³ஸ்ஸேதுங் சத்தாரோமே பி⁴க்க²வேதிஆதி³மாஹ. தத்த² அத்தபா⁴வப்படிலாபா⁴தி படிலத்³த⁴அத்தபா⁴வா. அத்தஸஞ்சேதனா கமதீதி அத்தனா பகப்பிதசேதனா வஹதி பவத்ததி.
Iti satthā ettakena ṭhānena tīhi dvārehi āyūhitakammaṃ dassetvā idāni tassa kammassa vipaccanaṭṭhānaṃ dassetuṃ cattārome bhikkhavetiādimāha. Tattha attabhāvappaṭilābhāti paṭiladdhaattabhāvā. Attasañcetanā kamatīti attanā pakappitacetanā vahati pavattati.
அத்தஸஞ்சேதனாஹேது தேஸங் ஸத்தானங் தம்ஹா காயா சுதி ஹோதீதிஆதீ³ஸு கி²ட்³டா³பதோ³ஸிகா தே³வா அத்தஸஞ்சேதனாஹேது சவந்தி. தேஸஞ்ஹி நந்த³னவனசித்தலதாவனபா²ருஸகவனாதீ³ஸு தி³ப்³ப³ரதிஸமப்பிதானங் கீளந்தானங் பானபோ⁴ஜனே ஸதி ஸம்முஸ்ஸதி, தே ஆஹாருபச்சே²தே³ன ஆதபே கி²த்தமாலா விய மிலாயந்தி. மனோபதோ³ஸிகா தே³வா பரஸஞ்சேதனாஹேது சவந்தி, ஏதே சாதுமஹாராஜிகா தே³வா. தேஸு கிர ஏகோ தே³வபுத்தோ ‘‘நக்க²த்தங் கீளிஸ்ஸாமீ’’தி ஸபரிவாரோ ரதே²ன வீதி²ங் படிபஜ்ஜதி. அத²ஞ்ஞோ நிக்க²மந்தோ தங் புரதோ க³ச்ச²ந்தங் தி³ஸ்வா ‘‘கிங், போ⁴, அயங் கபணோ அதி³ட்ட²புப்³ப³ங் விய ஏதங் தி³ஸ்வா பீதியா உத்³து⁴மாதோ விய க³ஜ்ஜமானோ விய ச க³ச்ச²தீ’’தி குஜ்ஜ²தி. புரதோ க³ச்ச²ந்தோபி நிவத்தித்வா தங் குத்³த⁴ங் தி³ஸ்வா குத்³தா⁴ நாம ஸுவிஜானா ஹொந்தீதி குத்³த⁴பா⁴வமஸ்ஸ ஞத்வா ‘‘த்வங் குத்³தோ⁴ மய்ஹங் கிங் கரிஸ்ஸஸி, அயங் ஸம்பத்தி மயா தா³னஸீலாதீ³னங் வஸேன லத்³தா⁴, ந துய்ஹங் வஸேனா’’தி படிகுஜ்ஜ²தி. ஏகஸ்மிஞ்ஹி குத்³தே⁴ இதரோ அகுத்³தோ⁴ ரக்க²தி, உபோ⁴ஸு பன குத்³தே⁴ஸு ஏகஸ்ஸ கோதோ⁴ இதரஸ்ஸ பச்சயோ ஹோதி, தஸ்ஸபி கோதோ⁴ இதரஸ்ஸ பச்சயோ ஹோதீதி உபோ⁴ கந்த³ந்தானங்யேவ ஓரோதா⁴னங் சவந்தி. மனுஸ்ஸா அத்தஸஞ்சேதனா ச பரஸஞ்சேதனா ச ஹேது சவந்தி, அத்தஸஞ்சேதனாய ச பரஸஞ்சேதனாய ச ஹேதுபூ⁴தாய சவந்தீதி அத்தோ². மனுஸ்ஸா ஹி குஜ்ஜி²த்வா அத்தனாவ அத்தானங் ஹத்தே²ஹிபி த³ண்டே³ஹிபி பஹரந்தி, ரஜ்ஜுப³ந்த⁴னாதீ³ஹிபி ப³ந்த⁴ந்தி, அஸினாபி ஸீஸங் சி²ந்த³ந்தி, விஸம்பி கா²த³ந்தி, பபாதேபி பதந்தி, உத³கம்பி பவிஸந்தி, அக்³கி³ம்பி பவிஸந்தி, பரேபி த³ண்டே³ன வா ஸத்த²னே வா பஹரித்வா மாரெந்தி. ஏவங் தேஸு அத்தஸஞ்சேதனாபி பரஸஞ்சேதனாபி கமதி.
Attasañcetanāhetu tesaṃ sattānaṃ tamhā kāyā cuti hotītiādīsu khiḍḍāpadosikā devā attasañcetanāhetu cavanti. Tesañhi nandanavanacittalatāvanaphārusakavanādīsu dibbaratisamappitānaṃ kīḷantānaṃ pānabhojane sati sammussati, te āhārupacchedena ātape khittamālā viya milāyanti. Manopadosikā devā parasañcetanāhetu cavanti, ete cātumahārājikā devā. Tesu kira eko devaputto ‘‘nakkhattaṃ kīḷissāmī’’ti saparivāro rathena vīthiṃ paṭipajjati. Athañño nikkhamanto taṃ purato gacchantaṃ disvā ‘‘kiṃ, bho, ayaṃ kapaṇo adiṭṭhapubbaṃ viya etaṃ disvā pītiyā uddhumāto viya gajjamāno viya ca gacchatī’’ti kujjhati. Purato gacchantopi nivattitvā taṃ kuddhaṃ disvā kuddhā nāma suvijānā hontīti kuddhabhāvamassa ñatvā ‘‘tvaṃ kuddho mayhaṃ kiṃ karissasi, ayaṃ sampatti mayā dānasīlādīnaṃ vasena laddhā, na tuyhaṃ vasenā’’ti paṭikujjhati. Ekasmiñhi kuddhe itaro akuddho rakkhati, ubhosu pana kuddhesu ekassa kodho itarassa paccayo hoti, tassapi kodho itarassa paccayo hotīti ubho kandantānaṃyeva orodhānaṃ cavanti. Manussā attasañcetanā ca parasañcetanā ca hetu cavanti, attasañcetanāya ca parasañcetanāya ca hetubhūtāya cavantīti attho. Manussā hi kujjhitvā attanāva attānaṃ hatthehipi daṇḍehipi paharanti, rajjubandhanādīhipi bandhanti, asināpi sīsaṃ chindanti, visampi khādanti, papātepi patanti, udakampi pavisanti, aggimpi pavisanti, parepi daṇḍena vā satthane vā paharitvā mārenti. Evaṃ tesu attasañcetanāpi parasañcetanāpi kamati.
கதமே தேன தே³வா த³ட்ட²ப்³பா³தி கதமே நாம தே தே³வா த³ட்ட²ப்³பா³தி அத்தோ². தேன வா அத்தபா⁴வேன கதமே தே³வா த³ட்ட²ப்³பா³திபி அத்தோ². கஸ்மா பன தே²ரோ இமங் பஞ்ஹங் புச்ச²தி, கிங் அத்தனா கதே²துங் நப்பஹோதீதி? பஹோதி, இத³ங் பன பத³ங் அத்தனோ ஸபா⁴வேன பு³த்³த⁴விஸயங் பஞ்ஹந்தி தே²ரோ ந கதே²ஸி. தேன த³ட்ட²ப்³பா³தி தேன அத்தபா⁴வேன த³ட்ட²ப்³பா³. அயங் பன பஞ்ஹோ ஹெட்டா² காமாவசரேபி ரூபாவசரேபி லப்³ப⁴தி, ப⁴வக்³கே³ன பன பரிச்சி²ந்தி³த்வா கதி²தோ நிப்பதே³ஸேன கதி²தோ ஹோதீதி ப⁴க³வதா ஏவங் கதி²தோ.
Katametena devā daṭṭhabbāti katame nāma te devā daṭṭhabbāti attho. Tena vā attabhāvena katame devā daṭṭhabbātipi attho. Kasmā pana thero imaṃ pañhaṃ pucchati, kiṃ attanā kathetuṃ nappahotīti? Pahoti, idaṃ pana padaṃ attano sabhāvena buddhavisayaṃ pañhanti thero na kathesi. Tena daṭṭhabbāti tena attabhāvena daṭṭhabbā. Ayaṃ pana pañho heṭṭhā kāmāvacarepi rūpāvacarepi labbhati, bhavaggena pana paricchinditvā kathito nippadesena kathito hotīti bhagavatā evaṃ kathito.
ஆக³ந்தாரோ இத்த²த்தந்தி இத்த²பா⁴வங் காமாவசரபஞ்சக்க²ந்த⁴பா⁴வமேவ ஆக³ந்தாரோ, நேவ தத்ரூபபத்திகா ந உபரூபபத்திகா ஹொந்தி. அனாக³ந்தாரோ இத்த²த்தந்தி இமங் க²ந்த⁴பஞ்சகங் அனாக³ந்தாரோ, ஹெட்டூ²பபத்திகா ந ஹொந்தி, தத்ரூபபத்திகா வா உபரூபபத்திகா வா தத்தே²வ வா பரினிப்³பா³யினோ ஹொந்தீதி அத்தோ². எத்த² ச ஹெட்டி²மப⁴வே நிப்³ப³த்தானங் வஸேன உபரூபபத்திகா வேதி³தப்³பா³. ப⁴வக்³கே³ பனேதங் நத்தி². ஸேஸங் ஸப்³ப³த்த² உத்தானமேவாதி.
Āgantāroitthattanti itthabhāvaṃ kāmāvacarapañcakkhandhabhāvameva āgantāro, neva tatrūpapattikā na uparūpapattikā honti. Anāgantāro itthattanti imaṃ khandhapañcakaṃ anāgantāro, heṭṭhūpapattikā na honti, tatrūpapattikā vā uparūpapattikā vā tattheva vā parinibbāyino hontīti attho. Ettha ca heṭṭhimabhave nibbattānaṃ vasena uparūpapattikā veditabbā. Bhavagge panetaṃ natthi. Sesaṃ sabbattha uttānamevāti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 1. சேதனாஸுத்தங் • 1. Cetanāsuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1. சேதனாஸுத்தவண்ணனா • 1. Cetanāsuttavaṇṇanā
