| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
8. சேதனாஸுத்தவண்ணனா
8. Cetanāsuttavaṇṇanā
38. அட்ட²மே யஞ்ச, பி⁴க்க²வே, சேதேதீதி யங் சேதனங் சேதேதி, பவத்தேதீதி அத்தோ². யஞ்ச பகப்பேதீதி யங் பகப்பனங் பகப்பேதி, பவத்தேதிச்சேவ அத்தோ². யஞ்ச அனுஸேதீதி யஞ்ச அனுஸயங் அனுஸேதி, பவத்தேதிச்சேவ அத்தோ². எத்த² ச சேதேதீதி தேபூ⁴மககுஸலாகுஸலசேதனா க³ஹிதா, பகப்பேதீதி அட்ட²ஸு லோப⁴ஸஹக³தசித்தேஸு தண்ஹாதி³ட்டி²கப்பா க³ஹிதா, அனுஸேதீதி த்³வாத³ஸன்னங் சேதனானங் ஸஹஜாதகோடியா சேவ உபனிஸ்ஸயகோடியா ச அனுஸயோ க³ஹிதோ. ஆரம்மணமேதங் ஹோதீதி (சேதனாதி³த⁴ம்மஜாதே ஸதி கம்மவிஞ்ஞாணஸ்ஸ உப்பத்தியா அவாரிதத்தா) ஏதங் சேதனாதி³த⁴ம்மஜாதங் பச்சயோ ஹோதி. பச்சயோ ஹி இத⁴ ஆரம்மணந்தி அதி⁴ப்பேதா. விஞ்ஞாணஸ்ஸ டி²தியாதி கம்மவிஞ்ஞாணஸ்ஸ டி²தத்த²ங். ஆரம்மணே ஸதீதி தஸ்மிங் பச்சயே ஸதி. பதிட்டா² விஞ்ஞாணஸ்ஸ ஹோதீதி தஸ்ஸ கம்மவிஞ்ஞாணஸ்ஸ பதிட்டா² ஹோதி. தஸ்மிங் பதிட்டி²தே விஞ்ஞாணேதி தஸ்மிங் கம்மவிஞ்ஞாணே பதிட்டி²தே. விரூள்ஹேதி கம்மங் ஜவாபெத்வா படிஸந்தி⁴ஆகட்³ட⁴னஸமத்த²தாய நிப்³ப³த்தமூலே ஜாதே. புனப்³ப⁴வாபி⁴னிப்³ப³த்தீதி புனப்³ப⁴வஸங்கா²தா அபி⁴னிப்³ப³த்தி.
38. Aṭṭhame yañca, bhikkhave, cetetīti yaṃ cetanaṃ ceteti, pavattetīti attho. Yañca pakappetīti yaṃ pakappanaṃ pakappeti, pavatteticceva attho. Yañca anusetīti yañca anusayaṃ anuseti, pavatteticceva attho. Ettha ca cetetīti tebhūmakakusalākusalacetanā gahitā, pakappetīti aṭṭhasu lobhasahagatacittesu taṇhādiṭṭhikappā gahitā, anusetīti dvādasannaṃ cetanānaṃ sahajātakoṭiyā ceva upanissayakoṭiyā ca anusayo gahito. Ārammaṇametaṃ hotīti (cetanādidhammajāte sati kammaviññāṇassa uppattiyā avāritattā) etaṃ cetanādidhammajātaṃ paccayo hoti. Paccayo hi idha ārammaṇanti adhippetā. Viññāṇassa ṭhitiyāti kammaviññāṇassa ṭhitatthaṃ. Ārammaṇe satīti tasmiṃ paccaye sati. Patiṭṭhā viññāṇassa hotīti tassa kammaviññāṇassa patiṭṭhā hoti. Tasmiṃ patiṭṭhite viññāṇeti tasmiṃ kammaviññāṇe patiṭṭhite. Virūḷheti kammaṃ javāpetvā paṭisandhiākaḍḍhanasamatthatāya nibbattamūle jāte. Punabbhavābhinibbattīti punabbhavasaṅkhātā abhinibbatti.
நோ சே, பி⁴க்க²வே, சேதேதீதி இமினா தேபூ⁴மகசேதனாய அப்பவத்தனக்க²ணோ வுத்தோ. நோ சே பகப்பேதீதி இமினா தண்ஹாதி³ட்டி²கப்பானங் அப்பவத்தனக்க²ணோ. அத² சே அனுஸேதீதி இமினா தேபூ⁴மகவிபாகேஸு பரித்தகிரியாஸு ரூபேதி எத்த² அப்பஹீனகோடியா அனுஸயோ க³ஹிதோ. ஆரம்மணமேதங் ஹோதீதி அனுஸயே ஸதி கம்மவிஞ்ஞாணஸ்ஸ உப்பத்தியா அவாரிதத்தா ஏதங் அனுஸயஜாதங் பச்சயோவ ஹோதி.
Noce, bhikkhave, cetetīti iminā tebhūmakacetanāya appavattanakkhaṇo vutto. No ce pakappetīti iminā taṇhādiṭṭhikappānaṃ appavattanakkhaṇo. Atha ce anusetīti iminā tebhūmakavipākesu parittakiriyāsu rūpeti ettha appahīnakoṭiyā anusayo gahito. Ārammaṇametaṃhotīti anusaye sati kammaviññāṇassa uppattiyā avāritattā etaṃ anusayajātaṃ paccayova hoti.
நோ சேவ சேதேதீதிஆதீ³ஸு பட²மபதே³ தேபூ⁴மககுஸலாகுஸலசேதனா நிவத்தா, து³தியபதே³ அட்ட²ஸு சித்தேஸு தண்ஹாதி³ட்டி²யோ, ததியபதே³ வுத்தப்பகாரேஸு த⁴ம்மேஸு யோ அப்பஹீனகோடியா அனுஸயிதோ அனுஸயோ, ஸோ நிவத்தோ.
No ceva cetetītiādīsu paṭhamapade tebhūmakakusalākusalacetanā nivattā, dutiyapade aṭṭhasu cittesu taṇhādiṭṭhiyo, tatiyapade vuttappakāresu dhammesu yo appahīnakoṭiyā anusayito anusayo, so nivatto.
அபிசெத்த² அஸம்மோஹத்த²ங் சேதேதி பகப்பேதி அனுஸேதி, சேதேதி ந பகப்பேதி அனுஸேதி, ந சேதேதி ந பகப்பேதி அனுஸேதி, ந சேதேதி ந பகப்பேதி ந அனுஸேதீதி இத³ம்பி சதுக்கங் வேதி³தப்³ப³ங். தத்த² பட²மனயே த⁴ம்மபரிச்சே²தோ³ த³ஸ்ஸிதோ. து³தியனயே சேதேதீதி தேபூ⁴மககுஸலசேதனா சேவ சதஸ்ஸோ ச அகுஸலசேதனா க³ஹிதா. ந பகப்பேதீதி அட்ட²ஸு சித்தேஸு தண்ஹாதி³ட்டி²யோ நிவத்தா. அனுஸேதீதி தேபூ⁴மககுஸலே உபனிஸ்ஸயகோடியா, சதூஸு அகுஸலசேதனாஸு ஸஹஜாதகோடியா சேவ உபனிஸ்ஸயகோடியா ச அனுஸயோ க³ஹிதோ. ததியனயே ந சேதேதீதி தேபூ⁴மககுஸலாகுஸலங் நிவத்தங், ந பகப்பேதீதி அட்ட²ஸு சித்தேஸு தண்ஹாதி³ட்டி²யோ நிவத்தா, அனுஸேதீதி ஸுத்தே ஆக³தங் வாரெத்வா தேபூ⁴மககுஸலாகுஸலவிபாககிரியாரூபேஸு அப்பஹீனகோடியா உபனிஸ்ஸயோ க³ஹிதோ. சதுத்த²னயோ புரிமஸதி³ஸோவ.
Apicettha asammohatthaṃ ceteti pakappeti anuseti, ceteti na pakappeti anuseti, na ceteti na pakappeti anuseti, na ceteti na pakappeti na anusetīti idampi catukkaṃ veditabbaṃ. Tattha paṭhamanaye dhammaparicchedo dassito. Dutiyanaye cetetīti tebhūmakakusalacetanā ceva catasso ca akusalacetanā gahitā. Na pakappetīti aṭṭhasu cittesu taṇhādiṭṭhiyo nivattā. Anusetīti tebhūmakakusale upanissayakoṭiyā, catūsu akusalacetanāsu sahajātakoṭiyā ceva upanissayakoṭiyā ca anusayo gahito. Tatiyanaye na cetetīti tebhūmakakusalākusalaṃ nivattaṃ, na pakappetīti aṭṭhasu cittesu taṇhādiṭṭhiyo nivattā, anusetīti sutte āgataṃ vāretvā tebhūmakakusalākusalavipākakiriyārūpesu appahīnakoṭiyā upanissayo gahito. Catutthanayo purimasadisova.
தத³ப்பதிட்டி²தேதி தஸ்மிங் அப்பதிட்டி²தே. அவிரூள்ஹேதி கம்மங் ஜவாபெத்வா படிஸந்தி⁴ஆகட்³ட⁴னஸமத்த²தாய அனிப்³ப³த்தமூலே. எத்த² பன கிங் கதி²தந்தி? அரஹத்தமக்³க³ஸ்ஸ கிச்சங், கீ²ணாஸவஸ்ஸ கிச்சகரணந்திபி நவலோகுத்தரத⁴ம்மாதிபி வத்துங் வட்டதி. எத்த² ச விஞ்ஞாணஸ்ஸ சேவ ஆயதிங் புனப்³ப⁴வஸ்ஸ ச அந்தரே ஏகோ ஸந்தி⁴, வேத³னாதண்ஹானமந்தரே ஏகோ, ப⁴வஜாதீனமந்தரே ஏகோதி. அட்ட²மங்.
Tadappatiṭṭhiteti tasmiṃ appatiṭṭhite. Avirūḷheti kammaṃ javāpetvā paṭisandhiākaḍḍhanasamatthatāya anibbattamūle. Ettha pana kiṃ kathitanti? Arahattamaggassa kiccaṃ, khīṇāsavassa kiccakaraṇantipi navalokuttaradhammātipi vattuṃ vaṭṭati. Ettha ca viññāṇassa ceva āyatiṃ punabbhavassa ca antare eko sandhi, vedanātaṇhānamantare eko, bhavajātīnamantare ekoti. Aṭṭhamaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 8. சேதனாஸுத்தங் • 8. Cetanāsuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 8. சேதனாஸுத்தவண்ணனா • 8. Cetanāsuttavaṇṇanā
