| Library / Tipiṭaka / তিপিটক • Tipiṭaka / কথাৰত্থুপাল়ি • Kathāvatthupāḷi |
৭. সত্তমৰগ্গো
7. Sattamavaggo
(৬৫) ৩. চেতসিককথা
(65) 3. Cetasikakathā
৪৭৫. নত্থি চেতসিকো ধম্মোতি? আমন্তা। ননু অত্থি কেচি ধম্মা চিত্তেন সহগতা সহজাতা সংসট্ঠা সম্পযুত্তা একুপ্পাদা একনিরোধা একৰত্থুকা একারম্মণাতি? আমন্তা। হঞ্চি অত্থি কেচি ধম্মা চিত্তেন সহগতা সহজাতা সংসট্ঠা সম্পযুত্তা একুপ্পাদা একনিরোধা একৰত্থুকা একারম্মণা, নো চ ৰত রে ৰত্তব্বে – ‘‘নত্থি চেতসিকো ধম্মো’’তি।
475. Natthi cetasiko dhammoti? Āmantā. Nanu atthi keci dhammā cittena sahagatā sahajātā saṃsaṭṭhā sampayuttā ekuppādā ekanirodhā ekavatthukā ekārammaṇāti? Āmantā. Hañci atthi keci dhammā cittena sahagatā sahajātā saṃsaṭṭhā sampayuttā ekuppādā ekanirodhā ekavatthukā ekārammaṇā, no ca vata re vattabbe – ‘‘natthi cetasiko dhammo’’ti.
ফস্সো চিত্তেন সহজাতোতি? আমন্তা। হঞ্চি ফস্সো চিত্তেন সহজাতো, তেন ৰত রে ৰত্তব্বে – ‘‘ফস্সো চেতসিকো’’তি। ৰেদনা…পে॰… সঞ্ঞা… চেতনা… সদ্ধা… ৰীরিযং… সতি… সমাধি… পঞ্ঞা… রাগো… দোসো… মোহো…পে॰… অনোত্তপ্পং চিত্তেন সহজাতন্তি? আমন্তা। হঞ্চি অনোত্তপ্পং চিত্তেন সহজাতং, তেন ৰত রে ৰত্তব্বে – ‘‘অনোত্তপ্পং চেতসিক’’ন্তি।
Phasso cittena sahajātoti? Āmantā. Hañci phasso cittena sahajāto, tena vata re vattabbe – ‘‘phasso cetasiko’’ti. Vedanā…pe… saññā… cetanā… saddhā… vīriyaṃ… sati… samādhi… paññā… rāgo… doso… moho…pe… anottappaṃ cittena sahajātanti? Āmantā. Hañci anottappaṃ cittena sahajātaṃ, tena vata re vattabbe – ‘‘anottappaṃ cetasika’’nti.
৪৭৬. চিত্তেন সহজাতাতি কত্ৰা চেতসিকাতি? আমন্তা। ফস্সেন সহজাতাতি কত্ৰা ফস্সসিকাতি 1? আমন্তা। চিত্তেন সহজাতাতি কত্ৰা চেতসিকাতি? আমন্তা । ৰেদনায… সঞ্ঞায… চেতনায… সদ্ধায… ৰীরিযেন… সতিযা… সমাধিনা… পঞ্ঞায… রাগেন… দোসেন… মোহেন…পে॰… অনোত্তপ্পেন সহজাতাতি কত্ৰা অনোত্তপ্পাসিকাতি 2? আমন্তা।
476. Cittena sahajātāti katvā cetasikāti? Āmantā. Phassena sahajātāti katvā phassasikāti 3? Āmantā. Cittena sahajātāti katvā cetasikāti? Āmantā . Vedanāya… saññāya… cetanāya… saddhāya… vīriyena… satiyā… samādhinā… paññāya… rāgena… dosena… mohena…pe… anottappena sahajātāti katvā anottappāsikāti 4? Āmantā.
৪৭৭. নত্থি চেতসিকো ধম্মোতি? আমন্তা। ননু ৰুত্তং ভগৰতা –
477. Natthi cetasiko dhammoti? Āmantā. Nanu vuttaṃ bhagavatā –
‘‘চিত্তঞ্হিদং চেতসিকা চ ধম্মা,
‘‘Cittañhidaṃ cetasikā ca dhammā,
অনত্ততো সংৰিদিতস্স হোন্তি।
Anattato saṃviditassa honti;
হীনপ্পণীতং তদুভযে ৰিদিত্ৰা,
Hīnappaṇītaṃ tadubhaye viditvā,
সম্মদ্দসো ৰেদি পলোকধম্ম’’ন্তি॥
Sammaddaso vedi palokadhamma’’nti.
অত্থেৰ সুত্তন্তোতি? আমন্তা। তেন হি অত্থি চেতসিকো ধম্মোতি।
Attheva suttantoti? Āmantā. Tena hi atthi cetasiko dhammoti.
নত্থি চেতসিকো ধম্মোতি? আমন্তা। ননু ৰুত্তং ভগৰতা – ‘‘ইধ, কেৰট্ট, ভিক্খু পরসত্তানং পরপুগ্গলানং চিত্তম্পি আদিসতি চেতসিকম্পি আদিসতি ৰিতক্কিতম্পি আদিসতি ৰিচারিতম্পি আদিসতি – ‘এৰম্পি তে মনো, ইত্থম্পি তে মনো, ইতিপি তে চিত্ত’’’ন্তি 5। অত্থেৰ সুত্তন্তোতি? আমন্তা। তেন হি অত্থি চেতসিকো ধম্মোতি।
Natthi cetasiko dhammoti? Āmantā. Nanu vuttaṃ bhagavatā – ‘‘idha, kevaṭṭa, bhikkhu parasattānaṃ parapuggalānaṃ cittampi ādisati cetasikampi ādisati vitakkitampi ādisati vicāritampi ādisati – ‘evampi te mano, itthampi te mano, itipi te citta’’’nti 6. Attheva suttantoti? Āmantā. Tena hi atthi cetasiko dhammoti.
চেতসিককথা নিট্ঠিতা।
Cetasikakathā niṭṭhitā.
Footnotes:
Related texts:
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / পঞ্চপকরণ-অট্ঠকথা • Pañcapakaraṇa-aṭṭhakathā / ৩. চেতসিককথাৰণ্ণনা • 3. Cetasikakathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ৩. চেতসিককথাৰণ্ণনা • 3. Cetasikakathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ৩. চেতসিককথাৰণ্ণনা • 3. Cetasikakathāvaṇṇanā
