| Library / Tipiṭaka / တိပိဋက • Tipiṭaka / မိလိန္ဒပဉ္ဟပာဠိ • Milindapañhapāḷi |
၇. စေတိယပာဋိဟာရိယပဉ္ဟော
7. Cetiyapāṭihāriyapañho
၇. ‘‘ဘန္တေ နာဂသေန, သဗ္ဗေသံ ပရိနိဗ္ဗုတာနံ စေတိယေ ပာဋိဟီရံ ဟောတိ, ဥဒာဟု ဧကစ္စာနံ ယေဝ ဟောတီ’’တိ? ‘‘ဧကစ္စာနံ, မဟာရာဇ, ဟောတိ, ဧကစ္စာနံ န ဟောတီ’’တိ။ ‘‘ကတမေသံ, ဘန္တေ, ဟောတိ, ကတမေသံ န ဟောတီ’’တိ? ‘‘တိဏ္ဏန္နံ, မဟာရာဇ, အညတရသ္သ အဓိဋ္ဌာနာ ပရိနိဗ္ဗုတသ္သ စေတိယေ ပာဋိဟီရံ ဟောတိ။ ကတမေသံ တိဏ္ဏန္နံ? ဣဓ, မဟာရာဇ, အရဟာ ဒေဝမနုသ္သာနံ အနုကမ္ပာယ တိဋ္ဌန္တောဝ အဓိဋ္ဌာတိ ‘ဧဝံနာမ စေတိယေ ပာဋိဟီရံ ဟောတူ’တိ, တသ္သ အဓိဋ္ဌာနဝသေန စေတိယေ ပာဋိဟီရံ ဟောတိ, ဧဝံ အရဟတော အဓိဋ္ဌာနဝသေန ပရိနိဗ္ဗုတသ္သ စေတိယေ ပာဋိဟီရံ ဟောတိ။
7. ‘‘Bhante nāgasena, sabbesaṃ parinibbutānaṃ cetiye pāṭihīraṃ hoti, udāhu ekaccānaṃ yeva hotī’’ti? ‘‘Ekaccānaṃ, mahārāja, hoti, ekaccānaṃ na hotī’’ti. ‘‘Katamesaṃ, bhante, hoti, katamesaṃ na hotī’’ti? ‘‘Tiṇṇannaṃ, mahārāja, aññatarassa adhiṭṭhānā parinibbutassa cetiye pāṭihīraṃ hoti. Katamesaṃ tiṇṇannaṃ? Idha, mahārāja, arahā devamanussānaṃ anukampāya tiṭṭhantova adhiṭṭhāti ‘evaṃnāma cetiye pāṭihīraṃ hotū’ti, tassa adhiṭṭhānavasena cetiye pāṭihīraṃ hoti, evaṃ arahato adhiṭṭhānavasena parinibbutassa cetiye pāṭihīraṃ hoti.
‘‘ပုန စပရံ, မဟာရာဇ, ဒေဝတာ မနုသ္သာနံ အနုကမ္ပာယ ပရိနိဗ္ဗုတသ္သ စေတိယေ ပာဋိဟီရံ ဒသ္သေန္တိ ‘ဣမိနာ ပာဋိဟီရေန သဒ္ဓမ္မော နိစ္စသမ္ပဂ္ဂဟိတော ဘဝိသ္သတိ, မနုသ္သာ စ ပသန္နာ ကုသလေန အဘိဝဍ္ဎိသ္သန္တီ’တိ, ဧဝံ ဒေဝတာနံ အဓိဋ္ဌာနဝသေန ပရိနိဗ္ဗုတသ္သ စေတိယေ ပာဋိဟီရံ ဟောတိ။
‘‘Puna caparaṃ, mahārāja, devatā manussānaṃ anukampāya parinibbutassa cetiye pāṭihīraṃ dassenti ‘iminā pāṭihīrena saddhammo niccasampaggahito bhavissati, manussā ca pasannā kusalena abhivaḍḍhissantī’ti, evaṃ devatānaṃ adhiṭṭhānavasena parinibbutassa cetiye pāṭihīraṃ hoti.
‘‘ပုန စပရံ, မဟာရာဇ, ဣတ္ထီ ဝာ ပုရိသော ဝာ သဒ္ဓော ပသန္နော ပဏ္ဍိတော ဗ္ယတ္တော မေဓာဝီ ဗုဒ္ဓိသမ္ပန္နော ယောနိသော စိန္တယိတ္ဝာ ဂန္ဓံ ဝာ မာလံ ဝာ ဒုသ္သံ ဝာ အညတရံ ဝာ ကိဉ္စိ အဓိဋ္ဌဟိတ္ဝာ စေတိယေ ဥက္ခိပတိ ‘ဧဝံနာမ ဟောတူ’တိ, တသ္သပိ အဓိဋ္ဌာနဝသေန ပရိနိဗ္ဗုတသ္သ စေတိယေ ပာဋိဟီရံ ဟောတိ, ဧဝံ မနုသ္သာနံ အဓိဋ္ဌာနဝသေန ပရိနိဗ္ဗုတသ္သ စေတိယေ ပာဋိဟီရံ ဟောတိ။
‘‘Puna caparaṃ, mahārāja, itthī vā puriso vā saddho pasanno paṇḍito byatto medhāvī buddhisampanno yoniso cintayitvā gandhaṃ vā mālaṃ vā dussaṃ vā aññataraṃ vā kiñci adhiṭṭhahitvā cetiye ukkhipati ‘evaṃnāma hotū’ti, tassapi adhiṭṭhānavasena parinibbutassa cetiye pāṭihīraṃ hoti, evaṃ manussānaṃ adhiṭṭhānavasena parinibbutassa cetiye pāṭihīraṃ hoti.
‘‘ဣမေသံ ခော, မဟာရာဇ, တိဏ္ဏန္နံ အညတရသ္သ အဓိဋ္ဌာနဝသေန ပရိနိဗ္ဗုတသ္သ စေတိယေ ပာဋိဟီရံ ဟောတိ။
‘‘Imesaṃ kho, mahārāja, tiṇṇannaṃ aññatarassa adhiṭṭhānavasena parinibbutassa cetiye pāṭihīraṃ hoti.
‘‘ယဒိ, မဟာရာဇ, တေသံ အဓိဋ္ဌာနံ န ဟောတိ, ခီဏာသဝသ္သပိ ဆဠဘိညသ္သ စေတောဝသိပ္ပတ္တသ္သ စေတိယေ ပာဋိဟီရံ န ဟောတိ, အသတိပိ , မဟာရာဇ, ပာဋိဟီရေ စရိတံ ဒိသ္ဝာ သုပရိသုဒ္ဓံ ဩကပ္ပေတဗ္ဗံ နိဋ္ဌံ ဂန္တဗ္ဗံ သဒ္ဒဟိတဗ္ဗံ ‘သုပရိနိဗ္ဗုတော အယံ ဗုဒ္ဓပုတ္တော’’’တိ။ ‘‘သာဓု, ဘန္တေ နာဂသေန, ဧဝမေတံ တထာ သမ္ပဋိစ္ဆာမီ’’တိ။
‘‘Yadi, mahārāja, tesaṃ adhiṭṭhānaṃ na hoti, khīṇāsavassapi chaḷabhiññassa cetovasippattassa cetiye pāṭihīraṃ na hoti, asatipi , mahārāja, pāṭihīre caritaṃ disvā suparisuddhaṃ okappetabbaṃ niṭṭhaṃ gantabbaṃ saddahitabbaṃ ‘suparinibbuto ayaṃ buddhaputto’’’ti. ‘‘Sādhu, bhante nāgasena, evametaṃ tathā sampaṭicchāmī’’ti.
စေတိယပာဋိဟာရိယပဉ္ဟော သတ္တမော။
Cetiyapāṭihāriyapañho sattamo.
