| Library / Tipiṭaka / ਤਿਪਿਟਕ • Tipiṭaka / ਮਿਲਿਨ੍ਦਪਞ੍ਹਪਾਲ਼ਿ • Milindapañhapāḷi |
੭. ਚੇਤਿਯਪਾਟਿਹਾਰਿਯਪਞ੍ਹੋ
7. Cetiyapāṭihāriyapañho
੭. ‘‘ਭਨ੍ਤੇ ਨਾਗਸੇਨ, ਸਬ੍ਬੇਸਂ ਪਰਿਨਿਬ੍ਬੁਤਾਨਂ ਚੇਤਿਯੇ ਪਾਟਿਹੀਰਂ ਹੋਤਿ, ਉਦਾਹੁ ਏਕਚ੍ਚਾਨਂ ਯੇવ ਹੋਤੀ’’ਤਿ? ‘‘ਏਕਚ੍ਚਾਨਂ, ਮਹਾਰਾਜ, ਹੋਤਿ, ਏਕਚ੍ਚਾਨਂ ਨ ਹੋਤੀ’’ਤਿ। ‘‘ਕਤਮੇਸਂ, ਭਨ੍ਤੇ, ਹੋਤਿ, ਕਤਮੇਸਂ ਨ ਹੋਤੀ’’ਤਿ? ‘‘ਤਿਣ੍ਣਨ੍ਨਂ, ਮਹਾਰਾਜ, ਅਞ੍ਞਤਰਸ੍ਸ ਅਧਿਟ੍ਠਾਨਾ ਪਰਿਨਿਬ੍ਬੁਤਸ੍ਸ ਚੇਤਿਯੇ ਪਾਟਿਹੀਰਂ ਹੋਤਿ। ਕਤਮੇਸਂ ਤਿਣ੍ਣਨ੍ਨਂ? ਇਧ, ਮਹਾਰਾਜ, ਅਰਹਾ ਦੇવਮਨੁਸ੍ਸਾਨਂ ਅਨੁਕਮ੍ਪਾਯ ਤਿਟ੍ਠਨ੍ਤੋવ ਅਧਿਟ੍ਠਾਤਿ ‘ਏવਂਨਾਮ ਚੇਤਿਯੇ ਪਾਟਿਹੀਰਂ ਹੋਤੂ’ਤਿ, ਤਸ੍ਸ ਅਧਿਟ੍ਠਾਨવਸੇਨ ਚੇਤਿਯੇ ਪਾਟਿਹੀਰਂ ਹੋਤਿ, ਏવਂ ਅਰਹਤੋ ਅਧਿਟ੍ਠਾਨવਸੇਨ ਪਰਿਨਿਬ੍ਬੁਤਸ੍ਸ ਚੇਤਿਯੇ ਪਾਟਿਹੀਰਂ ਹੋਤਿ।
7. ‘‘Bhante nāgasena, sabbesaṃ parinibbutānaṃ cetiye pāṭihīraṃ hoti, udāhu ekaccānaṃ yeva hotī’’ti? ‘‘Ekaccānaṃ, mahārāja, hoti, ekaccānaṃ na hotī’’ti. ‘‘Katamesaṃ, bhante, hoti, katamesaṃ na hotī’’ti? ‘‘Tiṇṇannaṃ, mahārāja, aññatarassa adhiṭṭhānā parinibbutassa cetiye pāṭihīraṃ hoti. Katamesaṃ tiṇṇannaṃ? Idha, mahārāja, arahā devamanussānaṃ anukampāya tiṭṭhantova adhiṭṭhāti ‘evaṃnāma cetiye pāṭihīraṃ hotū’ti, tassa adhiṭṭhānavasena cetiye pāṭihīraṃ hoti, evaṃ arahato adhiṭṭhānavasena parinibbutassa cetiye pāṭihīraṃ hoti.
‘‘ਪੁਨ ਚਪਰਂ, ਮਹਾਰਾਜ, ਦੇવਤਾ ਮਨੁਸ੍ਸਾਨਂ ਅਨੁਕਮ੍ਪਾਯ ਪਰਿਨਿਬ੍ਬੁਤਸ੍ਸ ਚੇਤਿਯੇ ਪਾਟਿਹੀਰਂ ਦਸ੍ਸੇਨ੍ਤਿ ‘ਇਮਿਨਾ ਪਾਟਿਹੀਰੇਨ ਸਦ੍ਧਮ੍ਮੋ ਨਿਚ੍ਚਸਮ੍ਪਗ੍ਗਹਿਤੋ ਭવਿਸ੍ਸਤਿ, ਮਨੁਸ੍ਸਾ ਚ ਪਸਨ੍ਨਾ ਕੁਸਲੇਨ ਅਭਿવਡ੍ਢਿਸ੍ਸਨ੍ਤੀ’ਤਿ, ਏવਂ ਦੇવਤਾਨਂ ਅਧਿਟ੍ਠਾਨવਸੇਨ ਪਰਿਨਿਬ੍ਬੁਤਸ੍ਸ ਚੇਤਿਯੇ ਪਾਟਿਹੀਰਂ ਹੋਤਿ।
‘‘Puna caparaṃ, mahārāja, devatā manussānaṃ anukampāya parinibbutassa cetiye pāṭihīraṃ dassenti ‘iminā pāṭihīrena saddhammo niccasampaggahito bhavissati, manussā ca pasannā kusalena abhivaḍḍhissantī’ti, evaṃ devatānaṃ adhiṭṭhānavasena parinibbutassa cetiye pāṭihīraṃ hoti.
‘‘ਪੁਨ ਚਪਰਂ, ਮਹਾਰਾਜ, ਇਤ੍ਥੀ વਾ ਪੁਰਿਸੋ વਾ ਸਦ੍ਧੋ ਪਸਨ੍ਨੋ ਪਣ੍ਡਿਤੋ ਬ੍ਯਤ੍ਤੋ ਮੇਧਾવੀ ਬੁਦ੍ਧਿਸਮ੍ਪਨ੍ਨੋ ਯੋਨਿਸੋ ਚਿਨ੍ਤਯਿਤ੍વਾ ਗਨ੍ਧਂ વਾ ਮਾਲਂ વਾ ਦੁਸ੍ਸਂ વਾ ਅਞ੍ਞਤਰਂ વਾ ਕਿਞ੍ਚਿ ਅਧਿਟ੍ਠਹਿਤ੍વਾ ਚੇਤਿਯੇ ਉਕ੍ਖਿਪਤਿ ‘ਏવਂਨਾਮ ਹੋਤੂ’ਤਿ, ਤਸ੍ਸਪਿ ਅਧਿਟ੍ਠਾਨવਸੇਨ ਪਰਿਨਿਬ੍ਬੁਤਸ੍ਸ ਚੇਤਿਯੇ ਪਾਟਿਹੀਰਂ ਹੋਤਿ, ਏવਂ ਮਨੁਸ੍ਸਾਨਂ ਅਧਿਟ੍ਠਾਨવਸੇਨ ਪਰਿਨਿਬ੍ਬੁਤਸ੍ਸ ਚੇਤਿਯੇ ਪਾਟਿਹੀਰਂ ਹੋਤਿ।
‘‘Puna caparaṃ, mahārāja, itthī vā puriso vā saddho pasanno paṇḍito byatto medhāvī buddhisampanno yoniso cintayitvā gandhaṃ vā mālaṃ vā dussaṃ vā aññataraṃ vā kiñci adhiṭṭhahitvā cetiye ukkhipati ‘evaṃnāma hotū’ti, tassapi adhiṭṭhānavasena parinibbutassa cetiye pāṭihīraṃ hoti, evaṃ manussānaṃ adhiṭṭhānavasena parinibbutassa cetiye pāṭihīraṃ hoti.
‘‘ਇਮੇਸਂ ਖੋ, ਮਹਾਰਾਜ, ਤਿਣ੍ਣਨ੍ਨਂ ਅਞ੍ਞਤਰਸ੍ਸ ਅਧਿਟ੍ਠਾਨવਸੇਨ ਪਰਿਨਿਬ੍ਬੁਤਸ੍ਸ ਚੇਤਿਯੇ ਪਾਟਿਹੀਰਂ ਹੋਤਿ।
‘‘Imesaṃ kho, mahārāja, tiṇṇannaṃ aññatarassa adhiṭṭhānavasena parinibbutassa cetiye pāṭihīraṃ hoti.
‘‘ਯਦਿ, ਮਹਾਰਾਜ, ਤੇਸਂ ਅਧਿਟ੍ਠਾਨਂ ਨ ਹੋਤਿ, ਖੀਣਾਸવਸ੍ਸਪਿ ਛਲ਼ਭਿਞ੍ਞਸ੍ਸ ਚੇਤੋવਸਿਪ੍ਪਤ੍ਤਸ੍ਸ ਚੇਤਿਯੇ ਪਾਟਿਹੀਰਂ ਨ ਹੋਤਿ, ਅਸਤਿਪਿ , ਮਹਾਰਾਜ, ਪਾਟਿਹੀਰੇ ਚਰਿਤਂ ਦਿਸ੍વਾ ਸੁਪਰਿਸੁਦ੍ਧਂ ਓਕਪ੍ਪੇਤਬ੍ਬਂ ਨਿਟ੍ਠਂ ਗਨ੍ਤਬ੍ਬਂ ਸਦ੍ਦਹਿਤਬ੍ਬਂ ‘ਸੁਪਰਿਨਿਬ੍ਬੁਤੋ ਅਯਂ ਬੁਦ੍ਧਪੁਤ੍ਤੋ’’’ਤਿ। ‘‘ਸਾਧੁ, ਭਨ੍ਤੇ ਨਾਗਸੇਨ, ਏવਮੇਤਂ ਤਥਾ ਸਮ੍ਪਟਿਚ੍ਛਾਮੀ’’ਤਿ।
‘‘Yadi, mahārāja, tesaṃ adhiṭṭhānaṃ na hoti, khīṇāsavassapi chaḷabhiññassa cetovasippattassa cetiye pāṭihīraṃ na hoti, asatipi , mahārāja, pāṭihīre caritaṃ disvā suparisuddhaṃ okappetabbaṃ niṭṭhaṃ gantabbaṃ saddahitabbaṃ ‘suparinibbuto ayaṃ buddhaputto’’’ti. ‘‘Sādhu, bhante nāgasena, evametaṃ tathā sampaṭicchāmī’’ti.
ਚੇਤਿਯਪਾਟਿਹਾਰਿਯਪਞ੍ਹੋ ਸਤ੍ਤਮੋ।
Cetiyapāṭihāriyapañho sattamo.
