| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
5. சேதோகி²லஸுத்தவண்ணனா
5. Cetokhilasuttavaṇṇanā
205. பஞ்சமே சேதோகி²லா நாம அத்த²தோ விசிகிச்சா² கோதோ⁴ ச. தே பன யஸ்மிங் ஸந்தானே உப்பஜ்ஜந்தி, தஸ்ஸ க²ரபா⁴வோ கக்க²ளபா⁴வோ ஹுத்வா உபதிட்ட²ந்தி, பகே³வ அத்தனா ஸம்பயுத்தசித்தஸ்ஸாதி ஆஹ ‘‘சித்தஸ்ஸ த²த்³த⁴பா⁴வா’’தி. யதா² லக்க²ணபாரிபூரியா க³ஹிதாய ஸப்³பா³ ஸத்து² ரூபகாயஸிரீ க³ஹிதா ஏவ நாம ஹோதி ஏவங் ஸப்³ப³ஞ்ஞுதாய ஸப்³ப³த⁴ம்மகாயஸிரீ க³ஹிதா ஏவ நாம ஹோதீதி தது³ப⁴யவத்து²கமேவ கங்க²ங் த³ஸ்ஸெந்தோ ‘‘ஸரீரே கங்க²மானோ’’திஆதி³மாஹ. விசினந்தோதி த⁴ம்மஸபா⁴வங் வீமங்ஸந்தோ. கிச்ச²தீதி கிலமதி. வினிச்சே²துங் ந ஸக்கோதீதி ஸன்னிட்டா²துங் ந ஸக்கோதி. ஆதபதி கிலேஸேதி ஆதப்பங், ஸம்மாவாயாமோதி ஆஹ ‘‘ஆதப்பாயாதி கிலேஸஸந்தாபனவீரியகரணத்தா²யா’’தி. புனப்புனங் யோகா³யாதி பா⁴வனங் புனப்புனங் யுஞ்ஜனாய. ஸததகிரியாயாதி பா⁴வனாய நிரந்தரப்பயோகா³ய.
205. Pañcame cetokhilā nāma atthato vicikicchā kodho ca. Te pana yasmiṃ santāne uppajjanti, tassa kharabhāvo kakkhaḷabhāvo hutvā upatiṭṭhanti, pageva attanā sampayuttacittassāti āha ‘‘cittassa thaddhabhāvā’’ti. Yathā lakkhaṇapāripūriyā gahitāya sabbā satthu rūpakāyasirī gahitā eva nāma hoti evaṃ sabbaññutāya sabbadhammakāyasirī gahitā eva nāma hotīti tadubhayavatthukameva kaṅkhaṃ dassento ‘‘sarīre kaṅkhamāno’’tiādimāha. Vicinantoti dhammasabhāvaṃ vīmaṃsanto. Kicchatīti kilamati. Vinicchetuṃ na sakkotīti sanniṭṭhātuṃ na sakkoti. Ātapati kileseti ātappaṃ, sammāvāyāmoti āha ‘‘ātappāyāti kilesasantāpanavīriyakaraṇatthāyā’’ti. Punappunaṃ yogāyāti bhāvanaṃ punappunaṃ yuñjanāya. Satatakiriyāyāti bhāvanāya nirantarappayogāya.
படிவேத⁴த⁴ம்மே கங்க²மானோதி எத்த² கத²ங் லோகுத்தரத⁴ம்மே கங்கா² பவத்தீதி? ந ஆரம்மணகரணவஸேன , அனுஸ்ஸுதாகாரபரிவிதக்கலத்³தே⁴ பரிகப்பிதரூபே கங்கா² பவத்ததீதி த³ஸ்ஸெந்தோ ஆஹ ‘‘விபஸ்ஸனா…பே॰… வத³ந்தி, தங் அத்தி² நு கோ² நத்தீ²தி கங்க²தீ’’தி. ஸிக்கா²தி செத்த² புப்³ப³பா⁴க³ஸிக்கா² வேதி³தப்³பா³. காமஞ்செத்த² விஸேஸுப்பத்தியா மஹாஸாவஜ்ஜதாய சேவ ஸங்வாஸனிமித்தங் க⁴டனாஹேது அபி⁴ண்ஹுப்பத்திகதாய ச ஸப்³ரஹ்மசாரீஸூதி கோபஸ்ஸ விஸயோ விஸேஸெத்வா வுத்தோ, அஞ்ஞத்தா²பி கோபோ ந சேதோகி²லோதி ந ஸக்கா விஞ்ஞாதுந்தி கேசி. யதி³ ஏவங் விசிகிச்சா²யபி அயங் நயோ ஆபஜ்ஜதி, தஸ்மா யதா²ருதவஸேன க³ஹேதப்³ப³ங்.
Paṭivedhadhamme kaṅkhamānoti ettha kathaṃ lokuttaradhamme kaṅkhā pavattīti? Na ārammaṇakaraṇavasena , anussutākāraparivitakkaladdhe parikappitarūpe kaṅkhā pavattatīti dassento āha ‘‘vipassanā…pe… vadanti, taṃ atthi nu kho natthīti kaṅkhatī’’ti. Sikkhāti cettha pubbabhāgasikkhā veditabbā. Kāmañcettha visesuppattiyā mahāsāvajjatāya ceva saṃvāsanimittaṃ ghaṭanāhetu abhiṇhuppattikatāya ca sabrahmacārīsūti kopassa visayo visesetvā vutto, aññatthāpi kopo na cetokhiloti na sakkā viññātunti keci. Yadi evaṃ vicikicchāyapi ayaṃ nayo āpajjati, tasmā yathārutavasena gahetabbaṃ.
சேதோகி²லஸுத்தவண்ணனா நிட்டி²தா.
Cetokhilasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 5. சேதோகி²லஸுத்தங் • 5. Cetokhilasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 5. சேதோகி²லஸுத்தவண்ணனா • 5. Cetokhilasuttavaṇṇanā
