| Library / Tipiṭaka / ཏིཔིཊཀ • Tipiṭaka / པཊིསམྦྷིདཱམགྒ-ཨཊྛཀཐཱ • Paṭisambhidāmagga-aṭṭhakathā |
༥༢. ཙེཏོཔརིཡཉཱཎནིདྡེསཝཎྞནཱ
52. Cetopariyañāṇaniddesavaṇṇanā
༡༠༤. ཙེཏོཔརིཡཉཱཎནིདྡེསེ སོ ཨེཝཾ པཛཱནཱཏཱིཏི ཨིདཱནི ཝཏྟབྦཾ ཝིདྷཱནཾ ཨུཔདིསཏི། ཨིདཾ རཱུཔཾ སོམནསྶིནྡྲིཡསམུཊྛིཏནྟིཨཱདི ཨཱདིཀམྨིཀེན ཛྷཱཡིནཱ པཊིཔཛྫིཏབྦཾ ཝིདྷཱནཾ། ཀཐཾ? ཨེཏཉྷི ཉཱཎཾ ཨུཔྤཱདེཏུཀཱམེན ཛྷཱཡིནཱ པཋམཾ ཏཱཝ དིབྦཙཀྑུཉཱཎཾ ཨུཔྤཱདེཏབྦཾ། ཨེཏཉྷི དིབྦཙཀྑུཝསེན ཨིཛ྄ཛྷཏི, ཏཾ ཨེཏསྶ པརིཀམྨཾ། ཏསྨཱ ཏེན བྷིཀྑུནཱ ཨཱལོཀཾ ཝཌྜྷེཏྭཱ དིབྦེན ཙཀྑུནཱ པརསྶ ཧདཡརཱུཔཾ ནིསྶཱཡ ཝཏྟམཱནསྶ ལོཧིཏསྶ ཝཎྞཾ པསྶིཏྭཱ པསྶིཏྭཱ ཙིཏྟཾ པརིཡེསིཏབྦཾ། ཏཉྷི ལོཧིཏཾ ཀུསལསོམནསྶེ ཝཏྟམཱནེ རཏྟཾ ཧོཏི ནིགྲོདྷཔཀྐཝཎྞཾ, ཨཀུསལསོམནསྶེ ཝཏྟམཱནེ ཏདེཝ ལུལི༹ཏཾ ཧོཏི, དོམནསྶེ ཝཏྟམཱནེ ཀཱལ༹ཀཾ ཧོཏི ཛམྦུཔཀྐཝཎྞཾ ལུལི༹ཏཾ། ཀུསལཱུཔེཀྑཱཡ ཝཏྟམཱནཱཡ པསནྣཾ ཧོཏི ཏིལཏེལཝཎྞཾ། ཨཀུསལཱུཔེཀྑཱཡ ཝཏྟམཱནཱཡ ཏདེཝ ལུལི༹ཏཾ ཧོཏི། ཏསྨཱ ཏེན ‘‘ཨིདཾ རཱུཔཾ སོམནསྶིནྡྲིཡསམུཊྛིཏཾ, ཨིདཾ རཱུཔཾ དོམནསྶིནྡྲིཡསམུཊྛིཏཾ, ཨིདཾ རཱུཔཾ ཨུཔེཀྑིནྡྲིཡསམུཊྛིཏ’’ནྟི པརསྶ ཧདཡལོཧིཏཝཎྞཾ པསྶིཏྭཱ པསྶིཏྭཱ ཙིཏྟཾ པརིཡེསནྟེན ཙེཏོཔརིཡཉཱཎཾ ཐཱམགཏཾ ཀཱཏབྦཾ། ཨེཝཾ ཐཱམགཏེ ཧི ཏསྨིཾ ཨནུཀྐམེན སབྦམྤི ཀཱམཱཝཙརཱདིབྷེདཾ ཙིཏྟཾ པཛཱནཱཏི ཙིཏྟཱ ཙིཏྟམེཝ སངྐམནྟོ ཝིནཱ ཧདཡརཱུཔདསྶནེན། ཝུཏྟམྤི ཙེཏཾ ཨཊྛཀཐཱཡཾ –
104. Cetopariyañāṇaniddese so evaṃ pajānātīti idāni vattabbaṃ vidhānaṃ upadisati. Idaṃ rūpaṃ somanassindriyasamuṭṭhitantiādi ādikammikena jhāyinā paṭipajjitabbaṃ vidhānaṃ. Kathaṃ? Etañhi ñāṇaṃ uppādetukāmena jhāyinā paṭhamaṃ tāva dibbacakkhuñāṇaṃ uppādetabbaṃ. Etañhi dibbacakkhuvasena ijjhati, taṃ etassa parikammaṃ. Tasmā tena bhikkhunā ālokaṃ vaḍḍhetvā dibbena cakkhunā parassa hadayarūpaṃ nissāya vattamānassa lohitassa vaṇṇaṃ passitvā passitvā cittaṃ pariyesitabbaṃ. Tañhi lohitaṃ kusalasomanasse vattamāne rattaṃ hoti nigrodhapakkavaṇṇaṃ, akusalasomanasse vattamāne tadeva luḷitaṃ hoti, domanasse vattamāne kāḷakaṃ hoti jambupakkavaṇṇaṃ luḷitaṃ. Kusalūpekkhāya vattamānāya pasannaṃ hoti tilatelavaṇṇaṃ. Akusalūpekkhāya vattamānāya tadeva luḷitaṃ hoti. Tasmā tena ‘‘idaṃ rūpaṃ somanassindriyasamuṭṭhitaṃ, idaṃ rūpaṃ domanassindriyasamuṭṭhitaṃ, idaṃ rūpaṃ upekkhindriyasamuṭṭhita’’nti parassa hadayalohitavaṇṇaṃ passitvā passitvā cittaṃ pariyesantena cetopariyañāṇaṃ thāmagataṃ kātabbaṃ. Evaṃ thāmagate hi tasmiṃ anukkamena sabbampi kāmāvacarādibhedaṃ cittaṃ pajānāti cittā cittameva saṅkamanto vinā hadayarūpadassanena. Vuttampi cetaṃ aṭṭhakathāyaṃ –
‘‘ཨཱརུཔྤེ པརསྶ ཙིཏྟཾ ཛཱནིཏུཀཱམོ ཀསྶ ཧདཡརཱུཔཾ པསྶཏི, ཀསྶིནྡྲིཡཝིཀཱརཾ ཨོལོཀེཏཱིཏི? ན ཀསྶཙི། ཨིདྡྷིམཏོ ཝིསཡོ ཨེས, ཡདིདཾ ཡཏྠ ཀཏྠཙི ཙིཏྟཾ ཨཱཝཛྫནྟོ སོལ༹སཔྤབྷེདཾ ཙིཏྟཾ ཛཱནཱཏི། ཨཀཏཱབྷིནིཝེསསྶ པན ཝསེན ཨཡཾ ཀཐཱ’’ཏི (ཝིསུདྡྷི॰ ༢.༤༠༡)།
‘‘Āruppe parassa cittaṃ jānitukāmo kassa hadayarūpaṃ passati, kassindriyavikāraṃ oloketīti? Na kassaci. Iddhimato visayo esa, yadidaṃ yattha katthaci cittaṃ āvajjanto soḷasappabhedaṃ cittaṃ jānāti. Akatābhinivesassa pana vasena ayaṃ kathā’’ti (visuddhi. 2.401).
པརསཏྟཱནནྟི ཨཏྟཱནཾ ཋཔེཏྭཱ སེསསཏྟཱནཾ། པརཔུགྒལཱནནྟི ཨིདམྤི ཨིམིནཱ ཨེཀཏྠམེཝ, ཝེནེཡྻཝསེན པན དེསནཱཝིལཱསེན ཙ བྱཉྫནེན ནཱནཏྟཾ ཀཏཾ། ཙེཏསཱ ཙེཏོ པརིཙྩ པཛཱནཱཏཱིཏི ཨཏྟནོ ཙིཏྟེན ཏེསཾ ཙིཏྟཾ པརིཙྪིནྡིཏྭཱ སརཱགཱདིཝསེན ནཱནཔྤཀཱརཏོ ཛཱནཱཏི། སརཱགཾ ཝཱཏིཨཱདཱིསུ ཝཱ-སདྡོ སམུཙྩཡཏྠོ། ཏཏྠ ཨཊྛཝིདྷཾ ལོབྷསཧགཏཙིཏྟཾ སརཱགཾ ཙིཏྟཾ ནཱམ, ཨཝསེསཾ ཙཏུབྷཱུམཀཀུསལཱབྱཱཀཏཙིཏྟཾ ཝཱིཏརཱགཾ ནཱམ། དྭེ དོམནསྶཙིཏྟཱནི, དྭེ ཝིཙིཀིཙྪཱཨུདྡྷཙྩཙིཏྟཱནཱིཏི ཨིམཱནི པན ཙཏྟཱརི ཙིཏྟཱནི ཨིམསྨིཾ དུཀེ སངྒཧཾ ན གཙྪནྟི། ཀེཙི པན ཐེརཱ ཏཱནིཔི ཝཱིཏརཱགཔདེན སངྒཎྷནྟི། དུཝིདྷཾ པན དོམནསྶསཧགཏཾ ཙིཏྟཾ སདོསཾ ཙིཏྟཾ ནཱམ, སབྦམྤི ཙཏུབྷཱུམཀཾ ཀུསལཱབྱཱཀཏཾ ཝཱིཏདོསཾ ནཱམ། སེསཱནི དས ཨཀུསལཙིཏྟཱནི ཨིམསྨིཾ དུཀེ སངྒཧཾ ན གཙྪནྟི། ཀེཙི པན ཐེརཱ ཏཱནིཔི ཝཱིཏདོསཔདེན སངྒཎྷནྟི། སམོཧཾ ཝཱིཏམོཧནྟི ཨེཏྠ པན མོཧེཀཧེཏུཀཝསེན ཝིཙིཀིཙྪཱཨུདྡྷཙྩསཧགཏདྭཡམེཝ སམོཧཾ། མོཧསྶ པན སབྦཱཀུསལེསུ སམྦྷཝཏོ དྭཱདསཝིདྷམྤི ཨཀུསལཾ ཙིཏྟཾ ‘‘སམོཧ’’ནྟི ཝེདིཏབྦཾ། ཨཝསེསཾ ཀུསལཱབྱཱཀཏཾ ཝཱིཏམོཧཾ། ཐིནམིདྡྷཱནུགཏཾ པན སཾཁིཏྟཾ, ཨུདྡྷཙྩཱནུགཏཾ ཝིཀྑིཏྟཾ། རཱུཔཱཝཙརཱརཱུཔཱཝཙརཾ མཧགྒཏཾ, ཨཝསེསཾ ཨམཧགྒཏཾ། སབྦམྤི ཏེབྷཱུམཀཾ སཨུཏྟརཾ, ལོཀུཏྟརཾ ཨནུཏྟརཾ། ཨུཔཙཱརཔྤཏྟཾ ཨཔྤནཱཔྤཏྟཉྩ སམཱཧིཏཾ, ཏདུབྷཡམསམྤཏྟཾ ཨསམཱཧིཏཾ། ཏདངྒཝིཀྑམྦྷནསམུཙྪེདཔཊིཔྤསྶདྡྷིནིསྶརཎཝིམུཏྟིཔྤཏྟཾ ཝིམུཏྟཾ, པཉྩཝིདྷམྤི ཨེཏཾ ཝིམུཏྟིམཔྤཏྟཾ ཨཝིམུཏྟནྟི ཝེདིཏབྦཾ། ཨིཏི ཙེཏོཔརིཡཉཱཎལཱབྷཱི བྷིཀྑུ སོལ༹སཔྤབྷེདམྤི ཙིཏྟཾ པཛཱནཱཏི། པུཐུཛྫནཱ པན ཨརིཡཱནཾ མགྒཕལཙིཏྟཾ ན ཛཱནནྟི, ཨརིཡཱཔི ཙ ཧེཊྛིམཱ ཧེཊྛིམཱ ཨུཔརིམཱནཾ ཨུཔརིམཱནཾ མགྒཕལཙིཏྟཾ ན ཛཱནནྟི, ཨུཔརིམཱ ཨུཔརིམཱ པན ཧེཊྛིམཱནཾ ཧེཊྛིམཱནཾ ཙིཏྟཾ ཛཱནནྟཱིཏི།
Parasattānanti attānaṃ ṭhapetvā sesasattānaṃ. Parapuggalānanti idampi iminā ekatthameva, veneyyavasena pana desanāvilāsena ca byañjanena nānattaṃ kataṃ. Cetasā ceto paricca pajānātīti attano cittena tesaṃ cittaṃ paricchinditvā sarāgādivasena nānappakārato jānāti. Sarāgaṃ vātiādīsu vā-saddo samuccayattho. Tattha aṭṭhavidhaṃ lobhasahagatacittaṃ sarāgaṃ cittaṃ nāma, avasesaṃ catubhūmakakusalābyākatacittaṃ vītarāgaṃ nāma. Dve domanassacittāni, dve vicikicchāuddhaccacittānīti imāni pana cattāri cittāni imasmiṃ duke saṅgahaṃ na gacchanti. Keci pana therā tānipi vītarāgapadena saṅgaṇhanti. Duvidhaṃ pana domanassasahagataṃ cittaṃ sadosaṃ cittaṃ nāma, sabbampi catubhūmakaṃ kusalābyākataṃ vītadosaṃ nāma. Sesāni dasa akusalacittāni imasmiṃ duke saṅgahaṃ na gacchanti. Keci pana therā tānipi vītadosapadena saṅgaṇhanti. Samohaṃ vītamohanti ettha pana mohekahetukavasena vicikicchāuddhaccasahagatadvayameva samohaṃ. Mohassa pana sabbākusalesu sambhavato dvādasavidhampi akusalaṃ cittaṃ ‘‘samoha’’nti veditabbaṃ. Avasesaṃ kusalābyākataṃ vītamohaṃ. Thinamiddhānugataṃ pana saṃkhittaṃ, uddhaccānugataṃ vikkhittaṃ. Rūpāvacarārūpāvacaraṃ mahaggataṃ, avasesaṃ amahaggataṃ. Sabbampi tebhūmakaṃ sauttaraṃ, lokuttaraṃ anuttaraṃ. Upacārappattaṃ appanāppattañca samāhitaṃ, tadubhayamasampattaṃ asamāhitaṃ. Tadaṅgavikkhambhanasamucchedapaṭippassaddhinissaraṇavimuttippattaṃ vimuttaṃ, pañcavidhampi etaṃ vimuttimappattaṃ avimuttanti veditabbaṃ. Iti cetopariyañāṇalābhī bhikkhu soḷasappabhedampi cittaṃ pajānāti. Puthujjanā pana ariyānaṃ maggaphalacittaṃ na jānanti, ariyāpi ca heṭṭhimā heṭṭhimā uparimānaṃ uparimānaṃ maggaphalacittaṃ na jānanti, uparimā uparimā pana heṭṭhimānaṃ heṭṭhimānaṃ cittaṃ jānantīti.
ཙེཏོཔརིཡཉཱཎནིདྡེསཝཎྞནཱ ནིཊྛིཏཱ།
Cetopariyañāṇaniddesavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཁུདྡཀནིཀཱཡ • Khuddakanikāya / པཊིསམྦྷིདཱམགྒཔཱལི༹ • Paṭisambhidāmaggapāḷi / ༥༢. ཙེཏོཔརིཡཉཱཎནིདྡེསོ • 52. Cetopariyañāṇaniddeso
