| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
ச²ஆபத்திஸமுட்டா²னவாரவண்ணனா
Chaāpattisamuṭṭhānavāravaṇṇanā
276. பட²மேன ஆபத்திஸமுட்டா²னேனாதி கேவலங் காயேன. பாராஜிகாபத்தியா ஏகந்தஸசித்தகஸமுட்டா²னத்தா ‘‘ந ஹீதி வத்தப்³ப³’’ந்தி வுத்தங். ஸங்கா⁴தி³ஸேஸாதீ³னங் து³க்கடபரியோஸானானங் பஞ்சன்னங் அசித்தகானம்பி ஸம்ப⁴வதோ ‘‘ஸியா’’தி வுத்தங், ஆபஜ்ஜனங் ஸியா ப⁴வெய்யாதி அத்தோ². ஹீனுக்கட்டே²ஹி ஜாதிஆதீ³ஹி ஓமஸனே ஏவ து³ப்³பா⁴ஸிதஸ்ஸ பஞ்ஞத்தத்தா ஸா ஏகந்தவாசாசித்தஸமுட்டா²னா ஏவாதி.
276.Paṭhamena āpattisamuṭṭhānenāti kevalaṃ kāyena. Pārājikāpattiyā ekantasacittakasamuṭṭhānattā ‘‘na hīti vattabba’’nti vuttaṃ. Saṅghādisesādīnaṃ dukkaṭapariyosānānaṃ pañcannaṃ acittakānampi sambhavato ‘‘siyā’’ti vuttaṃ, āpajjanaṃ siyā bhaveyyāti attho. Hīnukkaṭṭhehi jātiādīhi omasane eva dubbhāsitassa paññattattā sā ekantavācācittasamuṭṭhānā evāti.
து³தியஸமுட்டா²னநயே வாசாய ஏவ ஸமாபஜ்ஜிதப்³ப³பாடிதே³ஸனீயஸ்ஸ அபா⁴வா ‘‘ந ஹீ’’தி வுத்தங்.
Dutiyasamuṭṭhānanaye vācāya eva samāpajjitabbapāṭidesanīyassa abhāvā ‘‘na hī’’ti vuttaṃ.
ததியே பன வோஸாஸமானரூபங் பி⁴க்கு²னிங் காயவாசாஹி அனபஸாத³னபச்சயா பாடிதே³ஸனீயஸம்ப⁴வதோ ‘‘ஸியா’’தி வுத்தங்.
Tatiye pana vosāsamānarūpaṃ bhikkhuniṃ kāyavācāhi anapasādanapaccayā pāṭidesanīyasambhavato ‘‘siyā’’ti vuttaṃ.
ஓமஸனே பாசித்தியஸ்ஸ அதி³ன்னாதா³னஸமுட்டா²னத்தேபி தப்பச்சயா பஞ்ஞத்தஸ்ஸ து³ப்³பா⁴ஸிதஸ்ஸ பஞ்சமேனேவ ஸமுப்பத்தீதி த³ஸ்ஸேதுங் சதுத்த²வாரே ‘‘து³ப்³பா⁴ஸிதங் ஆபஜ்ஜெய்யாதி ந ஹீதி வத்தப்³ப³’’ந்தி வத்வா பஞ்சமவாரே ‘‘ஸியாதி வத்தப்³ப³’’ந்தி வுத்தங். காயவிகாரேனேவ ஓமஸந்தஸ்ஸ பனெத்த² து³ப்³பா⁴ஸிதபா⁴வேபி காயகீளாபா⁴வாபா⁴வதோ து³க்கடமேவாதி த³ட்ட²ப்³ப³ங்.
Omasane pācittiyassa adinnādānasamuṭṭhānattepi tappaccayā paññattassa dubbhāsitassa pañcameneva samuppattīti dassetuṃ catutthavāre ‘‘dubbhāsitaṃ āpajjeyyāti na hīti vattabba’’nti vatvā pañcamavāre ‘‘siyāti vattabba’’nti vuttaṃ. Kāyavikāreneva omasantassa panettha dubbhāsitabhāvepi kāyakīḷābhāvābhāvato dukkaṭamevāti daṭṭhabbaṃ.
ச²ட்ட²வாரே பன விஜ்ஜமானோபி காயோ து³ப்³பா⁴ஸிதஸ்ஸ அங்க³ங் ந ஹோதி, பஞ்சமஸமுட்டா²னே ஏவ ச²ட்ட²ம்பி பவிஸதீதி த³ஸ்ஸேதுங் ‘‘ந ஹீ’’தி படிக்கி²த்தங், ந பன தத்த² ஸப்³ப³தா² து³ப்³பா⁴ஸிதேன அனாபத்தீதி த³ஸ்ஸேதுங். ந ஹி த³வகம்யதாய காயவாசாஹி ஓமஸந்தஸ்ஸ து³ப்³பா⁴ஸிதாபத்தி ந ஸம்ப⁴வதி. யஞ்ஹி பஞ்சமேனேவ ஸமாபஜ்ஜதி, தங் ச²ட்டே²னபி ஸமாபஜ்ஜதி ஏவ த⁴ம்மதே³ஸனாபத்தி வியாதி க³ஹேதப்³ப³ங். ஸேஸங் ஸமுட்டா²னவாரே ஸுவிஞ்ஞெய்யமேவ.
Chaṭṭhavāre pana vijjamānopi kāyo dubbhāsitassa aṅgaṃ na hoti, pañcamasamuṭṭhāne eva chaṭṭhampi pavisatīti dassetuṃ ‘‘na hī’’ti paṭikkhittaṃ, na pana tattha sabbathā dubbhāsitena anāpattīti dassetuṃ. Na hi davakamyatāya kāyavācāhi omasantassa dubbhāsitāpatti na sambhavati. Yañhi pañcameneva samāpajjati, taṃ chaṭṭhenapi samāpajjati eva dhammadesanāpatti viyāti gahetabbaṃ. Sesaṃ samuṭṭhānavāre suviññeyyameva.
ச²ஆபத்திஸமுட்டா²னவாரவண்ணனா நிட்டி²தா.
Chaāpattisamuṭṭhānavāravaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / பரிவாரபாளி • Parivārapāḷi / 1. ச²ஆபத்திஸமுட்டா²னவாரோ • 1. Chaāpattisamuṭṭhānavāro
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / ச²ஆபத்திஸமுட்டா²னவாரகதா²வண்ணனா • Chaāpattisamuṭṭhānavārakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / ச²ஆபத்திஸமுட்டா²னவாராதி³வண்ணனா • Chaāpattisamuṭṭhānavārādivaṇṇanā
