| Library / Tipiṭaka / তিপিটক • Tipiṭaka / ৰিমতিৰিনোদনী-টীকা • Vimativinodanī-ṭīkā |
ছআপত্তিসমুট্ঠানৰারৰণ্ণনা
Chaāpattisamuṭṭhānavāravaṇṇanā
২৭৬. পঠমেন আপত্তিসমুট্ঠানেনাতি কেৰলং কাযেন। পারাজিকাপত্তিযা একন্তসচিত্তকসমুট্ঠানত্তা ‘‘ন হীতি ৰত্তব্ব’’ন্তি ৰুত্তং। সঙ্ঘাদিসেসাদীনং দুক্কটপরিযোসানানং পঞ্চন্নং অচিত্তকানম্পি সম্ভৰতো ‘‘সিযা’’তি ৰুত্তং, আপজ্জনং সিযা ভৰেয্যাতি অত্থো। হীনুক্কট্ঠেহি জাতিআদীহি ওমসনে এৰ দুব্ভাসিতস্স পঞ্ঞত্তত্তা সা একন্তৰাচাচিত্তসমুট্ঠানা এৰাতি।
276.Paṭhamena āpattisamuṭṭhānenāti kevalaṃ kāyena. Pārājikāpattiyā ekantasacittakasamuṭṭhānattā ‘‘na hīti vattabba’’nti vuttaṃ. Saṅghādisesādīnaṃ dukkaṭapariyosānānaṃ pañcannaṃ acittakānampi sambhavato ‘‘siyā’’ti vuttaṃ, āpajjanaṃ siyā bhaveyyāti attho. Hīnukkaṭṭhehi jātiādīhi omasane eva dubbhāsitassa paññattattā sā ekantavācācittasamuṭṭhānā evāti.
দুতিযসমুট্ঠাননযে ৰাচায এৰ সমাপজ্জিতব্বপাটিদেসনীযস্স অভাৰা ‘‘ন হী’’তি ৰুত্তং।
Dutiyasamuṭṭhānanaye vācāya eva samāpajjitabbapāṭidesanīyassa abhāvā ‘‘na hī’’ti vuttaṃ.
ততিযে পন ৰোসাসমানরূপং ভিক্খুনিং কাযৰাচাহি অনপসাদনপচ্চযা পাটিদেসনীযসম্ভৰতো ‘‘সিযা’’তি ৰুত্তং।
Tatiye pana vosāsamānarūpaṃ bhikkhuniṃ kāyavācāhi anapasādanapaccayā pāṭidesanīyasambhavato ‘‘siyā’’ti vuttaṃ.
ওমসনে পাচিত্তিযস্স অদিন্নাদানসমুট্ঠানত্তেপি তপ্পচ্চযা পঞ্ঞত্তস্স দুব্ভাসিতস্স পঞ্চমেনেৰ সমুপ্পত্তীতি দস্সেতুং চতুত্থৰারে ‘‘দুব্ভাসিতং আপজ্জেয্যাতি ন হীতি ৰত্তব্ব’’ন্তি ৰত্ৰা পঞ্চমৰারে ‘‘সিযাতি ৰত্তব্ব’’ন্তি ৰুত্তং। কাযৰিকারেনেৰ ওমসন্তস্স পনেত্থ দুব্ভাসিতভাৰেপি কাযকীল়াভাৰাভাৰতো দুক্কটমেৰাতি দট্ঠব্বং।
Omasane pācittiyassa adinnādānasamuṭṭhānattepi tappaccayā paññattassa dubbhāsitassa pañcameneva samuppattīti dassetuṃ catutthavāre ‘‘dubbhāsitaṃ āpajjeyyāti na hīti vattabba’’nti vatvā pañcamavāre ‘‘siyāti vattabba’’nti vuttaṃ. Kāyavikāreneva omasantassa panettha dubbhāsitabhāvepi kāyakīḷābhāvābhāvato dukkaṭamevāti daṭṭhabbaṃ.
ছট্ঠৰারে পন ৰিজ্জমানোপি কাযো দুব্ভাসিতস্স অঙ্গং ন হোতি, পঞ্চমসমুট্ঠানে এৰ ছট্ঠম্পি পৰিসতীতি দস্সেতুং ‘‘ন হী’’তি পটিক্খিত্তং, ন পন তত্থ সব্বথা দুব্ভাসিতেন অনাপত্তীতি দস্সেতুং। ন হি দৰকম্যতায কাযৰাচাহি ওমসন্তস্স দুব্ভাসিতাপত্তি ন সম্ভৰতি। যঞ্হি পঞ্চমেনেৰ সমাপজ্জতি, তং ছট্ঠেনপি সমাপজ্জতি এৰ ধম্মদেসনাপত্তি ৰিযাতি গহেতব্বং। সেসং সমুট্ঠানৰারে সুৰিঞ্ঞেয্যমেৰ।
Chaṭṭhavāre pana vijjamānopi kāyo dubbhāsitassa aṅgaṃ na hoti, pañcamasamuṭṭhāne eva chaṭṭhampi pavisatīti dassetuṃ ‘‘na hī’’ti paṭikkhittaṃ, na pana tattha sabbathā dubbhāsitena anāpattīti dassetuṃ. Na hi davakamyatāya kāyavācāhi omasantassa dubbhāsitāpatti na sambhavati. Yañhi pañcameneva samāpajjati, taṃ chaṭṭhenapi samāpajjati eva dhammadesanāpatti viyāti gahetabbaṃ. Sesaṃ samuṭṭhānavāre suviññeyyameva.
ছআপত্তিসমুট্ঠানৰারৰণ্ণনা নিট্ঠিতা।
Chaāpattisamuṭṭhānavāravaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / পরিৰারপাল়ি • Parivārapāḷi / ১. ছআপত্তিসমুট্ঠানৰারো • 1. Chaāpattisamuṭṭhānavāro
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ছআপত্তিসমুট্ঠানৰারকথাৰণ্ণনা • Chaāpattisamuṭṭhānavārakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ছআপত্তিসমুট্ঠানৰারাদিৰণ্ণনা • Chaāpattisamuṭṭhānavārādivaṇṇanā
