| Library / Tipiṭaka / තිපිටක • Tipiṭaka / විමතිවිනොදනී-ටීකා • Vimativinodanī-ṭīkā |
ඡආපත්‌තිසමුට්‌ඨානවාරවණ්‌ණනා
Chaāpattisamuṭṭhānavāravaṇṇanā
276. පඨමෙන ආපත්‌තිසමුට්‌ඨානෙනාති කෙවලං කායෙන. පාරාජිකාපත්‌තියා එකන්‌තසචිත්‌තකසමුට්‌ඨානත්‌තා ‘‘න හීති වත්‌තබ්‌බ’’න්‌ති වුත්‌තං. සඞ්‌ඝාදිසෙසාදීනං දුක්‌කටපරියොසානානං පඤ්‌චන්‌නං අචිත්‌තකානම්‌පි සම්‌භවතො ‘‘සියා’’ති වුත්‌තං, ආපජ්‌ජනං සියා භවෙය්‍යාති අත්‌ථො. හීනුක්‌කට්‌ඨෙහි ජාතිආදීහි ඔමසනෙ එව දුබ්‌භාසිතස්‌ස පඤ්‌ඤත්‌තත්‌තා සා එකන්‌තවාචාචිත්‌තසමුට්‌ඨානා එවාති.
276.Paṭhamena āpattisamuṭṭhānenāti kevalaṃ kāyena. Pārājikāpattiyā ekantasacittakasamuṭṭhānattā ‘‘na hīti vattabba’’nti vuttaṃ. Saṅghādisesādīnaṃ dukkaṭapariyosānānaṃ pañcannaṃ acittakānampi sambhavato ‘‘siyā’’ti vuttaṃ, āpajjanaṃ siyā bhaveyyāti attho. Hīnukkaṭṭhehi jātiādīhi omasane eva dubbhāsitassa paññattattā sā ekantavācācittasamuṭṭhānā evāti.
දුතියසමුට්‌ඨානනයෙ වාචාය එව සමාපජ්‌ජිතබ්‌බපාටිදෙසනීයස්‌ස අභාවා ‘‘න හී’’ති වුත්‌තං.
Dutiyasamuṭṭhānanaye vācāya eva samāpajjitabbapāṭidesanīyassa abhāvā ‘‘na hī’’ti vuttaṃ.
තතියෙ පන වොසාසමානරූපං භික්‌ඛුනිං කායවාචාහි අනපසාදනපච්‌චයා පාටිදෙසනීයසම්‌භවතො ‘‘සියා’’ති වුත්‌තං.
Tatiye pana vosāsamānarūpaṃ bhikkhuniṃ kāyavācāhi anapasādanapaccayā pāṭidesanīyasambhavato ‘‘siyā’’ti vuttaṃ.
ඔමසනෙ පාචිත්‌තියස්‌ස අදින්‌නාදානසමුට්‌ඨානත්‌තෙපි තප්‌පච්‌චයා පඤ්‌ඤත්‌තස්‌ස දුබ්‌භාසිතස්‌ස පඤ්‌චමෙනෙව සමුප්‌පත්‌තීති දස්‌සෙතුං චතුත්‌ථවාරෙ ‘‘දුබ්‌භාසිතං ආපජ්‌ජෙය්‍යාති න හීති වත්‌තබ්‌බ’’න්‌ති වත්‌වා පඤ්‌චමවාරෙ ‘‘සියාති වත්‌තබ්‌බ’’න්‌ති වුත්‌තං. කායවිකාරෙනෙව ඔමසන්‌තස්‌ස පනෙත්‌ථ දුබ්‌භාසිතභාවෙපි කායකීළාභාවාභාවතො දුක්‌කටමෙවාති දට්‌ඨබ්‌බං.
Omasane pācittiyassa adinnādānasamuṭṭhānattepi tappaccayā paññattassa dubbhāsitassa pañcameneva samuppattīti dassetuṃ catutthavāre ‘‘dubbhāsitaṃ āpajjeyyāti na hīti vattabba’’nti vatvā pañcamavāre ‘‘siyāti vattabba’’nti vuttaṃ. Kāyavikāreneva omasantassa panettha dubbhāsitabhāvepi kāyakīḷābhāvābhāvato dukkaṭamevāti daṭṭhabbaṃ.
ඡට්‌ඨවාරෙ පන විජ්‌ජමානොපි කායො දුබ්‌භාසිතස්‌ස අඞ්‌ගං න හොති, පඤ්‌චමසමුට්‌ඨානෙ එව ඡට්‌ඨම්‌පි පවිසතීති දස්‌සෙතුං ‘‘න හී’’ති පටික්‌ඛිත්‌තං, න පන තත්‌ථ සබ්‌බථා දුබ්‌භාසිතෙන අනාපත්‌තීති දස්‌සෙතුං. න හි දවකම්‍යතාය කායවාචාහි ඔමසන්‌තස්‌ස දුබ්‌භාසිතාපත්‌ති න සම්‌භවති. යඤ්‌හි පඤ්‌චමෙනෙව සමාපජ්‌ජති, තං ඡට්‌ඨෙනපි සමාපජ්‌ජති එව ධම්‌මදෙසනාපත්‌ති වියාති ගහෙතබ්‌බං. සෙසං සමුට්‌ඨානවාරෙ සුවිඤ්‌ඤෙය්‍යමෙව.
Chaṭṭhavāre pana vijjamānopi kāyo dubbhāsitassa aṅgaṃ na hoti, pañcamasamuṭṭhāne eva chaṭṭhampi pavisatīti dassetuṃ ‘‘na hī’’ti paṭikkhittaṃ, na pana tattha sabbathā dubbhāsitena anāpattīti dassetuṃ. Na hi davakamyatāya kāyavācāhi omasantassa dubbhāsitāpatti na sambhavati. Yañhi pañcameneva samāpajjati, taṃ chaṭṭhenapi samāpajjati eva dhammadesanāpatti viyāti gahetabbaṃ. Sesaṃ samuṭṭhānavāre suviññeyyameva.
ඡආපත්‌තිසමුට්‌ඨානවාරවණ්‌ණනා නිට්‌ඨිතා.
Chaāpattisamuṭṭhānavāravaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / පරිවාරපාළි • Parivārapāḷi / 1. ඡආපත්‌තිසමුට්‌ඨානවාරො • 1. Chaāpattisamuṭṭhānavāro
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / ඡආපත්‌තිසමුට්‌ඨානවාරකථාවණ්‌ණනා • Chaāpattisamuṭṭhānavārakathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / ඡආපත්‌තිසමුට්‌ඨානවාරාදිවණ්‌ණනා • Chaāpattisamuṭṭhānavārādivaṇṇanā
