| Library / Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
4. ச²ப்³ப³ஸ்ஸஸிக்கா²பத³வண்ணனா
4. Chabbassasikkhāpadavaṇṇanā
யங் ஸந்த²தஸம்முதிங் தே³தீதி ஸம்ப³ந்தோ⁴. கி³லானஸ்ஸ பி⁴க்கு²னோதி யஸ்ஸ வினா ஸந்த²தா ந பா²ஸு ஹோதி, ந ஸக்கோதி ச ஸந்த²தங் ஆதா³ய பக்கமிதுங், ஏவங்பூ⁴தஸ்ஸ கி³லானஸ்ஸ பி⁴க்கு²னோ. ஸந்த²தஸம்முதிங் தே³தீதி ‘‘ஸுணாது மே, ப⁴ந்தே, ஸங்கோ⁴, அயங் இத்த²ன்னாமோ பி⁴க்கு² கி³லானோ ந ஸக்கோதி ஸந்த²தங் ஆதா³ய பக்கமிது’’ந்திஆதி³னா (பாரா॰ 560) பத³பா⁴ஜனே வுத்தாய ஞத்திது³தியகம்மவாசாய ஸந்த²தஸம்முதிங் தே³தி.
Yaṃ santhatasammutiṃ detīti sambandho. Gilānassa bhikkhunoti yassa vinā santhatā na phāsu hoti, na sakkoti ca santhataṃ ādāya pakkamituṃ, evaṃbhūtassa gilānassa bhikkhuno. Santhatasammutiṃ detīti ‘‘suṇātu me, bhante, saṅgho, ayaṃ itthannāmo bhikkhu gilāno na sakkoti santhataṃ ādāya pakkamitu’’ntiādinā (pārā. 560) padabhājane vuttāya ñattidutiyakammavācāya santhatasammutiṃ deti.
ஸாதி ஸந்த²தஸம்முதி. வூபஸந்தோ வா புன குப்பதீதி வூபஸந்தோ வா ஸோ ஆபா³தோ⁴ புன குப்பதி, அனுவஸ்ஸம்பி காதுங் வட்டதி, புன ஸம்முதிதா³னகிச்சங் நத்தீ²தி அதி⁴ப்பாயோ. ந கேவலங் தஸ்மிங்யேவ ரோகே³ குப்பிதே, அத² கோ² அஞ்ஞஸ்மிங் ரோகே³ குப்பிதேபி க³தக³தட்டா²னே அனுவஸ்ஸங் காதுங் லப⁴தி. தேனேவ ஹி ஸமந்தபாஸாதி³காயங் ‘‘ஸசே அரோகோ³ ஹுத்வா புன மூலப்³யாதி⁴னாவ கி³லானோ ஹோதி , ஸோயேவ பரிஹாரோ, நத்த²ஞ்ஞங் ‘ஸம்முதிகிச்ச’ந்தி பு²ஸ்ஸதே³வத்தே²ரோ ஆஹ. உபதிஸ்ஸத்தே²ரோ பன ஸோ வா ப்³யாதி⁴ படிகுப்பது, அஞ்ஞோ வா, ஸகிங் ‘கி³லானோ’தி நாமங் லத்³த⁴ங் லத்³த⁴மேவ, புன ‘ஸம்முதிகிச்சங் நத்தீ²’தி ஆஹா’’தி (பாரா॰ அட்ட²॰ 2.557) உபதிஸ்ஸத்தே²ரவாதோ³ பச்சா² வுத்தோ.
Sāti santhatasammuti. Vūpasanto vā puna kuppatīti vūpasanto vā so ābādho puna kuppati, anuvassampi kātuṃ vaṭṭati, puna sammutidānakiccaṃ natthīti adhippāyo. Na kevalaṃ tasmiṃyeva roge kuppite, atha kho aññasmiṃ roge kuppitepi gatagataṭṭhāne anuvassaṃ kātuṃ labhati. Teneva hi samantapāsādikāyaṃ ‘‘sace arogo hutvā puna mūlabyādhināva gilāno hoti , soyeva parihāro, natthaññaṃ ‘sammutikicca’nti phussadevatthero āha. Upatissatthero pana so vā byādhi paṭikuppatu, añño vā, sakiṃ ‘gilāno’ti nāmaṃ laddhaṃ laddhameva, puna ‘sammutikiccaṃ natthī’ti āhā’’ti (pārā. aṭṭha. 2.557) upatissattheravādo pacchā vutto.
எத்த² ச ‘‘இத³ங் மே, ப⁴ந்தே, ஸந்த²தங் ஊனகச²ப்³ப³ஸ்ஸானி காராபிதங் அஞ்ஞத்ர பி⁴க்கு²ஸம்முதியா நிஸ்ஸக்³கி³ய’’ந்தி (பாரா॰ 562) இமினா நயேன நிஸ்ஸஜ்ஜனவிதா⁴னங் வேதி³தப்³ப³ங். ‘‘ஸேஸங் பட²மஸதி³ஸமேவா’’தி இமினா ‘‘அத்தனா கதங் பரேஹி பரியோஸாபேதீ’’திஆதி³கங் அதிதி³ட்ட²ங். அயங் பன விஸேஸோ – பரிபுண்ணே ச²ப்³ப³ஸ்ஸே வா அதிரேகச²ப்³ப³ஸ்ஸே வா அனாபத்தி. அங்கே³ஸு ச ச²ப்³ப³ஸ்ஸானங் அந்தோபா⁴வோ நானாத்தங்.
Ettha ca ‘‘idaṃ me, bhante, santhataṃ ūnakachabbassāni kārāpitaṃ aññatra bhikkhusammutiyā nissaggiya’’nti (pārā. 562) iminā nayena nissajjanavidhānaṃ veditabbaṃ. ‘‘Sesaṃ paṭhamasadisamevā’’ti iminā ‘‘attanā kataṃ parehi pariyosāpetī’’tiādikaṃ atidiṭṭhaṃ. Ayaṃ pana viseso – paripuṇṇe chabbasse vā atirekachabbasse vā anāpatti. Aṅgesu ca chabbassānaṃ antobhāvo nānāttaṃ.
ச²ப்³ப³ஸ்ஸஸிக்கா²பத³வண்ணனா நிட்டி²தா.
Chabbassasikkhāpadavaṇṇanā niṭṭhitā.
