| Library / Tipiṭaka / திபிடக • Tipiṭaka / வஜிரபு³த்³தி⁴-டீகா • Vajirabuddhi-ṭīkā |
4. ச²ப்³ப³ஸ்ஸஸிக்கா²பத³வண்ணனா
4. Chabbassasikkhāpadavaṇṇanā
562. நவங் நாம கரணங் உபாதா³யாதி இத³ங் ஆதி³கரணதோ பட்டா²ய வஸ்ஸக³ணனங் தீ³பேதி. கரித்வா வாதி வசனங் நிட்டா²னதி³வஸதோ பட்டா²யாதி தீ³பேதி. தா⁴ரேதப்³ப³ந்தி வசனங் பன பரிபோ⁴க³தோ பட்டா²யாதி தீ³பேதி, யஸ்மா லத்³த⁴ஸம்முதிகஸ்ஸ க³தக³தட்டா²னே ச²ன்னங் ச²ன்னங் வஸ்ஸானங் ஓரதோவ கதானி ப³ஹூனிபி ஹொந்தி, தஸ்மா அஞ்ஞங் நவந்தி கிங் கததோ அஞ்ஞங், உதா³ஹு தா⁴ரிததோ அஞ்ஞந்தி? கிஞ்செத்த² யதி³ கததோ அஞ்ஞங், தேஸு அஞ்ஞதரங் து³க்கதங் வா பரிபோ⁴க³ஜிண்ணங் வா புன காதுங் வட்டதி, தஞ்ச கோ² வினாபி புராணஸந்த²தஸ்ஸ ஸுக³தவித³த்தி²ங் அப்படிஸித்³த⁴பரியாபன்னத்தா. கததோ ஹி அஞ்ஞங் படிஸித்³த⁴ங், இத³ஞ்ச புப்³ப³கதந்தி ததோ அனந்தரஸிக்கா²பத³விரோதோ⁴ ஹோதி. அத² தா⁴ரிததோ அஞ்ஞங் நாம, ஸம்முதி நிரத்தி²கா ஆபஜ்ஜதி, பட²மகதங் சே அபரிபு⁴த்தங், ஸதியாபி ஸம்முதியா அஞ்ஞங் நவங் ந வட்டதீதி அதி⁴ப்பாயோ? தத்ரித³ங் ஸன்னிட்டா²னநித³ஸ்ஸனங் – நிட்டா²னதி³வஸதோ பட்டா²ய ச²ன்னங் ச²ன்னங் வஸ்ஸானங் பரிச்சே²தோ³ வேதி³தப்³போ³. தத்த² ச ஸத்தமே வஸ்ஸே ஸம்பத்தே ச²ப்³ப³ஸ்ஸானி பரிபுண்ணானி ஹொந்தி. தஞ்ச கோ² மாஸபரிச்சே²த³வஸேன, ந வஸ்ஸபரிச்சே²த³வஸேன. ஸத்தமே பரிபுண்ணஞ்ச ஊனகஞ்ச வஸ்ஸங் நாம, தஸ்மா விப்பகதஸ்ஸேவ ஸசே ச²ப்³ப³ஸ்ஸானி பூரெந்தி, புன நிட்டா²னதி³வஸதோ பட்டா²ய ச²ப்³ப³ஸ்ஸானி லப⁴ந்தி. தஞ்ச கோ² பரிபு⁴த்தங் வா ஹோது அபரிபு⁴த்தங் வா, தா⁴ரிதமேவ நாம. யஸ்மா ‘‘நவங் நாம கரணங் உபாதா³ய வுச்சதீ’’தி வுத்தங், தஸ்மா ச²ன்னங் வஸ்ஸானங் பரதோ தமேவ புப்³ப³கதங் து³க்கதபா⁴வேன, பரிபோ⁴க³ஜிண்ணதாய வா விஜடெத்வா புன கரோதி, நிட்டா²னதி³வஸதோ பட்டா²ய ச²ப்³ப³ஸ்ஸபரமதா தா⁴ரேதப்³ப³ங், அதிரேகங் வா. அந்தோ சே கரோதி, ததே³வ அஞ்ஞங் நவங் நாம ஹோதி கரணங் உபாதா³ய, தஸ்மா நிஸ்ஸக்³கி³யங். அஞ்ஞதா² ‘‘நவங் நாம கரணங் உபாதா³யா’’தி இமினா ந கோசி விஸேஸோ அத்தி². ஏவங் ஸந்தே கிங் ஹோதி? அட்டு²ப்பத்தீதி. ‘‘யாசனப³ஹுலா விஞ்ஞத்திப³ஹுலா விஹரந்தீ’’தி ஹி தத்த² வுத்தங், தஞ்ச அஞ்ஞஸ்ஸ கரணங் தீ³பேதி. யதி³ ஏவங் தங் நிப்³பி³ஸேஸமேவ ஆபஜ்ஜதீதி? நாபஜ்ஜதி. அயங் பனஸ்ஸ விஸேஸோ, யஸ்மா ‘‘அஞ்ஞேன கதங் படிலபி⁴த்வா பரிபு⁴ஞ்ஜதி, அனாபத்தீ’’தி வுத்தத்தோ² விஸேஸோதி. கிங் வுத்தங் ஹோதி ? ‘‘நவங் நாம கரணங் உபாதா³ய வுச்சதீ’’தி வுத்தே அதிரேகசீவரஸ்ஸ உப்பத்தி விய படிலாபே⁴னஸ்ஸ உப்பத்தி நவதா ஆபஜ்ஜதி. ததோ படிலத்³த⁴தி³வஸதோ பட்டா²ய ச²ப்³ப³ஸ்ஸபரமதா தா⁴ரேதப்³ப³ங். ஓரேன சே ச²ன்னங் வஸ்ஸானங்…பே॰… காராபெய்ய, நிஸ்ஸக்³கி³யந்தி ஆபஜ்ஜதி, தஸ்மா நவங் நாம கரணமேவ உபாதா³ய வுச்சதி, ந படிலாப⁴ங். ஓரேன ச²ன்னங் வஸ்ஸானங் அத்தனோ அனுப்பன்னத்தா ‘‘நவ’’ந்தி ஸங்க்²யங் க³தங், அப்படிலத்³த⁴ங் சே காராபெய்ய, யதா² லாபோ⁴, ததா² கரெய்ய வா காராபெய்ய வாதி ச ந ஹோதி. கஸ்மா? யஸ்மா அஞ்ஞேன கதங் படிலபி⁴த்வா பரிபு⁴ஞ்ஜதி, அனாபத்தீதி விஸேஸோதி.
562.Navaṃnāma karaṇaṃ upādāyāti idaṃ ādikaraṇato paṭṭhāya vassagaṇanaṃ dīpeti. Karitvā vāti vacanaṃ niṭṭhānadivasato paṭṭhāyāti dīpeti. Dhāretabbanti vacanaṃ pana paribhogato paṭṭhāyāti dīpeti, yasmā laddhasammutikassa gatagataṭṭhāne channaṃ channaṃ vassānaṃ oratova katāni bahūnipi honti, tasmā aññaṃ navanti kiṃ katato aññaṃ, udāhu dhāritato aññanti? Kiñcettha yadi katato aññaṃ, tesu aññataraṃ dukkataṃ vā paribhogajiṇṇaṃ vā puna kātuṃ vaṭṭati, tañca kho vināpi purāṇasanthatassa sugatavidatthiṃ appaṭisiddhapariyāpannattā. Katato hi aññaṃ paṭisiddhaṃ, idañca pubbakatanti tato anantarasikkhāpadavirodho hoti. Atha dhāritato aññaṃ nāma, sammuti niratthikā āpajjati, paṭhamakataṃ ce aparibhuttaṃ, satiyāpi sammutiyā aññaṃ navaṃ na vaṭṭatīti adhippāyo? Tatridaṃ sanniṭṭhānanidassanaṃ – niṭṭhānadivasato paṭṭhāya channaṃ channaṃ vassānaṃ paricchedo veditabbo. Tattha ca sattame vasse sampatte chabbassāni paripuṇṇāni honti. Tañca kho māsaparicchedavasena, na vassaparicchedavasena. Sattame paripuṇṇañca ūnakañca vassaṃ nāma, tasmā vippakatasseva sace chabbassāni pūrenti, puna niṭṭhānadivasato paṭṭhāya chabbassāni labhanti. Tañca kho paribhuttaṃ vā hotu aparibhuttaṃ vā, dhāritameva nāma. Yasmā ‘‘navaṃ nāma karaṇaṃ upādāya vuccatī’’ti vuttaṃ, tasmā channaṃ vassānaṃ parato tameva pubbakataṃ dukkatabhāvena, paribhogajiṇṇatāya vā vijaṭetvā puna karoti, niṭṭhānadivasato paṭṭhāya chabbassaparamatā dhāretabbaṃ, atirekaṃ vā. Anto ce karoti, tadeva aññaṃ navaṃ nāma hoti karaṇaṃ upādāya, tasmā nissaggiyaṃ. Aññathā ‘‘navaṃ nāma karaṇaṃ upādāyā’’ti iminā na koci viseso atthi. Evaṃ sante kiṃ hoti? Aṭṭhuppattīti. ‘‘Yācanabahulā viññattibahulā viharantī’’ti hi tattha vuttaṃ, tañca aññassa karaṇaṃ dīpeti. Yadi evaṃ taṃ nibbisesameva āpajjatīti? Nāpajjati. Ayaṃ panassa viseso, yasmā ‘‘aññena kataṃ paṭilabhitvā paribhuñjati, anāpattī’’ti vuttattho visesoti. Kiṃ vuttaṃ hoti ? ‘‘Navaṃ nāma karaṇaṃ upādāya vuccatī’’ti vutte atirekacīvarassa uppatti viya paṭilābhenassa uppatti navatā āpajjati. Tato paṭiladdhadivasato paṭṭhāya chabbassaparamatā dhāretabbaṃ. Orena ce channaṃ vassānaṃ…pe… kārāpeyya, nissaggiyanti āpajjati, tasmā navaṃ nāma karaṇameva upādāya vuccati, na paṭilābhaṃ. Orena channaṃ vassānaṃ attano anuppannattā ‘‘nava’’nti saṅkhyaṃ gataṃ, appaṭiladdhaṃ ce kārāpeyya, yathā lābho, tathā kareyya vā kārāpeyya vāti ca na hoti. Kasmā? Yasmā aññena kataṃ paṭilabhitvā paribhuñjati, anāpattīti visesoti.
ச²ப்³ப³ஸ்ஸஸிக்கா²பத³வண்ணனா நிட்டி²தா.
Chabbassasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 4. ச²ப்³ப³ஸ்ஸஸிக்கா²பத³ங் • 4. Chabbassasikkhāpadaṃ
