| Library / Tipiṭaka / д̇ибидага • Tipiṭaka / ган̇каавид̇аран̣ий-абхинава-дийгаа • Kaṅkhāvitaraṇī-abhinava-ṭīkā |
4. чаб̣б̣ассасигкаабад̣̇аван̣н̣анаа
4. Chabbassasikkhāpadavaṇṇanā
яам̣ сант̇ад̇асаммуд̇им̣ д̣̇зд̇ийд̇и самб̣анд̇хо. г̇илаанасса бхигкунод̇и яасса винаа сант̇ад̇аа на паасу ход̇и, на саггод̇и жа сант̇ад̇ам̣ аад̣̇ааяа баггамид̇ум̣, звам̣бхууд̇асса г̇илаанасса бхигкуно. сант̇ад̇асаммуд̇им̣ д̣̇зд̇ийд̇и ‘‘сун̣аад̇у мз, бханд̇з, сан̇гхо, аяам̣ ид̇т̇аннаамо бхигку г̇илаано на саггод̇и сант̇ад̇ам̣ аад̣̇ааяа баггамид̇у’’нд̇иаад̣̇инаа (баараа. 560) бад̣̇абхааж̇анз вуд̇д̇ааяа н̃ад̇д̇ид̣̇уд̇ияагаммаваажааяа сант̇ад̇асаммуд̇им̣ д̣̇зд̇и.
Yaṃ santhatasammutiṃ detīti sambandho. Gilānassa bhikkhunoti yassa vinā santhatā na phāsu hoti, na sakkoti ca santhataṃ ādāya pakkamituṃ, evaṃbhūtassa gilānassa bhikkhuno. Santhatasammutiṃ detīti ‘‘suṇātu me, bhante, saṅgho, ayaṃ itthannāmo bhikkhu gilāno na sakkoti santhataṃ ādāya pakkamitu’’ntiādinā (pārā. 560) padabhājane vuttāya ñattidutiyakammavācāya santhatasammutiṃ deti.
саад̇и сант̇ад̇асаммуд̇и. вуубасанд̇о ваа буна губбад̇ийд̇и вуубасанд̇о ваа со ааб̣аад̇хо буна губбад̇и, анувассамби гаад̇ум̣ ваддад̇и, буна саммуд̇ид̣̇аанагижжам̣ над̇т̇ийд̇и ад̇хиббааяо. на гзвалам̣ д̇асмим̣язва рог̇з губбид̇з, ат̇а ко ан̃н̃асмим̣ рог̇з губбид̇зби г̇ад̇аг̇ад̇адтаанз анувассам̣ гаад̇ум̣ лабхад̇и. д̇знзва хи саманд̇абаасаад̣̇игааяам̣ ‘‘сажз арог̇о худ̇ваа буна муулаб̣яаад̇хинаава г̇илаано ход̇и , соязва барихааро, над̇т̇ан̃н̃ам̣ ‘саммуд̇игижжа’нд̇и пуссад̣̇звад̇т̇зро ааха. убад̇иссад̇т̇зро бана со ваа б̣яаад̇хи бадигуббад̇у, ан̃н̃о ваа, сагим̣ ‘г̇илаано’д̇и наамам̣ лад̣̇д̇хам̣ лад̣̇д̇хамзва, буна ‘саммуд̇игижжам̣ над̇т̇ий’д̇и аахаа’’д̇и (баараа. адта. 2.557) убад̇иссад̇т̇зраваад̣̇о бажчаа вуд̇д̇о.
Sāti santhatasammuti. Vūpasanto vā puna kuppatīti vūpasanto vā so ābādho puna kuppati, anuvassampi kātuṃ vaṭṭati, puna sammutidānakiccaṃ natthīti adhippāyo. Na kevalaṃ tasmiṃyeva roge kuppite, atha kho aññasmiṃ roge kuppitepi gatagataṭṭhāne anuvassaṃ kātuṃ labhati. Teneva hi samantapāsādikāyaṃ ‘‘sace arogo hutvā puna mūlabyādhināva gilāno hoti , soyeva parihāro, natthaññaṃ ‘sammutikicca’nti phussadevatthero āha. Upatissatthero pana so vā byādhi paṭikuppatu, añño vā, sakiṃ ‘gilāno’ti nāmaṃ laddhaṃ laddhameva, puna ‘sammutikiccaṃ natthī’ti āhā’’ti (pārā. aṭṭha. 2.557) upatissattheravādo pacchā vutto.
зд̇т̇а жа ‘‘ид̣̇ам̣ мз, бханд̇з, сант̇ад̇ам̣ уунагачаб̣б̣ассаани гаараабид̇ам̣ ан̃н̃ад̇ра бхигкусаммуд̇ияаа ниссаг̇г̇ияа’’нд̇и (баараа. 562) иминаа наязна ниссаж̇ж̇анавид̇хаанам̣ взд̣̇ид̇аб̣б̣ам̣. ‘‘сзсам̣ батамасад̣̇исамзваа’’д̇и иминаа ‘‘ад̇д̇анаа гад̇ам̣ барзхи барияосаабзд̇ий’’д̇иаад̣̇игам̣ ад̇ид̣̇идтам̣. аяам̣ бана висзсо – барибун̣н̣з чаб̣б̣ассз ваа ад̇ирзгачаб̣б̣ассз ваа анаабад̇д̇и. ан̇г̇зсу жа чаб̣б̣ассаанам̣ анд̇обхааво наанаад̇д̇ам̣.
Ettha ca ‘‘idaṃ me, bhante, santhataṃ ūnakachabbassāni kārāpitaṃ aññatra bhikkhusammutiyā nissaggiya’’nti (pārā. 562) iminā nayena nissajjanavidhānaṃ veditabbaṃ. ‘‘Sesaṃ paṭhamasadisamevā’’ti iminā ‘‘attanā kataṃ parehi pariyosāpetī’’tiādikaṃ atidiṭṭhaṃ. Ayaṃ pana viseso – paripuṇṇe chabbasse vā atirekachabbasse vā anāpatti. Aṅgesu ca chabbassānaṃ antobhāvo nānāttaṃ.
чаб̣б̣ассасигкаабад̣̇аван̣н̣анаа нидтид̇аа.
Chabbassasikkhāpadavaṇṇanā niṭṭhitā.
