| Library / Tipiṭaka / තිපිටක • Tipiṭaka / මහාවිභඞ්‌ග-අට්‌ඨකථා • Mahāvibhaṅga-aṭṭhakathā |
4. ඡබ්‌බස්‌සසික්‌ඛාපදවණ්‌ණනා
4. Chabbassasikkhāpadavaṇṇanā
557. තෙන සමයෙනාති ඡබ්‌බස්‌සසික්‌ඛාපදං. තත්‌ථ ඌහදන්‌තිපි උම්‌මිහන්‌තිපීති සන්‌ථතානං උපරි වච්‌චම්‌පි පස්‌සාවම්‌පි කරොන්‌තීති වුත්‌තං හොති.
557.Tenasamayenāti chabbassasikkhāpadaṃ. Tattha ūhadantipi ummihantipīti santhatānaṃ upari vaccampi passāvampi karontīti vuttaṃ hoti.
දින්‌නා සඞ්‌ඝෙන ඉත්‌ථන්‌නාමස්‌ස භික්‌ඛුනො සන්‌ථතසම්‌මුතීති එවං ලද්‌ධසම්‌මුතිකො භික්‌ඛු යාව රොගො න වූපසම්‌මති, තාව යං යං ඨානං ගච්‌ඡති, තත්‌ථ තත්‌ථ සන්‌ථතං කාතුං ලභති. සචෙ අරොගො හුත්‌වා පුන මූලබ්‍යාධිනාව ගිලානො හොති, සොයෙව පරිහාරො, නත්‌ථඤ්‌ඤං සම්‌මුතිකිච්‌චන්‌ති ඵුස්‌සදෙවත්‌ථෙරො ආහ. උපතිස්‌සත්‌ථෙරො පන ‘‘සො වා බ්‍යාධි පටිකුප්‌පතු, අඤ්‌ඤො වා, ‘සකිං ගිලානො’ති නාමං ලද්‌ධං ලද්‌ධමෙව, පුන සම්‌මුතිකිච්‌චං නත්‌ථී’’ති ආහ.
Dinnā saṅghena itthannāmassa bhikkhuno santhatasammutīti evaṃ laddhasammutiko bhikkhu yāva rogo na vūpasammati, tāva yaṃ yaṃ ṭhānaṃ gacchati, tattha tattha santhataṃ kātuṃ labhati. Sace arogo hutvā puna mūlabyādhināva gilāno hoti, soyeva parihāro, natthaññaṃ sammutikiccanti phussadevatthero āha. Upatissatthero pana ‘‘so vā byādhi paṭikuppatu, añño vā, ‘sakiṃ gilāno’ti nāmaṃ laddhaṃ laddhameva, puna sammutikiccaṃ natthī’’ti āha.
ඔරෙන චෙ ඡන්‌නං වස්‌සානන්‌ති ඡන්‌නං වස්‌සානං ඔරිමභාගෙ, අන්‌තොති අත්‌ථො. පදභාජනෙ පන සඞ්‌ඛ්‍යාමත්‌තදස්‌සනත්‌ථං ‘‘ඌනකඡබ්‌බස්‌සානී’’ති වුත්‌තං.
Orenace channaṃ vassānanti channaṃ vassānaṃ orimabhāge, antoti attho. Padabhājane pana saṅkhyāmattadassanatthaṃ ‘‘ūnakachabbassānī’’ti vuttaṃ.
අනාපත්‌ති ඡබ්‌බස්‌සානි කරොතීති යදා ඡබ්‌බස්‌සානි පරිපුණ්‌ණානි හොන්‌ති, තදා සන්‌ථතං කරොති. දුතියපදෙපි ‘‘යදා අතිරෙකඡබ්‌බස්‌සානි හොන්‌ති, තදා කරොතී’’ති එවමත්‌ථො දට්‌ඨබ්‌බො. න හි සො ඡබ්‌බස්‌සානි කරොතීති. සෙසං උත්‌තානත්‌ථමෙව.
Anāpatti chabbassāni karotīti yadā chabbassāni paripuṇṇāni honti, tadā santhataṃ karoti. Dutiyapadepi ‘‘yadā atirekachabbassāni honti, tadā karotī’’ti evamattho daṭṭhabbo. Na hi so chabbassāni karotīti. Sesaṃ uttānatthameva.
සමුට්‌ඨානාදීනි කොසියසික්‌ඛාපදසදිසානෙවාති.
Samuṭṭhānādīni kosiyasikkhāpadasadisānevāti.
ඡබ්‌බස්‌සසික්‌ඛාපදවණ්‌ණනා නිට්‌ඨිතා.
Chabbassasikkhāpadavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / මහාවිභඞ්‌ග • Mahāvibhaṅga / 4. ඡබ්‌බස්‌සසික්‌ඛාපදං • 4. Chabbassasikkhāpadaṃ
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / 4. ඡබ්‌බස්‌සසික්‌ඛාපදවණ්‌ණනා • 4. Chabbassasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / 4. ඡබ්‌බස්‌සසික්‌ඛාපදවණ්‌ණනා • 4. Chabbassasikkhāpadavaṇṇanā
