| Library / Tipiṭaka / ਤਿਪਿਟਕ • Tipiṭaka / ਮਜ੍ਝਿਮਨਿਕਾਯ (ਅਟ੍ਠਕਥਾ) • Majjhimanikāya (aṭṭhakathā) |
੨. ਛਬ੍ਬਿਸੋਧਨਸੁਤ੍ਤવਣ੍ਣਨਾ
2. Chabbisodhanasuttavaṇṇanā
੯੮. ਏવਂ ਮੇ ਸੁਤਨ੍ਤਿ ਛਬ੍ਬਿਸੋਧਨਸੁਤ੍ਤਂ। ਤਤ੍ਥ ਖੀਣਾ ਜਾਤੀਤਿਆਦੀਸੁ ਏਕੇਨਾਪਿ ਪਦੇਨ ਅਞ੍ਞਾ ਬ੍ਯਾਕਤਾવ ਹੋਤਿ, ਦ੍વੀਹਿਪਿ। ਇਧ ਪਨ ਚਤੂਹਿ ਪਦੇਹਿ ਅਞ੍ਞਬ੍ਯਾਕਰਣਂ ਆਗਤਂ। ਦਿਟ੍ਠੇ ਦਿਟ੍ਠવਾਦਿਤਾਤਿਆਦੀਸੁ ਯਾਯ ਚੇਤਨਾਯ ਦਿਟ੍ਠੇ ਦਿਟ੍ਠਂ ਮੇਤਿ વਦਤਿ, ਸਾ ਦਿਟ੍ਠੇ ਦਿਟ੍ਠવਾਦਿਤਾ ਨਾਮ। ਸੇਸਪਦੇਸੁਪਿ ਏਸੇવ ਨਯੋ। ਅਯਮਨੁਧਮ੍ਮੋਤਿ ਅਯਂ ਸਭਾવੋ। ਅਭਿਨਨ੍ਦਿਤਬ੍ਬਨ੍ਤਿ ਨ ਕੇવਲਂ ਅਭਿਨਨ੍ਦਿਤਬ੍ਬਂ, ਪਰਿਨਿਬ੍ਬੁਤਸ੍ਸ ਪਨਸ੍ਸ ਸਬ੍ਬੋਪਿ ਖੀਣਾਸવਸ੍ਸ ਸਕ੍ਕਾਰੋ ਕਾਤਬ੍ਬੋ। ਉਤ੍ਤਰਿਂ ਪਞ੍ਹੋਤਿ ਸਚੇ ਪਨਸ੍ਸ વੇਯ੍ਯਾਕਰਣੇਨ ਅਸਨ੍ਤੁਟ੍ਠਾ ਹੋਥ, ਉਤ੍ਤਰਿਮ੍ਪਿ ਅਯਂ ਪਞ੍ਹੋ ਪੁਚ੍ਛਿਤਬ੍ਬੋਤਿ ਦਸ੍ਸੇਤਿ। ਇਤੋ ਪਰੇਸੁਪਿ ਤੀਸੁ વਾਰੇਸੁ ਅਯਮੇવ ਨਯੋ।
98.Evaṃme sutanti chabbisodhanasuttaṃ. Tattha khīṇā jātītiādīsu ekenāpi padena aññā byākatāva hoti, dvīhipi. Idha pana catūhi padehi aññabyākaraṇaṃ āgataṃ. Diṭṭhe diṭṭhavāditātiādīsu yāya cetanāya diṭṭhe diṭṭhaṃ meti vadati, sā diṭṭhe diṭṭhavāditā nāma. Sesapadesupi eseva nayo. Ayamanudhammoti ayaṃ sabhāvo. Abhinanditabbanti na kevalaṃ abhinanditabbaṃ, parinibbutassa panassa sabbopi khīṇāsavassa sakkāro kātabbo. Uttariṃ pañhoti sace panassa veyyākaraṇena asantuṭṭhā hotha, uttarimpi ayaṃ pañho pucchitabboti dasseti. Ito paresupi tīsu vāresu ayameva nayo.
੯੯. ਅਬਲਨ੍ਤਿ ਦੁਬ੍ਬਲਂ। વਿਰਾਗੁਨਨ੍ਤਿ વਿਗਚ੍ਛਨਸਭਾવਂ। ਅਨਸ੍ਸਾਸਿਕਨ੍ਤਿ ਅਸ੍ਸਾਸવਿਰਹਿਤਂ। ਉਪਾਯੂਪਾਦਾਨਾਤਿ ਤਣ੍ਹਾਦਿਟ੍ਠੀਨਮੇਤਂ ਅਧਿવਚਨਂ। ਤਣ੍ਹਾਦਿਟ੍ਠਿਯੋ ਹਿ ਤੇਭੂਮਕਧਮ੍ਮੇ ਉਪੇਨ੍ਤੀਤਿ ਉਪਾਯਾ, ਉਪਾਦਿਯਨ੍ਤੀਤਿ ਉਪਾਦਾਨਾ। ਚੇਤਸੋ ਅਦਿਟ੍ਠਾਨਾਭਿਨਿવੇਸਾਨੁਸਯਾਤਿਪਿ ਤਾਸਂਯੇવ ਨਾਮਂ। ਚਿਤ੍ਤਞ੍ਹਿ ਤਣ੍ਹਾਦਿਟ੍ਠੀਹਿ ਸਕ੍ਕਾਯਧਮ੍ਮੇਸੁ ਤਿਟ੍ਠਤਿ ਅਧਿਤਿਟ੍ਠਤੀਤਿ ਤਣ੍ਹਾਦਿਟ੍ਠਿਯੋ ਚੇਤਸੋ ਅਧਿਟ੍ਠਾਨਾ, ਤਾਹਿ ਤਂ ਅਭਿਨਿવਿਸਤੀਤਿ ਅਭਿਨਿવੇਸਾ, ਤਾਹਿਯੇવ ਤਂ ਅਨੁਸੇਤੀਤਿ ਅਨੁਸਯਾਤਿ વੁਚ੍ਚਨ੍ਤਿ। ਖਯਾ વਿਰਾਗਾਤਿਆਦੀਸੁ ਖਯੇਨ વਿਰਾਗੇਨਾਤਿ ਅਤ੍ਥੋ। ਸਬ੍ਬਾਨਿ ਚੇਤਾਨਿ ਅਞ੍ਞਮਞ੍ਞવੇવਚਨਾਨੇવ।
99.Abalanti dubbalaṃ. Virāgunanti vigacchanasabhāvaṃ. Anassāsikanti assāsavirahitaṃ. Upāyūpādānāti taṇhādiṭṭhīnametaṃ adhivacanaṃ. Taṇhādiṭṭhiyo hi tebhūmakadhamme upentīti upāyā, upādiyantīti upādānā. Cetaso adiṭṭhānābhinivesānusayātipi tāsaṃyeva nāmaṃ. Cittañhi taṇhādiṭṭhīhi sakkāyadhammesu tiṭṭhati adhitiṭṭhatīti taṇhādiṭṭhiyo cetaso adhiṭṭhānā, tāhi taṃ abhinivisatīti abhinivesā, tāhiyeva taṃ anusetīti anusayāti vuccanti. Khayāvirāgātiādīsu khayena virāgenāti attho. Sabbāni cetāni aññamaññavevacanāneva.
੧੦੦. ਪਥવੀਧਾਤੂਤਿ ਪਤਿਟ੍ਠਾਨਧਾਤੁ। ਆਪੋਧਾਤੂਤਿ ਆਬਨ੍ਧਨਧਾਤੁ। ਤੇਜੋਧਾਤੂਤਿ ਪਰਿਪਾਚਨਧਾਤੁ। વਾਯੋਧਾਤੂਤਿ વਿਤ੍ਥਮ੍ਭਨਧਾਤੁ। ਆਕਾਸਧਾਤੂਤਿ ਅਸਮ੍ਫੁਟ੍ਠਧਾਤੁ। વਿਞ੍ਞਾਣਧਾਤੂਤਿ વਿਜਾਨਨਧਾਤੁ। ਨ ਅਨਤ੍ਤਤੋ ਉਪਗਚ੍ਛਿਨ੍ਤਿ ਅਹਂ ਅਤ੍ਤਾਤਿ ਅਤ੍ਤਕੋਟ੍ਠਾਸੇਨ ਨ ਉਪਗਮਿਂ। ਨ ਚ ਪਥવੀਧਾਤੁਨਿਸ੍ਸਿਤਨ੍ਤਿ ਪਥવੀਧਾਤੁਨਿਸ੍ਸਿਤਾ ਸੇਸਧਾਤੁਯੋ ਚ ਉਪਾਦਾਰੂਪਞ੍ਚ ਅਰੂਪਕ੍ਖਨ੍ਧਾ ਚ। ਤੇਪਿ ਹਿ ਨਿਸ੍ਸਿਤવਤ੍ਥੁਰੂਪਾਨਂ ਪਥવੀਧਾਤੁਨਿਸ੍ਸਿਤਤ੍ਤਾ ਏਕੇਨ ਪਰਿਯਾਯੇਨ ਪਥવੀਧਾਤੁਨਿਸ੍ਸਿਤਾવ। ਤਸ੍ਮਾ ‘‘ਨ ਚ ਪਥવੀਧਾਤੁਨਿਸ੍ਸਿਤ’’ਨ੍ਤਿ વਦਨ੍ਤੋ ਸੇਸਰੂਪਾਰੂਪਧਮ੍ਮੇਪਿ ਅਤ੍ਤਤੋ ਨ ਉਪਗਚ੍ਛਿਨ੍ਤਿ વਦਤਿ। ਆਕਾਸਧਾਤੁਨਿਸ੍ਸਿਤਪਦੇ ਪਨ ਅવਿਨਿਬ੍ਭੋਗવਸੇਨ ਸਬ੍ਬਮ੍ਪਿ ਭੂਤੁਪਾਦਾਰੂਪਂ ਆਕਾਸਧਾਤੁਨਿਸ੍ਸਿਤਂ ਨਾਮ , ਤਥਾ ਤਂਨਿਸ੍ਸਿਤਰੂਪવਤ੍ਥੁਕਾ ਅਰੂਪਕ੍ਖਨ੍ਧਾ। ਏવਂ ਇਧਾਪਿ ਰੂਪਾਰੂਪਂ ਗਹਿਤਮੇવ ਹੋਤਿ। વਿਞ੍ਞਾਣਧਾਤੁਨਿਸ੍ਸਿਤਪਦੇ ਪਨ ਸਹਜਾਤਾ ਤਯੋ ਖਨ੍ਧਾ ਚਿਤ੍ਤਸਮੁਟ੍ਠਾਨਰੂਪਞ੍ਚ વਿਞ੍ਞਾਣਧਾਤੁਨਿਸ੍ਸਿਤਨ੍ਤਿ ਰੂਪਾਰੂਪਂ ਗਹਿਤਮੇવ ਹੋਤਿ।
100.Pathavīdhātūti patiṭṭhānadhātu. Āpodhātūti ābandhanadhātu. Tejodhātūti paripācanadhātu. Vāyodhātūti vitthambhanadhātu. Ākāsadhātūti asamphuṭṭhadhātu. Viññāṇadhātūti vijānanadhātu. Na anattato upagacchinti ahaṃ attāti attakoṭṭhāsena na upagamiṃ. Na ca pathavīdhātunissitanti pathavīdhātunissitā sesadhātuyo ca upādārūpañca arūpakkhandhā ca. Tepi hi nissitavatthurūpānaṃ pathavīdhātunissitattā ekena pariyāyena pathavīdhātunissitāva. Tasmā ‘‘na ca pathavīdhātunissita’’nti vadanto sesarūpārūpadhammepi attato na upagacchinti vadati. Ākāsadhātunissitapade pana avinibbhogavasena sabbampi bhūtupādārūpaṃ ākāsadhātunissitaṃ nāma , tathā taṃnissitarūpavatthukā arūpakkhandhā. Evaṃ idhāpi rūpārūpaṃ gahitameva hoti. Viññāṇadhātunissitapade pana sahajātā tayo khandhā cittasamuṭṭhānarūpañca viññāṇadhātunissitanti rūpārūpaṃ gahitameva hoti.
੧੦੧. ਰੂਪੇ ਚਕ੍ਖੁવਿਞ੍ਞਾਣੇ ਚਕ੍ਖੁવਿਞ੍ਞਾਣવਿਞ੍ਞਾਤਬ੍ਬੇਸੁ ਧਮ੍ਮੇਸੂਤਿ ਏਤ੍ਥ ਯਂ ਅਤੀਤੇ ਚਕ੍ਖੁਦ੍વਾਰਸ੍ਸ ਆਪਾਥਂ ਆਗਨ੍ਤ੍વਾ ਨਿਰੁਦ੍ਧਂ, ਯਞ੍ਚ ਅਨਾਗਤੇ ਆਪਾਥਂ ਆਗਨ੍ਤ੍વਾ ਨਿਰੁਜ੍ਝਿਸ੍ਸਤਿ, ਯਮ੍ਪਿ ਏਤਰਹਿ ਆਗਨ੍ਤ੍વਾ ਨਿਰੁਦ੍ਧਂ, ਤਂ ਸਬ੍ਬਂ ਰੂਪਂ ਨਾਮ। ਯਂ ਪਨ ਅਤੀਤੇਪਿ ਆਪਾਥਂ ਅਨਾਗਨ੍ਤ੍વਾ ਨਿਰੁਦ੍ਧਂ, ਅਨਾਗਤੇਪਿ ਅਨਾਗਨ੍ਤ੍વਾ ਨਿਰੁਜ੍ਝਿਸ੍ਸਤਿ, ਏਤਰਹਿਪਿ ਅਨਾਗਨ੍ਤ੍વਾ ਨਿਰੁਦ੍ਧਂ, ਤਂ ਚਕ੍ਖੁવਿਞ੍ਞਾਣવਿਞ੍ਞਾਤਬ੍ਬਧਮ੍ਮੇਸੁ ਸਙ੍ਗਹਿਤਨ੍ਤਿ વੁਤ੍ਤੇ ਤਿਪਿਟਕਚੂਲ਼ਾਭਯਤ੍ਥੇਰੋ ਆਹ – ‘‘ਇਮਸ੍ਮਿਂ ਠਾਨੇ ਦ੍વਿਧਾ ਕਰੋਥ, ਉਪਰਿ ਛਨ੍ਦੋવਾਰੇ ਕਿਨ੍ਤਿ ਕਰਿਸ੍ਸਥ, ਨਯਿਦਂ ਲਬ੍ਭਤੀ’’ਤਿ। ਤਸ੍ਮਾ ਤੀਸੁ ਕਾਲੇਸੁ ਆਪਾਥਂ ਆਗਤਂ વਾ ਅਨਾਗਤਂ વਾ ਸਬ੍ਬਮ੍ਪਿ ਤਂ ਰੂਪਮੇવ, ਚਕ੍ਖੁવਿਞ੍ਞਾਣਸਮ੍ਪਯੁਤ੍ਤਾ ਪਨ ਤਯੋ ਖਨ੍ਧਾ ਚਕ੍ਖੁવਿਞ੍ਞਾਣવਿਞ੍ਞਾਤਬ੍ਬਧਮ੍ਮਾਤਿ વੇਦਿਤਬ੍ਬਾ। ਅਯਞ੍ਹੇਤ੍ਥ ਅਤ੍ਥੋ ‘‘ਚਕ੍ਖੁવਿਞ੍ਞਾਣੇਨ ਸਦ੍ਧਿਂ વਿਞ੍ਞਾਤਬ੍ਬੇਸੁ ਧਮ੍ਮੇਸੂ’’ਤਿ। ਛਨ੍ਦੋਤਿ ਤਣ੍ਹਾਛਨ੍ਦੋ। ਰਾਗੋਤਿ ਸ੍વੇવ ਰਜ੍ਜਨવਸੇਨ ਰਾਗੋ। ਨਨ੍ਦੀਤਿ ਸ੍વੇવ ਅਭਿਨਨ੍ਦਨવਸੇਨ ਨਨ੍ਦੀ। ਤਣ੍ਹਾਤਿ ਸ੍વੇવ ਤਣ੍ਹਾਯਨવਸੇਨ ਤਣ੍ਹਾ। ਸੇਸਦ੍વਾਰੇਸੁਪਿ ਏਸੇવ ਨਯੋ।
101.Rūpe cakkhuviññāṇe cakkhuviññāṇaviññātabbesu dhammesūti ettha yaṃ atīte cakkhudvārassa āpāthaṃ āgantvā niruddhaṃ, yañca anāgate āpāthaṃ āgantvā nirujjhissati, yampi etarahi āgantvā niruddhaṃ, taṃ sabbaṃ rūpaṃ nāma. Yaṃ pana atītepi āpāthaṃ anāgantvā niruddhaṃ, anāgatepi anāgantvā nirujjhissati, etarahipi anāgantvā niruddhaṃ, taṃ cakkhuviññāṇaviññātabbadhammesu saṅgahitanti vutte tipiṭakacūḷābhayatthero āha – ‘‘imasmiṃ ṭhāne dvidhā karotha, upari chandovāre kinti karissatha, nayidaṃ labbhatī’’ti. Tasmā tīsu kālesu āpāthaṃ āgataṃ vā anāgataṃ vā sabbampi taṃ rūpameva, cakkhuviññāṇasampayuttā pana tayo khandhā cakkhuviññāṇaviññātabbadhammāti veditabbā. Ayañhettha attho ‘‘cakkhuviññāṇena saddhiṃ viññātabbesu dhammesū’’ti. Chandoti taṇhāchando. Rāgoti sveva rajjanavasena rāgo. Nandīti sveva abhinandanavasena nandī. Taṇhāti sveva taṇhāyanavasena taṇhā. Sesadvāresupi eseva nayo.
੧੦੨. ਅਹਙ੍ਕਾਰਮਮਙ੍ਕਾਰਮਾਨਾਨੁਸਯਾਤਿ ਏਤ੍ਥ ਅਹਙ੍ਕਾਰੋ ਮਾਨੋ, ਮਮਙ੍ਕਾਰੋ ਤਣ੍ਹਾ, ਸ੍વੇવ ਮਾਨਾਨੁਸਯੋ। ਆਸવਾਨਂ ਖਯਞਾਣਾਯਾਤਿ ਇਦਂ ਪੁਬ੍ਬੇਨਿવਾਸਂ ਦਿਬ੍ਬਚਕ੍ਖੁਞ੍ਚ ਅવਤ੍વਾ ਕਸ੍ਮਾ વੁਤ੍ਤਂ? ਭਿਕ੍ਖੂ ਲੋਕਿਯਧਮ੍ਮਂ ਨ ਪੁਚ੍ਛਨ੍ਤਿ, ਲੋਕੁਤ੍ਤਰਮੇવ ਪੁਚ੍ਛਨ੍ਤਿ, ਤਸ੍ਮਾ ਪੁਚ੍ਛਿਤਪਞ੍ਹਂਯੇવ ਕਥੇਨ੍ਤੋ ਏવਮਾਹ। ਏਕવਿਸ੍ਸਜ੍ਜਿਤਸੁਤ੍ਤਂ ਨਾਮੇਤਂ, ਛਬ੍ਬਿਸੋਧਨਨ੍ਤਿਪਿਸ੍ਸ ਨਾਮਂ। ਏਤ੍ਥ ਹਿ ਚਤ੍ਤਾਰੋ વੋਹਾਰਾ ਪਞ੍ਚ ਖਨ੍ਧਾ ਛ ਧਾਤੁਯੋ ਛ ਅਜ੍ਝਤ੍ਤਿਕਬਾਹਿਰਾਨਿ ਆਯਤਨਾਨਿ ਅਤ੍ਤਨੋ ਸવਿਞ੍ਞਾਣਕਕਾਯੋ ਪਰੇਸਂ ਸવਿਞ੍ਞਾਣਕਕਾਯੋਤਿ ਇਮੇ ਛ ਕੋਟ੍ਠਾਸਾ વਿਸੁਦ੍ਧਾ, ਤਸ੍ਮਾ ‘‘ਛਬ੍ਬਿਸੋਧਨਿਯ’’ਨ੍ਤਿ વੁਤ੍ਤਂ। ਪਰਸਮੁਦ੍ਦવਾਸਿਤ੍ਥੇਰਾ ਪਨ ਅਤ੍ਤਨੋ ਚ ਪਰਸ੍ਸ ਚ વਿਞ੍ਞਾਣਕਕਾਯਂ ਏਕਮੇવ ਕਤ੍વਾ ਚਤੂਹਿ ਆਹਾਰੇਹਿ ਸਦ੍ਧਿਨ੍ਤਿ ਛ ਕੋਟ੍ਠਾਸੇ વਦਨ੍ਤਿ।
102.Ahaṅkāramamaṅkāramānānusayāti ettha ahaṅkāro māno, mamaṅkāro taṇhā, sveva mānānusayo. Āsavānaṃ khayañāṇāyāti idaṃ pubbenivāsaṃ dibbacakkhuñca avatvā kasmā vuttaṃ? Bhikkhū lokiyadhammaṃ na pucchanti, lokuttarameva pucchanti, tasmā pucchitapañhaṃyeva kathento evamāha. Ekavissajjitasuttaṃ nāmetaṃ, chabbisodhanantipissa nāmaṃ. Ettha hi cattāro vohārā pañca khandhā cha dhātuyo cha ajjhattikabāhirāni āyatanāni attano saviññāṇakakāyo paresaṃ saviññāṇakakāyoti ime cha koṭṭhāsā visuddhā, tasmā ‘‘chabbisodhaniya’’nti vuttaṃ. Parasamuddavāsittherā pana attano ca parassa ca viññāṇakakāyaṃ ekameva katvā catūhi āhārehi saddhinti cha koṭṭhāse vadanti.
ਇਮੇ ਪਨ ਛ ਕੋਟ੍ਠਾਸਾ ‘‘ਕਿਂ ਤੇ ਅਧਿਗਤਂ, ਕਿਨ੍ਤਿ ਤੇ ਅਧਿਗਤਂ, ਕਦਾ ਤੇ ਅਧਿਗਤਂ, ਕਤ੍ਥ ਤੇ ਅਧਿਗਤਂ, ਕਤਮੇ ਤੇ ਕਿਲੇਸਾ ਪਹੀਨਾ, ਕਤਮੇਸਂ ਤ੍વਂ ਧਮ੍ਮਾਨਂ ਲਾਭੀ’’ਤਿ (ਪਾਰਾ॰ ੧੯੮) ਏવਂ વਿਨਯਨਿਦ੍ਦੇਸਪਰਿਯਾਯੇਨ ਸੋਧੇਤਬ੍ਬਾ।
Ime pana cha koṭṭhāsā ‘‘kiṃ te adhigataṃ, kinti te adhigataṃ, kadā te adhigataṃ, kattha te adhigataṃ, katame te kilesā pahīnā, katamesaṃ tvaṃ dhammānaṃ lābhī’’ti (pārā. 198) evaṃ vinayaniddesapariyāyena sodhetabbā.
ਏਤ੍ਥ ਹਿ ਕਿਂ ਤੇ ਅਧਿਗਤਨ੍ਤਿ ਅਧਿਗਮਪੁਚ੍ਛਾ, ਝਾਨવਿਮੋਕ੍ਖਾਦੀਸੁ ਸੋਤਾਪਤ੍ਤਿਮਗ੍ਗਾਦੀਸੁ વਾ ਕਿਂ ਤਯਾ ਅਧਿਗਤਂ। ਕਿਨ੍ਤਿ ਤੇ ਅਧਿਗਤਨ੍ਤਿ ਉਪਾਯਪੁਚ੍ਛਾ। ਅਯਞ੍ਹਿ ਏਤ੍ਥਾਧਿਪ੍ਪਾਯੋ – ਕਿਂ ਤਯਾ ਅਨਿਚ੍ਚਲਕ੍ਖਣਂ ਧੁਰਂ ਕਤ੍વਾ ਅਧਿਗਤਂ, ਦੁਕ੍ਖਾਨਤ੍ਤਲਕ੍ਖਣੇਸੁ ਅਞ੍ਞਤਰਂ વਾ, ਕਿਂ વਾ ਸਮਾਧਿવਸੇਨ ਅਭਿਨਿવਿਸਿਤ੍વਾ , ਉਦਾਹੁ વਿਪਸ੍ਸਨਾવਸੇਨ, ਤਥਾ ਕਿਂ ਰੂਪੇ ਅਭਿਨਿવਿਸਿਤ੍વਾ, ਉਦਾਹੁ ਅਰੂਪੇ, ਕਿਂ વਾ ਅਜ੍ਝਤ੍ਤਂ ਅਭਿਨਿવਿਸਿਤ੍વਾ, ਉਦਾਹੁ ਬਹਿਦ੍ਧਾਤਿ। ਕਦਾ ਤੇ ਅਧਿਗਤਨ੍ਤਿ ਕਾਲਪੁਚ੍ਛਾ, ਪੁਬ੍ਬਣ੍ਹਮਜ੍ਝਨ੍ਹਿਕਾਦੀਸੁ ਕਤਰਸ੍ਮਿਂ ਕਾਲੇਤਿ વੁਤ੍ਤਂ ਹੋਤਿ।
Ettha hi kiṃ te adhigatanti adhigamapucchā, jhānavimokkhādīsu sotāpattimaggādīsu vā kiṃ tayā adhigataṃ. Kinti te adhigatanti upāyapucchā. Ayañhi etthādhippāyo – kiṃ tayā aniccalakkhaṇaṃ dhuraṃ katvā adhigataṃ, dukkhānattalakkhaṇesu aññataraṃ vā, kiṃ vā samādhivasena abhinivisitvā , udāhu vipassanāvasena, tathā kiṃ rūpe abhinivisitvā, udāhu arūpe, kiṃ vā ajjhattaṃ abhinivisitvā, udāhu bahiddhāti. Kadā te adhigatanti kālapucchā, pubbaṇhamajjhanhikādīsu katarasmiṃ kāleti vuttaṃ hoti.
ਕਤ੍ਥ ਤੇ ਅਧਿਗਤਨ੍ਤਿ ਓਕਾਸਪੁਚ੍ਛਾ, ਕਿਸ੍ਮਿਂ ਓਕਾਸੇ, ਕਿਂ ਰਤ੍ਤਿਟ੍ਠਾਨੇ ਦਿવਾਟ੍ਠਾਨੇ ਰੁਕ੍ਖਮੂਲੇ ਮਣ੍ਡਪੇ ਕਤਰਸ੍ਮਿਂ વਾ વਿਹਾਰੇਤਿ વੁਤ੍ਤਂ ਹੋਤਿ। ਕਤਮੇ ਤੇ ਕਿਲੇਸਾ ਪਹੀਨਾਤਿ ਪਹੀਨਕਿਲੇਸੇ ਪੁਚ੍ਛਤਿ, ਕਤਰਮਗ੍ਗવਜ੍ਝਾ ਤવ ਕਿਲੇਸਾ ਪਹੀਨਾਤਿ વੁਤ੍ਤਂ ਹੋਤਿ।
Kattha te adhigatanti okāsapucchā, kismiṃ okāse, kiṃ rattiṭṭhāne divāṭṭhāne rukkhamūle maṇḍape katarasmiṃ vā vihāreti vuttaṃ hoti. Katame te kilesā pahīnāti pahīnakilese pucchati, kataramaggavajjhā tava kilesā pahīnāti vuttaṃ hoti.
ਕਤਮੇਸਂ ਤ੍વਂ ਧਮ੍ਮਾਨਂ ਲਾਭੀਤਿ ਪਟਿਲਦ੍ਧਧਮ੍ਮਪੁਚ੍ਛਾ, ਪਠਮਮਗ੍ਗਾਦੀਸੁ ਕਤਮੇਸਂ ਤ੍વਂ ਧਮ੍ਮਾਨਂ ਲਾਭੀਤਿ વੁਤ੍ਤਂ ਹੋਤਿ।
Katamesaṃ tvaṃ dhammānaṃ lābhīti paṭiladdhadhammapucchā, paṭhamamaggādīsu katamesaṃ tvaṃ dhammānaṃ lābhīti vuttaṃ hoti.
ਤਸ੍ਮਾ ਇਦਾਨਿ ਚੇਪਿ ਕੋਚਿ ਭਿਕ੍ਖੁ ਉਤ੍ਤਰਿਮਨੁਸ੍ਸਧਮ੍ਮਾਧਿਗਮਂ ਬ੍ਯਾਕਰੇਯ੍ਯ, ਨ ਸੋ ਏਤ੍ਤਾવਤਾવ ਸਕ੍ਕਾਤਬ੍ਬੋ। ਇਮੇਸੁ ਪਨ ਛਸੁ ਠਾਨੇਸੁ ਸੋਧਨਤ੍ਥਂ વਤ੍ਤਬ੍ਬੋ ‘‘ਕਿਂ ਤੇ ਅਧਿਗਤਂ, ਕਿਂ ਝਾਨਂ ਉਦਾਹੁ વਿਮੋਕ੍ਖਾਦੀਸੁ ਅਞ੍ਞਤਰ’’ਨ੍ਤਿ? ਯੋ ਹਿ ਯੇਨ ਅਧਿਗਤੋ ਧਮ੍ਮੋ, ਸੋ ਤਸ੍ਸ ਪਾਕਟੋ ਹੋਤਿ। ਸਚੇ ‘‘ਇਦਂ ਨਾਮ ਮੇ ਅਧਿਗਤ’’ਨ੍ਤਿ વਦਤਿ, ਤਤੋ ‘‘ਕਿਨ੍ਤਿ ਤੇ ਅਧਿਗਤ’’ਨ੍ਤਿ ਪੁਚ੍ਛਿਤਬ੍ਬੋ। ਅਨਿਚ੍ਚਲਕ੍ਖਣਾਦੀਸੁ ਕਿਂ ਧੁਰਂ ਕਤ੍વਾ, ਅਟ੍ਠਤਿਂਸਾਯ વਾ ਆਰਮ੍ਮਣੇਸੁ ਰੂਪਾਰੂਪਅਜ੍ਝਤ੍ਤਬਹਿਦ੍ਧਾਦਿਭੇਦੇਸੁ વਾ ਧਮ੍ਮੇਸੁ ਕੇਨ ਮੁਖੇਨ ਅਭਿਨਿવਿਸਿਤ੍વਾਤਿ? ਯੋ ਹਿ ਯਸ੍ਸਾਭਿਨਿવੇਸੋ, ਸੋ ਤਸ੍ਸ ਪਾਕਟੋ ਹੋਤਿ।
Tasmā idāni cepi koci bhikkhu uttarimanussadhammādhigamaṃ byākareyya, na so ettāvatāva sakkātabbo. Imesu pana chasu ṭhānesu sodhanatthaṃ vattabbo ‘‘kiṃ te adhigataṃ, kiṃ jhānaṃ udāhu vimokkhādīsu aññatara’’nti? Yo hi yena adhigato dhammo, so tassa pākaṭo hoti. Sace ‘‘idaṃ nāma me adhigata’’nti vadati, tato ‘‘kinti te adhigata’’nti pucchitabbo. Aniccalakkhaṇādīsu kiṃ dhuraṃ katvā, aṭṭhatiṃsāya vā ārammaṇesu rūpārūpaajjhattabahiddhādibhedesu vā dhammesu kena mukhena abhinivisitvāti? Yo hi yassābhiniveso, so tassa pākaṭo hoti.
ਸਚੇ ਪਨ ‘‘ਅਯਂ ਨਾਮ ਮੇ ਅਭਿਨਿવੇਸੋ, ਏવਂ ਮਯਾ ਅਧਿਗਤ’’ਨ੍ਤਿ વਦਤਿ, ਤਤੋ ‘‘ਕਦਾ ਤੇ ਅਧਿਗਤ’’ਨ੍ਤਿ ਪੁਚ੍ਛਿਤਬ੍ਬੋ, ‘‘ਕਿਂ ਪੁਬ੍ਬਣ੍ਹੇ, ਉਦਾਹੁ ਮਜ੍ਝਨ੍ਹਿਕਾਦੀਸੁ ਅਞ੍ਞਤਰਸ੍ਮਿਂ ਕਾਲੇ’’ਤਿ ? ਸਬ੍ਬੇਸਞ੍ਹਿ ਅਤ੍ਤਨਾ ਅਧਿਗਤਕਾਲੋ ਪਾਕਟੋ ਹੋਤਿ। ਸਚੇ ‘‘ਅਮੁਕਸ੍ਮਿਂ ਨਾਮ ਮੇ ਕਾਲੇ ਅਧਿਗਤ’’ਨ੍ਤਿ વਦਤਿ, ਤਤੋ ‘‘ਕਤ੍ਥ ਤੇ ਅਧਿਗਤ’’ਨ੍ਤਿ ਪੁਚ੍ਛਿਤਬ੍ਬੋ, ‘‘ਕਿਂ ਦਿવਾਟ੍ਠਾਨੇ, ਉਦਾਹੁ ਰਤ੍ਤਿਟ੍ਠਾਨਾਦੀਸੁ ਅਞ੍ਞਤਰਸ੍ਮਿਂ ਓਕਾਸੇ’’ਤਿ? ਸਬ੍ਬੇਸਞ੍ਹਿ ਅਤ੍ਤਨਾ ਅਧਿਗਤੋਕਾਸੋ ਪਾਕਟੋ ਹੋਤਿ। ਸਚੇ ‘‘ਅਮੁਕਸ੍ਮਿਂ ਨਾਮ ਮੇ ਓਕਾਸੇ ਅਧਿਗਤ’’ਨ੍ਤਿ વਦਤਿ, ਤਤੋ ‘‘ਕਤਮੇ ਤੇ ਕਿਲੇਸਾ ਪਹੀਨਾ’’ਤਿ ਪੁਚ੍ਛਿਤਬ੍ਬੋ, ‘‘ਕਿਂ ਪਠਮਮਗ੍ਗવਜ੍ਝਾ, ਉਦਾਹੁ ਦੁਤਿਯਾਦਿਮਗ੍ਗવਜ੍ਝਾ’’ਤਿ? ਸਬ੍ਬੇਸਞ੍ਹਿ ਅਤ੍ਤਨਾ ਅਧਿਗਤਮਗ੍ਗੇਨ ਪਹੀਨਕਿਲੇਸਾ ਪਾਕਟਾ ਹੋਨ੍ਤਿ।
Sace pana ‘‘ayaṃ nāma me abhiniveso, evaṃ mayā adhigata’’nti vadati, tato ‘‘kadā te adhigata’’nti pucchitabbo, ‘‘kiṃ pubbaṇhe, udāhu majjhanhikādīsu aññatarasmiṃ kāle’’ti ? Sabbesañhi attanā adhigatakālo pākaṭo hoti. Sace ‘‘amukasmiṃ nāma me kāle adhigata’’nti vadati, tato ‘‘kattha te adhigata’’nti pucchitabbo, ‘‘kiṃ divāṭṭhāne, udāhu rattiṭṭhānādīsu aññatarasmiṃ okāse’’ti? Sabbesañhi attanā adhigatokāso pākaṭo hoti. Sace ‘‘amukasmiṃ nāma me okāse adhigata’’nti vadati, tato ‘‘katame te kilesā pahīnā’’ti pucchitabbo, ‘‘kiṃ paṭhamamaggavajjhā, udāhu dutiyādimaggavajjhā’’ti? Sabbesañhi attanā adhigatamaggena pahīnakilesā pākaṭā honti.
ਸਚੇ ‘‘ਇਮੇ ਨਾਮ ਮੇ ਕਿਲੇਸਾ ਪਹੀਨਾ’’ਤਿ વਦਤਿ, ਤਤੋ ‘‘ਕਤਮੇਸਂ ਤ੍વਂ ਧਮ੍ਮਾਨਂ ਲਾਭੀ’’ਤਿ ਪੁਚ੍ਛਿਤਬ੍ਬੋ, ‘‘ਕਿਂ ਸੋਤਾਪਤ੍ਤਿਮਗ੍ਗਸ੍ਸ, ਉਦਾਹੁ ਸਕਦਾਗਾਮਿਮਗ੍ਗਾਦੀਸੁ ਅਞ੍ਞਤਰਸ੍ਸਾ’’ਤਿ? ਸਬ੍ਬੇਸਞ੍ਹਿ ਅਤ੍ਤਨਾ ਅਧਿਗਤਧਮ੍ਮੋ ਪਾਕਟੋ ਹੋਤਿ। ਸਚੇ ‘‘ਇਮੇਸਂ ਨਾਮਾਹਂ ਧਮ੍ਮਾਨਂ ਲਾਭੀ’’ਤਿ વਦਤਿ, ਏਤ੍ਤਾવਤਾਪਿਸ੍ਸ વਚਨਂ ਨ ਸਦ੍ਧਾਤਬ੍ਬਂ। ਬਹੁਸ੍ਸੁਤਾ ਹਿ ਉਗ੍ਗਹਪਰਿਪੁਚ੍ਛਾਕੁਸਲਾ ਭਿਕ੍ਖੂ ਇਮਾਨਿ ਛ ਠਾਨਾਨਿ ਸੋਧੇਤੁਂ ਸਕ੍ਕੋਨ੍ਤਿ। ਇਮਸ੍ਸ ਭਿਕ੍ਖੁਨੋ ਆਗਮਨਪਟਿਪਦਾ ਸੋਧੇਤਬ੍ਬਾ, ਯਦਿ ਆਗਮਨਪਟਿਪਦਾ ਨ ਸੁਜ੍ਝਤਿ, ‘‘ਇਮਾਯ ਪਟਿਪਦਾਯ ਲੋਕੁਤ੍ਤਰਧਮ੍ਮਾ ਨਾਮ ਨ ਲਬ੍ਭਨ੍ਤੀ’’ਤਿ ਅਪਨੇਤਬ੍ਬੋ।
Sace ‘‘ime nāma me kilesā pahīnā’’ti vadati, tato ‘‘katamesaṃ tvaṃ dhammānaṃ lābhī’’ti pucchitabbo, ‘‘kiṃ sotāpattimaggassa, udāhu sakadāgāmimaggādīsu aññatarassā’’ti? Sabbesañhi attanā adhigatadhammo pākaṭo hoti. Sace ‘‘imesaṃ nāmāhaṃ dhammānaṃ lābhī’’ti vadati, ettāvatāpissa vacanaṃ na saddhātabbaṃ. Bahussutā hi uggahaparipucchākusalā bhikkhū imāni cha ṭhānāni sodhetuṃ sakkonti. Imassa bhikkhuno āgamanapaṭipadā sodhetabbā, yadi āgamanapaṭipadā na sujjhati, ‘‘imāya paṭipadāya lokuttaradhammā nāma na labbhantī’’ti apanetabbo.
ਯਦਿ ਪਨਸ੍ਸ ਆਗਮਨਪਟਿਪਦਾ ਸੁਜ੍ਝਤਿ, ‘‘ਦੀਘਰਤ੍ਤਂ ਤੀਸੁ ਸਿਕ੍ਖਾਸੁ ਅਪ੍ਪਮਤ੍ਤੋ ਜਾਗਰਿਯਮਨੁਯੁਤ੍ਤੋ ਚਤੂਸੁ ਪਚ੍ਚਯੇਸੁ ਅਲਗ੍ਗੋ ਆਕਾਸੇ ਪਾਣਿਸਮੇਨ ਚੇਤਸਾ વਿਹਰਤੀ’’ਤਿ ਪਞ੍ਞਾਯਤਿ, ਤਸ੍ਸ ਭਿਕ੍ਖੁਨੋ ਬ੍ਯਾਕਰਣਂ ਪਟਿਪਦਾਯ ਸਦ੍ਧਿਂ ਸਂਸਨ੍ਦਤਿ ਸਮੇਤਿ। ‘‘ਸੇਯ੍ਯਥਾਪਿ ਨਾਮ ਗਙ੍ਗੋਦਕਂ ਯਮੁਨੋਦਕੇਨ ਸਦ੍ਧਿਂ ਸਂਸਨ੍ਦਤਿ ਸਮੇਤਿ, ਏવਮੇવ ਸੁਪਞ੍ਞਤ੍ਤਾ ਤੇਨ ਭਗવਤਾ ਸਾવਕਾਨਂ ਨਿਬ੍ਬਾਨਗਾਮਿਨੀ ਪਟਿਪਦਾ ਸਂਸਨ੍ਦਤਿ ਸਮੇਤਿ ਨਿਬ੍ਬਾਨਞ੍ਚ ਪਟਿਪਦਾ ਚਾ’’ਤਿ (ਦੀ॰ ਨਿ॰ ੨.੨੯੬) વੁਤ੍ਤਸਦਿਸਂ ਹੋਤਿ।
Yadi panassa āgamanapaṭipadā sujjhati, ‘‘dīgharattaṃ tīsu sikkhāsu appamatto jāgariyamanuyutto catūsu paccayesu alaggo ākāse pāṇisamena cetasā viharatī’’ti paññāyati, tassa bhikkhuno byākaraṇaṃ paṭipadāya saddhiṃ saṃsandati sameti. ‘‘Seyyathāpi nāma gaṅgodakaṃ yamunodakena saddhiṃ saṃsandati sameti, evameva supaññattā tena bhagavatā sāvakānaṃ nibbānagāminī paṭipadā saṃsandati sameti nibbānañca paṭipadā cā’’ti (dī. ni. 2.296) vuttasadisaṃ hoti.
ਅਪਿਚ ਖੋ ਏਤ੍ਤਕੇਨਾਪਿ ਸਕ੍ਕਾਰੋ ਨ ਕਾਤਬ੍ਬੋ। ਕਸ੍ਮਾ? ਏਕਚ੍ਚਸ੍ਸ ਹਿ ਪੁਥੁਜ੍ਜਨਸ੍ਸਾਪਿ ਸਤੋ ਖੀਣਾਸવਪਟਿਪਤ੍ਤਿਸਦਿਸਾ ਪਟਿਪਦਾ ਹੋਤਿ। ਤਸ੍ਮਾ ਸੋ ਭਿਕ੍ਖੁ ਤੇਹਿ ਤੇਹਿ ਉਪਾਯੇਹਿ ਉਤ੍ਤਾਸੇਤਬ੍ਬੋ। ਖੀਣਾਸવਸ੍ਸ ਨਾਮ ਅਸਨਿਯਾਪਿ ਮਤ੍ਥਕੇ ਪਤਮਾਨਾਯ ਭਯਂ વਾ ਛਮ੍ਭਿਤਤ੍ਤਂ વਾ ਲੋਮਹਂਸੋ વਾ ਨ ਹੋਤਿ, ਪੁਥੁਜ੍ਜਨਸ੍ਸ ਅਪ੍ਪਮਤ੍ਤਕੇਨਾਪਿ ਹੋਤਿ।
Apica kho ettakenāpi sakkāro na kātabbo. Kasmā? Ekaccassa hi puthujjanassāpi sato khīṇāsavapaṭipattisadisā paṭipadā hoti. Tasmā so bhikkhu tehi tehi upāyehi uttāsetabbo. Khīṇāsavassa nāma asaniyāpi matthake patamānāya bhayaṃ vā chambhitattaṃ vā lomahaṃso vā na hoti, puthujjanassa appamattakenāpi hoti.
ਤਤ੍ਰਿਮਾਨਿ વਤ੍ਥੂਨਿ – ਦੀਘਭਾਣਕਅਭਯਤ੍ਥੇਰੋ ਕਿਰ ਏਕਂ ਪਿਣ੍ਡਪਾਤਿਕਂ ਪਰਿਗ੍ਗਹੇਤੁਂ ਅਸਕ੍ਕੋਨ੍ਤੋ ਦਹਰਸ੍ਸ ਸਞ੍ਞਂ ਅਦਾਸਿ। ਸੋ ਤਂ ਨ੍ਹਾਯਮਾਨਂ ਕਲ੍ਯਾਣੀਨਦੀਮੁਖਦ੍વਾਰੇ ਨਿਮੁਜ੍ਜਿਤ੍વਾ ਪਾਦੇ ਅਗ੍ਗਹੇਸਿ। ਪਿਣ੍ਡਪਾਤਿਕੋ ਕੁਮ੍ਭੀਲੋਤਿ ਸਞ੍ਞਾਯ ਮਹਾਸਦ੍ਦਮਕਾਸਿ, ਤਦਾ ਨਂ ਪੁਥੁਜ੍ਜਨੋਤਿ ਸਞ੍ਜਾਨਿਂਸੁ। ਚਨ੍ਦਮੁਖਤਿਸ੍ਸਰਾਜਕਾਲੇ ਪਨ ਮਹਾવਿਹਾਰੇ ਸਙ੍ਘਤ੍ਥੇਰੋ ਖੀਣਾਸવੋ ਦੁਬ੍ਬਲਚਕ੍ਖੁਕੋ વਿਹਾਰੇਯੇવ ਅਚ੍ਛਿ। ਰਾਜਾ ਥੇਰਂ ਪਰਿਗ੍ਗਣ੍ਹਿਸ੍ਸਾਮੀਤਿ ਭਿਕ੍ਖੂਸੁ ਭਿਕ੍ਖਾਚਾਰਂ ਗਤੇਸੁ ਅਪ੍ਪਸਦ੍ਦੋ ਉਪਸਙ੍ਕਮਿਤ੍વਾ ਸਪ੍ਪੋ વਿਯ ਪਾਦੇ ਅਗ੍ਗਹੇਸਿ। ਥੇਰੋ ਸਿਲਾਥਮ੍ਭੋ વਿਯ ਨਿਚ੍ਚਲੋ ਹੁਤ੍વਾ ਕੋ ਏਤ੍ਥਾਤਿ ਆਹ ? ਅਹਂ, ਭਨ੍ਤੇ, ਤਿਸ੍ਸੋਤਿ। ਸੁਗਨ੍ਧਂ વਾਯਸਿ ਨੋ ਤਿਸ੍ਸਾਤਿ? ਏવਂ ਖੀਣਾਸવਸ੍ਸ ਭਯਂ ਨਾਮ ਨਤ੍ਥੀਤਿ।
Tatrimāni vatthūni – dīghabhāṇakaabhayatthero kira ekaṃ piṇḍapātikaṃ pariggahetuṃ asakkonto daharassa saññaṃ adāsi. So taṃ nhāyamānaṃ kalyāṇīnadīmukhadvāre nimujjitvā pāde aggahesi. Piṇḍapātiko kumbhīloti saññāya mahāsaddamakāsi, tadā naṃ puthujjanoti sañjāniṃsu. Candamukhatissarājakāle pana mahāvihāre saṅghatthero khīṇāsavo dubbalacakkhuko vihāreyeva acchi. Rājā theraṃ pariggaṇhissāmīti bhikkhūsu bhikkhācāraṃ gatesu appasaddo upasaṅkamitvā sappo viya pāde aggahesi. Thero silāthambho viya niccalo hutvā ko etthāti āha ? Ahaṃ, bhante, tissoti. Sugandhaṃ vāyasi no tissāti? Evaṃ khīṇāsavassa bhayaṃ nāma natthīti.
ਏਕਚ੍ਚੋ ਪਨ ਪੁਥੁਜ੍ਜਨੋਪਿ ਅਤਿਸੂਰੋ ਹੋਤਿ ਨਿਬ੍ਭਯੋ। ਸੋ ਰਞ੍ਜਨੀਯੇਨ ਆਰਮ੍ਮਣੇਨ ਪਰਿਗ੍ਗਣ੍ਹਿਤਬ੍ਬੋ। વਸਭਰਾਜਾਪਿ ਹਿ ਏਕਂ ਥੇਰਂ ਪਰਿਗ੍ਗਣ੍ਹਮਾਨੋ ਘਰੇ ਨਿਸੀਦਾਪੇਤ੍વਾ ਤਸ੍ਸ ਸਨ੍ਤਿਕੇ ਬਦਰਸਾਲ਼વਂ ਮਦ੍ਦਮਾਨੋ ਨਿਸੀਦਿ। ਮਹਾਥੇਰਸ੍ਸ ਖੇਲ਼ੋ ਚਲਿ, ਤਤੋ ਥੇਰਸ੍ਸ ਪੁਥੁਜ੍ਜਨਭਾવੋ ਆવਿਭੂਤੋ। ਖੀਣਾਸવਸ੍ਸ ਹਿ ਰਸਤਣ੍ਹਾ ਨਾਮ ਸੁਪ੍ਪਹੀਨਾ, ਦਿਬ੍ਬੇਸੁਪਿ ਰਸੇਸੁ ਨਿਕਨ੍ਤਿ ਨਾਮ ਨ ਹੋਤਿ। ਤਸ੍ਮਾ ਇਮੇਹਿ ਉਪਾਯੇਹਿ ਪਰਿਗ੍ਗਹੇਤ੍વਾ ਸਚਸ੍ਸ ਭਯਂ વਾ ਛਮ੍ਭਿਤਤ੍ਤਂ વਾ ਲੋਮਹਂਸੋ વਾ ਰਸਤਣ੍ਹਾ વਾ ਉਪ੍ਪਜ੍ਜਤਿ, ਨ ਤ੍વਂ ਅਰਹਾਤਿ ਅਪਨੇਤਬ੍ਬੋ। ਸਚੇ ਪਨ ਅਭੀਰੂ ਅਚ੍ਛਮ੍ਭੀ ਅਨੁਤ੍ਰਾਸੀ ਹੁਤ੍વਾ ਸੀਹੋ વਿਯ ਨਿਸੀਦਤਿ, ਦਿਬ੍ਬਾਰਮ੍ਮਣੇਪਿ ਨਿਕਨ੍ਤਿਂ ਨ ਜਨੇਤਿ। ਅਯਂ ਭਿਕ੍ਖੁ ਸਮ੍ਪਨ੍ਨવੇਯ੍ਯਾਕਰਣੋ ਸਮਨ੍ਤਾ ਰਾਜਰਾਜਮਹਾਮਤ੍ਤਾਦੀਹਿ ਪੇਸਿਤਂ ਸਕ੍ਕਾਰਂ ਅਰਹਤੀਤਿ।
Ekacco pana puthujjanopi atisūro hoti nibbhayo. So rañjanīyena ārammaṇena pariggaṇhitabbo. Vasabharājāpi hi ekaṃ theraṃ pariggaṇhamāno ghare nisīdāpetvā tassa santike badarasāḷavaṃ maddamāno nisīdi. Mahātherassa kheḷo cali, tato therassa puthujjanabhāvo āvibhūto. Khīṇāsavassa hi rasataṇhā nāma suppahīnā, dibbesupi rasesu nikanti nāma na hoti. Tasmā imehi upāyehi pariggahetvā sacassa bhayaṃ vā chambhitattaṃ vā lomahaṃso vā rasataṇhā vā uppajjati, na tvaṃ arahāti apanetabbo. Sace pana abhīrū acchambhī anutrāsī hutvā sīho viya nisīdati, dibbārammaṇepi nikantiṃ na janeti. Ayaṃ bhikkhu sampannaveyyākaraṇo samantā rājarājamahāmattādīhi pesitaṃ sakkāraṃ arahatīti.
ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ
Papañcasūdaniyā majjhimanikāyaṭṭhakathāya
ਛਬ੍ਬਿਸੋਧਨਸੁਤ੍ਤવਣ੍ਣਨਾ ਨਿਟ੍ਠਿਤਾ।
Chabbisodhanasuttavaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਮਜ੍ਝਿਮਨਿਕਾਯ • Majjhimanikāya / ੨. ਛਬ੍ਬਿਸੋਧਨਸੁਤ੍ਤਂ • 2. Chabbisodhanasuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਮਜ੍ਝਿਮਨਿਕਾਯ (ਟੀਕਾ) • Majjhimanikāya (ṭīkā) / ੨. ਛਬ੍ਬਿਸੋਧਨਸੁਤ੍ਤવਣ੍ਣਨਾ • 2. Chabbisodhanasuttavaṇṇanā
