| Library / Tipiṭaka / திபிடக • Tipiṭaka / மஜ்ஜி²மனிகாய (டீகா) • Majjhimanikāya (ṭīkā) |
6. ச²ச²க்கஸுத்தவண்ணனா
6. Chachakkasuttavaṇṇanā
420. ஆதி³ம்ஹி கல்யாணந்தி ஆதி³கொட்டா²ஸே கல்யாணங் ஏதஸ்ஸாதி வா ஆதி³கல்யாணோ, தங் ஆதி³கல்யாணங், ஆதி³கல்யாணபா⁴வோ ச தோ³ஸவிக³மேன இச்சி²தப்³போ³. யஞ்ஹி ஸப்³ப³ஸோ விக³ததோ³ஸங், தங் பரிபுண்ணகு³ணமேவ ஹோதீதி ‘‘நித்³தோ³ஸ’’ந்தி வுத்தங். கத்வாதி ச பத³ங், ‘‘கல்யாணங் கத்வா ப⁴த்³த³கங் கத்வா’’தி புரிமபத³த்³வயேனபி யோஜேதப்³ப³ங். தே³ஸனாகாரோ ஹி இத⁴ கல்யாணஸத்³தே³ன க³ஹிதோ. தேனேவாஹ – ‘‘தே³ஸேதப்³ப³த⁴ம்மஸ்ஸ கல்யாணதா த³ஸ்ஸிதா ஹோதீ’’தி, து³தியே பன அத்த²விகப்பே தே³ஸேதப்³ப³த⁴ம்மஸ்ஸ கல்யாணதா முக்²யேனேவ கதி²தா இதரஸ்ஸ அத்தா²பத்திதோ. மஜ்ஜே²கல்யாணங் பரியோஸானகல்யாணந்தி எத்தா²பி ஏஸேவ நயோ. அயஞ்ச தே³ஸனாய தோ²மனா பு³த்³தா⁴னங் ஆசிண்ணஸமாசிண்ணாவாதி த³ஸ்ஸேதுங், ‘‘இதி ப⁴க³வா அரியவங்ஸ’’ந்திஆதி³ வுத்தங். த⁴ம்மக்³க³ஹணம்பி தே³ஸனாய தோ²மனா ஏவாதி ‘‘நவஹி பதே³ஹீ’’தி வுத்தங்.
420.Ādimhikalyāṇanti ādikoṭṭhāse kalyāṇaṃ etassāti vā ādikalyāṇo, taṃ ādikalyāṇaṃ, ādikalyāṇabhāvo ca dosavigamena icchitabbo. Yañhi sabbaso vigatadosaṃ, taṃ paripuṇṇaguṇameva hotīti ‘‘niddosa’’nti vuttaṃ. Katvāti ca padaṃ, ‘‘kalyāṇaṃ katvā bhaddakaṃ katvā’’ti purimapadadvayenapi yojetabbaṃ. Desanākāro hi idha kalyāṇasaddena gahito. Tenevāha – ‘‘desetabbadhammassa kalyāṇatā dassitā hotī’’ti, dutiye pana atthavikappe desetabbadhammassa kalyāṇatā mukhyeneva kathitā itarassa atthāpattito. Majjhekalyāṇaṃ pariyosānakalyāṇanti etthāpi eseva nayo. Ayañca desanāya thomanā buddhānaṃ āciṇṇasamāciṇṇāvāti dassetuṃ, ‘‘iti bhagavā ariyavaṃsa’’ntiādi vuttaṃ. Dhammaggahaṇampi desanāya thomanā evāti ‘‘navahi padehī’’ti vuttaṃ.
வேத³னா யாதா²வதோ ஜானநங், தஞ்ச மக்³க³கிச்சங், தஸ்ஸ உபாயோ விபஸ்ஸனாதிஆஹ – ‘‘ஸஹவிபஸ்ஸனேன மக்³கே³ன ஜானிதப்³பா³னீ’’தி. பரிஞ்ஞாபி⁴ஸமயாதி³கிச்சேன நிப்³ப³த்தியா அஸம்மோஹதோ ச படிவிஜ்ஜி²தப்³போ³. தேபூ⁴மகசித்தமேவ கதி²தங் ஸம்மஸனட்டா²னஸ்ஸ அதி⁴ப்பேதத்தா. ஏஸ நயோ த⁴ம்மாயதனாதீ³ஸுபி. த⁴ம்மாயதனஸ்ஸ வா ஆயதனபா⁴வதோ ப³ஹித்³தா⁴க³ஹணங், ந ஸப்³ப³ஸோ அனஜ்ஜ²த்தபா⁴வதோ. விபாகவேத³னாபச்சயா ஜவனக்க²ணே உப்பன்னதண்ஹாதி ச²த்திங்ஸவிபாகவேத³னங் நிஸ்ஸாய ஏவங் அஸ்ஸாதெ³ந்தீ அனுப⁴வெய்யந்தி அகுஸலஜவனக்க²ணதோ உப்பன்னதண்ஹா.
Vedanā yāthāvato jānanaṃ, tañca maggakiccaṃ, tassa upāyo vipassanātiāha – ‘‘sahavipassanena maggena jānitabbānī’’ti. Pariññābhisamayādikiccena nibbattiyā asammohato ca paṭivijjhitabbo. Tebhūmakacittameva kathitaṃ sammasanaṭṭhānassa adhippetattā. Esa nayo dhammāyatanādīsupi. Dhammāyatanassa vā āyatanabhāvato bahiddhāgahaṇaṃ, na sabbaso anajjhattabhāvato. Vipākavedanāpaccayā javanakkhaṇe uppannataṇhāti chattiṃsavipākavedanaṃ nissāya evaṃ assādentī anubhaveyyanti akusalajavanakkhaṇato uppannataṇhā.
422. பாடியேக்கோ அனுஸந்தீ⁴தி யதா²னுஸந்தி⁴ஆதீ³னங் அஸம்ப⁴வதோதி அதி⁴ப்பாயேன வுத்தங். ஹெட்டா²தி விஞ்ஞாணப²ஸ்ஸவேத³னாதண்ஹானங் பச்சயாயத்தவுத்திதாத³ஸ்ஸனேன சக்கா²யதனாதீ³னங் ரூபாயதனாதீ³னஞ்ச பச்சயாயத்தவுத்திதா தீ³பிதா அபச்சயுப்பன்னஸ்ஸ பச்சயாபா⁴வதோ, யஞ்ச பச்சயாயத்தவுத்திகங், தங் அனிச்சங் உப்பாத³ஸம்ப⁴வதோ, யத³னிச்சங் தங் து³க்க²ங், யங் து³க்க²ங் தத³னத்தாதி க²ந்த⁴பஞ்சகே ச ச²ன்னங் ச²க்கானங் வஸேன க⁴னவினிப்³போ⁴க³கரணேன அத்த²தோ அனத்தலக்க²ணங் விபா⁴விதங். ந ஸரூபதோதி ஸரூபதோபி தங் விபா⁴வேதுகாமோ தேனேவ ச²ச²க்கானங் வஸேன க⁴னவினிப்³போ⁴க³னயேன ப்³யதிரேகதோ ச அன்வயதோ ச த³ஸ்ஸெந்தோ ப⁴க³வா – ‘‘சக்கு² அத்தாதி யோ வதெ³ய்யா’’திஆதி³மாஹாதி யதா²னுஸந்தி⁴காவ தே³ஸனா விபா⁴விதா. தேனாஹ ‘‘ஹெட்டா² கதி²தானங் ஹீ’’திஆதி³. ஹெட்டா² பன ச²ன்னங் ச²க்கானங் வஸேன வினிப்³போ⁴க³த³ஸ்ஸனமத்தங், ந அனத்தலக்க²ணங் விபா⁴விதங் , இத⁴ பன ஸரூபதோ அனத்தலக்க²ணங் விபா⁴விதந்தி அதி⁴ப்பாயேன அனுஸந்த⁴ந்தரபா⁴வஜோதனா. யதி³பி அனத்தபா⁴வோ நாம சதூஸுபி ஸச்சேஸு லப்³ப⁴தேவ, ஸப்³பே³பி ஹி த⁴ம்மா அனத்தா, இமே பனெத்த² த்³வேபி நயா ஸம்மஸனவஸேன பவத்தாதி வுத்தங் – ‘‘த்³வின்னங் ஸச்சானங் அனத்தபா⁴வத³ஸ்ஸனத்த²’’ந்தி. ந உபபஜ்ஜதீதி உபபத்திஸங்கா²தயுத்தியா ந ஸமேதீதி அயமெத்த² அத்தோ²தி ஆஹ ‘‘ந யுஜ்ஜதீ’’தி. அத்தவாதி³னா – ‘‘நிச்சோ து⁴வோ ஸஸ்ஸதோ’’தி அபி⁴மதோ, சக்கு²ஞ்ச உப்பாத³வந்ததாய அனிச்சங், யங் பச்சயாயத்த²வுத்திதா, தஸ்மா ‘‘சக்கு² அத்தாதி யோ வதெ³ய்ய, தங் ந உபபஜ்ஜதீ’’திஆதி³. ஸக்காயவத்து² சக்கு² அனத்தா அனிச்சபா⁴வதோ ஸெய்யதா²பி க⁴டோ, சக்கு²ங் அனிச்சங் பச்சயாயத்தவுத்திபா⁴வதோ ஸெய்யதா²பி க⁴டோ, சக்கு² பச்சயாயத்தவுத்தி உப்பாதா³தி³ஸம்ப⁴வதோ ஸெய்யதா²பி க⁴டோ. விக³ச்ச²தீதி ப⁴ங்கு³ப்பத்தியா ஸபா⁴வாவிக³மேன விக³ச்ச²தி. தேனாஹ ‘‘நிருஜ்ஜ²தீ’’தி.
422.Pāṭiyekko anusandhīti yathānusandhiādīnaṃ asambhavatoti adhippāyena vuttaṃ. Heṭṭhāti viññāṇaphassavedanātaṇhānaṃ paccayāyattavuttitādassanena cakkhāyatanādīnaṃ rūpāyatanādīnañca paccayāyattavuttitā dīpitā apaccayuppannassa paccayābhāvato, yañca paccayāyattavuttikaṃ, taṃ aniccaṃ uppādasambhavato, yadaniccaṃ taṃ dukkhaṃ, yaṃ dukkhaṃ tadanattāti khandhapañcake ca channaṃ chakkānaṃ vasena ghanavinibbhogakaraṇena atthato anattalakkhaṇaṃ vibhāvitaṃ. Na sarūpatoti sarūpatopi taṃ vibhāvetukāmo teneva chachakkānaṃ vasena ghanavinibbhoganayena byatirekato ca anvayato ca dassento bhagavā – ‘‘cakkhu attāti yo vadeyyā’’tiādimāhāti yathānusandhikāva desanā vibhāvitā. Tenāha ‘‘heṭṭhā kathitānaṃ hī’’tiādi. Heṭṭhā pana channaṃ chakkānaṃ vasena vinibbhogadassanamattaṃ, na anattalakkhaṇaṃ vibhāvitaṃ , idha pana sarūpato anattalakkhaṇaṃ vibhāvitanti adhippāyena anusandhantarabhāvajotanā. Yadipi anattabhāvo nāma catūsupi saccesu labbhateva, sabbepi hi dhammā anattā, ime panettha dvepi nayā sammasanavasena pavattāti vuttaṃ – ‘‘dvinnaṃ saccānaṃ anattabhāvadassanattha’’nti. Na upapajjatīti upapattisaṅkhātayuttiyā na sametīti ayamettha atthoti āha ‘‘na yujjatī’’ti. Attavādinā – ‘‘nicco dhuvo sassato’’ti abhimato, cakkhuñca uppādavantatāya aniccaṃ, yaṃ paccayāyatthavuttitā, tasmā ‘‘cakkhu attāti yo vadeyya, taṃ na upapajjatī’’tiādi. Sakkāyavatthu cakkhu anattā aniccabhāvato seyyathāpi ghaṭo, cakkhuṃ aniccaṃ paccayāyattavuttibhāvato seyyathāpi ghaṭo, cakkhu paccayāyattavutti uppādādisambhavato seyyathāpi ghaṭo. Vigacchatīti bhaṅguppattiyā sabhāvāvigamena vigacchati. Tenāha ‘‘nirujjhatī’’ti.
424. யஸ்மா கிலேஸவட்டமூலகங் கம்மவட்டங், கம்மவட்டமூலகஞ்ச விபாகவட்டங். கிலேஸுப்பத்தி ச தண்ஹாதி³க்³கா³ஹபுப்³பி³கா, தஸ்மா ‘‘திண்ணங் வா கா³ஹானங் வஸேன வட்டங் த³ஸ்ஸேது’’ந்தி ஆஹ. யஸ்மா பன தண்ஹாபக்கி²கா த⁴ம்மா ஸமுத³யஸச்சங், சக்கா²த³யோ து³க்க²ஸச்சங், தஸ்மா வுத்தங் – ‘‘த்³வின்னங் ஸச்சானங் வஸேன வட்டங் த³ஸ்ஸேது’’ந்தி. தண்ஹாமானதி³ட்டி²க்³கா³ஹாவ வேதி³தப்³பா³ ஸக்காயகா³மினிபடிபதா³ய அதி⁴ப்பேதத்தா. ‘‘ஏதங் மமா’’திஆதி³னா க³ஹணமேவெத்த² அனுபஸ்ஸனாதி ஆஹ – ‘‘கா³ஹத்தயவஸேன பஸ்ஸதீ’’தி.
424. Yasmā kilesavaṭṭamūlakaṃ kammavaṭṭaṃ, kammavaṭṭamūlakañca vipākavaṭṭaṃ. Kilesuppatti ca taṇhādiggāhapubbikā, tasmā ‘‘tiṇṇaṃ vā gāhānaṃ vasena vaṭṭaṃ dassetu’’nti āha. Yasmā pana taṇhāpakkhikā dhammā samudayasaccaṃ, cakkhādayo dukkhasaccaṃ, tasmā vuttaṃ – ‘‘dvinnaṃ saccānaṃ vasena vaṭṭaṃ dassetu’’nti. Taṇhāmānadiṭṭhiggāhāva veditabbā sakkāyagāminipaṭipadāya adhippetattā. ‘‘Etaṃ mamā’’tiādinā gahaṇamevettha anupassanāti āha – ‘‘gāhattayavasena passatī’’ti.
திண்ணங் கா³ஹானங் படிபக்க²வஸேனாதி தண்ஹாதி³க்³கா³ஹபடிபக்க²பூ⁴தானங் து³க்கா²னிச்சானத்தானுபஸ்ஸனானங் வஸேன, தாஹி வா திண்ணங் கா³ஹானங் படிபக்க²வஸேன வினிவேட²னவஸேன அனுப்பாத³னவஸேனாதி அத்தோ². படிபக்க²வஸேன விவட்டங் த³ஸ்ஸேதுந்தி யோஜனா. ஸக்காயனிரோத⁴கா³மினீ படிபதா³தி எத்த² நிரோத⁴த⁴ம்மோ ஸரூபேனேவ த³ஸ்ஸிதோதி ஆஹ – ‘‘நிரோதோ⁴…பே॰… த³ஸ்ஸேது’’ந்தி. படிஸேத⁴வசனானீதி படிக்கே²பவசனானி.
Tiṇṇaṃ gāhānaṃ paṭipakkhavasenāti taṇhādiggāhapaṭipakkhabhūtānaṃ dukkhāniccānattānupassanānaṃ vasena, tāhi vā tiṇṇaṃ gāhānaṃ paṭipakkhavasena viniveṭhanavasena anuppādanavasenāti attho. Paṭipakkhavasena vivaṭṭaṃ dassetunti yojanā. Sakkāyanirodhagāminī paṭipadāti ettha nirodhadhammo sarūpeneva dassitoti āha – ‘‘nirodho…pe… dassetu’’nti. Paṭisedhavacanānīti paṭikkhepavacanāni.
425. தண்ஹாதீ³னங் அனுபாதி³யனவசனானி தண்ஹாதி³ட்டி²வஸேனேவ வுத்தானி தண்ஹாதி³ட்டீ²னங்யேவ அபி⁴னந்த³னாதி³வஸேன பவத்திஸப்³பா⁴வதோ. அப்பஹீனத்தோ² அனுஸயத்தோ²தி ஆஹ – ‘‘அனுஸேதீதி அப்பஹீனோ ஹோதீ’’தி அரியமக்³கே³ன ஹி அப்பஹீனோ தா²மக³தோ ராகா³தி³கிலேஸோ அனுஸயோ காரணலாபே⁴ ஸதி உப்பஜ்ஜனாரஹபா⁴வதோ. யங் பனெத்த² வத்தப்³ப³ங், தங் ஹெட்டா² வுத்தமேவ. வட்டது³க்க²கிலேஸது³க்க²ஸ்ஸாதி வட்டது³க்க²ஸ்ஸ சேவ கிலேஸது³க்க²ஸ்ஸ ச. ஸஉபாதி³ஸேஸனிப்³பா³னஞ்ஹி கிலேஸது³க்க²ஸ்ஸ அந்தகரணங், அனுபாதி³ஸேஸனிப்³பா³னங் வட்டது³க்க²ஸ்ஸ.
425. Taṇhādīnaṃ anupādiyanavacanāni taṇhādiṭṭhivaseneva vuttāni taṇhādiṭṭhīnaṃyeva abhinandanādivasena pavattisabbhāvato. Appahīnattho anusayatthoti āha – ‘‘anusetīti appahīno hotī’’ti ariyamaggena hi appahīno thāmagato rāgādikileso anusayo kāraṇalābhe sati uppajjanārahabhāvato. Yaṃ panettha vattabbaṃ, taṃ heṭṭhā vuttameva. Vaṭṭadukkhakilesadukkhassāti vaṭṭadukkhassa ceva kilesadukkhassa ca. Saupādisesanibbānañhi kilesadukkhassa antakaraṇaṃ, anupādisesanibbānaṃ vaṭṭadukkhassa.
426. தேஸந்தி அனுஸயானங். படிக்கே²பவஸேனாதி பஜஹனவஸேன, அப்பவத்திகரணவஸேனாதி அத்தோ². அவிஜ்ஜங் பஜஹித்வாதி அனவஸேஸதோ அவிஜ்ஜங் அப்பவத்தித⁴ம்மதங் ஆபாதெ³த்வா. காமங் ஹெட்டி²மமக்³க³ஞாணம்பி அவிஜ்ஜாபஹாயினீ விஜ்ஜா ஏவ, தங் பன ஞாணங் அவிஜ்ஜாய அனவஸேஸப்பஹாயகங் ந ஹோதி, அக்³க³மக்³க³ஞாணே பன உப்பன்னே அவிஜ்ஜாய லேஸோபி நாவஸிஸ்ஸதீதி ததே³வ அவிஜ்ஜாய பஹாயகந்தி ஆஹ – ‘‘அரஹத்தமக்³க³விஜ்ஜங் உப்பாதெ³த்வா’’தி.
426.Tesanti anusayānaṃ. Paṭikkhepavasenāti pajahanavasena, appavattikaraṇavasenāti attho. Avijjaṃ pajahitvāti anavasesato avijjaṃ appavattidhammataṃ āpādetvā. Kāmaṃ heṭṭhimamaggañāṇampi avijjāpahāyinī vijjā eva, taṃ pana ñāṇaṃ avijjāya anavasesappahāyakaṃ na hoti, aggamaggañāṇe pana uppanne avijjāya lesopi nāvasissatīti tadeva avijjāya pahāyakanti āha – ‘‘arahattamaggavijjaṃ uppādetvā’’ti.
427. ஸயமேவ ததா²க³தே அத்தனோ பு³த்³தா⁴னுபா⁴வேன தே³ஸெந்தே ஸட்டி² பி⁴க்கூ² அரஹத்தங் பத்தாதி அனச்ச²ரியமேதங், அத² கிங் அச்ச²ரியந்தி ஆஹ ‘‘இம’’ந்திஆதி³. கதெ²ந்தேபீதி எத்த² இதிஸத்³தோ³ பகாரத்தோ², இமினாவ பகாரேனாதி அத்தோ². பத்தா ஏவாதி ஸட்டி² பி⁴க்கூ² அரஹத்தங் பத்தா ஏவாதி யோஜனா. ஏதம்பி அனச்ச²ரியங், ஸத்து² ஸம்முகா² ஸாவகா ஸமுதா³க³மா மஹாபி⁴ஞ்ஞா பபி⁴ன்னபடிஸம்பி⁴தா³ ததா² ததா² ஸப்பாடிஹாரியங் த⁴ம்மங் தே³ஸெந்தீதி. தேனாஹ – ‘‘மஹாபி⁴ஞ்ஞப்பத்தா ஹி தே ஸாவகா’’தி.
427. Sayameva tathāgate attano buddhānubhāvena desente saṭṭhi bhikkhū arahattaṃ pattāti anacchariyametaṃ, atha kiṃ acchariyanti āha ‘‘ima’’ntiādi. Kathentepīti ettha itisaddo pakārattho, imināva pakārenāti attho. Pattā evāti saṭṭhi bhikkhū arahattaṃ pattā evāti yojanā. Etampi anacchariyaṃ, satthu sammukhā sāvakā samudāgamā mahābhiññā pabhinnapaṭisambhidā tathā tathā sappāṭihāriyaṃ dhammaṃ desentīti. Tenāha – ‘‘mahābhiññappattā hi te sāvakā’’ti.
மஹாமண்ட³பேதி லோஹபாஸாத³ஸ்ஸ புரதோ ஏவ மஹாபி⁴க்கு²ஸன்னிபாதோ ஜாதோதி தேஸங் பஹோனகவஸேன கதே மஹதி ஸாணிமண்ட³பேதி வத³ந்தி. தேஸுபி டா²னேஸூதி தேஸு யதா²வுத்தமஹாமண்ட³பாதீ³ஸு டா²னேஸு. மஹாதே²ரோ அத்தீ²தி பத³ங் ஆனெத்வா ஸம்ப³ந்தி⁴தப்³ப³ங். தே³வத்தே²ரஸ்ஸ கு³ணே ஸுத்வா பஸன்னமானஸோ மஹாதே²ரோ, ததா²பி வத்த²ஸம்பத்தியா பஸீதி³த்வா ‘‘த்வங் பன ந்ஹாபேஹீ’’தி ஆஹ.
Mahāmaṇḍapeti lohapāsādassa purato eva mahābhikkhusannipāto jātoti tesaṃ pahonakavasena kate mahati sāṇimaṇḍapeti vadanti. Tesupi ṭhānesūti tesu yathāvuttamahāmaṇḍapādīsu ṭhānesu. Mahāthero atthīti padaṃ ānetvā sambandhitabbaṃ. Devattherassa guṇe sutvā pasannamānaso mahāthero, tathāpi vatthasampattiyā pasīditvā ‘‘tvaṃ pana nhāpehī’’ti āha.
ஹெட்டா²பாஸாதே³தி ச கல்யாணியமஹாவிஹாரே உபோஸதா²கா³ரே ஹெட்டா²பாஸாதே³ ஏகதா³ உபரிபாஸாதே³ ஏகதா³, கதே²ஸீதி. சூளனாக³ஸ்ஸ ததா² மஹதீ பரிஸா தே³வதானுபா⁴வேன அபி⁴ஞ்ஞாபாத³னங் அஹோஸீதி கேசி . தே²ரோ பன மஹித்³தி⁴கோ அஹோஸி, தஸ்மா தாவ மஹதிங் பரிஸங் அபி⁴ஞ்ஞாபேஸீதி அபரே.
Heṭṭhāpāsādeti ca kalyāṇiyamahāvihāre uposathāgāre heṭṭhāpāsāde ekadā uparipāsāde ekadā, kathesīti. Cūḷanāgassa tathā mahatī parisā devatānubhāvena abhiññāpādanaṃ ahosīti keci . Thero pana mahiddhiko ahosi, tasmā tāva mahatiṃ parisaṃ abhiññāpesīti apare.
ததோ ததோதி தஸ்ஸங் தஸ்ஸங் தி³ஸாயங். ஏகோவாதி ஏகச்சோ ஏவ, ந ப³ஹுஸோ, கதிபயாவ புது²ஜ்ஜனா அஹேஸுந்தி அத்தோ². ஸேஸங் ஹெட்டா² வுத்தனயத்தா ஸுவிஞ்ஞெய்யமேவ.
Tato tatoti tassaṃ tassaṃ disāyaṃ. Ekovāti ekacco eva, na bahuso, katipayāva puthujjanā ahesunti attho. Sesaṃ heṭṭhā vuttanayattā suviññeyyameva.
ச²ச²க்கஸுத்தவண்ணனாய லீனத்த²ப்பகாஸனா ஸமத்தா.
Chachakkasuttavaṇṇanāya līnatthappakāsanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 6. ச²ச²க்கஸுத்தங் • 6. Chachakkasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 6. ச²ச²க்கஸுத்தவண்ணனா • 6. Chachakkasuttavaṇṇanā
