| Library / Tipiṭaka / তিপিটক • Tipiṭaka / মজ্ঝিমনিকায (অট্ঠকথা) • Majjhimanikāya (aṭṭhakathā) |
৬. ছছক্কসুত্তৰণ্ণনা
6. Chachakkasuttavaṇṇanā
৪২০. এৰং মে সুতন্তি ছছক্কসুত্তং। তত্থ আদিকল্যাণন্তিআদিম্হি কল্যাণং ভদ্দকং নিদ্দোসং কত্ৰা দেসেস্সামি। মজ্ঝপরিযোসানেসুপি এসেৰ নযো। ইতি ভগৰা অরিযৰংসং নৰহি, মহাসতিপট্ঠানং সত্তহি, মহাঅস্সপুরং সত্তহিযেৰ পদেহি থোমেসি। ইদং পন সুত্তং নৰহি পদেহি থোমেসি।
420.Evaṃme sutanti chachakkasuttaṃ. Tattha ādikalyāṇantiādimhi kalyāṇaṃ bhaddakaṃ niddosaṃ katvā desessāmi. Majjhapariyosānesupi eseva nayo. Iti bhagavā ariyavaṃsaṃ navahi, mahāsatipaṭṭhānaṃ sattahi, mahāassapuraṃ sattahiyeva padehi thomesi. Idaṃ pana suttaṃ navahi padehi thomesi.
ৰেদিতব্বানীতি সহৰিপস্সনেন মগ্গেন জানিতব্বানি। মনাযতনেন তেভূমকচিত্তমেৰ কথিতং, ধম্মাযতনেন বহিদ্ধা তেভূমকধম্মা চ, মনোৰিঞ্ঞাণেন ঠপেত্ৰা দ্ৰে পঞ্চৰিঞ্ঞাণানি সেসং বাৰীসতিৰিধং লোকিযৰিপাকচিত্তং। ফস্সৰেদনা যথাৰুত্তৰিপাকৰিঞ্ঞাণসম্পযুত্তাৰ। তণ্হাতি ৰিপাকৰেদনাপচ্চযা জৰনক্খণে উপ্পন্নতণ্হা।
Veditabbānīti sahavipassanena maggena jānitabbāni. Manāyatanena tebhūmakacittameva kathitaṃ, dhammāyatanena bahiddhā tebhūmakadhammā ca, manoviññāṇena ṭhapetvā dve pañcaviññāṇāni sesaṃ bāvīsatividhaṃ lokiyavipākacittaṃ. Phassavedanā yathāvuttavipākaviññāṇasampayuttāva. Taṇhāti vipākavedanāpaccayā javanakkhaṇe uppannataṇhā.
৪২২. চক্খু অত্তাতি পাটিযেক্কো অনুসন্ধি। হেট্ঠা কথিতানঞ্হি দ্ৰিন্নং সচ্চানং অনত্তভাৰদস্সনত্থং অযং দেসনা আরদ্ধা। তত্থ ন উপপজ্জতীতি ন যুজ্জতি। ৰেতীতি ৰিগচ্ছতি নিরুজ্ঝতি।
422.Cakkhu attāti pāṭiyekko anusandhi. Heṭṭhā kathitānañhi dvinnaṃ saccānaṃ anattabhāvadassanatthaṃ ayaṃ desanā āraddhā. Tattha na upapajjatīti na yujjati. Vetīti vigacchati nirujjhati.
৪২৪. অযং খো পন, ভিক্খৰেতি অযম্পি পাটিযেক্কো অনুসন্ধি। অযঞ্হি দেসনা তিণ্ণং গাহানং ৰসেন ৰট্টং দস্সেতুং আরদ্ধা। দুক্খং সমুদযোতি দ্ৰিন্নং সচ্চানং ৰসেন ৰট্টং দস্সেতুন্তিপি ৰদন্তিযেৰ। এতং মমাতিআদীসু তণ্হামানদিট্ঠিগাহাৰ ৰেদিতব্বা। সমনুপস্সতীতি গাহত্তযৰসেন পস্সতি।
424.Ayaṃ kho pana, bhikkhaveti ayampi pāṭiyekko anusandhi. Ayañhi desanā tiṇṇaṃ gāhānaṃ vasena vaṭṭaṃ dassetuṃ āraddhā. Dukkhaṃ samudayoti dvinnaṃ saccānaṃ vasena vaṭṭaṃ dassetuntipi vadantiyeva. Etaṃ mamātiādīsu taṇhāmānadiṭṭhigāhāva veditabbā. Samanupassatīti gāhattayavasena passati.
এৰং ৰট্টং দস্সেত্ৰা ইদানি তিণ্ণং গাহানং পটিপক্খৰসেন, নিরোধো মগ্গোতি ইমেসং ৰা দ্ৰিন্নং সচ্চানং ৰসেন ৰিৰট্টং দস্সেতুং অযং খো পনাতিআদিমাহ। নেতং মমাতিআদীনি তণ্হাদীনং পটিসেধৰচনানি। সমনুপস্সতীতি অনিচ্চং দুক্খমনত্তাতি পস্সতি।
Evaṃ vaṭṭaṃ dassetvā idāni tiṇṇaṃ gāhānaṃ paṭipakkhavasena, nirodho maggoti imesaṃ vā dvinnaṃ saccānaṃ vasena vivaṭṭaṃ dassetuṃ ayaṃ kho panātiādimāha. Netaṃ mamātiādīni taṇhādīnaṃ paṭisedhavacanāni. Samanupassatīti aniccaṃ dukkhamanattāti passati.
৪২৫. এৰং ৰিৰট্টং দস্সেত্ৰা ইদানি তিণ্ণং অনুসযানং ৰসেন পুন ৰট্টং দস্সেতুং চক্খুঞ্চ, ভিক্খৰেতিআদিমাহ। তত্থ অভিনন্দতীতিআদীনি তণ্হাদিট্ঠিৰসেনেৰ ৰুত্তানি। অনুসেতীতি অপ্পহীনো হোতি। দুক্খস্সাতি ৰট্টদুক্খকিলেসদুক্খস্স।
425. Evaṃ vivaṭṭaṃ dassetvā idāni tiṇṇaṃ anusayānaṃ vasena puna vaṭṭaṃ dassetuṃ cakkhuñca, bhikkhavetiādimāha. Tattha abhinandatītiādīni taṇhādiṭṭhivaseneva vuttāni. Anusetīti appahīno hoti. Dukkhassāti vaṭṭadukkhakilesadukkhassa.
৪২৬. এৰং তিণ্ণং অনুসযানং ৰসেন ৰট্টং কথেত্ৰা ইদানি তেসং পটিক্খেপৰসেন ৰিৰট্টং দস্সেন্তো পুন চক্খুঞ্চাতিআদিমাহ। অৰিজ্জং পহাযাতি ৰট্টমূলিকং অৰিজ্জং পজহিত্ৰা। ৰিজ্জন্তি অরহত্তমগ্গৰিজ্জং উপ্পাদেত্ৰা।
426. Evaṃ tiṇṇaṃ anusayānaṃ vasena vaṭṭaṃ kathetvā idāni tesaṃ paṭikkhepavasena vivaṭṭaṃ dassento puna cakkhuñcātiādimāha. Avijjaṃ pahāyāti vaṭṭamūlikaṃ avijjaṃ pajahitvā. Vijjanti arahattamaggavijjaṃ uppādetvā.
৪২৭. ঠানমেতং ৰিজ্জতীতি এত্তকেনেৰ কথামগ্গেন ৰট্টৰিৰট্টৰসেন দেসনং মত্থকং পাপেত্ৰা পুন তদেৰ সম্পিণ্ডেত্ৰা দস্সেন্তো এৰং পস্সং, ভিক্খৰেতিআদিমাহ। সট্ঠিমত্তানং ভিক্খূনন্তি এত্থ অনচ্ছরিযমেতং, যং সযমেৰ তথাগতে দেসেন্তে সট্ঠি ভিক্খূ অরহত্তং পত্তা। ইমঞ্হি সুত্তং ধম্মসেনাপতিম্হি কথেন্তেপি সট্ঠি ভিক্খূ অরহত্তং পত্তা, মহামোগ্গল্লানে কথেন্তেপি, অসীতিমহাথেরেসু কথেন্তেসুপি পত্তা এৰ। এতম্পি অনচ্ছরিযং। মহাভিঞ্ঞপ্পত্তা হি তে সাৰকা।
427.Ṭhānametaṃ vijjatīti ettakeneva kathāmaggena vaṭṭavivaṭṭavasena desanaṃ matthakaṃ pāpetvā puna tadeva sampiṇḍetvā dassento evaṃ passaṃ, bhikkhavetiādimāha. Saṭṭhimattānaṃ bhikkhūnanti ettha anacchariyametaṃ, yaṃ sayameva tathāgate desente saṭṭhi bhikkhū arahattaṃ pattā. Imañhi suttaṃ dhammasenāpatimhi kathentepi saṭṭhi bhikkhū arahattaṃ pattā, mahāmoggallāne kathentepi, asītimahātheresu kathentesupi pattā eva. Etampi anacchariyaṃ. Mahābhiññappattā hi te sāvakā.
অপরভাগে পন তম্বপণ্ণিদীপে মালেয্যদেৰত্থেরো নাম হেট্ঠা লোহপাসাদে ইদং সুত্তং কথেসি। তদাপি সট্ঠি ভিক্খূ অরহত্তং পত্তা। যথা চ লোহপাসাদে, এৰং থেরো মহামণ্ডপেপি ইদং সুত্তং কথেসি। মহাৰিহারা নিক্খমিত্ৰা চেতিযপব্বতং গতো, তত্থাপি কথেসি। ততো সাকিযৰংসৰিহারে, কূটালিৰিহারে, অন্তরসোব্ভে, মুত্তঙ্গণে, ৰাতকপব্বতে, পাচিনঘরকে, দীঘৰাপিযং, লোকন্দরে, নোমণ্ডলতলে কথেসি। তেসুপি ঠানেসু সট্ঠি সট্ঠি ভিক্খূ অরহত্তং পত্তা। ততো নিক্খমিত্ৰা পন থেরো চিত্তলপব্বতং গতো। তদা চ চিত্তলপব্বতৰিহারে অতিরেকসট্ঠিৰস্সো মহাথেরো, পোক্খরণিযং কুরুৰকতিত্থং নাম পটিচ্ছন্নট্ঠানং অত্থি, তত্থ থেরো ন্হাযিস্সামীতি ওতিণ্ণো। দেৰত্থেরো তস্স সন্তিকং গন্ত্ৰা ন্হাপেমি, ভন্তেতি আহ। থেরো পটিসন্থারেনেৰ – ‘‘মালেয্যদেৰো নাম অত্থীতি ৰদন্তি, সো অযং ভৰিস্সতী’’তি ঞত্ৰা ত্ৰং দেৰোতি আহ। আম, ভন্তেতি। সট্ঠিৰস্সদ্ধানং মে, আৰুসো, কোচি সরীরং হত্থেন ফুসিতুং নাম ন লভি, ত্ৰং পন ন্হাপেহীতি উত্তরিত্ৰা তীরে নিসীদি।
Aparabhāge pana tambapaṇṇidīpe māleyyadevatthero nāma heṭṭhā lohapāsāde idaṃ suttaṃ kathesi. Tadāpi saṭṭhi bhikkhū arahattaṃ pattā. Yathā ca lohapāsāde, evaṃ thero mahāmaṇḍapepi idaṃ suttaṃ kathesi. Mahāvihārā nikkhamitvā cetiyapabbataṃ gato, tatthāpi kathesi. Tato sākiyavaṃsavihāre, kūṭālivihāre, antarasobbhe, muttaṅgaṇe, vātakapabbate, pācinagharake, dīghavāpiyaṃ, lokandare, nomaṇḍalatale kathesi. Tesupi ṭhānesu saṭṭhi saṭṭhi bhikkhū arahattaṃ pattā. Tato nikkhamitvā pana thero cittalapabbataṃ gato. Tadā ca cittalapabbatavihāre atirekasaṭṭhivasso mahāthero, pokkharaṇiyaṃ kuruvakatitthaṃ nāma paṭicchannaṭṭhānaṃ atthi, tattha thero nhāyissāmīti otiṇṇo. Devatthero tassa santikaṃ gantvā nhāpemi, bhanteti āha. Thero paṭisanthāreneva – ‘‘māleyyadevo nāma atthīti vadanti, so ayaṃ bhavissatī’’ti ñatvā tvaṃ devoti āha. Āma, bhanteti. Saṭṭhivassaddhānaṃ me, āvuso, koci sarīraṃ hatthena phusituṃ nāma na labhi, tvaṃ pana nhāpehīti uttaritvā tīre nisīdi.
থেরো সব্বম্পি হত্থপাদাদিপরিকম্মং কত্ৰা মহাথেরং ন্হাপেসি। তং দিৰসঞ্চ ধম্মস্সৰনদিৰসো হোতি। অথ মহাথেরো – ‘‘দেৰ অম্হাকং ধম্মদানং দাতুং ৰট্টতী’’তি আহ। থেরো সাধু, ভন্তেতি সম্পটিচ্ছি। অত্থঙ্গতে সূরিযে ধম্মস্সৰনং ঘোসেসুং। অতিক্কন্তসট্ঠিৰস্সাৰ সট্ঠি মহাথেরা ধম্মস্সৰনত্থং অগমংসু। দেৰত্থেরো সরভাণাৰসানে ইমং সুত্তং আরভি, সুত্তন্তপরিযোসানে চ সট্ঠি মহাথেরা অরহত্তং পাপুণিংসু। ততো তিস্সমহাৰিহারং গন্ত্ৰা কথেসি, তস্মিম্পি সট্ঠি থেরা। ততো নাগমহাৰিহারে কাল়কচ্ছগামে কথেসি, তস্মিম্পি সট্ঠি থেরা। ততো কল্যাণিং গন্ত্ৰা তত্থ চাতুদ্দসে হেট্ঠাপাসাদে কথেসি, তস্মিম্পি সট্ঠি থেরা। উপোসথদিৰসে উপরিপাসাদে কথেসি, তস্মিম্পি সট্ঠি থেরাতি এৰং দেৰত্থেরেযেৰ ইদং সুত্তং কথেন্তে সট্ঠিট্ঠানেসু সট্ঠি সট্ঠি জনা অরহত্তং পত্তা।
Thero sabbampi hatthapādādiparikammaṃ katvā mahātheraṃ nhāpesi. Taṃ divasañca dhammassavanadivaso hoti. Atha mahāthero – ‘‘deva amhākaṃ dhammadānaṃ dātuṃ vaṭṭatī’’ti āha. Thero sādhu, bhanteti sampaṭicchi. Atthaṅgate sūriye dhammassavanaṃ ghosesuṃ. Atikkantasaṭṭhivassāva saṭṭhi mahātherā dhammassavanatthaṃ agamaṃsu. Devatthero sarabhāṇāvasāne imaṃ suttaṃ ārabhi, suttantapariyosāne ca saṭṭhi mahātherā arahattaṃ pāpuṇiṃsu. Tato tissamahāvihāraṃ gantvā kathesi, tasmimpi saṭṭhi therā. Tato nāgamahāvihāre kāḷakacchagāme kathesi, tasmimpi saṭṭhi therā. Tato kalyāṇiṃ gantvā tattha cātuddase heṭṭhāpāsāde kathesi, tasmimpi saṭṭhi therā. Uposathadivase uparipāsāde kathesi, tasmimpi saṭṭhi therāti evaṃ devatthereyeva idaṃ suttaṃ kathente saṭṭhiṭṭhānesu saṭṭhi saṭṭhi janā arahattaṃ pattā.
অম্বিলকাল়কৰিহারে পন তিপিটকচূল়নাগত্থেরে ইমং সুত্তং কথেন্তে মনুস্সপরিসা গাৰুতং অহোসি, দেৰপরিসা যোজনিকা। সুত্তপরিযোসানে সহস্সভিক্খূ অরহত্তং পত্তা, দেৰেসু পন ততো ততো একেকোৰ পুথুজ্জনো অহোসীতি।
Ambilakāḷakavihāre pana tipiṭakacūḷanāgatthere imaṃ suttaṃ kathente manussaparisā gāvutaṃ ahosi, devaparisā yojanikā. Suttapariyosāne sahassabhikkhū arahattaṃ pattā, devesu pana tato tato ekekova puthujjano ahosīti.
পপঞ্চসূদনিযা মজ্ঝিমনিকাযট্ঠকথায
Papañcasūdaniyā majjhimanikāyaṭṭhakathāya
ছছক্কসুত্তৰণ্ণনা নিট্ঠিতা।
Chachakkasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / মজ্ঝিমনিকায • Majjhimanikāya / ৬. ছছক্কসুত্তং • 6. Chachakkasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / মজ্ঝিমনিকায (টীকা) • Majjhimanikāya (ṭīkā) / ৬. ছছক্কসুত্তৰণ্ণনা • 6. Chachakkasuttavaṇṇanā
