| Library / Tipiṭaka / ತಿಪಿಟಕ • Tipiṭaka / ಮಜ್ಝಿಮನಿಕಾಯ (ಅಟ್ಠಕಥಾ) • Majjhimanikāya (aṭṭhakathā) |
೬. ಛಛಕ್ಕಸುತ್ತವಣ್ಣನಾ
6. Chachakkasuttavaṇṇanā
೪೨೦. ಏವಂ ಮೇ ಸುತನ್ತಿ ಛಛಕ್ಕಸುತ್ತಂ। ತತ್ಥ ಆದಿಕಲ್ಯಾಣನ್ತಿಆದಿಮ್ಹಿ ಕಲ್ಯಾಣಂ ಭದ್ದಕಂ ನಿದ್ದೋಸಂ ಕತ್ವಾ ದೇಸೇಸ್ಸಾಮಿ। ಮಜ್ಝಪರಿಯೋಸಾನೇಸುಪಿ ಏಸೇವ ನಯೋ। ಇತಿ ಭಗವಾ ಅರಿಯವಂಸಂ ನವಹಿ, ಮಹಾಸತಿಪಟ್ಠಾನಂ ಸತ್ತಹಿ, ಮಹಾಅಸ್ಸಪುರಂ ಸತ್ತಹಿಯೇವ ಪದೇಹಿ ಥೋಮೇಸಿ। ಇದಂ ಪನ ಸುತ್ತಂ ನವಹಿ ಪದೇಹಿ ಥೋಮೇಸಿ।
420.Evaṃme sutanti chachakkasuttaṃ. Tattha ādikalyāṇantiādimhi kalyāṇaṃ bhaddakaṃ niddosaṃ katvā desessāmi. Majjhapariyosānesupi eseva nayo. Iti bhagavā ariyavaṃsaṃ navahi, mahāsatipaṭṭhānaṃ sattahi, mahāassapuraṃ sattahiyeva padehi thomesi. Idaṃ pana suttaṃ navahi padehi thomesi.
ವೇದಿತಬ್ಬಾನೀತಿ ಸಹವಿಪಸ್ಸನೇನ ಮಗ್ಗೇನ ಜಾನಿತಬ್ಬಾನಿ। ಮನಾಯತನೇನ ತೇಭೂಮಕಚಿತ್ತಮೇವ ಕಥಿತಂ, ಧಮ್ಮಾಯತನೇನ ಬಹಿದ್ಧಾ ತೇಭೂಮಕಧಮ್ಮಾ ಚ, ಮನೋವಿಞ್ಞಾಣೇನ ಠಪೇತ್ವಾ ದ್ವೇ ಪಞ್ಚವಿಞ್ಞಾಣಾನಿ ಸೇಸಂ ಬಾವೀಸತಿವಿಧಂ ಲೋಕಿಯವಿಪಾಕಚಿತ್ತಂ। ಫಸ್ಸವೇದನಾ ಯಥಾವುತ್ತವಿಪಾಕವಿಞ್ಞಾಣಸಮ್ಪಯುತ್ತಾವ। ತಣ್ಹಾತಿ ವಿಪಾಕವೇದನಾಪಚ್ಚಯಾ ಜವನಕ್ಖಣೇ ಉಪ್ಪನ್ನತಣ್ಹಾ।
Veditabbānīti sahavipassanena maggena jānitabbāni. Manāyatanena tebhūmakacittameva kathitaṃ, dhammāyatanena bahiddhā tebhūmakadhammā ca, manoviññāṇena ṭhapetvā dve pañcaviññāṇāni sesaṃ bāvīsatividhaṃ lokiyavipākacittaṃ. Phassavedanā yathāvuttavipākaviññāṇasampayuttāva. Taṇhāti vipākavedanāpaccayā javanakkhaṇe uppannataṇhā.
೪೨೨. ಚಕ್ಖು ಅತ್ತಾತಿ ಪಾಟಿಯೇಕ್ಕೋ ಅನುಸನ್ಧಿ। ಹೇಟ್ಠಾ ಕಥಿತಾನಞ್ಹಿ ದ್ವಿನ್ನಂ ಸಚ್ಚಾನಂ ಅನತ್ತಭಾವದಸ್ಸನತ್ಥಂ ಅಯಂ ದೇಸನಾ ಆರದ್ಧಾ। ತತ್ಥ ನ ಉಪಪಜ್ಜತೀತಿ ನ ಯುಜ್ಜತಿ। ವೇತೀತಿ ವಿಗಚ್ಛತಿ ನಿರುಜ್ಝತಿ।
422.Cakkhu attāti pāṭiyekko anusandhi. Heṭṭhā kathitānañhi dvinnaṃ saccānaṃ anattabhāvadassanatthaṃ ayaṃ desanā āraddhā. Tattha na upapajjatīti na yujjati. Vetīti vigacchati nirujjhati.
೪೨೪. ಅಯಂ ಖೋ ಪನ, ಭಿಕ್ಖವೇತಿ ಅಯಮ್ಪಿ ಪಾಟಿಯೇಕ್ಕೋ ಅನುಸನ್ಧಿ। ಅಯಞ್ಹಿ ದೇಸನಾ ತಿಣ್ಣಂ ಗಾಹಾನಂ ವಸೇನ ವಟ್ಟಂ ದಸ್ಸೇತುಂ ಆರದ್ಧಾ। ದುಕ್ಖಂ ಸಮುದಯೋತಿ ದ್ವಿನ್ನಂ ಸಚ್ಚಾನಂ ವಸೇನ ವಟ್ಟಂ ದಸ್ಸೇತುನ್ತಿಪಿ ವದನ್ತಿಯೇವ। ಏತಂ ಮಮಾತಿಆದೀಸು ತಣ್ಹಾಮಾನದಿಟ್ಠಿಗಾಹಾವ ವೇದಿತಬ್ಬಾ। ಸಮನುಪಸ್ಸತೀತಿ ಗಾಹತ್ತಯವಸೇನ ಪಸ್ಸತಿ।
424.Ayaṃ kho pana, bhikkhaveti ayampi pāṭiyekko anusandhi. Ayañhi desanā tiṇṇaṃ gāhānaṃ vasena vaṭṭaṃ dassetuṃ āraddhā. Dukkhaṃ samudayoti dvinnaṃ saccānaṃ vasena vaṭṭaṃ dassetuntipi vadantiyeva. Etaṃ mamātiādīsu taṇhāmānadiṭṭhigāhāva veditabbā. Samanupassatīti gāhattayavasena passati.
ಏವಂ ವಟ್ಟಂ ದಸ್ಸೇತ್ವಾ ಇದಾನಿ ತಿಣ್ಣಂ ಗಾಹಾನಂ ಪಟಿಪಕ್ಖವಸೇನ, ನಿರೋಧೋ ಮಗ್ಗೋತಿ ಇಮೇಸಂ ವಾ ದ್ವಿನ್ನಂ ಸಚ್ಚಾನಂ ವಸೇನ ವಿವಟ್ಟಂ ದಸ್ಸೇತುಂ ಅಯಂ ಖೋ ಪನಾತಿಆದಿಮಾಹ। ನೇತಂ ಮಮಾತಿಆದೀನಿ ತಣ್ಹಾದೀನಂ ಪಟಿಸೇಧವಚನಾನಿ। ಸಮನುಪಸ್ಸತೀತಿ ಅನಿಚ್ಚಂ ದುಕ್ಖಮನತ್ತಾತಿ ಪಸ್ಸತಿ।
Evaṃ vaṭṭaṃ dassetvā idāni tiṇṇaṃ gāhānaṃ paṭipakkhavasena, nirodho maggoti imesaṃ vā dvinnaṃ saccānaṃ vasena vivaṭṭaṃ dassetuṃ ayaṃ kho panātiādimāha. Netaṃ mamātiādīni taṇhādīnaṃ paṭisedhavacanāni. Samanupassatīti aniccaṃ dukkhamanattāti passati.
೪೨೫. ಏವಂ ವಿವಟ್ಟಂ ದಸ್ಸೇತ್ವಾ ಇದಾನಿ ತಿಣ್ಣಂ ಅನುಸಯಾನಂ ವಸೇನ ಪುನ ವಟ್ಟಂ ದಸ್ಸೇತುಂ ಚಕ್ಖುಞ್ಚ, ಭಿಕ್ಖವೇತಿಆದಿಮಾಹ। ತತ್ಥ ಅಭಿನನ್ದತೀತಿಆದೀನಿ ತಣ್ಹಾದಿಟ್ಠಿವಸೇನೇವ ವುತ್ತಾನಿ। ಅನುಸೇತೀತಿ ಅಪ್ಪಹೀನೋ ಹೋತಿ। ದುಕ್ಖಸ್ಸಾತಿ ವಟ್ಟದುಕ್ಖಕಿಲೇಸದುಕ್ಖಸ್ಸ।
425. Evaṃ vivaṭṭaṃ dassetvā idāni tiṇṇaṃ anusayānaṃ vasena puna vaṭṭaṃ dassetuṃ cakkhuñca, bhikkhavetiādimāha. Tattha abhinandatītiādīni taṇhādiṭṭhivaseneva vuttāni. Anusetīti appahīno hoti. Dukkhassāti vaṭṭadukkhakilesadukkhassa.
೪೨೬. ಏವಂ ತಿಣ್ಣಂ ಅನುಸಯಾನಂ ವಸೇನ ವಟ್ಟಂ ಕಥೇತ್ವಾ ಇದಾನಿ ತೇಸಂ ಪಟಿಕ್ಖೇಪವಸೇನ ವಿವಟ್ಟಂ ದಸ್ಸೇನ್ತೋ ಪುನ ಚಕ್ಖುಞ್ಚಾತಿಆದಿಮಾಹ। ಅವಿಜ್ಜಂ ಪಹಾಯಾತಿ ವಟ್ಟಮೂಲಿಕಂ ಅವಿಜ್ಜಂ ಪಜಹಿತ್ವಾ। ವಿಜ್ಜನ್ತಿ ಅರಹತ್ತಮಗ್ಗವಿಜ್ಜಂ ಉಪ್ಪಾದೇತ್ವಾ।
426. Evaṃ tiṇṇaṃ anusayānaṃ vasena vaṭṭaṃ kathetvā idāni tesaṃ paṭikkhepavasena vivaṭṭaṃ dassento puna cakkhuñcātiādimāha. Avijjaṃ pahāyāti vaṭṭamūlikaṃ avijjaṃ pajahitvā. Vijjanti arahattamaggavijjaṃ uppādetvā.
೪೨೭. ಠಾನಮೇತಂ ವಿಜ್ಜತೀತಿ ಏತ್ತಕೇನೇವ ಕಥಾಮಗ್ಗೇನ ವಟ್ಟವಿವಟ್ಟವಸೇನ ದೇಸನಂ ಮತ್ಥಕಂ ಪಾಪೇತ್ವಾ ಪುನ ತದೇವ ಸಮ್ಪಿಣ್ಡೇತ್ವಾ ದಸ್ಸೇನ್ತೋ ಏವಂ ಪಸ್ಸಂ, ಭಿಕ್ಖವೇತಿಆದಿಮಾಹ। ಸಟ್ಠಿಮತ್ತಾನಂ ಭಿಕ್ಖೂನನ್ತಿ ಏತ್ಥ ಅನಚ್ಛರಿಯಮೇತಂ, ಯಂ ಸಯಮೇವ ತಥಾಗತೇ ದೇಸೇನ್ತೇ ಸಟ್ಠಿ ಭಿಕ್ಖೂ ಅರಹತ್ತಂ ಪತ್ತಾ। ಇಮಞ್ಹಿ ಸುತ್ತಂ ಧಮ್ಮಸೇನಾಪತಿಮ್ಹಿ ಕಥೇನ್ತೇಪಿ ಸಟ್ಠಿ ಭಿಕ್ಖೂ ಅರಹತ್ತಂ ಪತ್ತಾ, ಮಹಾಮೋಗ್ಗಲ್ಲಾನೇ ಕಥೇನ್ತೇಪಿ, ಅಸೀತಿಮಹಾಥೇರೇಸು ಕಥೇನ್ತೇಸುಪಿ ಪತ್ತಾ ಏವ। ಏತಮ್ಪಿ ಅನಚ್ಛರಿಯಂ। ಮಹಾಭಿಞ್ಞಪ್ಪತ್ತಾ ಹಿ ತೇ ಸಾವಕಾ।
427.Ṭhānametaṃ vijjatīti ettakeneva kathāmaggena vaṭṭavivaṭṭavasena desanaṃ matthakaṃ pāpetvā puna tadeva sampiṇḍetvā dassento evaṃ passaṃ, bhikkhavetiādimāha. Saṭṭhimattānaṃ bhikkhūnanti ettha anacchariyametaṃ, yaṃ sayameva tathāgate desente saṭṭhi bhikkhū arahattaṃ pattā. Imañhi suttaṃ dhammasenāpatimhi kathentepi saṭṭhi bhikkhū arahattaṃ pattā, mahāmoggallāne kathentepi, asītimahātheresu kathentesupi pattā eva. Etampi anacchariyaṃ. Mahābhiññappattā hi te sāvakā.
ಅಪರಭಾಗೇ ಪನ ತಮ್ಬಪಣ್ಣಿದೀಪೇ ಮಾಲೇಯ್ಯದೇವತ್ಥೇರೋ ನಾಮ ಹೇಟ್ಠಾ ಲೋಹಪಾಸಾದೇ ಇದಂ ಸುತ್ತಂ ಕಥೇಸಿ। ತದಾಪಿ ಸಟ್ಠಿ ಭಿಕ್ಖೂ ಅರಹತ್ತಂ ಪತ್ತಾ। ಯಥಾ ಚ ಲೋಹಪಾಸಾದೇ, ಏವಂ ಥೇರೋ ಮಹಾಮಣ್ಡಪೇಪಿ ಇದಂ ಸುತ್ತಂ ಕಥೇಸಿ। ಮಹಾವಿಹಾರಾ ನಿಕ್ಖಮಿತ್ವಾ ಚೇತಿಯಪಬ್ಬತಂ ಗತೋ, ತತ್ಥಾಪಿ ಕಥೇಸಿ। ತತೋ ಸಾಕಿಯವಂಸವಿಹಾರೇ, ಕೂಟಾಲಿವಿಹಾರೇ, ಅನ್ತರಸೋಬ್ಭೇ, ಮುತ್ತಙ್ಗಣೇ, ವಾತಕಪಬ್ಬತೇ, ಪಾಚಿನಘರಕೇ, ದೀಘವಾಪಿಯಂ, ಲೋಕನ್ದರೇ, ನೋಮಣ್ಡಲತಲೇ ಕಥೇಸಿ। ತೇಸುಪಿ ಠಾನೇಸು ಸಟ್ಠಿ ಸಟ್ಠಿ ಭಿಕ್ಖೂ ಅರಹತ್ತಂ ಪತ್ತಾ। ತತೋ ನಿಕ್ಖಮಿತ್ವಾ ಪನ ಥೇರೋ ಚಿತ್ತಲಪಬ್ಬತಂ ಗತೋ। ತದಾ ಚ ಚಿತ್ತಲಪಬ್ಬತವಿಹಾರೇ ಅತಿರೇಕಸಟ್ಠಿವಸ್ಸೋ ಮಹಾಥೇರೋ, ಪೋಕ್ಖರಣಿಯಂ ಕುರುವಕತಿತ್ಥಂ ನಾಮ ಪಟಿಚ್ಛನ್ನಟ್ಠಾನಂ ಅತ್ಥಿ, ತತ್ಥ ಥೇರೋ ನ್ಹಾಯಿಸ್ಸಾಮೀತಿ ಓತಿಣ್ಣೋ। ದೇವತ್ಥೇರೋ ತಸ್ಸ ಸನ್ತಿಕಂ ಗನ್ತ್ವಾ ನ್ಹಾಪೇಮಿ, ಭನ್ತೇತಿ ಆಹ। ಥೇರೋ ಪಟಿಸನ್ಥಾರೇನೇವ – ‘‘ಮಾಲೇಯ್ಯದೇವೋ ನಾಮ ಅತ್ಥೀತಿ ವದನ್ತಿ, ಸೋ ಅಯಂ ಭವಿಸ್ಸತೀ’’ತಿ ಞತ್ವಾ ತ್ವಂ ದೇವೋತಿ ಆಹ। ಆಮ, ಭನ್ತೇತಿ। ಸಟ್ಠಿವಸ್ಸದ್ಧಾನಂ ಮೇ, ಆವುಸೋ, ಕೋಚಿ ಸರೀರಂ ಹತ್ಥೇನ ಫುಸಿತುಂ ನಾಮ ನ ಲಭಿ, ತ್ವಂ ಪನ ನ್ಹಾಪೇಹೀತಿ ಉತ್ತರಿತ್ವಾ ತೀರೇ ನಿಸೀದಿ।
Aparabhāge pana tambapaṇṇidīpe māleyyadevatthero nāma heṭṭhā lohapāsāde idaṃ suttaṃ kathesi. Tadāpi saṭṭhi bhikkhū arahattaṃ pattā. Yathā ca lohapāsāde, evaṃ thero mahāmaṇḍapepi idaṃ suttaṃ kathesi. Mahāvihārā nikkhamitvā cetiyapabbataṃ gato, tatthāpi kathesi. Tato sākiyavaṃsavihāre, kūṭālivihāre, antarasobbhe, muttaṅgaṇe, vātakapabbate, pācinagharake, dīghavāpiyaṃ, lokandare, nomaṇḍalatale kathesi. Tesupi ṭhānesu saṭṭhi saṭṭhi bhikkhū arahattaṃ pattā. Tato nikkhamitvā pana thero cittalapabbataṃ gato. Tadā ca cittalapabbatavihāre atirekasaṭṭhivasso mahāthero, pokkharaṇiyaṃ kuruvakatitthaṃ nāma paṭicchannaṭṭhānaṃ atthi, tattha thero nhāyissāmīti otiṇṇo. Devatthero tassa santikaṃ gantvā nhāpemi, bhanteti āha. Thero paṭisanthāreneva – ‘‘māleyyadevo nāma atthīti vadanti, so ayaṃ bhavissatī’’ti ñatvā tvaṃ devoti āha. Āma, bhanteti. Saṭṭhivassaddhānaṃ me, āvuso, koci sarīraṃ hatthena phusituṃ nāma na labhi, tvaṃ pana nhāpehīti uttaritvā tīre nisīdi.
ಥೇರೋ ಸಬ್ಬಮ್ಪಿ ಹತ್ಥಪಾದಾದಿಪರಿಕಮ್ಮಂ ಕತ್ವಾ ಮಹಾಥೇರಂ ನ್ಹಾಪೇಸಿ। ತಂ ದಿವಸಞ್ಚ ಧಮ್ಮಸ್ಸವನದಿವಸೋ ಹೋತಿ। ಅಥ ಮಹಾಥೇರೋ – ‘‘ದೇವ ಅಮ್ಹಾಕಂ ಧಮ್ಮದಾನಂ ದಾತುಂ ವಟ್ಟತೀ’’ತಿ ಆಹ। ಥೇರೋ ಸಾಧು, ಭನ್ತೇತಿ ಸಮ್ಪಟಿಚ್ಛಿ। ಅತ್ಥಙ್ಗತೇ ಸೂರಿಯೇ ಧಮ್ಮಸ್ಸವನಂ ಘೋಸೇಸುಂ। ಅತಿಕ್ಕನ್ತಸಟ್ಠಿವಸ್ಸಾವ ಸಟ್ಠಿ ಮಹಾಥೇರಾ ಧಮ್ಮಸ್ಸವನತ್ಥಂ ಅಗಮಂಸು। ದೇವತ್ಥೇರೋ ಸರಭಾಣಾವಸಾನೇ ಇಮಂ ಸುತ್ತಂ ಆರಭಿ, ಸುತ್ತನ್ತಪರಿಯೋಸಾನೇ ಚ ಸಟ್ಠಿ ಮಹಾಥೇರಾ ಅರಹತ್ತಂ ಪಾಪುಣಿಂಸು। ತತೋ ತಿಸ್ಸಮಹಾವಿಹಾರಂ ಗನ್ತ್ವಾ ಕಥೇಸಿ, ತಸ್ಮಿಮ್ಪಿ ಸಟ್ಠಿ ಥೇರಾ। ತತೋ ನಾಗಮಹಾವಿಹಾರೇ ಕಾಳಕಚ್ಛಗಾಮೇ ಕಥೇಸಿ, ತಸ್ಮಿಮ್ಪಿ ಸಟ್ಠಿ ಥೇರಾ। ತತೋ ಕಲ್ಯಾಣಿಂ ಗನ್ತ್ವಾ ತತ್ಥ ಚಾತುದ್ದಸೇ ಹೇಟ್ಠಾಪಾಸಾದೇ ಕಥೇಸಿ, ತಸ್ಮಿಮ್ಪಿ ಸಟ್ಠಿ ಥೇರಾ। ಉಪೋಸಥದಿವಸೇ ಉಪರಿಪಾಸಾದೇ ಕಥೇಸಿ, ತಸ್ಮಿಮ್ಪಿ ಸಟ್ಠಿ ಥೇರಾತಿ ಏವಂ ದೇವತ್ಥೇರೇಯೇವ ಇದಂ ಸುತ್ತಂ ಕಥೇನ್ತೇ ಸಟ್ಠಿಟ್ಠಾನೇಸು ಸಟ್ಠಿ ಸಟ್ಠಿ ಜನಾ ಅರಹತ್ತಂ ಪತ್ತಾ।
Thero sabbampi hatthapādādiparikammaṃ katvā mahātheraṃ nhāpesi. Taṃ divasañca dhammassavanadivaso hoti. Atha mahāthero – ‘‘deva amhākaṃ dhammadānaṃ dātuṃ vaṭṭatī’’ti āha. Thero sādhu, bhanteti sampaṭicchi. Atthaṅgate sūriye dhammassavanaṃ ghosesuṃ. Atikkantasaṭṭhivassāva saṭṭhi mahātherā dhammassavanatthaṃ agamaṃsu. Devatthero sarabhāṇāvasāne imaṃ suttaṃ ārabhi, suttantapariyosāne ca saṭṭhi mahātherā arahattaṃ pāpuṇiṃsu. Tato tissamahāvihāraṃ gantvā kathesi, tasmimpi saṭṭhi therā. Tato nāgamahāvihāre kāḷakacchagāme kathesi, tasmimpi saṭṭhi therā. Tato kalyāṇiṃ gantvā tattha cātuddase heṭṭhāpāsāde kathesi, tasmimpi saṭṭhi therā. Uposathadivase uparipāsāde kathesi, tasmimpi saṭṭhi therāti evaṃ devatthereyeva idaṃ suttaṃ kathente saṭṭhiṭṭhānesu saṭṭhi saṭṭhi janā arahattaṃ pattā.
ಅಮ್ಬಿಲಕಾಳಕವಿಹಾರೇ ಪನ ತಿಪಿಟಕಚೂಳನಾಗತ್ಥೇರೇ ಇಮಂ ಸುತ್ತಂ ಕಥೇನ್ತೇ ಮನುಸ್ಸಪರಿಸಾ ಗಾವುತಂ ಅಹೋಸಿ, ದೇವಪರಿಸಾ ಯೋಜನಿಕಾ। ಸುತ್ತಪರಿಯೋಸಾನೇ ಸಹಸ್ಸಭಿಕ್ಖೂ ಅರಹತ್ತಂ ಪತ್ತಾ, ದೇವೇಸು ಪನ ತತೋ ತತೋ ಏಕೇಕೋವ ಪುಥುಜ್ಜನೋ ಅಹೋಸೀತಿ।
Ambilakāḷakavihāre pana tipiṭakacūḷanāgatthere imaṃ suttaṃ kathente manussaparisā gāvutaṃ ahosi, devaparisā yojanikā. Suttapariyosāne sahassabhikkhū arahattaṃ pattā, devesu pana tato tato ekekova puthujjano ahosīti.
ಪಪಞ್ಚಸೂದನಿಯಾ ಮಜ್ಝಿಮನಿಕಾಯಟ್ಠಕಥಾಯ
Papañcasūdaniyā majjhimanikāyaṭṭhakathāya
ಛಛಕ್ಕಸುತ್ತವಣ್ಣನಾ ನಿಟ್ಠಿತಾ।
Chachakkasuttavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಮಜ್ಝಿಮನಿಕಾಯ • Majjhimanikāya / ೬. ಛಛಕ್ಕಸುತ್ತಂ • 6. Chachakkasuttaṃ
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಮಜ್ಝಿಮನಿಕಾಯ (ಟೀಕಾ) • Majjhimanikāya (ṭīkā) / ೬. ಛಛಕ್ಕಸುತ್ತವಣ್ಣನಾ • 6. Chachakkasuttavaṇṇanā
