| Library / Tipiṭaka / তিপিটক • Tipiṭaka / পঞ্চপকরণ-অট্ঠকথা • Pañcapakaraṇa-aṭṭhakathā |
৮. অট্ঠমৰগ্গো
8. Aṭṭhamavaggo
১. ছগতিকথাৰণ্ণনা
1. Chagatikathāvaṇṇanā
৫০৩-৫০৪. ইদানি ছগতিকথা নাম হোতি। তত্থ অসুরকাযেন সদ্ধিং ছগতিযোতি যেসং লদ্ধি, সেয্যথাপি অন্ধকানঞ্চেৰ উত্তরাপথকানঞ্চ; তে সন্ধায পুচ্ছা সকৰাদিস্স, পটিঞ্ঞা ইতরস্স। অথ নং সকৰাদী ‘‘পঞ্চ খো পনিমা, সারিপুত্ত, গতিযো’’তি (ম॰ নি॰ ১.১৫৩) লোমহংসনপরিযাযে পরিচ্ছিন্নানং গতীনং ৰসেন চোদেতুং ননু পঞ্চ গতিযোতিআদিমাহ। ইতরো সুত্তৰিরোধভযেন পটিজানাতি। কস্মা পন সকৰাদী ছ গতিযো ন সম্পটিচ্ছতি, ননু ‘‘চতূহাপাযেহি চ ৰিপ্পমুত্তো’’তি এত্থ অসুরকাযোপি গহিতোতি। সচ্চং গহিতো, ন পনেসা গতি। কস্মা? ৰিসুং অভাৰতো। অসুরকাযস্মিঞ্হি কালকঞ্চিকা অসুরা পেতগতিযা সঙ্গহিতা , ৰেপচিত্তিপরিসা দেৰগতিযা, অসুরকাযোতি ৰিসুং একা গতি নাম নত্থি।
503-504. Idāni chagatikathā nāma hoti. Tattha asurakāyena saddhiṃ chagatiyoti yesaṃ laddhi, seyyathāpi andhakānañceva uttarāpathakānañca; te sandhāya pucchā sakavādissa, paṭiññā itarassa. Atha naṃ sakavādī ‘‘pañca kho panimā, sāriputta, gatiyo’’ti (ma. ni. 1.153) lomahaṃsanapariyāye paricchinnānaṃ gatīnaṃ vasena codetuṃ nanu pañca gatiyotiādimāha. Itaro suttavirodhabhayena paṭijānāti. Kasmā pana sakavādī cha gatiyo na sampaṭicchati, nanu ‘‘catūhāpāyehi ca vippamutto’’ti ettha asurakāyopi gahitoti. Saccaṃ gahito, na panesā gati. Kasmā? Visuṃ abhāvato. Asurakāyasmiñhi kālakañcikā asurā petagatiyā saṅgahitā , vepacittiparisā devagatiyā, asurakāyoti visuṃ ekā gati nāma natthi.
ইদানি এতমেৰ অত্থং দস্সেতুং ননু কালকঞ্চিকাতিআদি আরদ্ধং। তত্থ সমানৰণ্ণাতি সদিসরূপসণ্ঠানা বীভচ্ছা ৰিরূপা দুদ্দস্সিকা। সমানভোগাতি সদিসমেথুনসমাচারা। সমানাহারাতি সদিসখেল়সিঙ্ঘাণিকপুব্বলোহিতাদিআহারা। সমানাযুকাতি সদিসআযুপরিচ্ছেদা। আৰাহৰিৰাহন্তি কঞ্ঞাগহণঞ্চেৰ কঞ্ঞাদানঞ্চ। সুক্কপক্খে সমানৰণ্ণাতি সদিসরূপসণ্ঠানা অভিরূপা পাসাদিকা দস্সনীযা পভাসম্পন্না। সমানভোগাতি সদিসপঞ্চকআমগুণভোগা। সমানাহারাতি সদিসসুধাভোজনাদিআহারা। সেসং ৰুত্তনযমেৰ। ননু অত্থি অসুরকাযোতি ইদং অসুরকাযস্সেৰ সাধকং। তস্স পন ৰিসুং গতিপরিচ্ছেদাভাৰেন ন গতিসাধকন্তি।
Idāni etameva atthaṃ dassetuṃ nanu kālakañcikātiādi āraddhaṃ. Tattha samānavaṇṇāti sadisarūpasaṇṭhānā bībhacchā virūpā duddassikā. Samānabhogāti sadisamethunasamācārā. Samānāhārāti sadisakheḷasiṅghāṇikapubbalohitādiāhārā. Samānāyukāti sadisaāyuparicchedā. Āvāhavivāhanti kaññāgahaṇañceva kaññādānañca. Sukkapakkhe samānavaṇṇāti sadisarūpasaṇṭhānā abhirūpā pāsādikā dassanīyā pabhāsampannā. Samānabhogāti sadisapañcakaāmaguṇabhogā. Samānāhārāti sadisasudhābhojanādiāhārā. Sesaṃ vuttanayameva. Nanu atthi asurakāyoti idaṃ asurakāyasseva sādhakaṃ. Tassa pana visuṃ gatiparicchedābhāvena na gatisādhakanti.
ছগতিকথাৰণ্ণনা।
Chagatikathāvaṇṇanā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / কথাৰত্থুপাল়ি • Kathāvatthupāḷi / (৭৩) ১. ছগতিকথা • (73) 1. Chagatikathā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ১. ছগতিকথাৰণ্ণনা • 1. Chagatikathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ১. ছগতিকথাৰণ্ণনা • 1. Chagatikathāvaṇṇanā
