| Library / Tipiṭaka / တိပိဋက • Tipiṭaka / ဓမ္မသင္ဂဏိ-အဋ္ဌကထာ • Dhammasaṅgaṇi-aṭṭhakathā |
ဆက္ကာဒိနိဒ္ဒေသဝဏ္ဏနာ
Chakkādiniddesavaṇṇanā
၉၇၂-၄. ဆဗ္ဗိဓာဒိသင္ဂဟာနံ တိဏ္ဏံ ဩသာနပဒသ္သ ဘေဒာဘာဝတော အာဒိတော ပဋ္ဌာယ အပုစ္ဆိတ္ဝာဝ နိဒ္ဒေသော ကတော။ တတ္ထ စက္ခုဝိညာဏေန ဇာနိတုံ သက္ကာတိ စက္ခုဝိညေယ္ယံ။ပေ.။ မနောဝိညာဏေန ဇာနိတုံ သက္ကာတိ မနောဝိညေယ္ယံ။ တိဝိဓာယ မနောဓာတုယာ ဇာနိတုံ သက္ကာတိ မနောဓာတုဝိညေယ္ယံ သဗ္ဗံ ရူပန္တိ ဧတ္ထ ယသ္မာ ဧကံ ရူပမ္ပိ မနောဝိညာဏဓာတုယာ အဇာနိတဗ္ဗံ နာမ နတ္ထိ, တသ္မာ ‘သဗ္ဗံ ရူပ’န္တိ ဝုတ္တံ။ သမ္မာသမ္ဗုဒ္ဓေန ဟိ အဘိဓမ္မံ ပတ္ဝာ နယံ ကာတုံ ယုတ္တဋ္ဌာနေ နယော အကတော နာမ နတ္ထိ။ ဣဒဉ္စ ဧကရူပသ္သာပိ မနောဝိညာဏဓာတုယာ အဇာနိတဗ္ဗသ္သ အဘာဝေန နယံ ကာတုံ ယုတ္တဋ္ဌာနံ နာမ, တသ္မာ နယံ ကရောန္တော ‘သဗ္ဗံ ရူပ’န္တိ အာဟ။
972-4. Chabbidhādisaṅgahānaṃ tiṇṇaṃ osānapadassa bhedābhāvato ādito paṭṭhāya apucchitvāva niddeso kato. Tattha cakkhuviññāṇena jānituṃ sakkāti cakkhuviññeyyaṃ…pe… manoviññāṇena jānituṃ sakkāti manoviññeyyaṃ. Tividhāya manodhātuyā jānituṃ sakkāti manodhātuviññeyyaṃ sabbaṃ rūpanti ettha yasmā ekaṃ rūpampi manoviññāṇadhātuyā ajānitabbaṃ nāma natthi, tasmā ‘sabbaṃ rūpa’nti vuttaṃ. Sammāsambuddhena hi abhidhammaṃ patvā nayaṃ kātuṃ yuttaṭṭhāne nayo akato nāma natthi. Idañca ekarūpassāpi manoviññāṇadhātuyā ajānitabbassa abhāvena nayaṃ kātuṃ yuttaṭṭhānaṃ nāma, tasmā nayaṃ karonto ‘sabbaṃ rūpa’nti āha.
၉၇၄. သုခသမ္ဖသ္သောတိ သုခဝေဒနာပဋိလာဘပစ္စယော။ ဒုက္ခသမ္ဖသ္သောတိ ဒုက္ခဝေဒနာပဋိလာဘပစ္စယော။ ဣဓာပိ ဖောဋ္ဌဗ္ဗာရမ္မဏသ္သ သုခဒုက္ခသ္သ သဗ္ဘာဝတော အယံ နယော ဒိန္နော။
974. Sukhasamphassoti sukhavedanāpaṭilābhapaccayo. Dukkhasamphassoti dukkhavedanāpaṭilābhapaccayo. Idhāpi phoṭṭhabbārammaṇassa sukhadukkhassa sabbhāvato ayaṃ nayo dinno.
Related texts:
တိပိဋက (မူလ) • Tipiṭaka (Mūla) / အဘိဓမ္မပိဋက • Abhidhammapiṭaka / ဓမ္မသင္ဂဏီပာဠိ • Dhammasaṅgaṇīpāḷi / ရူပဝိဘတ္တိ • Rūpavibhatti
