| Library / Tipiṭaka / ತಿಪಿಟಕ • Tipiṭaka / ಧಮ್ಮಸಙ್ಗಣಿ-ಅಟ್ಠಕಥಾ • Dhammasaṅgaṇi-aṭṭhakathā |
ಛಕ್ಕಾದಿನಿದ್ದೇಸವಣ್ಣನಾ
Chakkādiniddesavaṇṇanā
೯೭೨-೪. ಛಬ್ಬಿಧಾದಿಸಙ್ಗಹಾನಂ ತಿಣ್ಣಂ ಓಸಾನಪದಸ್ಸ ಭೇದಾಭಾವತೋ ಆದಿತೋ ಪಟ್ಠಾಯ ಅಪುಚ್ಛಿತ್ವಾವ ನಿದ್ದೇಸೋ ಕತೋ। ತತ್ಥ ಚಕ್ಖುವಿಞ್ಞಾಣೇನ ಜಾನಿತುಂ ಸಕ್ಕಾತಿ ಚಕ್ಖುವಿಞ್ಞೇಯ್ಯಂ…ಪೇ॰… ಮನೋವಿಞ್ಞಾಣೇನ ಜಾನಿತುಂ ಸಕ್ಕಾತಿ ಮನೋವಿಞ್ಞೇಯ್ಯಂ। ತಿವಿಧಾಯ ಮನೋಧಾತುಯಾ ಜಾನಿತುಂ ಸಕ್ಕಾತಿ ಮನೋಧಾತುವಿಞ್ಞೇಯ್ಯಂ ಸಬ್ಬಂ ರೂಪನ್ತಿ ಏತ್ಥ ಯಸ್ಮಾ ಏಕಂ ರೂಪಮ್ಪಿ ಮನೋವಿಞ್ಞಾಣಧಾತುಯಾ ಅಜಾನಿತಬ್ಬಂ ನಾಮ ನತ್ಥಿ, ತಸ್ಮಾ ‘ಸಬ್ಬಂ ರೂಪ’ನ್ತಿ ವುತ್ತಂ। ಸಮ್ಮಾಸಮ್ಬುದ್ಧೇನ ಹಿ ಅಭಿಧಮ್ಮಂ ಪತ್ವಾ ನಯಂ ಕಾತುಂ ಯುತ್ತಟ್ಠಾನೇ ನಯೋ ಅಕತೋ ನಾಮ ನತ್ಥಿ। ಇದಞ್ಚ ಏಕರೂಪಸ್ಸಾಪಿ ಮನೋವಿಞ್ಞಾಣಧಾತುಯಾ ಅಜಾನಿತಬ್ಬಸ್ಸ ಅಭಾವೇನ ನಯಂ ಕಾತುಂ ಯುತ್ತಟ್ಠಾನಂ ನಾಮ, ತಸ್ಮಾ ನಯಂ ಕರೋನ್ತೋ ‘ಸಬ್ಬಂ ರೂಪ’ನ್ತಿ ಆಹ।
972-4. Chabbidhādisaṅgahānaṃ tiṇṇaṃ osānapadassa bhedābhāvato ādito paṭṭhāya apucchitvāva niddeso kato. Tattha cakkhuviññāṇena jānituṃ sakkāti cakkhuviññeyyaṃ…pe… manoviññāṇena jānituṃ sakkāti manoviññeyyaṃ. Tividhāya manodhātuyā jānituṃ sakkāti manodhātuviññeyyaṃ sabbaṃ rūpanti ettha yasmā ekaṃ rūpampi manoviññāṇadhātuyā ajānitabbaṃ nāma natthi, tasmā ‘sabbaṃ rūpa’nti vuttaṃ. Sammāsambuddhena hi abhidhammaṃ patvā nayaṃ kātuṃ yuttaṭṭhāne nayo akato nāma natthi. Idañca ekarūpassāpi manoviññāṇadhātuyā ajānitabbassa abhāvena nayaṃ kātuṃ yuttaṭṭhānaṃ nāma, tasmā nayaṃ karonto ‘sabbaṃ rūpa’nti āha.
೯೭೪. ಸುಖಸಮ್ಫಸ್ಸೋತಿ ಸುಖವೇದನಾಪಟಿಲಾಭಪಚ್ಚಯೋ। ದುಕ್ಖಸಮ್ಫಸ್ಸೋತಿ ದುಕ್ಖವೇದನಾಪಟಿಲಾಭಪಚ್ಚಯೋ। ಇಧಾಪಿ ಫೋಟ್ಠಬ್ಬಾರಮ್ಮಣಸ್ಸ ಸುಖದುಕ್ಖಸ್ಸ ಸಬ್ಭಾವತೋ ಅಯಂ ನಯೋ ದಿನ್ನೋ।
974. Sukhasamphassoti sukhavedanāpaṭilābhapaccayo. Dukkhasamphassoti dukkhavedanāpaṭilābhapaccayo. Idhāpi phoṭṭhabbārammaṇassa sukhadukkhassa sabbhāvato ayaṃ nayo dinno.
Related texts:
ತಿಪಿಟಕ (ಮೂಲ) • Tipiṭaka (Mūla) / ಅಭಿಧಮ್ಮಪಿಟಕ • Abhidhammapiṭaka / ಧಮ್ಮಸಙ್ಗಣೀಪಾಳಿ • Dhammasaṅgaṇīpāḷi / ರೂಪವಿಭತ್ತಿ • Rūpavibhatti
