| Library / Tipiṭaka / திபிடக • Tipiṭaka / ஸம்மோஹவினோத³னீ-அட்ட²கதா² • Sammohavinodanī-aṭṭhakathā |
(6.) ச²க்கனித்³தே³ஸவண்ணனா
(6.) Chakkaniddesavaṇṇanā
944. ச²க்கனித்³தே³ஸே யஸ்மா குத்³தோ⁴ வா கோத⁴வஸேன, ஸந்தி³ட்டி²பராமாஸீ வா ஸந்தி³ட்டி²பராமாஸிதாய கலஹங் விக்³க³ஹங் விவாத³ங் ஆபஜ்ஜதி, தஸ்மா கோதா⁴த³யோ ‘விவாத³மூலானீ’தி வுத்தா.
944. Chakkaniddese yasmā kuddho vā kodhavasena, sandiṭṭhiparāmāsī vā sandiṭṭhiparāmāsitāya kalahaṃ viggahaṃ vivādaṃ āpajjati, tasmā kodhādayo ‘vivādamūlānī’ti vuttā.
ச²ந்த³ராக³னித்³தே³ஸே காமகே³ஹஸிதத்தா ச²ந்த³ராகா³ கே³ஹஸ்ஸிதா த⁴ம்மாதி ஸங்க³ஹதோ வத்வா புன பபே⁴த³தோ த³ஸ்ஸேதுங் மனாபியேஸு ரூபேஸூதிஆதி³ வுத்தங். தத்த² மனாபியேஸூதி மனவட்³ட⁴னகேஸு இட்டே²ஸு. விரோதா⁴ ஏவ விரோத⁴வத்தூ²னி. அமனாபியேஸூதி அனிட்டே²ஸு.
Chandarāganiddese kāmagehasitattā chandarāgā gehassitā dhammāti saṅgahato vatvā puna pabhedato dassetuṃ manāpiyesu rūpesūtiādi vuttaṃ. Tattha manāpiyesūti manavaḍḍhanakesu iṭṭhesu. Virodhā eva virodhavatthūni. Amanāpiyesūti aniṭṭhesu.
945. அகா³ரவேஸு அகா³ரவோதி கா³ரவவிரஹிதோ. அப்பதிஸ்ஸோதி அப்பதிஸ்ஸயோ அனீசவுத்தி. எத்த² பன யோ பி⁴க்கு² ஸத்த²ரி த⁴ரமானே தீஸு காலேஸு உபட்டா²னங் ந யாதி, ஸத்த²ரி அனுபாஹனே சங்கமந்தே ஸஉபாஹனோ சங்கமதி , நீசே சங்கமே சங்கமந்தே உச்சே சங்கமே சங்கமதி, ஹெட்டா² வஸந்தே உபரி வஸதி, ஸத்து²த³ஸ்ஸனட்டா²னே உபோ⁴ அங்ஸே பாருபதி, ச²த்தங் தா⁴ரேதி, உபாஹனங் தா⁴ரேதி, ந்ஹாயதி, உச்சாரங் வா பஸ்ஸாவங் வா கரோதி, பரினிப்³பு³தே வா பன சேதியங் வந்தி³துங் ந க³ச்ச²தி, சேதியஸ்ஸ பஞ்ஞாயனட்டா²னே ஸத்து²த³ஸ்ஸனட்டா²னே வுத்தங் ஸப்³ப³ங் கரோதி – அயங் ஸத்த²ரி அகா³ரவோ நாம. யோ பன த⁴ம்மஸவனே ஸங்கு⁴ட்டே² ஸக்கச்சங் ந க³ச்ச²தி, ஸக்கச்சங் த⁴ம்மங் ந ஸுணாதி, ஸமுல்லபந்தோ நிஸீத³தி, ந ஸக்கச்சங் க³ண்ஹாதி, ந ஸக்கச்சங் வாசேதி – ‘அயங் த⁴ம்மே அகா³ரவோ நாம. யோ பன தே²ரேன பி⁴க்கு²னா அனஜ்ஜி²ட்டோ² த⁴ம்மங் தே³ஸேதி, பஞ்ஹங் கதே²தி, வுட்³டே⁴ பி⁴க்கூ² க⁴ட்டெந்தோ க³ச்ச²தி, திட்ட²தி, நிஸீத³தி, து³ஸ்ஸபல்லத்தி²கங் வா ஹத்த²பல்லத்தி²கங் வா கரோதி, ஸங்க⁴மஜ்ஜே² உபோ⁴ அங்ஸே பாருபதி, ச²த்துபாஹனங் தா⁴ரேதி – அயங் ஸங்கே⁴ அகா³ரவோ நாம. ஏகபி⁴க்கு²ஸ்மிம்பி ஹி அகா³ரவே கதே ஸங்கே⁴ அகா³ரவோ கதோவ ஹோதி. திஸ்ஸோ ஸிக்கா² பன அபூரயமானோவ ஸிக்கா²ய அகா³ரவோ நாம. அப்பமாத³லக்க²ணங் அனநுப்³ரூஹயமானோ அப்பமாதே³ அகா³ரவோ நாம. து³வித⁴ங் படிஸந்தா²ரங் அகரொந்தோ படிஸந்தா²ரே அகா³ரவோ நாம.
945. Agāravesu agāravoti gāravavirahito. Appatissoti appatissayo anīcavutti. Ettha pana yo bhikkhu satthari dharamāne tīsu kālesu upaṭṭhānaṃ na yāti, satthari anupāhane caṅkamante saupāhano caṅkamati , nīce caṅkame caṅkamante ucce caṅkame caṅkamati, heṭṭhā vasante upari vasati, satthudassanaṭṭhāne ubho aṃse pārupati, chattaṃ dhāreti, upāhanaṃ dhāreti, nhāyati, uccāraṃ vā passāvaṃ vā karoti, parinibbute vā pana cetiyaṃ vandituṃ na gacchati, cetiyassa paññāyanaṭṭhāne satthudassanaṭṭhāne vuttaṃ sabbaṃ karoti – ayaṃ satthari agāravo nāma. Yo pana dhammasavane saṅghuṭṭhe sakkaccaṃ na gacchati, sakkaccaṃ dhammaṃ na suṇāti, samullapanto nisīdati, na sakkaccaṃ gaṇhāti, na sakkaccaṃ vāceti – ‘ayaṃ dhamme agāravo nāma. Yo pana therena bhikkhunā anajjhiṭṭho dhammaṃ deseti, pañhaṃ katheti, vuḍḍhe bhikkhū ghaṭṭento gacchati, tiṭṭhati, nisīdati, dussapallatthikaṃ vā hatthapallatthikaṃ vā karoti, saṅghamajjhe ubho aṃse pārupati, chattupāhanaṃ dhāreti – ayaṃ saṅghe agāravo nāma. Ekabhikkhusmimpi hi agārave kate saṅghe agāravo katova hoti. Tisso sikkhā pana apūrayamānova sikkhāya agāravo nāma. Appamādalakkhaṇaṃ ananubrūhayamāno appamāde agāravo nāma. Duvidhaṃ paṭisanthāraṃ akaronto paṭisanthāre agāravo nāma.
பரிஹானியா த⁴ம்மாதி பரிஹானகரா த⁴ம்மா. கம்மாராமதாதி நவகம்மே வா சீவரவிசாரணாதீ³ஸு வா கம்மேஸு அபி⁴ரதி யுத்தபயுத்ததா. ப⁴ஸ்ஸாராமதாதி திரச்சா²னகதா²வஸேன ப⁴ஸ்ஸே யுத்தபயுத்ததா. நித்³தா³ராமதாதி நித்³தா³ய யுத்தபயுத்ததா. ஸங்க³ணிகாராமதாதி ஸங்க³ணிகாய யுத்தபயுத்ததா. ஸங்ஸக்³கா³ராமதாதி ஸவனஸங்ஸக்³கே³, த³ஸ்ஸனஸங்ஸக்³கே³, ஸமுல்லாபஸங்ஸக்³கே³, பரிபோ⁴க³ஸங்ஸக்³கே³, காயஸங்ஸக்³கே³தி பஞ்சவிதே⁴ ஸங்ஸக்³கே³ யுத்தபயுத்ததா. பபஞ்சாராமதாதி தண்ஹாமானதி³ட்டி²பபஞ்சேஸு யுத்தபயுத்ததா.
Parihāniyā dhammāti parihānakarā dhammā. Kammārāmatāti navakamme vā cīvaravicāraṇādīsu vā kammesu abhirati yuttapayuttatā. Bhassārāmatāti tiracchānakathāvasena bhasse yuttapayuttatā. Niddārāmatāti niddāya yuttapayuttatā. Saṅgaṇikārāmatāti saṅgaṇikāya yuttapayuttatā. Saṃsaggārāmatāti savanasaṃsagge, dassanasaṃsagge, samullāpasaṃsagge, paribhogasaṃsagge, kāyasaṃsaggeti pañcavidhe saṃsagge yuttapayuttatā. Papañcārāmatāti taṇhāmānadiṭṭhipapañcesu yuttapayuttatā.
946. ஸோமனஸ்ஸுபவிசாராதீ³ஸு ஸோமனஸ்ஸேன ஸத்³தி⁴ங் உபவிசரந்தீதி ஸோமனஸ்ஸுபவிசாரா. சக்கு²னா ரூபங் தி³ஸ்வாதி சக்கு²விஞ்ஞாணேன ரூபங் பஸ்ஸித்வா. ஸோமனஸ்ஸட்டா²னியந்தி ஸோமனஸ்ஸஸ்ஸ ஆரம்மணவஸேன காரணபூ⁴தங். உபவிசரதீதி தத்த² விசாரப்பவத்தனேன உபவிசரதி. விதக்கோ பன தங்ஸம்பயுத்தோ வாதி இமினா நயேன தீஸுபி ச²க்கேஸு அத்தோ² வேதி³தப்³போ³.
946. Somanassupavicārādīsu somanassena saddhiṃ upavicarantīti somanassupavicārā. Cakkhunā rūpaṃ disvāti cakkhuviññāṇena rūpaṃ passitvā. Somanassaṭṭhāniyanti somanassassa ārammaṇavasena kāraṇabhūtaṃ. Upavicaratīti tattha vicārappavattanena upavicarati. Vitakko pana taṃsampayutto vāti iminā nayena tīsupi chakkesu attho veditabbo.
947. கே³ஹஸிதானீதி காமகு³ணனிஸ்ஸிதானி. ஸோமனஸ்ஸானீதி சேதஸிகஸுகா²னி. தோ³மனஸ்ஸானீதி சேதஸிகது³க்கா²னி. உபெக்கா²தி அஞ்ஞாணஸம்பயுத்தா உபெக்கா² வேத³னா, அஞ்ஞாணுபெக்கா²திபி ஏதாஸங்யேவ நாமங்.
947. Gehasitānīti kāmaguṇanissitāni. Somanassānīti cetasikasukhāni. Domanassānīti cetasikadukkhāni. Upekkhāti aññāṇasampayuttā upekkhā vedanā, aññāṇupekkhātipi etāsaṃyeva nāmaṃ.
948. அத்தி² மே அத்தாதி வாதி ஸப்³ப³பதே³ஸு வா-ஸத்³தோ³ விகப்பத்தோ²; ஏவங் வா தி³ட்டி² உப்பஜ்ஜதீதி வுத்தங் ஹோதி. அத்தி² மே அத்தாதி செத்த² ஸஸ்ஸததி³ட்டி² ஸப்³ப³காலேஸு அத்தனோ அத்தி²தங் க³ண்ஹாதி. ஸச்சதோ தே²ததோதி பூ⁴ததோ ச தி²ரதோ ச; இத³ங் ஸச்சந்தி ஸுட்டு² த³ள்ஹபா⁴வேனாதி வுத்தங் ஹோதி. நத்தி² மே அத்தாதி அயங் பன உச்சே²த³தி³ட்டி², ஸதோ ஸத்தஸ்ஸ தத்த² தத்த² விப⁴வக்³க³ஹணதோ. அத² வா புரிமாபி தீஸு காலேஸு அத்தீ²தி க³ஹணதோ ஸஸ்ஸததி³ட்டி², பச்சுப்பன்னமேவ அத்தீ²தி க³ண்ஹந்தீ உச்சே²த³தி³ட்டி². பச்சி²மாபி அதீதானாக³தேஸு நத்தீ²தி க³ஹணதோ ‘ப⁴ஸ்மந்தா ஆஹுதியோ’தி க³ஹிததி³ட்டி²கானங் விய உச்சே²த³தி³ட்டி², அதீதேயேவ நத்தீ²தி க³ண்ஹந்தீ அதி⁴ச்சஸமுப்பன்னிகஸ்ஸேவ ஸஸ்ஸததி³ட்டி². அத்தனா வா அத்தானங் ஸஞ்ஜானாமீதி ஸஞ்ஞாக்க²ந்த⁴ஸீஸேன க²ந்தே⁴ அத்தாதி க³ஹெத்வா ஸஞ்ஞாய அவஸேஸக்க²ந்தே⁴ ஸஞ்ஜானநதோ ‘இமினா அத்தனா இமங் அத்தானங் ஸஞ்ஜானாமீ’தி ஏவங் ஹோதி. அத்தனா வா அனத்தானந்தி ஸஞ்ஞாக்க²ந்த⁴ங்யேவ அத்தாதி க³ஹெத்வா இதரே சத்தாரோ க²ந்தே⁴ அனத்தாதி க³ஹெத்வா ஸஞ்ஞாய தேஸங் ஜானநதோ ஏவங் ஹோதி. அனத்தனா வா அத்தானந்தி ஸஞ்ஞாக்க²ந்த⁴ங் அனத்தாதி இதரே ச சத்தாரோ க²ந்தே⁴ அத்தாதி க³ஹெத்வா ஸஞ்ஞாய தேஸங் ஜானநதோ ஏவங் ஹோதி. ஸப்³பா³பி ஸஸ்ஸதுச்சே²த³தி³ட்டி²யோவ.
948. Atthi me attāti vāti sabbapadesu vā-saddo vikappattho; evaṃ vā diṭṭhi uppajjatīti vuttaṃ hoti. Atthi me attāti cettha sassatadiṭṭhi sabbakālesu attano atthitaṃ gaṇhāti. Saccato thetatoti bhūtato ca thirato ca; idaṃ saccanti suṭṭhu daḷhabhāvenāti vuttaṃ hoti. Natthi me attāti ayaṃ pana ucchedadiṭṭhi, sato sattassa tattha tattha vibhavaggahaṇato. Atha vā purimāpi tīsu kālesu atthīti gahaṇato sassatadiṭṭhi, paccuppannameva atthīti gaṇhantī ucchedadiṭṭhi. Pacchimāpi atītānāgatesu natthīti gahaṇato ‘bhasmantā āhutiyo’ti gahitadiṭṭhikānaṃ viya ucchedadiṭṭhi, atīteyeva natthīti gaṇhantī adhiccasamuppannikasseva sassatadiṭṭhi. Attanā vā attānaṃ sañjānāmīti saññākkhandhasīsena khandhe attāti gahetvā saññāya avasesakkhandhe sañjānanato ‘iminā attanā imaṃ attānaṃ sañjānāmī’ti evaṃ hoti. Attanā vā anattānanti saññākkhandhaṃyeva attāti gahetvā itare cattāro khandhe anattāti gahetvā saññāya tesaṃ jānanato evaṃ hoti. Anattanā vā attānanti saññākkhandhaṃ anattāti itare ca cattāro khandhe attāti gahetvā saññāya tesaṃ jānanato evaṃ hoti. Sabbāpi sassatucchedadiṭṭhiyova.
வதோ³ வேதெ³ய்யோதி ஆத³யோ பன ஸஸ்ஸததி³ட்டி²யா ஏவ அபி⁴னிவேஸாகாரா. தத்த² வத³தீதி வதோ³; வசீகம்மஸ்ஸ காரகோதி வுத்தங் ஹோதி. வேத³யதீதி வேதெ³ய்யோ; ஜானாதி அனுப⁴வதி சாதி வுத்தங் ஹோதி. இதா³னி யங் ஸோ வேதே³தி தங் த³ஸ்ஸேதுங் தத்ர தத்ர தீ³க⁴ரத்தங் கல்யாணபாபகானந்திஆதி³ வுத்தங். தத்த² தத்ர தத்ராதி தேஸு தேஸு யோனிக³திடி²தினிவாஸனிகாயேஸு ஆரம்மணேஸு வா. தீ³க⁴ரத்தந்தி சிரரத்தங். பச்சனுபோ⁴தீதி படிஸங்வேத³யதி. ந ஸோ ஜாதோ நாஹோஸீதி ஸோ அத்தா அஜாதித⁴ம்மதோ ந ஜாதோ நாம; ஸதா³ விஜ்ஜமானோ யேவாதி அத்தோ². தேனேவ அதீதே நாஹோஸி, அனாக³தேபி ந ப⁴விஸ்ஸதி. யோ ஹி ஜாதோ ஸோ அஹோஸி, யோ ச ஜாயிஸ்ஸதி ஸோ ப⁴விஸ்ஸதீதி. அத²வா ‘ந ஸோ ஜாதோ நாஹோஸீ’தி ஸோ ஸதா³ விஜ்ஜமானத்தா அதீதேபி ந ஜாது நாஹோஸி , அனாக³தேபி ந ஜாது ந ப⁴விஸ்ஸதி. நிச்சோதி உப்பாத³வயரஹிதோ. து⁴வோதி தி²ரோ ஸாரபூ⁴தோ. ஸஸ்ஸதோதி ஸப்³ப³காலிகோ. அவிபரிணாமத⁴ம்மோதி அத்தனோ பகதிபா⁴வங் அவிஜஹனத⁴ம்மோ ககண்டகோ விய நானப்பகாரத்தங் நாபஜ்ஜதி. ஏவமயங் ஸப்³பா³ஸவதி³ட்டி² (ம॰ நி॰ 1.17 ஆத³யோ) நாம கதி²தா. ஸேஸங் ஸப்³ப³த்த² உத்தானத்த²மேவாதி.
Vado vedeyyoti ādayo pana sassatadiṭṭhiyā eva abhinivesākārā. Tattha vadatīti vado; vacīkammassa kārakoti vuttaṃ hoti. Vedayatīti vedeyyo; jānāti anubhavati cāti vuttaṃ hoti. Idāni yaṃ so vedeti taṃ dassetuṃ tatra tatra dīgharattaṃ kalyāṇapāpakānantiādi vuttaṃ. Tattha tatra tatrāti tesu tesu yonigatiṭhitinivāsanikāyesu ārammaṇesu vā. Dīgharattanti cirarattaṃ. Paccanubhotīti paṭisaṃvedayati. Na so jāto nāhosīti so attā ajātidhammato na jāto nāma; sadā vijjamāno yevāti attho. Teneva atīte nāhosi, anāgatepi na bhavissati. Yo hi jāto so ahosi, yo ca jāyissati so bhavissatīti. Athavā ‘na so jāto nāhosī’ti so sadā vijjamānattā atītepi na jātu nāhosi , anāgatepi na jātu na bhavissati. Niccoti uppādavayarahito. Dhuvoti thiro sārabhūto. Sassatoti sabbakāliko. Avipariṇāmadhammoti attano pakatibhāvaṃ avijahanadhammo kakaṇṭako viya nānappakārattaṃ nāpajjati. Evamayaṃ sabbāsavadiṭṭhi (ma. ni. 1.17 ādayo) nāma kathitā. Sesaṃ sabbattha uttānatthamevāti.
ச²க்கனித்³தே³ஸவண்ணனா.
Chakkaniddesavaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / விப⁴ங்க³பாளி • Vibhaṅgapāḷi / 17. கு²த்³த³கவத்து²விப⁴ங்கோ³ • 17. Khuddakavatthuvibhaṅgo
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / விப⁴ங்க³-மூலடீகா • Vibhaṅga-mūlaṭīkā / 17. கு²த்³த³கவத்து²விப⁴ங்கோ³ • 17. Khuddakavatthuvibhaṅgo
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / விப⁴ங்க³-அனுடீகா • Vibhaṅga-anuṭīkā / 17. கு²த்³த³கவத்து²விப⁴ங்கோ³ • 17. Khuddakavatthuvibhaṅgo
