| Library / Tipiṭaka / ਤਿਪਿਟਕ • Tipiṭaka / ਸਮ੍ਮੋਹવਿਨੋਦਨੀ-ਅਟ੍ਠਕਥਾ • Sammohavinodanī-aṭṭhakathā |
(੬.) ਛਕ੍ਕਨਿਦ੍ਦੇਸવਣ੍ਣਨਾ
(6.) Chakkaniddesavaṇṇanā
੯੪੪. ਛਕ੍ਕਨਿਦ੍ਦੇਸੇ ਯਸ੍ਮਾ ਕੁਦ੍ਧੋ વਾ ਕੋਧવਸੇਨ, ਸਨ੍ਦਿਟ੍ਠਿਪਰਾਮਾਸੀ વਾ ਸਨ੍ਦਿਟ੍ਠਿਪਰਾਮਾਸਿਤਾਯ ਕਲਹਂ વਿਗ੍ਗਹਂ વਿવਾਦਂ ਆਪਜ੍ਜਤਿ, ਤਸ੍ਮਾ ਕੋਧਾਦਯੋ ‘વਿવਾਦਮੂਲਾਨੀ’ਤਿ વੁਤ੍ਤਾ।
944. Chakkaniddese yasmā kuddho vā kodhavasena, sandiṭṭhiparāmāsī vā sandiṭṭhiparāmāsitāya kalahaṃ viggahaṃ vivādaṃ āpajjati, tasmā kodhādayo ‘vivādamūlānī’ti vuttā.
ਛਨ੍ਦਰਾਗਨਿਦ੍ਦੇਸੇ ਕਾਮਗੇਹਸਿਤਤ੍ਤਾ ਛਨ੍ਦਰਾਗਾ ਗੇਹਸ੍ਸਿਤਾ ਧਮ੍ਮਾਤਿ ਸਙ੍ਗਹਤੋ વਤ੍વਾ ਪੁਨ ਪਭੇਦਤੋ ਦਸ੍ਸੇਤੁਂ ਮਨਾਪਿਯੇਸੁ ਰੂਪੇਸੂਤਿਆਦਿ વੁਤ੍ਤਂ। ਤਤ੍ਥ ਮਨਾਪਿਯੇਸੂਤਿ ਮਨવਡ੍ਢਨਕੇਸੁ ਇਟ੍ਠੇਸੁ। વਿਰੋਧਾ ਏવ વਿਰੋਧવਤ੍ਥੂਨਿ। ਅਮਨਾਪਿਯੇਸੂਤਿ ਅਨਿਟ੍ਠੇਸੁ।
Chandarāganiddese kāmagehasitattā chandarāgā gehassitā dhammāti saṅgahato vatvā puna pabhedato dassetuṃ manāpiyesu rūpesūtiādi vuttaṃ. Tattha manāpiyesūti manavaḍḍhanakesu iṭṭhesu. Virodhā eva virodhavatthūni. Amanāpiyesūti aniṭṭhesu.
੯੪੫. ਅਗਾਰવੇਸੁ ਅਗਾਰવੋਤਿ ਗਾਰવવਿਰਹਿਤੋ। ਅਪ੍ਪਤਿਸ੍ਸੋਤਿ ਅਪ੍ਪਤਿਸ੍ਸਯੋ ਅਨੀਚવੁਤ੍ਤਿ। ਏਤ੍ਥ ਪਨ ਯੋ ਭਿਕ੍ਖੁ ਸਤ੍ਥਰਿ ਧਰਮਾਨੇ ਤੀਸੁ ਕਾਲੇਸੁ ਉਪਟ੍ਠਾਨਂ ਨ ਯਾਤਿ, ਸਤ੍ਥਰਿ ਅਨੁਪਾਹਨੇ ਚਙ੍ਕਮਨ੍ਤੇ ਸਉਪਾਹਨੋ ਚਙ੍ਕਮਤਿ , ਨੀਚੇ ਚਙ੍ਕਮੇ ਚਙ੍ਕਮਨ੍ਤੇ ਉਚ੍ਚੇ ਚਙ੍ਕਮੇ ਚਙ੍ਕਮਤਿ, ਹੇਟ੍ਠਾ વਸਨ੍ਤੇ ਉਪਰਿ વਸਤਿ, ਸਤ੍ਥੁਦਸ੍ਸਨਟ੍ਠਾਨੇ ਉਭੋ ਅਂਸੇ ਪਾਰੁਪਤਿ, ਛਤ੍ਤਂ ਧਾਰੇਤਿ, ਉਪਾਹਨਂ ਧਾਰੇਤਿ, ਨ੍ਹਾਯਤਿ, ਉਚ੍ਚਾਰਂ વਾ ਪਸ੍ਸਾવਂ વਾ ਕਰੋਤਿ, ਪਰਿਨਿਬ੍ਬੁਤੇ વਾ ਪਨ ਚੇਤਿਯਂ વਨ੍ਦਿਤੁਂ ਨ ਗਚ੍ਛਤਿ, ਚੇਤਿਯਸ੍ਸ ਪਞ੍ਞਾਯਨਟ੍ਠਾਨੇ ਸਤ੍ਥੁਦਸ੍ਸਨਟ੍ਠਾਨੇ વੁਤ੍ਤਂ ਸਬ੍ਬਂ ਕਰੋਤਿ – ਅਯਂ ਸਤ੍ਥਰਿ ਅਗਾਰવੋ ਨਾਮ। ਯੋ ਪਨ ਧਮ੍ਮਸવਨੇ ਸਙ੍ਘੁਟ੍ਠੇ ਸਕ੍ਕਚ੍ਚਂ ਨ ਗਚ੍ਛਤਿ, ਸਕ੍ਕਚ੍ਚਂ ਧਮ੍ਮਂ ਨ ਸੁਣਾਤਿ, ਸਮੁਲ੍ਲਪਨ੍ਤੋ ਨਿਸੀਦਤਿ, ਨ ਸਕ੍ਕਚ੍ਚਂ ਗਣ੍ਹਾਤਿ, ਨ ਸਕ੍ਕਚ੍ਚਂ વਾਚੇਤਿ – ‘ਅਯਂ ਧਮ੍ਮੇ ਅਗਾਰવੋ ਨਾਮ। ਯੋ ਪਨ ਥੇਰੇਨ ਭਿਕ੍ਖੁਨਾ ਅਨਜ੍ਝਿਟ੍ਠੋ ਧਮ੍ਮਂ ਦੇਸੇਤਿ, ਪਞ੍ਹਂ ਕਥੇਤਿ, વੁਡ੍ਢੇ ਭਿਕ੍ਖੂ ਘਟ੍ਟੇਨ੍ਤੋ ਗਚ੍ਛਤਿ, ਤਿਟ੍ਠਤਿ, ਨਿਸੀਦਤਿ, ਦੁਸ੍ਸਪਲ੍ਲਤ੍ਥਿਕਂ વਾ ਹਤ੍ਥਪਲ੍ਲਤ੍ਥਿਕਂ વਾ ਕਰੋਤਿ, ਸਙ੍ਘਮਜ੍ਝੇ ਉਭੋ ਅਂਸੇ ਪਾਰੁਪਤਿ, ਛਤ੍ਤੁਪਾਹਨਂ ਧਾਰੇਤਿ – ਅਯਂ ਸਙ੍ਘੇ ਅਗਾਰવੋ ਨਾਮ। ਏਕਭਿਕ੍ਖੁਸ੍ਮਿਮ੍ਪਿ ਹਿ ਅਗਾਰવੇ ਕਤੇ ਸਙ੍ਘੇ ਅਗਾਰવੋ ਕਤੋવ ਹੋਤਿ। ਤਿਸ੍ਸੋ ਸਿਕ੍ਖਾ ਪਨ ਅਪੂਰਯਮਾਨੋવ ਸਿਕ੍ਖਾਯ ਅਗਾਰવੋ ਨਾਮ। ਅਪ੍ਪਮਾਦਲਕ੍ਖਣਂ ਅਨਨੁਬ੍ਰੂਹਯਮਾਨੋ ਅਪ੍ਪਮਾਦੇ ਅਗਾਰવੋ ਨਾਮ। ਦੁવਿਧਂ ਪਟਿਸਨ੍ਥਾਰਂ ਅਕਰੋਨ੍ਤੋ ਪਟਿਸਨ੍ਥਾਰੇ ਅਗਾਰવੋ ਨਾਮ।
945. Agāravesu agāravoti gāravavirahito. Appatissoti appatissayo anīcavutti. Ettha pana yo bhikkhu satthari dharamāne tīsu kālesu upaṭṭhānaṃ na yāti, satthari anupāhane caṅkamante saupāhano caṅkamati , nīce caṅkame caṅkamante ucce caṅkame caṅkamati, heṭṭhā vasante upari vasati, satthudassanaṭṭhāne ubho aṃse pārupati, chattaṃ dhāreti, upāhanaṃ dhāreti, nhāyati, uccāraṃ vā passāvaṃ vā karoti, parinibbute vā pana cetiyaṃ vandituṃ na gacchati, cetiyassa paññāyanaṭṭhāne satthudassanaṭṭhāne vuttaṃ sabbaṃ karoti – ayaṃ satthari agāravo nāma. Yo pana dhammasavane saṅghuṭṭhe sakkaccaṃ na gacchati, sakkaccaṃ dhammaṃ na suṇāti, samullapanto nisīdati, na sakkaccaṃ gaṇhāti, na sakkaccaṃ vāceti – ‘ayaṃ dhamme agāravo nāma. Yo pana therena bhikkhunā anajjhiṭṭho dhammaṃ deseti, pañhaṃ katheti, vuḍḍhe bhikkhū ghaṭṭento gacchati, tiṭṭhati, nisīdati, dussapallatthikaṃ vā hatthapallatthikaṃ vā karoti, saṅghamajjhe ubho aṃse pārupati, chattupāhanaṃ dhāreti – ayaṃ saṅghe agāravo nāma. Ekabhikkhusmimpi hi agārave kate saṅghe agāravo katova hoti. Tisso sikkhā pana apūrayamānova sikkhāya agāravo nāma. Appamādalakkhaṇaṃ ananubrūhayamāno appamāde agāravo nāma. Duvidhaṃ paṭisanthāraṃ akaronto paṭisanthāre agāravo nāma.
ਪਰਿਹਾਨਿਯਾ ਧਮ੍ਮਾਤਿ ਪਰਿਹਾਨਕਰਾ ਧਮ੍ਮਾ। ਕਮ੍ਮਾਰਾਮਤਾਤਿ ਨવਕਮ੍ਮੇ વਾ ਚੀવਰવਿਚਾਰਣਾਦੀਸੁ વਾ ਕਮ੍ਮੇਸੁ ਅਭਿਰਤਿ ਯੁਤ੍ਤਪਯੁਤ੍ਤਤਾ। ਭਸ੍ਸਾਰਾਮਤਾਤਿ ਤਿਰਚ੍ਛਾਨਕਥਾવਸੇਨ ਭਸ੍ਸੇ ਯੁਤ੍ਤਪਯੁਤ੍ਤਤਾ। ਨਿਦ੍ਦਾਰਾਮਤਾਤਿ ਨਿਦ੍ਦਾਯ ਯੁਤ੍ਤਪਯੁਤ੍ਤਤਾ। ਸਙ੍ਗਣਿਕਾਰਾਮਤਾਤਿ ਸਙ੍ਗਣਿਕਾਯ ਯੁਤ੍ਤਪਯੁਤ੍ਤਤਾ। ਸਂਸਗ੍ਗਾਰਾਮਤਾਤਿ ਸવਨਸਂਸਗ੍ਗੇ, ਦਸ੍ਸਨਸਂਸਗ੍ਗੇ, ਸਮੁਲ੍ਲਾਪਸਂਸਗ੍ਗੇ, ਪਰਿਭੋਗਸਂਸਗ੍ਗੇ, ਕਾਯਸਂਸਗ੍ਗੇਤਿ ਪਞ੍ਚવਿਧੇ ਸਂਸਗ੍ਗੇ ਯੁਤ੍ਤਪਯੁਤ੍ਤਤਾ। ਪਪਞ੍ਚਾਰਾਮਤਾਤਿ ਤਣ੍ਹਾਮਾਨਦਿਟ੍ਠਿਪਪਞ੍ਚੇਸੁ ਯੁਤ੍ਤਪਯੁਤ੍ਤਤਾ।
Parihāniyā dhammāti parihānakarā dhammā. Kammārāmatāti navakamme vā cīvaravicāraṇādīsu vā kammesu abhirati yuttapayuttatā. Bhassārāmatāti tiracchānakathāvasena bhasse yuttapayuttatā. Niddārāmatāti niddāya yuttapayuttatā. Saṅgaṇikārāmatāti saṅgaṇikāya yuttapayuttatā. Saṃsaggārāmatāti savanasaṃsagge, dassanasaṃsagge, samullāpasaṃsagge, paribhogasaṃsagge, kāyasaṃsaggeti pañcavidhe saṃsagge yuttapayuttatā. Papañcārāmatāti taṇhāmānadiṭṭhipapañcesu yuttapayuttatā.
੯੪੬. ਸੋਮਨਸ੍ਸੁਪવਿਚਾਰਾਦੀਸੁ ਸੋਮਨਸ੍ਸੇਨ ਸਦ੍ਧਿਂ ਉਪવਿਚਰਨ੍ਤੀਤਿ ਸੋਮਨਸ੍ਸੁਪવਿਚਾਰਾ। ਚਕ੍ਖੁਨਾ ਰੂਪਂ ਦਿਸ੍વਾਤਿ ਚਕ੍ਖੁવਿਞ੍ਞਾਣੇਨ ਰੂਪਂ ਪਸ੍ਸਿਤ੍વਾ। ਸੋਮਨਸ੍ਸਟ੍ਠਾਨਿਯਨ੍ਤਿ ਸੋਮਨਸ੍ਸਸ੍ਸ ਆਰਮ੍ਮਣવਸੇਨ ਕਾਰਣਭੂਤਂ। ਉਪવਿਚਰਤੀਤਿ ਤਤ੍ਥ વਿਚਾਰਪ੍ਪવਤ੍ਤਨੇਨ ਉਪવਿਚਰਤਿ। વਿਤਕ੍ਕੋ ਪਨ ਤਂਸਮ੍ਪਯੁਤ੍ਤੋ વਾਤਿ ਇਮਿਨਾ ਨਯੇਨ ਤੀਸੁਪਿ ਛਕ੍ਕੇਸੁ ਅਤ੍ਥੋ વੇਦਿਤਬ੍ਬੋ।
946. Somanassupavicārādīsu somanassena saddhiṃ upavicarantīti somanassupavicārā. Cakkhunā rūpaṃ disvāti cakkhuviññāṇena rūpaṃ passitvā. Somanassaṭṭhāniyanti somanassassa ārammaṇavasena kāraṇabhūtaṃ. Upavicaratīti tattha vicārappavattanena upavicarati. Vitakko pana taṃsampayutto vāti iminā nayena tīsupi chakkesu attho veditabbo.
੯੪੭. ਗੇਹਸਿਤਾਨੀਤਿ ਕਾਮਗੁਣਨਿਸ੍ਸਿਤਾਨਿ। ਸੋਮਨਸ੍ਸਾਨੀਤਿ ਚੇਤਸਿਕਸੁਖਾਨਿ। ਦੋਮਨਸ੍ਸਾਨੀਤਿ ਚੇਤਸਿਕਦੁਕ੍ਖਾਨਿ। ਉਪੇਕ੍ਖਾਤਿ ਅਞ੍ਞਾਣਸਮ੍ਪਯੁਤ੍ਤਾ ਉਪੇਕ੍ਖਾ વੇਦਨਾ, ਅਞ੍ਞਾਣੁਪੇਕ੍ਖਾਤਿਪਿ ਏਤਾਸਂਯੇવ ਨਾਮਂ।
947. Gehasitānīti kāmaguṇanissitāni. Somanassānīti cetasikasukhāni. Domanassānīti cetasikadukkhāni. Upekkhāti aññāṇasampayuttā upekkhā vedanā, aññāṇupekkhātipi etāsaṃyeva nāmaṃ.
੯੪੮. ਅਤ੍ਥਿ ਮੇ ਅਤ੍ਤਾਤਿ વਾਤਿ ਸਬ੍ਬਪਦੇਸੁ વਾ-ਸਦ੍ਦੋ વਿਕਪ੍ਪਤ੍ਥੋ; ਏવਂ વਾ ਦਿਟ੍ਠਿ ਉਪ੍ਪਜ੍ਜਤੀਤਿ વੁਤ੍ਤਂ ਹੋਤਿ। ਅਤ੍ਥਿ ਮੇ ਅਤ੍ਤਾਤਿ ਚੇਤ੍ਥ ਸਸ੍ਸਤਦਿਟ੍ਠਿ ਸਬ੍ਬਕਾਲੇਸੁ ਅਤ੍ਤਨੋ ਅਤ੍ਥਿਤਂ ਗਣ੍ਹਾਤਿ। ਸਚ੍ਚਤੋ ਥੇਤਤੋਤਿ ਭੂਤਤੋ ਚ ਥਿਰਤੋ ਚ; ਇਦਂ ਸਚ੍ਚਨ੍ਤਿ ਸੁਟ੍ਠੁ ਦਲ਼੍ਹਭਾવੇਨਾਤਿ વੁਤ੍ਤਂ ਹੋਤਿ। ਨਤ੍ਥਿ ਮੇ ਅਤ੍ਤਾਤਿ ਅਯਂ ਪਨ ਉਚ੍ਛੇਦਦਿਟ੍ਠਿ, ਸਤੋ ਸਤ੍ਤਸ੍ਸ ਤਤ੍ਥ ਤਤ੍ਥ વਿਭવਗ੍ਗਹਣਤੋ। ਅਥ વਾ ਪੁਰਿਮਾਪਿ ਤੀਸੁ ਕਾਲੇਸੁ ਅਤ੍ਥੀਤਿ ਗਹਣਤੋ ਸਸ੍ਸਤਦਿਟ੍ਠਿ, ਪਚ੍ਚੁਪ੍ਪਨ੍ਨਮੇવ ਅਤ੍ਥੀਤਿ ਗਣ੍ਹਨ੍ਤੀ ਉਚ੍ਛੇਦਦਿਟ੍ਠਿ। ਪਚ੍ਛਿਮਾਪਿ ਅਤੀਤਾਨਾਗਤੇਸੁ ਨਤ੍ਥੀਤਿ ਗਹਣਤੋ ‘ਭਸ੍ਮਨ੍ਤਾ ਆਹੁਤਿਯੋ’ਤਿ ਗਹਿਤਦਿਟ੍ਠਿਕਾਨਂ વਿਯ ਉਚ੍ਛੇਦਦਿਟ੍ਠਿ, ਅਤੀਤੇਯੇવ ਨਤ੍ਥੀਤਿ ਗਣ੍ਹਨ੍ਤੀ ਅਧਿਚ੍ਚਸਮੁਪ੍ਪਨ੍ਨਿਕਸ੍ਸੇવ ਸਸ੍ਸਤਦਿਟ੍ਠਿ। ਅਤ੍ਤਨਾ વਾ ਅਤ੍ਤਾਨਂ ਸਞ੍ਜਾਨਾਮੀਤਿ ਸਞ੍ਞਾਕ੍ਖਨ੍ਧਸੀਸੇਨ ਖਨ੍ਧੇ ਅਤ੍ਤਾਤਿ ਗਹੇਤ੍વਾ ਸਞ੍ਞਾਯ ਅવਸੇਸਕ੍ਖਨ੍ਧੇ ਸਞ੍ਜਾਨਨਤੋ ‘ਇਮਿਨਾ ਅਤ੍ਤਨਾ ਇਮਂ ਅਤ੍ਤਾਨਂ ਸਞ੍ਜਾਨਾਮੀ’ਤਿ ਏવਂ ਹੋਤਿ। ਅਤ੍ਤਨਾ વਾ ਅਨਤ੍ਤਾਨਨ੍ਤਿ ਸਞ੍ਞਾਕ੍ਖਨ੍ਧਂਯੇવ ਅਤ੍ਤਾਤਿ ਗਹੇਤ੍વਾ ਇਤਰੇ ਚਤ੍ਤਾਰੋ ਖਨ੍ਧੇ ਅਨਤ੍ਤਾਤਿ ਗਹੇਤ੍વਾ ਸਞ੍ਞਾਯ ਤੇਸਂ ਜਾਨਨਤੋ ਏવਂ ਹੋਤਿ। ਅਨਤ੍ਤਨਾ વਾ ਅਤ੍ਤਾਨਨ੍ਤਿ ਸਞ੍ਞਾਕ੍ਖਨ੍ਧਂ ਅਨਤ੍ਤਾਤਿ ਇਤਰੇ ਚ ਚਤ੍ਤਾਰੋ ਖਨ੍ਧੇ ਅਤ੍ਤਾਤਿ ਗਹੇਤ੍વਾ ਸਞ੍ਞਾਯ ਤੇਸਂ ਜਾਨਨਤੋ ਏવਂ ਹੋਤਿ। ਸਬ੍ਬਾਪਿ ਸਸ੍ਸਤੁਚ੍ਛੇਦਦਿਟ੍ਠਿਯੋવ।
948. Atthi me attāti vāti sabbapadesu vā-saddo vikappattho; evaṃ vā diṭṭhi uppajjatīti vuttaṃ hoti. Atthi me attāti cettha sassatadiṭṭhi sabbakālesu attano atthitaṃ gaṇhāti. Saccato thetatoti bhūtato ca thirato ca; idaṃ saccanti suṭṭhu daḷhabhāvenāti vuttaṃ hoti. Natthi me attāti ayaṃ pana ucchedadiṭṭhi, sato sattassa tattha tattha vibhavaggahaṇato. Atha vā purimāpi tīsu kālesu atthīti gahaṇato sassatadiṭṭhi, paccuppannameva atthīti gaṇhantī ucchedadiṭṭhi. Pacchimāpi atītānāgatesu natthīti gahaṇato ‘bhasmantā āhutiyo’ti gahitadiṭṭhikānaṃ viya ucchedadiṭṭhi, atīteyeva natthīti gaṇhantī adhiccasamuppannikasseva sassatadiṭṭhi. Attanā vā attānaṃ sañjānāmīti saññākkhandhasīsena khandhe attāti gahetvā saññāya avasesakkhandhe sañjānanato ‘iminā attanā imaṃ attānaṃ sañjānāmī’ti evaṃ hoti. Attanā vā anattānanti saññākkhandhaṃyeva attāti gahetvā itare cattāro khandhe anattāti gahetvā saññāya tesaṃ jānanato evaṃ hoti. Anattanā vā attānanti saññākkhandhaṃ anattāti itare ca cattāro khandhe attāti gahetvā saññāya tesaṃ jānanato evaṃ hoti. Sabbāpi sassatucchedadiṭṭhiyova.
વਦੋ વੇਦੇਯ੍ਯੋਤਿ ਆਦਯੋ ਪਨ ਸਸ੍ਸਤਦਿਟ੍ਠਿਯਾ ਏવ ਅਭਿਨਿવੇਸਾਕਾਰਾ। ਤਤ੍ਥ વਦਤੀਤਿ વਦੋ; વਚੀਕਮ੍ਮਸ੍ਸ ਕਾਰਕੋਤਿ વੁਤ੍ਤਂ ਹੋਤਿ। વੇਦਯਤੀਤਿ વੇਦੇਯ੍ਯੋ; ਜਾਨਾਤਿ ਅਨੁਭવਤਿ ਚਾਤਿ વੁਤ੍ਤਂ ਹੋਤਿ। ਇਦਾਨਿ ਯਂ ਸੋ વੇਦੇਤਿ ਤਂ ਦਸ੍ਸੇਤੁਂ ਤਤ੍ਰ ਤਤ੍ਰ ਦੀਘਰਤ੍ਤਂ ਕਲ੍ਯਾਣਪਾਪਕਾਨਨ੍ਤਿਆਦਿ વੁਤ੍ਤਂ। ਤਤ੍ਥ ਤਤ੍ਰ ਤਤ੍ਰਾਤਿ ਤੇਸੁ ਤੇਸੁ ਯੋਨਿਗਤਿਠਿਤਿਨਿવਾਸਨਿਕਾਯੇਸੁ ਆਰਮ੍ਮਣੇਸੁ વਾ। ਦੀਘਰਤ੍ਤਨ੍ਤਿ ਚਿਰਰਤ੍ਤਂ। ਪਚ੍ਚਨੁਭੋਤੀਤਿ ਪਟਿਸਂવੇਦਯਤਿ। ਨ ਸੋ ਜਾਤੋ ਨਾਹੋਸੀਤਿ ਸੋ ਅਤ੍ਤਾ ਅਜਾਤਿਧਮ੍ਮਤੋ ਨ ਜਾਤੋ ਨਾਮ; ਸਦਾ વਿਜ੍ਜਮਾਨੋ ਯੇવਾਤਿ ਅਤ੍ਥੋ। ਤੇਨੇવ ਅਤੀਤੇ ਨਾਹੋਸਿ, ਅਨਾਗਤੇਪਿ ਨ ਭવਿਸ੍ਸਤਿ। ਯੋ ਹਿ ਜਾਤੋ ਸੋ ਅਹੋਸਿ, ਯੋ ਚ ਜਾਯਿਸ੍ਸਤਿ ਸੋ ਭવਿਸ੍ਸਤੀਤਿ। ਅਥવਾ ‘ਨ ਸੋ ਜਾਤੋ ਨਾਹੋਸੀ’ਤਿ ਸੋ ਸਦਾ વਿਜ੍ਜਮਾਨਤ੍ਤਾ ਅਤੀਤੇਪਿ ਨ ਜਾਤੁ ਨਾਹੋਸਿ , ਅਨਾਗਤੇਪਿ ਨ ਜਾਤੁ ਨ ਭવਿਸ੍ਸਤਿ। ਨਿਚ੍ਚੋਤਿ ਉਪ੍ਪਾਦવਯਰਹਿਤੋ। ਧੁવੋਤਿ ਥਿਰੋ ਸਾਰਭੂਤੋ। ਸਸ੍ਸਤੋਤਿ ਸਬ੍ਬਕਾਲਿਕੋ। ਅવਿਪਰਿਣਾਮਧਮ੍ਮੋਤਿ ਅਤ੍ਤਨੋ ਪਕਤਿਭਾવਂ ਅવਿਜਹਨਧਮ੍ਮੋ ਕਕਣ੍ਟਕੋ વਿਯ ਨਾਨਪ੍ਪਕਾਰਤ੍ਤਂ ਨਾਪਜ੍ਜਤਿ। ਏવਮਯਂ ਸਬ੍ਬਾਸવਦਿਟ੍ਠਿ (ਮ॰ ਨਿ॰ ੧.੧੭ ਆਦਯੋ) ਨਾਮ ਕਥਿਤਾ। ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇવਾਤਿ।
Vado vedeyyoti ādayo pana sassatadiṭṭhiyā eva abhinivesākārā. Tattha vadatīti vado; vacīkammassa kārakoti vuttaṃ hoti. Vedayatīti vedeyyo; jānāti anubhavati cāti vuttaṃ hoti. Idāni yaṃ so vedeti taṃ dassetuṃ tatra tatra dīgharattaṃ kalyāṇapāpakānantiādi vuttaṃ. Tattha tatra tatrāti tesu tesu yonigatiṭhitinivāsanikāyesu ārammaṇesu vā. Dīgharattanti cirarattaṃ. Paccanubhotīti paṭisaṃvedayati. Na so jāto nāhosīti so attā ajātidhammato na jāto nāma; sadā vijjamāno yevāti attho. Teneva atīte nāhosi, anāgatepi na bhavissati. Yo hi jāto so ahosi, yo ca jāyissati so bhavissatīti. Athavā ‘na so jāto nāhosī’ti so sadā vijjamānattā atītepi na jātu nāhosi , anāgatepi na jātu na bhavissati. Niccoti uppādavayarahito. Dhuvoti thiro sārabhūto. Sassatoti sabbakāliko. Avipariṇāmadhammoti attano pakatibhāvaṃ avijahanadhammo kakaṇṭako viya nānappakārattaṃ nāpajjati. Evamayaṃ sabbāsavadiṭṭhi (ma. ni. 1.17 ādayo) nāma kathitā. Sesaṃ sabbattha uttānatthamevāti.
ਛਕ੍ਕਨਿਦ੍ਦੇਸવਣ੍ਣਨਾ।
Chakkaniddesavaṇṇanā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਅਭਿਧਮ੍ਮਪਿਟਕ • Abhidhammapiṭaka / વਿਭਙ੍ਗਪਾਲ਼ਿ • Vibhaṅgapāḷi / ੧੭. ਖੁਦ੍ਦਕવਤ੍ਥੁવਿਭਙ੍ਗੋ • 17. Khuddakavatthuvibhaṅgo
ਟੀਕਾ • Tīkā / ਅਭਿਧਮ੍ਮਪਿਟਕ (ਟੀਕਾ) • Abhidhammapiṭaka (ṭīkā) / વਿਭਙ੍ਗ-ਮੂਲਟੀਕਾ • Vibhaṅga-mūlaṭīkā / ੧੭. ਖੁਦ੍ਦਕવਤ੍ਥੁવਿਭਙ੍ਗੋ • 17. Khuddakavatthuvibhaṅgo
ਟੀਕਾ • Tīkā / ਅਭਿਧਮ੍ਮਪਿਟਕ (ਟੀਕਾ) • Abhidhammapiṭaka (ṭīkā) / વਿਭਙ੍ਗ-ਅਨੁਟੀਕਾ • Vibhaṅga-anuṭīkā / ੧੭. ਖੁਦ੍ਦਕવਤ੍ਥੁવਿਭਙ੍ਗੋ • 17. Khuddakavatthuvibhaṅgo
