| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
2. ச²ளபி⁴ஜாதிஸுத்தவண்ணனா
2. Chaḷabhijātisuttavaṇṇanā
57. ததியே அபி⁴ஜாதியோதி எத்த² அபி⁴-ஸத்³தோ³ உபஸக்³க³மத்தங், ந அத்த²விஸேஸஜோதகோதி ஆஹ ‘‘ச² ஜாதியோ’’தி. அபி⁴ஜாயதீதி எத்தா²பி ஏஸேவ நயோ.
57. Tatiye abhijātiyoti ettha abhi-saddo upasaggamattaṃ, na atthavisesajotakoti āha ‘‘cha jātiyo’’ti. Abhijāyatīti etthāpi eseva nayo.
உரப்³பே⁴ ஹனந்தீதி ஓரப்³பி⁴கா. ஏவங் ஸூகரிகாத³யோ வேதி³தப்³பா³. ரோதே³ந்தி குருரகம்மந்ததாய ஸப்படிப³த்³தே⁴ ஸத்தே அஸ்ஸூனி மோசெந்தீதி ருத்³தா³, தே ஏவ லுத்³தா³ ர-காரஸ்ஸ ல-காரங் கத்வா. இமினா அஞ்ஞேபி யே கேசி மாக³விகா நேஸாதா³ வுத்தா, தே பாபகம்மப்பஸுததாய ‘‘கண்ஹாபி⁴ஜாதீ’’தி வத³தி.
Urabbhe hanantīti orabbhikā. Evaṃ sūkarikādayo veditabbā. Rodenti kururakammantatāya sappaṭibaddhe satte assūni mocentīti ruddā, te eva luddā ra-kārassa la-kāraṃ katvā. Iminā aññepi ye keci māgavikā nesādā vuttā, te pāpakammappasutatāya ‘‘kaṇhābhijātī’’ti vadati.
பி⁴க்கூ²தி ச பு³த்³த⁴ஸாஸனே பி⁴க்கூ². தே கிர ஸச்ச²ந்த³ராகே³ன பரிபு⁴ஞ்ஜந்தீதி அதி⁴ப்பாயேன சதூஸு பச்சயேஸு கண்டகே பக்கி²பித்வா கா²த³ந்தீதி ‘‘கண்டகவுத்திகா’’தி வத³தி. கஸ்மாதி சே? யஸ்மா தே பணீதே பச்சயே படிஸேவந்தீதி தஸ்ஸ மிச்சா²கா³ஹோ. ஞாயலத்³தே⁴பி பச்சயே பு⁴ஞ்ஜமானா ஆஜீவகஸமயஸ்ஸ விலோமக்³கா³ஹிதாய பச்சயேஸு கண்டகே பக்கி²பித்வா கா²த³ந்தி நாமாதி வத³தீதி. அத² வா கண்டகவுத்திகா ஏவங்னாமகா ஏகே பப்³ப³ஜிதா, யே ஸவிஸேஸங் அத்தகிலமதா²னுயோக³ங் அனுயுத்தா. ததா² ஹி தே கண்டகே வத்தந்தா விய ஹொந்தீதி ‘‘கண்டகவுத்திகா’’தி வுத்தா. இமமேவ ச அத்த²விகப்பங் ஸந்தா⁴யாஹ ‘‘கண்டகவுத்திகாதி ஸமணா நாமேதே’’தி.
Bhikkhūti ca buddhasāsane bhikkhū. Te kira sacchandarāgena paribhuñjantīti adhippāyena catūsu paccayesu kaṇṭake pakkhipitvā khādantīti ‘‘kaṇṭakavuttikā’’ti vadati. Kasmāti ce? Yasmā te paṇīte paccaye paṭisevantīti tassa micchāgāho. Ñāyaladdhepi paccaye bhuñjamānā ājīvakasamayassa vilomaggāhitāya paccayesu kaṇṭake pakkhipitvā khādanti nāmāti vadatīti. Atha vā kaṇṭakavuttikā evaṃnāmakā eke pabbajitā, ye savisesaṃ attakilamathānuyogaṃ anuyuttā. Tathā hi te kaṇṭake vattantā viya hontīti ‘‘kaṇṭakavuttikā’’ti vuttā. Imameva ca atthavikappaṃ sandhāyāha ‘‘kaṇṭakavuttikāti samaṇā nāmete’’ti.
லோஹிதாபி⁴ஜாதி நாம நிக³ண்டா² ஏகஸாடகாதி வுத்தா. தே கிர ட²த்வா பு⁴ஞ்ஜனநஹானப்படிக்கே²பாதி³வதஸமாயோகே³ன புரிமேஹி த்³வீஹி பண்ட³ரதரா.
Lohitābhijāti nāma nigaṇṭhā ekasāṭakāti vuttā. Te kira ṭhatvā bhuñjananahānappaṭikkhepādivatasamāyogena purimehi dvīhi paṇḍaratarā.
அசேலகஸாவகாதி ஆஜீவகஸாவகே வத³தி. தே கிர ஆஜீவகலத்³தி⁴யா ஸுவிஸுத்³த⁴சித்ததாய நிக³ண்டே²ஹிபி பண்ட³ரதரா. ஏவஞ்ச கத்வா அத்தனோ பச்சயதா³யகே நிக³ண்டே²ஹிபி ஜெட்ட²கதரே கரோதி.
Acelakasāvakāti ājīvakasāvake vadati. Te kira ājīvakaladdhiyā suvisuddhacittatāya nigaṇṭhehipi paṇḍaratarā. Evañca katvā attano paccayadāyake nigaṇṭhehipi jeṭṭhakatare karoti.
ஆஜீவகா ஆஜீவகினியோ ‘‘ஸுக்காபி⁴ஜாதீ’’தி வுத்தா. தே கிர புரிமேஹி சதூஹி பண்ட³ரதரா. நந்தா³த³யோ ஹி ததா²ரூபங் ஆஜீவகப்படிபத்திங் உக்கங்ஸங் பாபெத்வா டி²தா, தஸ்மா நிக³ண்டே²ஹி ஆஜீவகஸாவகேஹி ச பண்ட³ரதராதி ‘‘பரமஸுக்காபி⁴ஜாதீ’’தி வுத்தா.
Ājīvakā ājīvakiniyo ‘‘sukkābhijātī’’ti vuttā. Te kira purimehi catūhi paṇḍaratarā. Nandādayo hi tathārūpaṃ ājīvakappaṭipattiṃ ukkaṃsaṃ pāpetvā ṭhitā, tasmā nigaṇṭhehi ājīvakasāvakehi ca paṇḍaratarāti ‘‘paramasukkābhijātī’’ti vuttā.
பி³லங் ஓலக்³கெ³ய்யுந்தி மங்ஸபா⁴க³ங் ந்ஹாருனா வா கேனசி வா க³ந்தி²த்வா புரிஸஸ்ஸ ஹத்தே² வா கேஸே வா ஓலம்ப³னவஸேன ப³ந்தெ⁴ய்யுங். இமினா ஸத்த²த⁴ம்மங் நாம த³ஸ்ஸேதி. ஸத்த²வாஹோ கிர மஹாகந்தாரங் படிபன்னோ அந்தராமக்³கே³ கோ³ணே மதே மங்ஸங் க³ஹெத்வா ஸப்³பே³ஸங் ஸத்தி²கானங் ‘‘இத³ங் கா²தி³த்வா எத்தகங் மூலங் தா³தப்³ப³’’ந்தி கொட்டா²ஸங் ஓலம்ப³தி. கோ³ணமங்ஸங் நாம கா²த³ந்தாபி அத்தி², அகா²த³ந்தாபி அத்தி², கா²த³ந்தாபி மூலங் தா³துங் ஸக்கொந்தாபி அஸக்கொந்தாபி. ஸத்த²வாஹோ யேன மூலேன கோ³ணோ க³ஹிதோ, தங் மூலங் ஸத்தி²கேஹி தா⁴ரணத்த²ங் ஸப்³பே³ஸங் ப³லக்காரேன கொட்டா²ஸங் த³த்வா மூலங் க³ண்ஹாதி. அயங் ஸத்த²த⁴ம்மோ.
Bilaṃ olaggeyyunti maṃsabhāgaṃ nhārunā vā kenaci vā ganthitvā purisassa hatthe vā kese vā olambanavasena bandheyyuṃ. Iminā satthadhammaṃ nāma dasseti. Satthavāho kira mahākantāraṃ paṭipanno antarāmagge goṇe mate maṃsaṃ gahetvā sabbesaṃ satthikānaṃ ‘‘idaṃ khāditvā ettakaṃ mūlaṃ dātabba’’nti koṭṭhāsaṃ olambati. Goṇamaṃsaṃ nāma khādantāpi atthi, akhādantāpi atthi, khādantāpi mūlaṃ dātuṃ sakkontāpi asakkontāpi. Satthavāho yena mūlena goṇo gahito, taṃ mūlaṃ satthikehi dhāraṇatthaṃ sabbesaṃ balakkārena koṭṭhāsaṃ datvā mūlaṃ gaṇhāti. Ayaṃ satthadhammo.
கண்ஹாபி⁴ஜாதியோ ஸமானோதி கண்ஹே நீசகுலே ஜாதோ ஹுத்வா. கண்ஹத⁴ம்மந்தி பச்சத்தே உபயோக³வசனந்தி ஆஹ ‘‘கண்ஹஸபா⁴வோ ஹுத்வா அபி⁴ஜாயதீ’’தி, தங் அந்தோக³த⁴ஹேதுஅத்த²ங் பத³ங், உப்பாதே³தீதி அத்தோ². தஸ்மா கண்ஹங் த⁴ம்மங் அபி⁴ஜாயதீதி காளகங் த³ஸது³ஸ்ஸீல்யத⁴ம்மங் உப்பாதே³தி. ஸுக்கங் த⁴ம்மங் அபி⁴ஜாயதீதி எத்தா²பி இமினா நயேன அத்தோ² வேதி³தப்³போ³. ஸோ ஹி ‘‘அஹங் புப்³பே³பி புஞ்ஞானங் அகதத்தா நீசகுலே நிப்³ப³த்தோ, இதா³னி புஞ்ஞங் கரிஸ்ஸாமீ’’தி புஞ்ஞஸங்கா²தங் பண்ட³ரத⁴ம்மங் கரோதி.
Kaṇhābhijātiyo samānoti kaṇhe nīcakule jāto hutvā. Kaṇhadhammanti paccatte upayogavacananti āha ‘‘kaṇhasabhāvo hutvā abhijāyatī’’ti, taṃ antogadhahetuatthaṃ padaṃ, uppādetīti attho. Tasmā kaṇhaṃ dhammaṃ abhijāyatīti kāḷakaṃ dasadussīlyadhammaṃ uppādeti. Sukkaṃ dhammaṃ abhijāyatīti etthāpi iminā nayena attho veditabbo. So hi ‘‘ahaṃ pubbepi puññānaṃ akatattā nīcakule nibbatto, idāni puññaṃ karissāmī’’ti puññasaṅkhātaṃ paṇḍaradhammaṃ karoti.
அகண்ஹங் அஸுக்கங் நிப்³பா³னந்தி ஸசே கண்ஹங் ப⁴வெய்ய, கண்ஹவிபாகங் த³தெ³ய்ய யதா² த³ஸவித⁴ங் து³ஸ்ஸீல்யத⁴ம்மங். ஸசே ஸுக்கங், ஸுக்கவிபாகங் த³தெ³ய்ய யதா² தா³னஸீலாதி³குஸலகம்மங். த்³வின்னம்பி அப்பதா³னதோ ‘‘அகண்ஹங் அஸுக்க’’ந்தி வுத்தங். நிப்³பா³னஞ்ச நாம இமஸ்மிங் அத்தே² அரஹத்தங் அதி⁴ப்பேதங் ‘‘அபி⁴ஜாயதீ’’தி வசனதோ . தஞ்ஹி கிலேஸனிப்³பா³னந்தே ஜாதத்தா நிப்³பா³னங் நாம யதா² ‘‘ராகா³தீ³னங் க²யந்தே ஜாதத்தா ராக³க்க²யோ, தோ³ஸக்க²யோ, மோஹக்க²யோ’’தி. படிப்பஸ்ஸம்ப⁴னவஸேன வா கிலேஸானங் நிப்³பா³பனதோ நிப்³பா³னங். தங் ஏஸ அபி⁴ஜாயதி பஸவதி. இதா⁴பி ஹி அந்தோக³த⁴ஹேது அத்த²ங் ‘‘ஜாயதீ’’தி பத³ங். அட்ட²கதா²யங் பன ‘‘ஜாயதீ’’தி இமஸ்ஸ பாபுணாதீஹி அத்த²ங் க³ஹெத்வாவ ‘‘நிப்³பா³னங் பாபுணாதீ’’தி வுத்தங். ஸுக்காபி⁴ஜாதியோ ஸமானோதி ஸுக்கே உச்சகுலே ஜாதோ ஹுத்வா. ஸேஸமெத்த² ஸுவிஞ்ஞெய்யமேவ.
Akaṇhaṃ asukkaṃ nibbānanti sace kaṇhaṃ bhaveyya, kaṇhavipākaṃ dadeyya yathā dasavidhaṃ dussīlyadhammaṃ. Sace sukkaṃ, sukkavipākaṃ dadeyya yathā dānasīlādikusalakammaṃ. Dvinnampi appadānato ‘‘akaṇhaṃ asukka’’nti vuttaṃ. Nibbānañca nāma imasmiṃ atthe arahattaṃ adhippetaṃ ‘‘abhijāyatī’’ti vacanato . Tañhi kilesanibbānante jātattā nibbānaṃ nāma yathā ‘‘rāgādīnaṃ khayante jātattā rāgakkhayo, dosakkhayo, mohakkhayo’’ti. Paṭippassambhanavasena vā kilesānaṃ nibbāpanato nibbānaṃ. Taṃ esa abhijāyati pasavati. Idhāpi hi antogadhahetu atthaṃ ‘‘jāyatī’’ti padaṃ. Aṭṭhakathāyaṃ pana ‘‘jāyatī’’ti imassa pāpuṇātīhi atthaṃ gahetvāva ‘‘nibbānaṃ pāpuṇātī’’ti vuttaṃ. Sukkābhijātiyo samānoti sukke uccakule jāto hutvā. Sesamettha suviññeyyameva.
ச²ளபி⁴ஜாதிஸுத்தவண்ணனா நிட்டி²தா.
Chaḷabhijātisuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 3. ச²ளபி⁴ஜாதிஸுத்தங் • 3. Chaḷabhijātisuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 3. ச²ளபி⁴ஜாதிஸுத்தவண்ணனா • 3. Chaḷabhijātisuttavaṇṇanā
