| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
၃. ဆဠဘိဇာတိသုတ္တဝဏ္ဏနာ
3. Chaḷabhijātisuttavaṇṇanā
၅၇. တတိယေ ဆဠဘိဇာတိယောတိ ဆ ဇာတိယော။ တတ္ရိဒန္တိ တတ္ရာယံ။ လုဒ္ဒာတိ ဒာရုဏာ။ ဘိက္ခူ ကဏ္ဋကဝုတ္တိကာတိ သမဏာ နာမေတေ။ ဧကသာဋကာတိ ဧကေနေဝ ပိလောတိကခဏ္ဍေန ပုရတော ပဋိစ္ဆာဒနကာ။ အကာမကသ္သ ဗိလံ ဩလဂ္ဂေယ္ယုန္တိ သတ္ထေ ဂစ္ဆမာနေ ဂောဏမ္ဟိ မတေ ဂောမံသမူလံ ဥပ္ပာဒနတ္ထာယ ဝိဘဇိတ္ဝာ ခာဒမာနာ ဧကသ္သ ဂောမံသံ အနိစ္ဆန္တသ္သေဝ ကောဋ္ဌာသံ ကတ္ဝာ ‘‘အယဉ္စ တေ ခာဒိတဗ္ဗော, မူလဉ္စ ဒာတဗ္ဗ’’န္တိ တံ ကောဋ္ဌာသသင္ခာတံ ဗိလံ ဩလဂ္ဂေယ္ယုံ, ဗလက္ကာရေန ဟတ္ထေ ဌပေယ္ယုန္တိ အတ္ထော။ အခေတ္တညုနာတိ အဘိဇာတိပညတ္တိယာ ခေတ္တံ အဇာနန္တေန။ တံ သုဏာဟီတိ တံ မမ ပညတ္တိံ သုဏာဟိ။ ကဏ္ဟာဘိဇာတိကောတိ ကာဠကဇာတိကော။ ကဏ္ဟံ ဓမ္မံ အဘိဇာယတီတိ ကဏ္ဟသဘာဝော ဟုတ္ဝာ ဇာယတိ နိဗ္ဗတ္တတိ, ကဏ္ဟာဘိဇာတိယံ ဝာ ဇာယတိ။ နိဗ္ဗာနံ အဘိဇာယတီတိ နိဗ္ဗာနံ ပာပုဏာတိ, အရိယဘူမိသင္ခာတာယ ဝာ နိဗ္ဗာနဇာတိယာ ဇာယတိ။
57. Tatiye chaḷabhijātiyoti cha jātiyo. Tatridanti tatrāyaṃ. Luddāti dāruṇā. Bhikkhūkaṇṭakavuttikāti samaṇā nāmete. Ekasāṭakāti ekeneva pilotikakhaṇḍena purato paṭicchādanakā. Akāmakassa bilaṃ olaggeyyunti satthe gacchamāne goṇamhi mate gomaṃsamūlaṃ uppādanatthāya vibhajitvā khādamānā ekassa gomaṃsaṃ anicchantasseva koṭṭhāsaṃ katvā ‘‘ayañca te khāditabbo, mūlañca dātabba’’nti taṃ koṭṭhāsasaṅkhātaṃ bilaṃ olaggeyyuṃ, balakkārena hatthe ṭhapeyyunti attho. Akhettaññunāti abhijātipaññattiyā khettaṃ ajānantena. Taṃ suṇāhīti taṃ mama paññattiṃ suṇāhi. Kaṇhābhijātikoti kāḷakajātiko. Kaṇhaṃ dhammaṃ abhijāyatīti kaṇhasabhāvo hutvā jāyati nibbattati, kaṇhābhijātiyaṃ vā jāyati. Nibbānaṃabhijāyatīti nibbānaṃ pāpuṇāti, ariyabhūmisaṅkhātāya vā nibbānajātiyā jāyati.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၃. ဆဠဘိဇာတိသုတ္တံ • 3. Chaḷabhijātisuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၂. ဆဠဘိဇာတိသုတ္တဝဏ္ဏနာ • 2. Chaḷabhijātisuttavaṇṇanā
