| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
7. ச²ளங்க³தா³னஸுத்தவண்ணனா
7. Chaḷaṅgadānasuttavaṇṇanā
37. ஸத்தமே த³க்க²ந்தி வட்³ட⁴ந்தி ஏதாயாதி த³க்கி²ணா, பரிச்சாக³மயங் புஞ்ஞங், தஸ்ஸூபகரணபூ⁴தோ தெ³ய்யத⁴ம்மோ ச. இத⁴ பன தெ³ய்யத⁴ம்மோ அதி⁴ப்பேதோ. தேனேவாஹ ‘‘த³க்கி²ணங் பதிட்டா²பேதீ’’தி. இதோ உட்டி²தேனாதி இதோ கெ²த்ததோ உப்பன்னேன. ராகோ³ வினயதி ஏதேனாதி ராக³வினயோ, ராக³ஸ்ஸ ஸமுச்சே²தி³கா படிபதா³. தேனாஹ ‘‘ராக³வினயபடிபத³ங் படிபன்னா’’தி.
37. Sattame dakkhanti vaḍḍhanti etāyāti dakkhiṇā, pariccāgamayaṃ puññaṃ, tassūpakaraṇabhūto deyyadhammo ca. Idha pana deyyadhammo adhippeto. Tenevāha ‘‘dakkhiṇaṃ patiṭṭhāpetī’’ti. Ito uṭṭhitenāti ito khettato uppannena. Rāgo vinayati etenāti rāgavinayo, rāgassa samucchedikā paṭipadā. Tenāha ‘‘rāgavinayapaṭipadaṃ paṭipannā’’ti.
‘‘புப்³பே³வ தா³னா ஸுமனோ’’திஆதி³கா³தா²ய புப்³பே³வ தா³னா முஞ்சசேதனாய புப்³பே³ தா³னூபகரணஸம்ப⁴ரணதோ பட்டா²ய ஸுமனோ ‘‘ஸம்பத்தீனங் நிதா³னங் அனுகா³மிகதா³னங் த³ஸ்ஸாமீ’’தி ஸோமனஸ்ஸிதோ ப⁴வெய்ய. த³த³ங் சித்தங் பஸாத³யேதி த³த³ந்தோ தெ³ய்யத⁴ம்மங் த³க்கி²ணெய்யஹத்தே² பதிட்டா²பெந்தோ ‘‘அஸாரதோ த⁴னதோ ஸாராதா³னங் கரோமீ’’தி அத்தனோ சித்தங் பஸாதெ³ய்ய. த³த்வா அத்தமனோ ஹோதீதி த³க்கி²ணெய்யானங் தெ³ய்யத⁴ம்மங் பரிச்சஜித்வா ‘‘பண்டி³தபஞ்ஞத்தங் நாம மயா அனுட்டி²தங், அஹோ ஸாது⁴ ஸுட்டூ²’’தி அத்தமனோ பமுதி³தோ பீதிஸோமனஸ்ஸஜாதோ ஹோதி. ஏஸாதி யா அயங் புப்³ப³சேதனா முஞ்சசேதனா அபரசேதனாதி இமாஸங் கம்மப²லானங் ஸத்³தா⁴னுக³தானங் ஸோமனஸ்ஸபரிக்³க³ஹிதானங் திவிதா⁴னங் சேதனானங் பாரிபூரீ, ஏஸா.
‘‘Pubbeva dānā sumano’’tiādigāthāya pubbeva dānā muñcacetanāya pubbe dānūpakaraṇasambharaṇato paṭṭhāya sumano ‘‘sampattīnaṃ nidānaṃ anugāmikadānaṃ dassāmī’’ti somanassito bhaveyya. Dadaṃ cittaṃ pasādayeti dadanto deyyadhammaṃ dakkhiṇeyyahatthe patiṭṭhāpento ‘‘asārato dhanato sārādānaṃ karomī’’ti attano cittaṃ pasādeyya. Datvā attamano hotīti dakkhiṇeyyānaṃ deyyadhammaṃ pariccajitvā ‘‘paṇḍitapaññattaṃ nāma mayā anuṭṭhitaṃ, aho sādhu suṭṭhū’’ti attamano pamudito pītisomanassajāto hoti. Esāti yā ayaṃ pubbacetanā muñcacetanā aparacetanāti imāsaṃ kammaphalānaṃ saddhānugatānaṃ somanassapariggahitānaṃ tividhānaṃ cetanānaṃ pāripūrī, esā.
ஸீலஸஞ்ஞமேனாதி காயிகவாசஸிகஸங்வரேன. ஹத்த²பாதே³தி த³க்கி²ணெய்யானங் ஹத்த²பாதே³. முக²ங் விக்கா²லெத்வாதி தேஸங்யேவ முக²ங் விக்கா²லெத்வா, அத்தனாவ முகோ²த³கங் த³த்வாதி அதி⁴ப்பாயோ.
Sīlasaññamenāti kāyikavācasikasaṃvarena. Hatthapādeti dakkhiṇeyyānaṃ hatthapāde. Mukhaṃ vikkhāletvāti tesaṃyeva mukhaṃ vikkhāletvā, attanāva mukhodakaṃ datvāti adhippāyo.
ச²ளங்க³தா³னஸுத்தவண்ணனா நிட்டி²தா.
Chaḷaṅgadānasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 7. ச²ளங்க³தா³னஸுத்தங் • 7. Chaḷaṅgadānasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 7. தா³னஸுத்தவண்ணனா • 7. Dānasuttavaṇṇanā
