| Library / Tipiṭaka / တိပိဋက • Tipiṭaka / အင္ဂုတ္တရနိကာယ (ဋီကာ) • Aṅguttaranikāya (ṭīkā) |
၇. ဆဠင္ဂဒာနသုတ္တဝဏ္ဏနာ
7. Chaḷaṅgadānasuttavaṇṇanā
၃၇. သတ္တမေ ဒက္ခန္တိ ဝဍ္ဎန္တိ ဧတာယာတိ ဒက္ခိဏာ, ပရိစ္စာဂမယံ ပုညံ, တသ္သူပကရဏဘူတော ဒေယ္ယဓမ္မော စ။ ဣဓ ပန ဒေယ္ယဓမ္မော အဓိပ္ပေတော။ တေနေဝာဟ ‘‘ဒက္ခိဏံ ပတိဋ္ဌာပေတီ’’တိ။ ဣတော ဥဋ္ဌိတေနာတိ ဣတော ခေတ္တတော ဥပ္ပန္နေန။ ရာဂော ဝိနယတိ ဧတေနာတိ ရာဂဝိနယော, ရာဂသ္သ သမုစ္ဆေဒိကာ ပဋိပဒာ။ တေနာဟ ‘‘ရာဂဝိနယပဋိပဒံ ပဋိပန္နာ’’တိ။
37. Sattame dakkhanti vaḍḍhanti etāyāti dakkhiṇā, pariccāgamayaṃ puññaṃ, tassūpakaraṇabhūto deyyadhammo ca. Idha pana deyyadhammo adhippeto. Tenevāha ‘‘dakkhiṇaṃ patiṭṭhāpetī’’ti. Ito uṭṭhitenāti ito khettato uppannena. Rāgo vinayati etenāti rāgavinayo, rāgassa samucchedikā paṭipadā. Tenāha ‘‘rāgavinayapaṭipadaṃ paṭipannā’’ti.
‘‘ပုဗ္ဗေဝ ဒာနာ သုမနော’’တိအာဒိဂာထာယ ပုဗ္ဗေဝ ဒာနာ မုဉ္စစေတနာယ ပုဗ္ဗေ ဒာနူပကရဏသမ္ဘရဏတော ပဋ္ဌာယ သုမနော ‘‘သမ္ပတ္တီနံ နိဒာနံ အနုဂာမိကဒာနံ ဒသ္သာမီ’’တိ သောမနသ္သိတော ဘဝေယ္ယ။ ဒဒံ စိတ္တံ ပသာဒယေတိ ဒဒန္တော ဒေယ္ယဓမ္မံ ဒက္ခိဏေယ္ယဟတ္ထေ ပတိဋ္ဌာပေန္တော ‘‘အသာရတော ဓနတော သာရာဒာနံ ကရောမီ’’တိ အတ္တနော စိတ္တံ ပသာဒေယ္ယ။ ဒတ္ဝာ အတ္တမနော ဟောတီတိ ဒက္ခိဏေယ္ယာနံ ဒေယ္ယဓမ္မံ ပရိစ္စဇိတ္ဝာ ‘‘ပဏ္ဍိတပညတ္တံ နာမ မယာ အနုဋ္ဌိတံ, အဟော သာဓု သုဋ္ဌူ’’တိ အတ္တမနော ပမုဒိတော ပီတိသောမနသ္သဇာတော ဟောတိ။ ဧသာတိ ယာ အယံ ပုဗ္ဗစေတနာ မုဉ္စစေတနာ အပရစေတနာတိ ဣမာသံ ကမ္မဖလာနံ သဒ္ဓာနုဂတာနံ သောမနသ္သပရိဂ္ဂဟိတာနံ တိဝိဓာနံ စေတနာနံ ပာရိပူရီ, ဧသာ။
‘‘Pubbeva dānā sumano’’tiādigāthāya pubbeva dānā muñcacetanāya pubbe dānūpakaraṇasambharaṇato paṭṭhāya sumano ‘‘sampattīnaṃ nidānaṃ anugāmikadānaṃ dassāmī’’ti somanassito bhaveyya. Dadaṃ cittaṃ pasādayeti dadanto deyyadhammaṃ dakkhiṇeyyahatthe patiṭṭhāpento ‘‘asārato dhanato sārādānaṃ karomī’’ti attano cittaṃ pasādeyya. Datvā attamano hotīti dakkhiṇeyyānaṃ deyyadhammaṃ pariccajitvā ‘‘paṇḍitapaññattaṃ nāma mayā anuṭṭhitaṃ, aho sādhu suṭṭhū’’ti attamano pamudito pītisomanassajāto hoti. Esāti yā ayaṃ pubbacetanā muñcacetanā aparacetanāti imāsaṃ kammaphalānaṃ saddhānugatānaṃ somanassapariggahitānaṃ tividhānaṃ cetanānaṃ pāripūrī, esā.
သီလသညမေနာတိ ကာယိကဝာစသိကသံဝရေန။ ဟတ္ထပာဒေတိ ဒက္ခိဏေယ္ယာနံ ဟတ္ထပာဒေ။ မုခံ ဝိက္ခာလေတ္ဝာတိ တေသံယေဝ မုခံ ဝိက္ခာလေတ္ဝာ, အတ္တနာဝ မုခောဒကံ ဒတ္ဝာတိ အဓိပ္ပာယော။
Sīlasaññamenāti kāyikavācasikasaṃvarena. Hatthapādeti dakkhiṇeyyānaṃ hatthapāde. Mukhaṃ vikkhāletvāti tesaṃyeva mukhaṃ vikkhāletvā, attanāva mukhodakaṃ datvāti adhippāyo.
ဆဠင္ဂဒာနသုတ္တဝဏ္ဏနာ နိဋ္ဌိတာ။
Chaḷaṅgadānasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၇. ဆဠင္ဂဒာနသုတ္တံ • 7. Chaḷaṅgadānasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၇. ဒာနသုတ္တဝဏ္ဏနာ • 7. Dānasuttavaṇṇanā
