| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) |
೭. ಛಳಙ್ಗದಾನಸುತ್ತವಣ್ಣನಾ
7. Chaḷaṅgadānasuttavaṇṇanā
೩೭. ಸತ್ತಮೇ ದಕ್ಖನ್ತಿ ವಡ್ಢನ್ತಿ ಏತಾಯಾತಿ ದಕ್ಖಿಣಾ, ಪರಿಚ್ಚಾಗಮಯಂ ಪುಞ್ಞಂ, ತಸ್ಸೂಪಕರಣಭೂತೋ ದೇಯ್ಯಧಮ್ಮೋ ಚ। ಇಧ ಪನ ದೇಯ್ಯಧಮ್ಮೋ ಅಧಿಪ್ಪೇತೋ। ತೇನೇವಾಹ ‘‘ದಕ್ಖಿಣಂ ಪತಿಟ್ಠಾಪೇತೀ’’ತಿ। ಇತೋ ಉಟ್ಠಿತೇನಾತಿ ಇತೋ ಖೇತ್ತತೋ ಉಪ್ಪನ್ನೇನ। ರಾಗೋ ವಿನಯತಿ ಏತೇನಾತಿ ರಾಗವಿನಯೋ, ರಾಗಸ್ಸ ಸಮುಚ್ಛೇದಿಕಾ ಪಟಿಪದಾ। ತೇನಾಹ ‘‘ರಾಗವಿನಯಪಟಿಪದಂ ಪಟಿಪನ್ನಾ’’ತಿ।
37. Sattame dakkhanti vaḍḍhanti etāyāti dakkhiṇā, pariccāgamayaṃ puññaṃ, tassūpakaraṇabhūto deyyadhammo ca. Idha pana deyyadhammo adhippeto. Tenevāha ‘‘dakkhiṇaṃ patiṭṭhāpetī’’ti. Ito uṭṭhitenāti ito khettato uppannena. Rāgo vinayati etenāti rāgavinayo, rāgassa samucchedikā paṭipadā. Tenāha ‘‘rāgavinayapaṭipadaṃ paṭipannā’’ti.
‘‘ಪುಬ್ಬೇವ ದಾನಾ ಸುಮನೋ’’ತಿಆದಿಗಾಥಾಯ ಪುಬ್ಬೇವ ದಾನಾ ಮುಞ್ಚಚೇತನಾಯ ಪುಬ್ಬೇ ದಾನೂಪಕರಣಸಮ್ಭರಣತೋ ಪಟ್ಠಾಯ ಸುಮನೋ ‘‘ಸಮ್ಪತ್ತೀನಂ ನಿದಾನಂ ಅನುಗಾಮಿಕದಾನಂ ದಸ್ಸಾಮೀ’’ತಿ ಸೋಮನಸ್ಸಿತೋ ಭವೇಯ್ಯ। ದದಂ ಚಿತ್ತಂ ಪಸಾದಯೇತಿ ದದನ್ತೋ ದೇಯ್ಯಧಮ್ಮಂ ದಕ್ಖಿಣೇಯ್ಯಹತ್ಥೇ ಪತಿಟ್ಠಾಪೇನ್ತೋ ‘‘ಅಸಾರತೋ ಧನತೋ ಸಾರಾದಾನಂ ಕರೋಮೀ’’ತಿ ಅತ್ತನೋ ಚಿತ್ತಂ ಪಸಾದೇಯ್ಯ। ದತ್ವಾ ಅತ್ತಮನೋ ಹೋತೀತಿ ದಕ್ಖಿಣೇಯ್ಯಾನಂ ದೇಯ್ಯಧಮ್ಮಂ ಪರಿಚ್ಚಜಿತ್ವಾ ‘‘ಪಣ್ಡಿತಪಞ್ಞತ್ತಂ ನಾಮ ಮಯಾ ಅನುಟ್ಠಿತಂ, ಅಹೋ ಸಾಧು ಸುಟ್ಠೂ’’ತಿ ಅತ್ತಮನೋ ಪಮುದಿತೋ ಪೀತಿಸೋಮನಸ್ಸಜಾತೋ ಹೋತಿ। ಏಸಾತಿ ಯಾ ಅಯಂ ಪುಬ್ಬಚೇತನಾ ಮುಞ್ಚಚೇತನಾ ಅಪರಚೇತನಾತಿ ಇಮಾಸಂ ಕಮ್ಮಫಲಾನಂ ಸದ್ಧಾನುಗತಾನಂ ಸೋಮನಸ್ಸಪರಿಗ್ಗಹಿತಾನಂ ತಿವಿಧಾನಂ ಚೇತನಾನಂ ಪಾರಿಪೂರೀ, ಏಸಾ।
‘‘Pubbeva dānā sumano’’tiādigāthāya pubbeva dānā muñcacetanāya pubbe dānūpakaraṇasambharaṇato paṭṭhāya sumano ‘‘sampattīnaṃ nidānaṃ anugāmikadānaṃ dassāmī’’ti somanassito bhaveyya. Dadaṃ cittaṃ pasādayeti dadanto deyyadhammaṃ dakkhiṇeyyahatthe patiṭṭhāpento ‘‘asārato dhanato sārādānaṃ karomī’’ti attano cittaṃ pasādeyya. Datvā attamano hotīti dakkhiṇeyyānaṃ deyyadhammaṃ pariccajitvā ‘‘paṇḍitapaññattaṃ nāma mayā anuṭṭhitaṃ, aho sādhu suṭṭhū’’ti attamano pamudito pītisomanassajāto hoti. Esāti yā ayaṃ pubbacetanā muñcacetanā aparacetanāti imāsaṃ kammaphalānaṃ saddhānugatānaṃ somanassapariggahitānaṃ tividhānaṃ cetanānaṃ pāripūrī, esā.
ಸೀಲಸಞ್ಞಮೇನಾತಿ ಕಾಯಿಕವಾಚಸಿಕಸಂವರೇನ। ಹತ್ಥಪಾದೇತಿ ದಕ್ಖಿಣೇಯ್ಯಾನಂ ಹತ್ಥಪಾದೇ। ಮುಖಂ ವಿಕ್ಖಾಲೇತ್ವಾತಿ ತೇಸಂಯೇವ ಮುಖಂ ವಿಕ್ಖಾಲೇತ್ವಾ, ಅತ್ತನಾವ ಮುಖೋದಕಂ ದತ್ವಾತಿ ಅಧಿಪ್ಪಾಯೋ।
Sīlasaññamenāti kāyikavācasikasaṃvarena. Hatthapādeti dakkhiṇeyyānaṃ hatthapāde. Mukhaṃ vikkhāletvāti tesaṃyeva mukhaṃ vikkhāletvā, attanāva mukhodakaṃ datvāti adhippāyo.
ಛಳಙ್ಗದಾನಸುತ್ತವಣ್ಣನಾ ನಿಟ್ಠಿತಾ।
Chaḷaṅgadānasuttavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಅಙ್ಗುತ್ತರನಿಕಾಯ • Aṅguttaranikāya / ೭. ಛಳಙ್ಗದಾನಸುತ್ತಂ • 7. Chaḷaṅgadānasuttaṃ
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) / ೭. ದಾನಸುತ್ತವಣ್ಣನಾ • 7. Dānasuttavaṇṇanā
