| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (ටීකා) • Aṅguttaranikāya (ṭīkā) |
7. ඡළඞ්‌ගදානසුත්‌තවණ්‌ණනා
7. Chaḷaṅgadānasuttavaṇṇanā
37. සත්‌තමෙ දක්‌ඛන්‌ති වඩ්‌ඪන්‌ති එතායාති දක්‌ඛිණා, පරිච්‌චාගමයං පුඤ්‌ඤං, තස්‌සූපකරණභූතො දෙය්‍යධම්‌මො ච. ඉධ පන දෙය්‍යධම්‌මො අධිප්‌පෙතො. තෙනෙවාහ ‘‘දක්‌ඛිණං පතිට්‌ඨාපෙතී’’ති. ඉතො උට්‌ඨිතෙනාති ඉතො ඛෙත්‌තතො උප්‌පන්‌නෙන. රාගො විනයති එතෙනාති රාගවිනයො, රාගස්‌ස සමුච්‌ඡෙදිකා පටිපදා. තෙනාහ ‘‘රාගවිනයපටිපදං පටිපන්‌නා’’ති.
37. Sattame dakkhanti vaḍḍhanti etāyāti dakkhiṇā, pariccāgamayaṃ puññaṃ, tassūpakaraṇabhūto deyyadhammo ca. Idha pana deyyadhammo adhippeto. Tenevāha ‘‘dakkhiṇaṃ patiṭṭhāpetī’’ti. Ito uṭṭhitenāti ito khettato uppannena. Rāgo vinayati etenāti rāgavinayo, rāgassa samucchedikā paṭipadā. Tenāha ‘‘rāgavinayapaṭipadaṃ paṭipannā’’ti.
‘‘පුබ්‌බෙව දානා සුමනො’’තිආදිගාථාය පුබ්‌බෙව දානා මුඤ්‌චචෙතනාය පුබ්‌බෙ දානූපකරණසම්‌භරණතො පට්‌ඨාය සුමනො ‘‘සම්‌පත්‌තීනං නිදානං අනුගාමිකදානං දස්‌සාමී’’ති සොමනස්‌සිතො භවෙය්‍ය. දදං චිත්‌තං පසාදයෙති දදන්‌තො දෙය්‍යධම්‌මං දක්‌ඛිණෙය්‍යහත්‌ථෙ පතිට්‌ඨාපෙන්‌තො ‘‘අසාරතො ධනතො සාරාදානං කරොමී’’ති අත්‌තනො චිත්‌තං පසාදෙය්‍ය. දත්‌වා අත්‌තමනො හොතීති දක්‌ඛිණෙය්‍යානං දෙය්‍යධම්‌මං පරිච්‌චජිත්‌වා ‘‘පණ්‌ඩිතපඤ්‌ඤත්‌තං නාම මයා අනුට්‌ඨිතං, අහො සාධු සුට්‌ඨූ’’ති අත්‌තමනො පමුදිතො පීතිසොමනස්‌සජාතො හොති. එසාති යා අයං පුබ්‌බචෙතනා මුඤ්‌චචෙතනා අපරචෙතනාති ඉමාසං කම්‌මඵලානං සද්‌ධානුගතානං සොමනස්‌සපරිග්‌ගහිතානං තිවිධානං චෙතනානං පාරිපූරී, එසා.
‘‘Pubbeva dānā sumano’’tiādigāthāya pubbeva dānā muñcacetanāya pubbe dānūpakaraṇasambharaṇato paṭṭhāya sumano ‘‘sampattīnaṃ nidānaṃ anugāmikadānaṃ dassāmī’’ti somanassito bhaveyya. Dadaṃ cittaṃ pasādayeti dadanto deyyadhammaṃ dakkhiṇeyyahatthe patiṭṭhāpento ‘‘asārato dhanato sārādānaṃ karomī’’ti attano cittaṃ pasādeyya. Datvā attamano hotīti dakkhiṇeyyānaṃ deyyadhammaṃ pariccajitvā ‘‘paṇḍitapaññattaṃ nāma mayā anuṭṭhitaṃ, aho sādhu suṭṭhū’’ti attamano pamudito pītisomanassajāto hoti. Esāti yā ayaṃ pubbacetanā muñcacetanā aparacetanāti imāsaṃ kammaphalānaṃ saddhānugatānaṃ somanassapariggahitānaṃ tividhānaṃ cetanānaṃ pāripūrī, esā.
සීලසඤ්‌ඤමෙනාති කායිකවාචසිකසංවරෙන. හත්‌ථපාදෙති දක්‌ඛිණෙය්‍යානං හත්‌ථපාදෙ. මුඛං වික්‌ඛාලෙත්‌වාති තෙසංයෙව මුඛං වික්‌ඛාලෙත්‌වා, අත්‌තනාව මුඛොදකං දත්‌වාති අධිප්‌පායො.
Sīlasaññamenāti kāyikavācasikasaṃvarena. Hatthapādeti dakkhiṇeyyānaṃ hatthapāde. Mukhaṃ vikkhāletvāti tesaṃyeva mukhaṃ vikkhāletvā, attanāva mukhodakaṃ datvāti adhippāyo.
ඡළඞ්‌ගදානසුත්‌තවණ්‌ණනා නිට්‌ඨිතා.
Chaḷaṅgadānasuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 7. ඡළඞ්‌ගදානසුත්‌තං • 7. Chaḷaṅgadānasuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 7. දානසුත්‌තවණ්‌ණනා • 7. Dānasuttavaṇṇanā
