| Library / Tipiṭaka / திபிடக • Tipiṭaka / மஹாவக்³க³பாளி • Mahāvaggapāḷi |
88. ச²ந்த³தா³னகதா²
88. Chandadānakathā
165. அத² கோ² ப⁴க³வா பி⁴க்கூ² ஆமந்தேஸி – ‘‘ஸன்னிபதத², பி⁴க்க²வே, ஸங்கோ⁴ கம்மங் கரிஸ்ஸதீ’’தி . ஏவங் வுத்தே அஞ்ஞதரோ பி⁴க்கு² ப⁴க³வந்தங் ஏதத³வோச – ‘‘அத்தி², ப⁴ந்தே, பி⁴க்கு² கி³லானோ, ஸோ அனாக³தோ’’தி. அனுஜானாமி, பி⁴க்க²வே, கி³லானேன பி⁴க்கு²னா ச²ந்த³ங் தா³துங். ஏவஞ்ச பன, பி⁴க்க²வே, தா³தப்³போ³. தேன கி³லானேன பி⁴க்கு²னா ஏகங் பி⁴க்கு²ங் உபஸங்கமித்வா ஏகங்ஸங் உத்தராஸங்க³ங் கரித்வா உக்குடிகங் நிஸீதி³த்வா அஞ்ஜலிங் பக்³க³ஹெத்வா ஏவமஸ்ஸ வசனீயோ – ‘‘ச²ந்த³ங் த³ம்மி, ச²ந்த³ங் மே ஹர, ச²ந்த³ங் மே ஆரோசேஹீ’’தி. காயேன விஞ்ஞாபேதி, வாசாய விஞ்ஞாபேதி, காயேன வாசாய விஞ்ஞாபேதி, தி³ன்னோ ஹோதி ச²ந்தோ³. ந காயேன விஞ்ஞாபேதி, ந வாசாய விஞ்ஞாபேதி, ந காயேன வாசாய விஞ்ஞாபேதி, ந தி³ன்னோ ஹோதி ச²ந்தோ³. ஏவஞ்சேதங் லபே⁴த², இச்சேதங் குஸலங். நோ சே லபே⁴த², ஸோ, பி⁴க்க²வே , கி³லானோ பி⁴க்கு² மஞ்சேன வா பீடே²ன வா ஸங்க⁴மஜ்ஜே² ஆனெத்வா கம்மங் காதப்³ப³ங். ஸசே, பி⁴க்க²வே, கி³லானுபட்டா²கானங் பி⁴க்கூ²னங் ஏவங் ஹோதி – ‘‘ஸசே கோ² மயங் கி³லானங் டா²னா சாவெஸ்ஸாம, ஆபா³தோ⁴ வா அபி⁴வட்³டி⁴ஸ்ஸதி காலங்கிரியா வா ப⁴விஸ்ஸதீ’’தி, ந, பி⁴க்க²வே, கி³லானோ பி⁴க்கு² டா²னா சாவேதப்³போ³. ஸங்கே⁴ன தத்த² க³ந்த்வா கம்மங் காதப்³ப³ங். ந த்வேவ வக்³கே³ன ஸங்கே⁴ன கம்மங் காதப்³ப³ங். கரெய்ய சே, ஆபத்தி து³க்கடஸ்ஸ.
165. Atha kho bhagavā bhikkhū āmantesi – ‘‘sannipatatha, bhikkhave, saṅgho kammaṃ karissatī’’ti . Evaṃ vutte aññataro bhikkhu bhagavantaṃ etadavoca – ‘‘atthi, bhante, bhikkhu gilāno, so anāgato’’ti. Anujānāmi, bhikkhave, gilānena bhikkhunā chandaṃ dātuṃ. Evañca pana, bhikkhave, dātabbo. Tena gilānena bhikkhunā ekaṃ bhikkhuṃ upasaṅkamitvā ekaṃsaṃ uttarāsaṅgaṃ karitvā ukkuṭikaṃ nisīditvā añjaliṃ paggahetvā evamassa vacanīyo – ‘‘chandaṃ dammi, chandaṃ me hara, chandaṃ me ārocehī’’ti. Kāyena viññāpeti, vācāya viññāpeti, kāyena vācāya viññāpeti, dinno hoti chando. Na kāyena viññāpeti, na vācāya viññāpeti, na kāyena vācāya viññāpeti, na dinno hoti chando. Evañcetaṃ labhetha, iccetaṃ kusalaṃ. No ce labhetha, so, bhikkhave , gilāno bhikkhu mañcena vā pīṭhena vā saṅghamajjhe ānetvā kammaṃ kātabbaṃ. Sace, bhikkhave, gilānupaṭṭhākānaṃ bhikkhūnaṃ evaṃ hoti – ‘‘sace kho mayaṃ gilānaṃ ṭhānā cāvessāma, ābādho vā abhivaḍḍhissati kālaṃkiriyā vā bhavissatī’’ti, na, bhikkhave, gilāno bhikkhu ṭhānā cāvetabbo. Saṅghena tattha gantvā kammaṃ kātabbaṃ. Na tveva vaggena saṅghena kammaṃ kātabbaṃ. Kareyya ce, āpatti dukkaṭassa.
ச²ந்த³ஹாரகோ சே, பி⁴க்க²வே, தி³ன்னே ச²ந்தே³ தத்தே²வ பக்கமதி, அஞ்ஞஸ்ஸ தா³தப்³போ³ ச²ந்தோ³. ச²ந்த³ஹாரகோ சே, பி⁴க்க²வே, தி³ன்னே ச²ந்தே³ தத்தே²வ விப்³ப⁴மதி…பே॰… காலங்கரோதி – ஸாமணேரோ படிஜானாதி – ஸிக்க²ங் பச்சக்கா²தகோ படிஜானாதி – அந்திமவத்து²ங் அஜ்ஜா²பன்னகோ படிஜானாதி – உம்மத்தகோ படிஜானாதி – கி²த்தசித்தோ படிஜானாதி – வேத³னாட்டோ படிஜானாதி – ஆபத்தியா அத³ஸ்ஸனே உக்கி²த்தகோ படிஜானாதி – ஆபத்தியா அப்படிகம்மே உக்கி²த்தகோ படிஜானாதி – பாபிகாய தி³ட்டி²யா அப்படினிஸ்ஸக்³கே³ உக்கி²த்தகோ படிஜானாதி – பண்ட³கோ படிஜானாதி – தெ²ய்யஸங்வாஸகோ படிஜானாதி – தித்தி²யபக்கந்தகோ படிஜானாதி – திரச்சா²னக³தோ படிஜானாதி – மாதுகா⁴தகோ படிஜானாதி – பிதுகா⁴தகோ படிஜானாதி – அரஹந்தகா⁴தகோ படிஜானாதி – பி⁴க்கு²னிதூ³ஸகோ படிஜானாதி – ஸங்க⁴பே⁴த³கோ படிஜானாதி – லோஹிதுப்பாத³கோ படிஜானாதி – உப⁴தொப்³யஞ்ஜனகோ படிஜானாதி, அஞ்ஞஸ்ஸ தா³தப்³போ³ ச²ந்தோ³.
Chandahārako ce, bhikkhave, dinne chande tattheva pakkamati, aññassa dātabbo chando. Chandahārako ce, bhikkhave, dinne chande tattheva vibbhamati…pe… kālaṃkaroti – sāmaṇero paṭijānāti – sikkhaṃ paccakkhātako paṭijānāti – antimavatthuṃ ajjhāpannako paṭijānāti – ummattako paṭijānāti – khittacitto paṭijānāti – vedanāṭṭo paṭijānāti – āpattiyā adassane ukkhittako paṭijānāti – āpattiyā appaṭikamme ukkhittako paṭijānāti – pāpikāya diṭṭhiyā appaṭinissagge ukkhittako paṭijānāti – paṇḍako paṭijānāti – theyyasaṃvāsako paṭijānāti – titthiyapakkantako paṭijānāti – tiracchānagato paṭijānāti – mātughātako paṭijānāti – pitughātako paṭijānāti – arahantaghātako paṭijānāti – bhikkhunidūsako paṭijānāti – saṅghabhedako paṭijānāti – lohituppādako paṭijānāti – ubhatobyañjanako paṭijānāti, aññassa dātabbo chando.
ச²ந்த³ஹாரகோ சே, பி⁴க்க²வே, தி³ன்னே ச²ந்தே³ அந்தராமக்³கே³ பக்கமதி, அனாஹடோ ஹோதி ச²ந்தோ³. ச²ந்த³ஹாரகோ சே, பி⁴க்க²வே, தி³ன்னே ச²ந்தே³ அந்தராமக்³கே³ விப்³ப⁴மதி…பே॰… உப⁴தொப்³யஞ்ஜனகோ படிஜானாதி, அனாஹடோ ஹோதி ச²ந்தோ³.
Chandahārako ce, bhikkhave, dinne chande antarāmagge pakkamati, anāhaṭo hoti chando. Chandahārako ce, bhikkhave, dinne chande antarāmagge vibbhamati…pe… ubhatobyañjanako paṭijānāti, anāhaṭo hoti chando.
ச²ந்த³ஹாரகோ சே, பி⁴க்க²வே, தி³ன்னே ச²ந்தே³ ஸங்க⁴ப்பத்தோ பக்கமதி, ஆஹடோ ஹோதி ச²ந்தோ³. ச²ந்த³ஹாரகோ சே, பி⁴க்க²வே, தி³ன்னே ச²ந்தே³ ஸங்க⁴ப்பத்தோ விப்³ப⁴மதி…பே॰… உப⁴தொப்³யஞ்ஜனகோ படிஜானாதி, ஆஹடோ ஹோதி ச²ந்தோ³.
Chandahārako ce, bhikkhave, dinne chande saṅghappatto pakkamati, āhaṭo hoti chando. Chandahārako ce, bhikkhave, dinne chande saṅghappatto vibbhamati…pe… ubhatobyañjanako paṭijānāti, āhaṭo hoti chando.
ச²ந்த³ஹாரகோ சே, பி⁴க்க²வே, தி³ன்னே ச²ந்தே³ ஸங்க⁴ப்பத்தோ ஸுத்தோ ந ஆரோசேதி, பமத்தோ ந ஆரோசேதி, ஸமாபன்னோ ந ஆரோசேதி, ஆஹடோ ஹோதி ச²ந்தோ³. ச²ந்த³ஹாரகஸ்ஸ அனாபத்தி.
Chandahārako ce, bhikkhave, dinne chande saṅghappatto sutto na āroceti, pamatto na āroceti, samāpanno na āroceti, āhaṭo hoti chando. Chandahārakassa anāpatti.
ச²ந்த³ஹாரகோ சே, பி⁴க்க²வே, தி³ன்னே ச²ந்தே³ ஸங்க⁴ப்பத்தோ ஸஞ்சிச்ச ந ஆரோசேதி, ஆஹடோ ஹோதி ச²ந்தோ³. ச²ந்த³ஹாரகஸ்ஸ ஆபத்தி து³க்கடஸ்ஸ. அனுஜானாமி, பி⁴க்க²வே, தத³ஹுபோஸதே² பாரிஸுத்³தி⁴ங் தெ³ந்தேன ச²ந்த³ம்பி தா³துங், ஸந்தி ஸங்க⁴ஸ்ஸ கரணீயந்தி.
Chandahārako ce, bhikkhave, dinne chande saṅghappatto sañcicca na āroceti, āhaṭo hoti chando. Chandahārakassa āpatti dukkaṭassa. Anujānāmi, bhikkhave, tadahuposathe pārisuddhiṃ dentena chandampi dātuṃ, santi saṅghassa karaṇīyanti.
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / ச²ந்த³தா³னகதா² • Chandadānakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / ச²ந்த³தா³னகதா²வண்ணனா • Chandadānakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / ச²ந்த³தா³னாதி³கதா²வண்ணனா • Chandadānādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / ச²ந்த³தா³னகதா²தி³வண்ணனா • Chandadānakathādivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 88. ச²ந்த³தா³னகதா² • 88. Chandadānakathā
