| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
৮৮. ছন্দদানকথা
88. Chandadānakathā
১৬৫. ছন্দদানেপি ৰিনিচ্ছযো ৰেদিতব্বোতি যোজনা। উপোসথো কতো হোতীতি পারিসুদ্ধিদাযকস্স চ সঙ্ঘস্স চ উপোসথো কতো হোতি। অঞ্ঞন্তি উপোসথকম্মতো অঞ্ঞং। যং পন কম্মন্তি সম্বন্ধো। কম্মম্পীতি উপোসথকম্মতো অঞ্ঞং কম্মম্পি। এত্থ চ তদহুপোসথে অত্তনো চ সঙ্ঘস্স চ সচে উপোসথকম্মং হোতি, পারিসুদ্ধিযেৰ দাতব্বা। অথ অঞ্ঞং কম্মং হোতি, ছন্দোযেৰ দাতব্বো। যদি উপোসথকম্মঞ্চ অঞ্ঞকম্মঞ্চ হোতি, পারিসুদ্ধি চ ছন্দো চ দাতব্বো। তং সন্ধায ৰুত্তং ‘‘তদহুপোসথে পারিসুদ্ধিং দেন্তেন ছন্দম্পি দাতু’’ন্তি। সীমায ৰাতি বদ্ধসীমায ৰা। অচ্ছিতুন্তি উপৰেসিতুং। ‘‘আস উপৰেসনে’’তি হি ধাতুপাঠেসু (সদ্দনীতিধাতুমালাযং ১৬ সকারন্তধাতু) ৰুত্তং। সামগ্গী ৰাতি কাযসামগ্গী ৰা।
165. Chandadānepi vinicchayo veditabboti yojanā. Uposatho kato hotīti pārisuddhidāyakassa ca saṅghassa ca uposatho kato hoti. Aññanti uposathakammato aññaṃ. Yaṃ pana kammanti sambandho. Kammampīti uposathakammato aññaṃ kammampi. Ettha ca tadahuposathe attano ca saṅghassa ca sace uposathakammaṃ hoti, pārisuddhiyeva dātabbā. Atha aññaṃ kammaṃ hoti, chandoyeva dātabbo. Yadi uposathakammañca aññakammañca hoti, pārisuddhi ca chando ca dātabbo. Taṃ sandhāya vuttaṃ ‘‘tadahuposathe pārisuddhiṃ dentena chandampi dātu’’nti. Sīmāya vāti baddhasīmāya vā. Acchitunti upavesituṃ. ‘‘Āsa upavesane’’ti hi dhātupāṭhesu (saddanītidhātumālāyaṃ 16 sakārantadhātu) vuttaṃ. Sāmaggī vāti kāyasāmaggī vā.
১৬৭. সরতিপি উপোসথং, নপি সরতীতি এত্থ পিসদ্দস্স অনিযমৰিকপ্পত্থং দস্সেতুং ৰুত্তং ‘‘একদা সরতি, একদা ন সরতী’’তি। ‘‘একন্ত’’ন্তি ইমিনা নেৰ সরতীতি এত্থ এৰসদ্দস্স সন্নিট্ঠানত্থং দস্সেতি। কম্মং ন কোপেতীতি সম্মুতিলদ্ধোপি অলদ্ধোপি উম্মত্তকো কম্মং ন কোপেতি।
167.Saratipi uposathaṃ, napi saratīti ettha pisaddassa aniyamavikappatthaṃ dassetuṃ vuttaṃ ‘‘ekadā sarati, ekadā na saratī’’ti. ‘‘Ekanta’’nti iminā neva saratīti ettha evasaddassa sanniṭṭhānatthaṃ dasseti. Kammaṃ na kopetīti sammutiladdhopi aladdhopi ummattako kammaṃ na kopeti.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi
৮৮. ছন্দদানকথা • 88. Chandadānakathā
৯০. উম্মত্তকসম্মুতি • 90. Ummattakasammuti
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / ছন্দদানকথা • Chandadānakathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ছন্দদানকথাৰণ্ণনা • Chandadānakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ছন্দদানাদিকথাৰণ্ণনা • Chandadānādikathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ছন্দদানকথাদিৰণ্ণনা • Chandadānakathādivaṇṇanā
