| Library / Tipiṭaka / ติปิฎก • Tipiṭaka / มหาวคฺคปาฬิ • Mahāvaggapāḷi |
๘๘. ฉนฺททานกถา
88. Chandadānakathā
๑๖๕. อถ โข ภควา ภิกฺขู อามเนฺตสิ – ‘‘สนฺนิปตถ, ภิกฺขเว, สโงฺฆ กมฺมํ กริสฺสตี’’ติ ฯ เอวํ วุเตฺต อญฺญตโร ภิกฺขุ ภควนฺตํ เอตทโวจ – ‘‘อตฺถิ, ภเนฺต, ภิกฺขุ คิลาโน, โส อนาคโต’’ติฯ อนุชานามิ, ภิกฺขเว, คิลาเนน ภิกฺขุนา ฉนฺทํ ทาตุํฯ เอวญฺจ ปน, ภิกฺขเว, ทาตโพฺพฯ เตน คิลาเนน ภิกฺขุนา เอกํ ภิกฺขุํ อุปสงฺกมิตฺวา เอกํสํ อุตฺตราสงฺคํ กริตฺวา อุกฺกุฎิกํ นิสีทิตฺวา อญฺชลิํ ปคฺคเหตฺวา เอวมสฺส วจนีโย – ‘‘ฉนฺทํ ทมฺมิ, ฉนฺทํ เม หร, ฉนฺทํ เม อาโรเจหี’’ติฯ กาเยน วิญฺญาเปติ, วาจาย วิญฺญาเปติ, กาเยน วาจาย วิญฺญาเปติ, ทิโนฺน โหติ ฉโนฺทฯ น กาเยน วิญฺญาเปติ, น วาจาย วิญฺญาเปติ, น กาเยน วาจาย วิญฺญาเปติ, น ทิโนฺน โหติ ฉโนฺทฯ เอวเญฺจตํ ลเภถ, อิเจฺจตํ กุสลํฯ โน เจ ลเภถ, โส, ภิกฺขเว , คิลาโน ภิกฺขุ มเญฺจน วา ปีเฐน วา สงฺฆมเชฺฌ อาเนตฺวา กมฺมํ กาตพฺพํฯ สเจ, ภิกฺขเว, คิลานุปฎฺฐากานํ ภิกฺขูนํ เอวํ โหติ – ‘‘สเจ โข มยํ คิลานํ ฐานา จาเวสฺสาม, อาพาโธ วา อภิวฑฺฒิสฺสติ กาลํกิริยา วา ภวิสฺสตี’’ติ, น, ภิกฺขเว, คิลาโน ภิกฺขุ ฐานา จาเวตโพฺพฯ สเงฺฆน ตตฺถ คนฺตฺวา กมฺมํ กาตพฺพํฯ น เตฺวว วเคฺคน สเงฺฆน กมฺมํ กาตพฺพํฯ กเรยฺย เจ, อาปตฺติ ทุกฺกฎสฺสฯ
165. Atha kho bhagavā bhikkhū āmantesi – ‘‘sannipatatha, bhikkhave, saṅgho kammaṃ karissatī’’ti . Evaṃ vutte aññataro bhikkhu bhagavantaṃ etadavoca – ‘‘atthi, bhante, bhikkhu gilāno, so anāgato’’ti. Anujānāmi, bhikkhave, gilānena bhikkhunā chandaṃ dātuṃ. Evañca pana, bhikkhave, dātabbo. Tena gilānena bhikkhunā ekaṃ bhikkhuṃ upasaṅkamitvā ekaṃsaṃ uttarāsaṅgaṃ karitvā ukkuṭikaṃ nisīditvā añjaliṃ paggahetvā evamassa vacanīyo – ‘‘chandaṃ dammi, chandaṃ me hara, chandaṃ me ārocehī’’ti. Kāyena viññāpeti, vācāya viññāpeti, kāyena vācāya viññāpeti, dinno hoti chando. Na kāyena viññāpeti, na vācāya viññāpeti, na kāyena vācāya viññāpeti, na dinno hoti chando. Evañcetaṃ labhetha, iccetaṃ kusalaṃ. No ce labhetha, so, bhikkhave , gilāno bhikkhu mañcena vā pīṭhena vā saṅghamajjhe ānetvā kammaṃ kātabbaṃ. Sace, bhikkhave, gilānupaṭṭhākānaṃ bhikkhūnaṃ evaṃ hoti – ‘‘sace kho mayaṃ gilānaṃ ṭhānā cāvessāma, ābādho vā abhivaḍḍhissati kālaṃkiriyā vā bhavissatī’’ti, na, bhikkhave, gilāno bhikkhu ṭhānā cāvetabbo. Saṅghena tattha gantvā kammaṃ kātabbaṃ. Na tveva vaggena saṅghena kammaṃ kātabbaṃ. Kareyya ce, āpatti dukkaṭassa.
ฉนฺทหารโก เจ, ภิกฺขเว, ทิเนฺน ฉเนฺท ตเตฺถว ปกฺกมติ, อญฺญสฺส ทาตโพฺพ ฉโนฺทฯ ฉนฺทหารโก เจ, ภิกฺขเว, ทิเนฺน ฉเนฺท ตเตฺถว วิพฺภมติ…เป.… กาลํกโรติ – สามเณโร ปฎิชานาติ – สิกฺขํ ปจฺจกฺขาตโก ปฎิชานาติ – อนฺติมวตฺถุํ อชฺฌาปนฺนโก ปฎิชานาติ – อุมฺมตฺตโก ปฎิชานาติ – ขิตฺตจิโตฺต ปฎิชานาติ – เวทนาโฎฺฎ ปฎิชานาติ – อาปตฺติยา อทสฺสเน อุกฺขิตฺตโก ปฎิชานาติ – อาปตฺติยา อปฺปฎิกเมฺม อุกฺขิตฺตโก ปฎิชานาติ – ปาปิกาย ทิฎฺฐิยา อปฺปฎินิสฺสเคฺค อุกฺขิตฺตโก ปฎิชานาติ – ปณฺฑโก ปฎิชานาติ – เถยฺยสํวาสโก ปฎิชานาติ – ติตฺถิยปกฺกนฺตโก ปฎิชานาติ – ติรจฺฉานคโต ปฎิชานาติ – มาตุฆาตโก ปฎิชานาติ – ปิตุฆาตโก ปฎิชานาติ – อรหนฺตฆาตโก ปฎิชานาติ – ภิกฺขุนิทูสโก ปฎิชานาติ – สงฺฆเภทโก ปฎิชานาติ – โลหิตุปฺปาทโก ปฎิชานาติ – อุภโตพฺยญฺชนโก ปฎิชานาติ, อญฺญสฺส ทาตโพฺพ ฉโนฺทฯ
Chandahārako ce, bhikkhave, dinne chande tattheva pakkamati, aññassa dātabbo chando. Chandahārako ce, bhikkhave, dinne chande tattheva vibbhamati…pe… kālaṃkaroti – sāmaṇero paṭijānāti – sikkhaṃ paccakkhātako paṭijānāti – antimavatthuṃ ajjhāpannako paṭijānāti – ummattako paṭijānāti – khittacitto paṭijānāti – vedanāṭṭo paṭijānāti – āpattiyā adassane ukkhittako paṭijānāti – āpattiyā appaṭikamme ukkhittako paṭijānāti – pāpikāya diṭṭhiyā appaṭinissagge ukkhittako paṭijānāti – paṇḍako paṭijānāti – theyyasaṃvāsako paṭijānāti – titthiyapakkantako paṭijānāti – tiracchānagato paṭijānāti – mātughātako paṭijānāti – pitughātako paṭijānāti – arahantaghātako paṭijānāti – bhikkhunidūsako paṭijānāti – saṅghabhedako paṭijānāti – lohituppādako paṭijānāti – ubhatobyañjanako paṭijānāti, aññassa dātabbo chando.
ฉนฺทหารโก เจ, ภิกฺขเว, ทิเนฺน ฉเนฺท อนฺตรามเคฺค ปกฺกมติ, อนาหโฎ โหติ ฉโนฺทฯ ฉนฺทหารโก เจ, ภิกฺขเว, ทิเนฺน ฉเนฺท อนฺตรามเคฺค วิพฺภมติ…เป.… อุภโตพฺยญฺชนโก ปฎิชานาติ, อนาหโฎ โหติ ฉโนฺทฯ
Chandahārako ce, bhikkhave, dinne chande antarāmagge pakkamati, anāhaṭo hoti chando. Chandahārako ce, bhikkhave, dinne chande antarāmagge vibbhamati…pe… ubhatobyañjanako paṭijānāti, anāhaṭo hoti chando.
ฉนฺทหารโก เจ, ภิกฺขเว, ทิเนฺน ฉเนฺท สงฺฆปฺปโตฺต ปกฺกมติ, อาหโฎ โหติ ฉโนฺทฯ ฉนฺทหารโก เจ, ภิกฺขเว, ทิเนฺน ฉเนฺท สงฺฆปฺปโตฺต วิพฺภมติ…เป.… อุภโตพฺยญฺชนโก ปฎิชานาติ, อาหโฎ โหติ ฉโนฺทฯ
Chandahārako ce, bhikkhave, dinne chande saṅghappatto pakkamati, āhaṭo hoti chando. Chandahārako ce, bhikkhave, dinne chande saṅghappatto vibbhamati…pe… ubhatobyañjanako paṭijānāti, āhaṭo hoti chando.
ฉนฺทหารโก เจ, ภิกฺขเว, ทิเนฺน ฉเนฺท สงฺฆปฺปโตฺต สุโตฺต น อาโรเจติ, ปมโตฺต น อาโรเจติ, สมาปโนฺน น อาโรเจติ, อาหโฎ โหติ ฉโนฺทฯ ฉนฺทหารกสฺส อนาปตฺติฯ
Chandahārako ce, bhikkhave, dinne chande saṅghappatto sutto na āroceti, pamatto na āroceti, samāpanno na āroceti, āhaṭo hoti chando. Chandahārakassa anāpatti.
ฉนฺทหารโก เจ, ภิกฺขเว, ทิเนฺน ฉเนฺท สงฺฆปฺปโตฺต สญฺจิจฺจ น อาโรเจติ, อาหโฎ โหติ ฉโนฺทฯ ฉนฺทหารกสฺส อาปตฺติ ทุกฺกฎสฺสฯ อนุชานามิ, ภิกฺขเว, ตทหุโปสเถ ปาริสุทฺธิํ เทเนฺตน ฉนฺทมฺปิ ทาตุํ, สนฺติ สงฺฆสฺส กรณียนฺติฯ
Chandahārako ce, bhikkhave, dinne chande saṅghappatto sañcicca na āroceti, āhaṭo hoti chando. Chandahārakassa āpatti dukkaṭassa. Anujānāmi, bhikkhave, tadahuposathe pārisuddhiṃ dentena chandampi dātuṃ, santi saṅghassa karaṇīyanti.
Related texts:
อฎฺฐกถา • Aṭṭhakathā / วินยปิฎก (อฎฺฐกถา) • Vinayapiṭaka (aṭṭhakathā) / มหาวคฺค-อฎฺฐกถา • Mahāvagga-aṭṭhakathā / ฉนฺททานกถา • Chandadānakathā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / สารตฺถทีปนี-ฎีกา • Sāratthadīpanī-ṭīkā / ฉนฺททานกถาวณฺณนา • Chandadānakathāvaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วชิรพุทฺธิ-ฎีกา • Vajirabuddhi-ṭīkā / ฉนฺททานาทิกถาวณฺณนา • Chandadānādikathāvaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วิมติวิโนทนี-ฎีกา • Vimativinodanī-ṭīkā / ฉนฺททานกถาทิวณฺณนา • Chandadānakathādivaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / ปาจิตฺยาทิโยชนาปาฬิ • Pācityādiyojanāpāḷi / ๘๘. ฉนฺททานกถา • 88. Chandadānakathā
