| Library / Tipiṭaka / திபிடக • Tipiṭaka / கு²த்³த³ஸிக்கா²-மூலஸிக்கா² • Khuddasikkhā-mūlasikkhā |
43. ச²ந்த³தா³னநித்³தே³ஸவண்ணனா
43. Chandadānaniddesavaṇṇanā
399. கம்மப்பத்தேதி உபோஸதா²தி³னோ கம்மஸ்ஸ பத்தே யுத்தே அனுரூபே. ஸங்கே⁴ ஸமாக³தேதி சதுவக்³கா³தி³கே ஸங்கே⁴ ஏகத்த² ஸன்னிபதிதே. எத்த² ச ச²ந்த³ஹாரகேனாபி ஸத்³தி⁴ங் சதுவக்³கா³தி³கோ வேதி³தப்³போ³.
399.Kammappatteti uposathādino kammassa patte yutte anurūpe. Saṅghe samāgateti catuvaggādike saṅghe ekattha sannipatite. Ettha ca chandahārakenāpi saddhiṃ catuvaggādiko veditabbo.
400. ச²ந்த³தா³னாதி³விதி⁴ங் த³ஸ்ஸேதுங் ‘‘ஏக’’ந்திஆதி³மாஹ. உபாக³ம்மாதி ஸந்திங் ஆபத்திங் பகாஸெத்வா ததோ பச்சா² உபக³ந்த்வா. ச²ந்த³ங் த³தே³தி வக்க²மானேஸு தீஸு ஏகேனபி ப³ஹி உபோஸத²ங் கத்வா ஆக³தோ ச²ந்த³ங் த³தெ³ய்ய, கேனசி கரணீயேன ஸன்னிபாதட்டா²னங் க³ந்த்வா காயஸாமக்³கி³ங் அதெ³ந்தோ பன பாரிஸுத்³தி⁴ங் தெ³ந்தோ ச²ந்த³ங் த³தெ³ய்ய.
400. Chandadānādividhiṃ dassetuṃ ‘‘eka’’ntiādimāha. Upāgammāti santiṃ āpattiṃ pakāsetvā tato pacchā upagantvā. Chandaṃ dadeti vakkhamānesu tīsu ekenapi bahi uposathaṃ katvā āgato chandaṃ dadeyya, kenaci karaṇīyena sannipātaṭṭhānaṃ gantvā kāyasāmaggiṃ adento pana pārisuddhiṃ dento chandaṃ dadeyya.
402. உபி⁴ன்னங் தா³னே கிங்பயோஜனந்தி ஆஹ ‘‘பாரிஸுத்³தீ⁴’’திஆதி³. பாரிஸுத்³தி⁴ப்பதா³னேன ஸங்க⁴ஸ்ஸ அத்தனோ சாபி உபோஸத²ங் ஸம்பாதே³தீதி ஸம்ப³ந்தோ⁴. பரிஸுத்³தி⁴ ஏவ பாரிஸுத்³தி⁴, தஸ்ஸ பதா³னங், தேன. நனு ச பாரிஸுத்³தி⁴தாபதா³னமத்தமேவ உபோஸத²கம்மங் நாமாதி பாரிஸுத்³தி⁴ப்பதா³னங் அத்தனோ உபோஸத²ங் ஸம்பாதே³து, கத²ங் ஸங்க⁴ஸ்ஸாதி? வுச்சதே – பாரிஸுத்³தி⁴தா³னஸ்ஸ த⁴ம்மகம்மதாஸம்பாத³னேன ஸங்க⁴ஸ்ஸாபி உபோஸத²ங் ஸம்பாதே³தீதி.
402. Ubhinnaṃ dāne kiṃpayojananti āha ‘‘pārisuddhī’’tiādi. Pārisuddhippadānena saṅghassa attano cāpi uposathaṃ sampādetīti sambandho. Parisuddhi eva pārisuddhi, tassa padānaṃ, tena. Nanu ca pārisuddhitāpadānamattameva uposathakammaṃ nāmāti pārisuddhippadānaṃ attano uposathaṃ sampādetu, kathaṃ saṅghassāti? Vuccate – pārisuddhidānassa dhammakammatāsampādanena saṅghassāpi uposathaṃ sampādetīti.
எத்த² பன சதூஸு ஏகஸ்ஸ ச²ந்த³பாரிஸுத்³தி⁴ங் ஆஹரித்வா தயோ பாரிஸுத்³தி⁴உபோஸத²ங் கரொந்தி, தீஸு வா ஏகஸ்ஸ ச²ந்த³பாரிஸுத்³தி⁴ங் ஆஹரித்வா த்³வே பாதிமொக்க²ங் உத்³தி³ஸந்தி, அத⁴ம்மேன வக்³க³ங் உபோஸத²கம்மங். சத்தாரோ பாரிஸுத்³தி⁴உபோஸத²ங் கரொந்தி, தயோ வா த்³வே வா பாதிமொக்க²ங் உத்³தி³ஸந்தி, அத⁴ம்மேன ஸமக்³க³ங். சதூஸு ஏகஸ்ஸ ஆஹரித்வா தயோ பாதிமொக்க²ங் உத்³தி³ஸந்தி, தீஸு வா ஏகஸ்ஸ ஆஹரித்வா த்³வே பாரிஸுத்³தி⁴உபோஸத²ங் கரொந்தி, த⁴ம்மேன வக்³க³ங். ஸசே பன சத்தாரோ ஸன்னிபதித்வா பாதிமொக்க²ங் உத்³தி³ஸந்தி, தயோ பாரிஸுத்³தி⁴உபோஸத²ங், த்³வே அஞ்ஞமஞ்ஞங் பாரிஸுத்³தி⁴உபோஸத²ங் கரொந்தி, த⁴ம்மேன ஸமக்³க³ங். பவாரணகம்மேஸுபி பஞ்சஸு ஏகஸ்ஸ பவாரணங் ஆஹரித்வா சத்தாரோ க³ணஞத்திங் ட²பெத்வா பவாரெந்தி, சதூஸு தீஸு வா ஏகஸ்ஸ ஆஹரித்வா தயோ த்³வே வா ஸங்க⁴ஞத்திங் ட²பெத்வா பவாரெந்தி, அத⁴ம்மேன வக்³க³ங் பவாரணகம்மந்திஆதி³ வுத்தனயமேவ. ஸேஸகம்மங் விபா³த⁴தீதி அவஸேஸஸங்க⁴கிச்சங் விபா³தே⁴தி அலத்³தா⁴தி⁴ப்பாயத்தாதி அதி⁴ப்பாயோ.
Ettha pana catūsu ekassa chandapārisuddhiṃ āharitvā tayo pārisuddhiuposathaṃ karonti, tīsu vā ekassa chandapārisuddhiṃ āharitvā dve pātimokkhaṃ uddisanti, adhammena vaggaṃ uposathakammaṃ. Cattāro pārisuddhiuposathaṃ karonti, tayo vā dve vā pātimokkhaṃ uddisanti, adhammena samaggaṃ. Catūsu ekassa āharitvā tayo pātimokkhaṃ uddisanti, tīsu vā ekassa āharitvā dve pārisuddhiuposathaṃ karonti, dhammena vaggaṃ. Sace pana cattāro sannipatitvā pātimokkhaṃ uddisanti, tayo pārisuddhiuposathaṃ, dve aññamaññaṃ pārisuddhiuposathaṃ karonti, dhammena samaggaṃ. Pavāraṇakammesupi pañcasu ekassa pavāraṇaṃ āharitvā cattāro gaṇañattiṃ ṭhapetvā pavārenti, catūsu tīsu vā ekassa āharitvā tayo dve vā saṅghañattiṃ ṭhapetvā pavārenti, adhammena vaggaṃ pavāraṇakammantiādi vuttanayameva. Sesakammaṃ vibādhatīti avasesasaṅghakiccaṃ vibādheti aladdhādhippāyattāti adhippāyo.
403. த்³வயந்தி உபோஸத²கரணஞ்சேவ அவஸேஸகிச்சஞ்ச. அத்தனோ ந ஸாதே⁴தீதி ஸம்ப³ந்த⁴னீயங்.
403.Dvayanti uposathakaraṇañceva avasesakiccañca. Attano na sādhetīti sambandhanīyaṃ.
404. ஹரெய்யாதி புப்³பே³ வுத்தங் ஸுத்³தி⁴கச²ந்த³ங் வா இமங் வா ச²ந்த³பாரிஸுத்³தி⁴ங் ஹரெய்ய. பரம்பரா ந ஹாரயேதி பரம்பரா ந ஆஹரெய்ய. கஸ்மாதி ஆஹ ‘‘பரம்பராஹடா’’திஆதி³. தேனாதி பட²மதோ க³ஹிதச²ந்த³பாரிஸுத்³தி⁴கேன. பரம்பராஹடாதி யதா² பி³ளாலஸங்க²லிகாய பட²மங் வலயங் து³தியங் பாபுணாதி, ததியங் ந பாபுணாதி, ஏவங் து³தியஸ்ஸ ஆக³ச்ச²தி, ததியஸ்ஸ ந ஆக³ச்ச²தி. ‘‘பரிம்பராஹடா ச²ந்த³-பாரிஸுத்³தி⁴ ந க³ச்ச²தீ’’தி வா பாடோ².
404.Hareyyāti pubbe vuttaṃ suddhikachandaṃ vā imaṃ vā chandapārisuddhiṃ hareyya. Paramparā na hārayeti paramparā na āhareyya. Kasmāti āha ‘‘paramparāhaṭā’’tiādi. Tenāti paṭhamato gahitachandapārisuddhikena. Paramparāhaṭāti yathā biḷālasaṅkhalikāya paṭhamaṃ valayaṃ dutiyaṃ pāpuṇāti, tatiyaṃ na pāpuṇāti, evaṃ dutiyassa āgacchati, tatiyassa na āgacchati. ‘‘Parimparāhaṭā chanda-pārisuddhi na gacchatī’’ti vā pāṭho.
405. ஸப்³பூ³பசாரந்தி ‘‘ஏகங்ஸங் சீவரங் கத்வா’’ திஆதி³ ஸப்³ப³ங் உபசாரங்.
405.Sabbūpacāranti ‘‘ekaṃsaṃ cīvaraṃ katvā’’ tiādi sabbaṃ upacāraṃ.
406. ஸோ ஆக³தோ ஆரோசெத்வா ஸங்க⁴ங் பவாரெய்யாதி யோஜனா. அதா²தி அனந்தரத்தே². ஆக³தோதி பவாரணங் க³ஹெத்வா ஆக³தோ பி⁴க்கு². ஆரோசெத்வாதி பி⁴க்கு²ஸங்க⁴ஸ்ஸ ஆரோசெத்வா. ஏவந்தி வக்க²மானக்கமேன.
406. So āgato ārocetvā saṅghaṃ pavāreyyāti yojanā. Athāti anantaratthe. Āgatoti pavāraṇaṃ gahetvā āgato bhikkhu. Ārocetvāti bhikkhusaṅghassa ārocetvā. Evanti vakkhamānakkamena.
407-8. க³ஹெத்வா ஹாரகோதி ஸம்ப³ந்தோ⁴. நாஹடாதி ஆஹடாவ ந ஹோதீதி அத்தோ². ஹாரகோ ஸங்க⁴ங் பத்வா ததா² ஹெய்ய, ஆஹடா ஹோதீதி யோஜனா. ததா² ஹெய்யாதி விப்³ப⁴ந்தாதி³கோ ப⁴வெய்ய.
407-8. Gahetvā hārakoti sambandho. Nāhaṭāti āhaṭāva na hotīti attho. Hārako saṅghaṃ patvā tathā heyya, āhaṭā hotīti yojanā. Tathā heyyāti vibbhantādiko bhaveyya.
409. ஸங்க⁴ங் பத்தோ பமத்தோ வா ஸுத்தோ வா நாரோசயெய்ய அனாபத்தி சாதி ஸம்ப³ந்தோ⁴. ச-ஸத்³தோ³ ச²ந்த³பாரிஸுத்³தி⁴ஹரணங் ஸம்பிண்டே³தீதி.
409. Saṅghaṃ patto pamatto vā sutto vā nārocayeyya anāpatti cāti sambandho. Ca-saddo chandapārisuddhiharaṇaṃ sampiṇḍetīti.
ச²ந்த³தா³னநித்³தே³ஸவண்ணனா நிட்டி²தா.
Chandadānaniddesavaṇṇanā niṭṭhitā.
