| Library / Tipiṭaka / တိပိဋက • Tipiṭaka / ခုဒ္ဒသိက္ခာ-မူလသိက္ခာ • Khuddasikkhā-mūlasikkhā |
၄၃. ဆန္ဒဒာနနိဒ္ဒေသဝဏ္ဏနာ
43. Chandadānaniddesavaṇṇanā
၃၉၉. ကမ္မပ္ပတ္တေတိ ဥပောသထာဒိနော ကမ္မသ္သ ပတ္တေ ယုတ္တေ အနုရူပေ။ သင္ဃေ သမာဂတေတိ စတုဝဂ္ဂာဒိကေ သင္ဃေ ဧကတ္ထ သန္နိပတိတေ။ ဧတ္ထ စ ဆန္ဒဟာရကေနာပိ သဒ္ဓိံ စတုဝဂ္ဂာဒိကော ဝေဒိတဗ္ဗော။
399.Kammappatteti uposathādino kammassa patte yutte anurūpe. Saṅghe samāgateti catuvaggādike saṅghe ekattha sannipatite. Ettha ca chandahārakenāpi saddhiṃ catuvaggādiko veditabbo.
၄၀၀. ဆန္ဒဒာနာဒိဝိဓိံ ဒသ္သေတုံ ‘‘ဧက’’န္တိအာဒိမာဟ။ ဥပာဂမ္မာတိ သန္တိံ အာပတ္တိံ ပကာသေတ္ဝာ တတော ပစ္ဆာ ဥပဂန္တ္ဝာ။ ဆန္ဒံ ဒဒေတိ ဝက္ခမာနေသု တီသု ဧကေနပိ ဗဟိ ဥပောသထံ ကတ္ဝာ အာဂတော ဆန္ဒံ ဒဒေယ္ယ, ကေနစိ ကရဏီယေန သန္နိပာတဋ္ဌာနံ ဂန္တ္ဝာ ကာယသာမဂ္ဂိံ အဒေန္တော ပန ပာရိသုဒ္ဓိံ ဒေန္တော ဆန္ဒံ ဒဒေယ္ယ။
400. Chandadānādividhiṃ dassetuṃ ‘‘eka’’ntiādimāha. Upāgammāti santiṃ āpattiṃ pakāsetvā tato pacchā upagantvā. Chandaṃ dadeti vakkhamānesu tīsu ekenapi bahi uposathaṃ katvā āgato chandaṃ dadeyya, kenaci karaṇīyena sannipātaṭṭhānaṃ gantvā kāyasāmaggiṃ adento pana pārisuddhiṃ dento chandaṃ dadeyya.
၄၀၂. ဥဘိန္နံ ဒာနေ ကိံပယောဇနန္တိ အာဟ ‘‘ပာရိသုဒ္ဓီ’’တိအာဒိ။ ပာရိသုဒ္ဓိပ္ပဒာနေန သင္ဃသ္သ အတ္တနော စာပိ ဥပောသထံ သမ္ပာဒေတီတိ သမ္ဗန္ဓော။ ပရိသုဒ္ဓိ ဧဝ ပာရိသုဒ္ဓိ, တသ္သ ပဒာနံ, တေန။ နနု စ ပာရိသုဒ္ဓိတာပဒာနမတ္တမေဝ ဥပောသထကမ္မံ နာမာတိ ပာရိသုဒ္ဓိပ္ပဒာနံ အတ္တနော ဥပောသထံ သမ္ပာဒေတု, ကထံ သင္ဃသ္သာတိ? ဝုစ္စတေ – ပာရိသုဒ္ဓိဒာနသ္သ ဓမ္မကမ္မတာသမ္ပာဒနေန သင္ဃသ္သာပိ ဥပောသထံ သမ္ပာဒေတီတိ။
402. Ubhinnaṃ dāne kiṃpayojananti āha ‘‘pārisuddhī’’tiādi. Pārisuddhippadānena saṅghassa attano cāpi uposathaṃ sampādetīti sambandho. Parisuddhi eva pārisuddhi, tassa padānaṃ, tena. Nanu ca pārisuddhitāpadānamattameva uposathakammaṃ nāmāti pārisuddhippadānaṃ attano uposathaṃ sampādetu, kathaṃ saṅghassāti? Vuccate – pārisuddhidānassa dhammakammatāsampādanena saṅghassāpi uposathaṃ sampādetīti.
ဧတ္ထ ပန စတူသု ဧကသ္သ ဆန္ဒပာရိသုဒ္ဓိံ အာဟရိတ္ဝာ တယော ပာရိသုဒ္ဓိဥပောသထံ ကရောန္တိ, တီသု ဝာ ဧကသ္သ ဆန္ဒပာရိသုဒ္ဓိံ အာဟရိတ္ဝာ ဒ္ဝေ ပာတိမောက္ခံ ဥဒ္ဒိသန္တိ, အဓမ္မေန ဝဂ္ဂံ ဥပောသထကမ္မံ။ စတ္တာရော ပာရိသုဒ္ဓိဥပောသထံ ကရောန္တိ, တယော ဝာ ဒ္ဝေ ဝာ ပာတိမောက္ခံ ဥဒ္ဒိသန္တိ, အဓမ္မေန သမဂ္ဂံ။ စတူသု ဧကသ္သ အာဟရိတ္ဝာ တယော ပာတိမောက္ခံ ဥဒ္ဒိသန္တိ, တီသု ဝာ ဧကသ္သ အာဟရိတ္ဝာ ဒ္ဝေ ပာရိသုဒ္ဓိဥပောသထံ ကရောန္တိ, ဓမ္မေန ဝဂ္ဂံ။ သစေ ပန စတ္တာရော သန္နိပတိတ္ဝာ ပာတိမောက္ခံ ဥဒ္ဒိသန္တိ, တယော ပာရိသုဒ္ဓိဥပောသထံ, ဒ္ဝေ အညမညံ ပာရိသုဒ္ဓိဥပောသထံ ကရောန္တိ, ဓမ္မေန သမဂ္ဂံ။ ပဝာရဏကမ္မေသုပိ ပဉ္စသု ဧကသ္သ ပဝာရဏံ အာဟရိတ္ဝာ စတ္တာရော ဂဏဉတ္တိံ ဌပေတ္ဝာ ပဝာရေန္တိ, စတူသု တီသု ဝာ ဧကသ္သ အာဟရိတ္ဝာ တယော ဒ္ဝေ ဝာ သင္ဃဉတ္တိံ ဌပေတ္ဝာ ပဝာရေန္တိ, အဓမ္မေန ဝဂ္ဂံ ပဝာရဏကမ္မန္တိအာဒိ ဝုတ္တနယမေဝ။ သေသကမ္မံ ဝိဗာဓတီတိ အဝသေသသင္ဃကိစ္စံ ဝိဗာဓေတိ အလဒ္ဓာဓိပ္ပာယတ္တာတိ အဓိပ္ပာယော။
Ettha pana catūsu ekassa chandapārisuddhiṃ āharitvā tayo pārisuddhiuposathaṃ karonti, tīsu vā ekassa chandapārisuddhiṃ āharitvā dve pātimokkhaṃ uddisanti, adhammena vaggaṃ uposathakammaṃ. Cattāro pārisuddhiuposathaṃ karonti, tayo vā dve vā pātimokkhaṃ uddisanti, adhammena samaggaṃ. Catūsu ekassa āharitvā tayo pātimokkhaṃ uddisanti, tīsu vā ekassa āharitvā dve pārisuddhiuposathaṃ karonti, dhammena vaggaṃ. Sace pana cattāro sannipatitvā pātimokkhaṃ uddisanti, tayo pārisuddhiuposathaṃ, dve aññamaññaṃ pārisuddhiuposathaṃ karonti, dhammena samaggaṃ. Pavāraṇakammesupi pañcasu ekassa pavāraṇaṃ āharitvā cattāro gaṇañattiṃ ṭhapetvā pavārenti, catūsu tīsu vā ekassa āharitvā tayo dve vā saṅghañattiṃ ṭhapetvā pavārenti, adhammena vaggaṃ pavāraṇakammantiādi vuttanayameva. Sesakammaṃ vibādhatīti avasesasaṅghakiccaṃ vibādheti aladdhādhippāyattāti adhippāyo.
၄၀၃. ဒ္ဝယန္တိ ဥပောသထကရဏဉ္စေဝ အဝသေသကိစ္စဉ္စ။ အတ္တနော န သာဓေတီတိ သမ္ဗန္ဓနီယံ။
403.Dvayanti uposathakaraṇañceva avasesakiccañca. Attano na sādhetīti sambandhanīyaṃ.
၄၀၄. ဟရေယ္ယာတိ ပုဗ္ဗေ ဝုတ္တံ သုဒ္ဓိကဆန္ဒံ ဝာ ဣမံ ဝာ ဆန္ဒပာရိသုဒ္ဓိံ ဟရေယ္ယ။ ပရမ္ပရာ န ဟာရယေတိ ပရမ္ပရာ န အာဟရေယ္ယ။ ကသ္မာတိ အာဟ ‘‘ပရမ္ပရာဟဋာ’’တိအာဒိ။ တေနာတိ ပဌမတော ဂဟိတဆန္ဒပာရိသုဒ္ဓိကေန။ ပရမ္ပရာဟဋာတိ ယထာ ဗိဠာလသင္ခလိကာယ ပဌမံ ဝလယံ ဒုတိယံ ပာပုဏာတိ, တတိယံ န ပာပုဏာတိ, ဧဝံ ဒုတိယသ္သ အာဂစ္ဆတိ, တတိယသ္သ န အာဂစ္ဆတိ။ ‘‘ပရိမ္ပရာဟဋာ ဆန္ဒ-ပာရိသုဒ္ဓိ န ဂစ္ဆတီ’’တိ ဝာ ပာဌော။
404.Hareyyāti pubbe vuttaṃ suddhikachandaṃ vā imaṃ vā chandapārisuddhiṃ hareyya. Paramparā na hārayeti paramparā na āhareyya. Kasmāti āha ‘‘paramparāhaṭā’’tiādi. Tenāti paṭhamato gahitachandapārisuddhikena. Paramparāhaṭāti yathā biḷālasaṅkhalikāya paṭhamaṃ valayaṃ dutiyaṃ pāpuṇāti, tatiyaṃ na pāpuṇāti, evaṃ dutiyassa āgacchati, tatiyassa na āgacchati. ‘‘Parimparāhaṭā chanda-pārisuddhi na gacchatī’’ti vā pāṭho.
၄၀၅. သဗ္ဗူပစာရန္တိ ‘‘ဧကံသံ စီဝရံ ကတ္ဝာ’’ တိအာဒိ သဗ္ဗံ ဥပစာရံ။
405.Sabbūpacāranti ‘‘ekaṃsaṃ cīvaraṃ katvā’’ tiādi sabbaṃ upacāraṃ.
၄၀၆. သော အာဂတော အာရောစေတ္ဝာ သင္ဃံ ပဝာရေယ္ယာတိ ယောဇနာ။ အထာတိ အနန္တရတ္ထေ။ အာဂတောတိ ပဝာရဏံ ဂဟေတ္ဝာ အာဂတော ဘိက္ခု။ အာရောစေတ္ဝာတိ ဘိက္ခုသင္ဃသ္သ အာရောစေတ္ဝာ။ ဧဝန္တိ ဝက္ခမာနက္ကမေန။
406. So āgato ārocetvā saṅghaṃ pavāreyyāti yojanā. Athāti anantaratthe. Āgatoti pavāraṇaṃ gahetvā āgato bhikkhu. Ārocetvāti bhikkhusaṅghassa ārocetvā. Evanti vakkhamānakkamena.
၄၀၇-၈. ဂဟေတ္ဝာ ဟာရကောတိ သမ္ဗန္ဓော။ နာဟဋာတိ အာဟဋာဝ န ဟောတီတိ အတ္ထော။ ဟာရကော သင္ဃံ ပတ္ဝာ တထာ ဟေယ္ယ, အာဟဋာ ဟောတီတိ ယောဇနာ။ တထာ ဟေယ္ယာတိ ဝိဗ္ဘန္တာဒိကော ဘဝေယ္ယ။
407-8. Gahetvā hārakoti sambandho. Nāhaṭāti āhaṭāva na hotīti attho. Hārako saṅghaṃ patvā tathā heyya, āhaṭā hotīti yojanā. Tathā heyyāti vibbhantādiko bhaveyya.
၄၀၉. သင္ဃံ ပတ္တော ပမတ္တော ဝာ သုတ္တော ဝာ နာရောစယေယ္ယ အနာပတ္တိ စာတိ သမ္ဗန္ဓော။ စ-သဒ္ဒော ဆန္ဒပာရိသုဒ္ဓိဟရဏံ သမ္ပိဏ္ဍေတီတိ။
409. Saṅghaṃ patto pamatto vā sutto vā nārocayeyya anāpatti cāti sambandho. Ca-saddo chandapārisuddhiharaṇaṃ sampiṇḍetīti.
ဆန္ဒဒာနနိဒ္ဒေသဝဏ္ဏနာ နိဋ္ဌိတာ။
Chandadānaniddesavaṇṇanā niṭṭhitā.
