| Library / Tipiṭaka / ತಿಪಿಟಕ • Tipiṭaka / ಖುದ್ದಸಿಕ್ಖಾ-ಮೂಲಸಿಕ್ಖಾ • Khuddasikkhā-mūlasikkhā |
೪೩. ಛನ್ದದಾನನಿದ್ದೇಸವಣ್ಣನಾ
43. Chandadānaniddesavaṇṇanā
೩೯೯. ಕಮ್ಮಪ್ಪತ್ತೇತಿ ಉಪೋಸಥಾದಿನೋ ಕಮ್ಮಸ್ಸ ಪತ್ತೇ ಯುತ್ತೇ ಅನುರೂಪೇ। ಸಙ್ಘೇ ಸಮಾಗತೇತಿ ಚತುವಗ್ಗಾದಿಕೇ ಸಙ್ಘೇ ಏಕತ್ಥ ಸನ್ನಿಪತಿತೇ। ಏತ್ಥ ಚ ಛನ್ದಹಾರಕೇನಾಪಿ ಸದ್ಧಿಂ ಚತುವಗ್ಗಾದಿಕೋ ವೇದಿತಬ್ಬೋ।
399.Kammappatteti uposathādino kammassa patte yutte anurūpe. Saṅghe samāgateti catuvaggādike saṅghe ekattha sannipatite. Ettha ca chandahārakenāpi saddhiṃ catuvaggādiko veditabbo.
೪೦೦. ಛನ್ದದಾನಾದಿವಿಧಿಂ ದಸ್ಸೇತುಂ ‘‘ಏಕ’’ನ್ತಿಆದಿಮಾಹ। ಉಪಾಗಮ್ಮಾತಿ ಸನ್ತಿಂ ಆಪತ್ತಿಂ ಪಕಾಸೇತ್ವಾ ತತೋ ಪಚ್ಛಾ ಉಪಗನ್ತ್ವಾ। ಛನ್ದಂ ದದೇತಿ ವಕ್ಖಮಾನೇಸು ತೀಸು ಏಕೇನಪಿ ಬಹಿ ಉಪೋಸಥಂ ಕತ್ವಾ ಆಗತೋ ಛನ್ದಂ ದದೇಯ್ಯ, ಕೇನಚಿ ಕರಣೀಯೇನ ಸನ್ನಿಪಾತಟ್ಠಾನಂ ಗನ್ತ್ವಾ ಕಾಯಸಾಮಗ್ಗಿಂ ಅದೇನ್ತೋ ಪನ ಪಾರಿಸುದ್ಧಿಂ ದೇನ್ತೋ ಛನ್ದಂ ದದೇಯ್ಯ।
400. Chandadānādividhiṃ dassetuṃ ‘‘eka’’ntiādimāha. Upāgammāti santiṃ āpattiṃ pakāsetvā tato pacchā upagantvā. Chandaṃ dadeti vakkhamānesu tīsu ekenapi bahi uposathaṃ katvā āgato chandaṃ dadeyya, kenaci karaṇīyena sannipātaṭṭhānaṃ gantvā kāyasāmaggiṃ adento pana pārisuddhiṃ dento chandaṃ dadeyya.
೪೦೨. ಉಭಿನ್ನಂ ದಾನೇ ಕಿಂಪಯೋಜನನ್ತಿ ಆಹ ‘‘ಪಾರಿಸುದ್ಧೀ’’ತಿಆದಿ। ಪಾರಿಸುದ್ಧಿಪ್ಪದಾನೇನ ಸಙ್ಘಸ್ಸ ಅತ್ತನೋ ಚಾಪಿ ಉಪೋಸಥಂ ಸಮ್ಪಾದೇತೀತಿ ಸಮ್ಬನ್ಧೋ। ಪರಿಸುದ್ಧಿ ಏವ ಪಾರಿಸುದ್ಧಿ, ತಸ್ಸ ಪದಾನಂ, ತೇನ। ನನು ಚ ಪಾರಿಸುದ್ಧಿತಾಪದಾನಮತ್ತಮೇವ ಉಪೋಸಥಕಮ್ಮಂ ನಾಮಾತಿ ಪಾರಿಸುದ್ಧಿಪ್ಪದಾನಂ ಅತ್ತನೋ ಉಪೋಸಥಂ ಸಮ್ಪಾದೇತು, ಕಥಂ ಸಙ್ಘಸ್ಸಾತಿ? ವುಚ್ಚತೇ – ಪಾರಿಸುದ್ಧಿದಾನಸ್ಸ ಧಮ್ಮಕಮ್ಮತಾಸಮ್ಪಾದನೇನ ಸಙ್ಘಸ್ಸಾಪಿ ಉಪೋಸಥಂ ಸಮ್ಪಾದೇತೀತಿ।
402. Ubhinnaṃ dāne kiṃpayojananti āha ‘‘pārisuddhī’’tiādi. Pārisuddhippadānena saṅghassa attano cāpi uposathaṃ sampādetīti sambandho. Parisuddhi eva pārisuddhi, tassa padānaṃ, tena. Nanu ca pārisuddhitāpadānamattameva uposathakammaṃ nāmāti pārisuddhippadānaṃ attano uposathaṃ sampādetu, kathaṃ saṅghassāti? Vuccate – pārisuddhidānassa dhammakammatāsampādanena saṅghassāpi uposathaṃ sampādetīti.
ಏತ್ಥ ಪನ ಚತೂಸು ಏಕಸ್ಸ ಛನ್ದಪಾರಿಸುದ್ಧಿಂ ಆಹರಿತ್ವಾ ತಯೋ ಪಾರಿಸುದ್ಧಿಉಪೋಸಥಂ ಕರೋನ್ತಿ, ತೀಸು ವಾ ಏಕಸ್ಸ ಛನ್ದಪಾರಿಸುದ್ಧಿಂ ಆಹರಿತ್ವಾ ದ್ವೇ ಪಾತಿಮೋಕ್ಖಂ ಉದ್ದಿಸನ್ತಿ, ಅಧಮ್ಮೇನ ವಗ್ಗಂ ಉಪೋಸಥಕಮ್ಮಂ। ಚತ್ತಾರೋ ಪಾರಿಸುದ್ಧಿಉಪೋಸಥಂ ಕರೋನ್ತಿ, ತಯೋ ವಾ ದ್ವೇ ವಾ ಪಾತಿಮೋಕ್ಖಂ ಉದ್ದಿಸನ್ತಿ, ಅಧಮ್ಮೇನ ಸಮಗ್ಗಂ। ಚತೂಸು ಏಕಸ್ಸ ಆಹರಿತ್ವಾ ತಯೋ ಪಾತಿಮೋಕ್ಖಂ ಉದ್ದಿಸನ್ತಿ, ತೀಸು ವಾ ಏಕಸ್ಸ ಆಹರಿತ್ವಾ ದ್ವೇ ಪಾರಿಸುದ್ಧಿಉಪೋಸಥಂ ಕರೋನ್ತಿ, ಧಮ್ಮೇನ ವಗ್ಗಂ। ಸಚೇ ಪನ ಚತ್ತಾರೋ ಸನ್ನಿಪತಿತ್ವಾ ಪಾತಿಮೋಕ್ಖಂ ಉದ್ದಿಸನ್ತಿ, ತಯೋ ಪಾರಿಸುದ್ಧಿಉಪೋಸಥಂ, ದ್ವೇ ಅಞ್ಞಮಞ್ಞಂ ಪಾರಿಸುದ್ಧಿಉಪೋಸಥಂ ಕರೋನ್ತಿ, ಧಮ್ಮೇನ ಸಮಗ್ಗಂ। ಪವಾರಣಕಮ್ಮೇಸುಪಿ ಪಞ್ಚಸು ಏಕಸ್ಸ ಪವಾರಣಂ ಆಹರಿತ್ವಾ ಚತ್ತಾರೋ ಗಣಞತ್ತಿಂ ಠಪೇತ್ವಾ ಪವಾರೇನ್ತಿ, ಚತೂಸು ತೀಸು ವಾ ಏಕಸ್ಸ ಆಹರಿತ್ವಾ ತಯೋ ದ್ವೇ ವಾ ಸಙ್ಘಞತ್ತಿಂ ಠಪೇತ್ವಾ ಪವಾರೇನ್ತಿ, ಅಧಮ್ಮೇನ ವಗ್ಗಂ ಪವಾರಣಕಮ್ಮನ್ತಿಆದಿ ವುತ್ತನಯಮೇವ। ಸೇಸಕಮ್ಮಂ ವಿಬಾಧತೀತಿ ಅವಸೇಸಸಙ್ಘಕಿಚ್ಚಂ ವಿಬಾಧೇತಿ ಅಲದ್ಧಾಧಿಪ್ಪಾಯತ್ತಾತಿ ಅಧಿಪ್ಪಾಯೋ।
Ettha pana catūsu ekassa chandapārisuddhiṃ āharitvā tayo pārisuddhiuposathaṃ karonti, tīsu vā ekassa chandapārisuddhiṃ āharitvā dve pātimokkhaṃ uddisanti, adhammena vaggaṃ uposathakammaṃ. Cattāro pārisuddhiuposathaṃ karonti, tayo vā dve vā pātimokkhaṃ uddisanti, adhammena samaggaṃ. Catūsu ekassa āharitvā tayo pātimokkhaṃ uddisanti, tīsu vā ekassa āharitvā dve pārisuddhiuposathaṃ karonti, dhammena vaggaṃ. Sace pana cattāro sannipatitvā pātimokkhaṃ uddisanti, tayo pārisuddhiuposathaṃ, dve aññamaññaṃ pārisuddhiuposathaṃ karonti, dhammena samaggaṃ. Pavāraṇakammesupi pañcasu ekassa pavāraṇaṃ āharitvā cattāro gaṇañattiṃ ṭhapetvā pavārenti, catūsu tīsu vā ekassa āharitvā tayo dve vā saṅghañattiṃ ṭhapetvā pavārenti, adhammena vaggaṃ pavāraṇakammantiādi vuttanayameva. Sesakammaṃ vibādhatīti avasesasaṅghakiccaṃ vibādheti aladdhādhippāyattāti adhippāyo.
೪೦೩. ದ್ವಯನ್ತಿ ಉಪೋಸಥಕರಣಞ್ಚೇವ ಅವಸೇಸಕಿಚ್ಚಞ್ಚ। ಅತ್ತನೋ ನ ಸಾಧೇತೀತಿ ಸಮ್ಬನ್ಧನೀಯಂ।
403.Dvayanti uposathakaraṇañceva avasesakiccañca. Attano na sādhetīti sambandhanīyaṃ.
೪೦೪. ಹರೇಯ್ಯಾತಿ ಪುಬ್ಬೇ ವುತ್ತಂ ಸುದ್ಧಿಕಛನ್ದಂ ವಾ ಇಮಂ ವಾ ಛನ್ದಪಾರಿಸುದ್ಧಿಂ ಹರೇಯ್ಯ। ಪರಮ್ಪರಾ ನ ಹಾರಯೇತಿ ಪರಮ್ಪರಾ ನ ಆಹರೇಯ್ಯ। ಕಸ್ಮಾತಿ ಆಹ ‘‘ಪರಮ್ಪರಾಹಟಾ’’ತಿಆದಿ। ತೇನಾತಿ ಪಠಮತೋ ಗಹಿತಛನ್ದಪಾರಿಸುದ್ಧಿಕೇನ। ಪರಮ್ಪರಾಹಟಾತಿ ಯಥಾ ಬಿಳಾಲಸಙ್ಖಲಿಕಾಯ ಪಠಮಂ ವಲಯಂ ದುತಿಯಂ ಪಾಪುಣಾತಿ, ತತಿಯಂ ನ ಪಾಪುಣಾತಿ, ಏವಂ ದುತಿಯಸ್ಸ ಆಗಚ್ಛತಿ, ತತಿಯಸ್ಸ ನ ಆಗಚ್ಛತಿ। ‘‘ಪರಿಮ್ಪರಾಹಟಾ ಛನ್ದ-ಪಾರಿಸುದ್ಧಿ ನ ಗಚ್ಛತೀ’’ತಿ ವಾ ಪಾಠೋ।
404.Hareyyāti pubbe vuttaṃ suddhikachandaṃ vā imaṃ vā chandapārisuddhiṃ hareyya. Paramparā na hārayeti paramparā na āhareyya. Kasmāti āha ‘‘paramparāhaṭā’’tiādi. Tenāti paṭhamato gahitachandapārisuddhikena. Paramparāhaṭāti yathā biḷālasaṅkhalikāya paṭhamaṃ valayaṃ dutiyaṃ pāpuṇāti, tatiyaṃ na pāpuṇāti, evaṃ dutiyassa āgacchati, tatiyassa na āgacchati. ‘‘Parimparāhaṭā chanda-pārisuddhi na gacchatī’’ti vā pāṭho.
೪೦೫. ಸಬ್ಬೂಪಚಾರನ್ತಿ ‘‘ಏಕಂಸಂ ಚೀವರಂ ಕತ್ವಾ’’ ತಿಆದಿ ಸಬ್ಬಂ ಉಪಚಾರಂ।
405.Sabbūpacāranti ‘‘ekaṃsaṃ cīvaraṃ katvā’’ tiādi sabbaṃ upacāraṃ.
೪೦೬. ಸೋ ಆಗತೋ ಆರೋಚೇತ್ವಾ ಸಙ್ಘಂ ಪವಾರೇಯ್ಯಾತಿ ಯೋಜನಾ। ಅಥಾತಿ ಅನನ್ತರತ್ಥೇ। ಆಗತೋತಿ ಪವಾರಣಂ ಗಹೇತ್ವಾ ಆಗತೋ ಭಿಕ್ಖು। ಆರೋಚೇತ್ವಾತಿ ಭಿಕ್ಖುಸಙ್ಘಸ್ಸ ಆರೋಚೇತ್ವಾ। ಏವನ್ತಿ ವಕ್ಖಮಾನಕ್ಕಮೇನ।
406. So āgato ārocetvā saṅghaṃ pavāreyyāti yojanā. Athāti anantaratthe. Āgatoti pavāraṇaṃ gahetvā āgato bhikkhu. Ārocetvāti bhikkhusaṅghassa ārocetvā. Evanti vakkhamānakkamena.
೪೦೭-೮. ಗಹೇತ್ವಾ ಹಾರಕೋತಿ ಸಮ್ಬನ್ಧೋ। ನಾಹಟಾತಿ ಆಹಟಾವ ನ ಹೋತೀತಿ ಅತ್ಥೋ। ಹಾರಕೋ ಸಙ್ಘಂ ಪತ್ವಾ ತಥಾ ಹೇಯ್ಯ, ಆಹಟಾ ಹೋತೀತಿ ಯೋಜನಾ। ತಥಾ ಹೇಯ್ಯಾತಿ ವಿಬ್ಭನ್ತಾದಿಕೋ ಭವೇಯ್ಯ।
407-8. Gahetvā hārakoti sambandho. Nāhaṭāti āhaṭāva na hotīti attho. Hārako saṅghaṃ patvā tathā heyya, āhaṭā hotīti yojanā. Tathā heyyāti vibbhantādiko bhaveyya.
೪೦೯. ಸಙ್ಘಂ ಪತ್ತೋ ಪಮತ್ತೋ ವಾ ಸುತ್ತೋ ವಾ ನಾರೋಚಯೇಯ್ಯ ಅನಾಪತ್ತಿ ಚಾತಿ ಸಮ್ಬನ್ಧೋ। ಚ-ಸದ್ದೋ ಛನ್ದಪಾರಿಸುದ್ಧಿಹರಣಂ ಸಮ್ಪಿಣ್ಡೇತೀತಿ।
409. Saṅghaṃ patto pamatto vā sutto vā nārocayeyya anāpatti cāti sambandho. Ca-saddo chandapārisuddhiharaṇaṃ sampiṇḍetīti.
ಛನ್ದದಾನನಿದ್ದೇಸವಣ್ಣನಾ ನಿಟ್ಠಿತಾ।
Chandadānaniddesavaṇṇanā niṭṭhitā.
